KPL
ບົດລາຍງານ ສະບັບຫລ້າສຸດ ຂອງ ອົງການ ອະນາໄມໂລກ (ດັບເບີລຢູເອຊໂອ) ກ່ຽວກັບ ແອລກໍຮໍ ແລະ ສຸຂະພາບ ລະບຸວ່າ: ເຄື່ອງດື່ມ ແອລກໍຮໍ ເປັນສາເຫດ ຂອງ ການເສຍຊີວິດ ປະຊາກອນ ທົ່ວໂລກ ເກືອບ 20% ຕໍ່ປີ.
ຂປລ. ສຳນັກຂ່າວ ເອເອຟພີ ລາຍງານ ຈາກ ເມືອງເຈນິວາ ປະເທດ ສະວິດ ເມື່ອວັນທີ 26 ມິຖຸນາ, ບົດລາຍງານ ສະບັບຫລ້າສຸດ ຂອງ ອົງການ ອະນາໄມໂລກ (ດັບເບີລຢູເອຊໂອ) ກ່ຽວກັບ ແອລກໍຮໍ ແລະ ສຸຂະພາບ ລະບຸວ່າ: ເຄື່ອງດື່ມ ແອລກໍຮໍ ເປັນສາເຫດ ຂອງ ການເສຍຊີວິດ ປະຊາກອນ ທົ່ວໂລກ ເກືອບ 20% ຕໍ່ປີ. ໃນນັ້ນ ລວມທັງ ກໍລະນີ ການດື່ມແລ້ວຂັບ, ຄວາມາຮຸນແຮງ ແລະ ການລ່ວງລະເມີດ ເກີດຈາກ ແອລກໍຮໍ ລວມເຖິງພະຍາດ ແລະ ຄວາມຜິດປົກກະຕິອື່ນໆ.
ບົດລາຍງານ ລະບຸວ່າ ຈຳນວນ ຜູ້ເສຍຊີວິດ 2,6 ລ້ານຄົນຕໍ່ປີ ໂດຍອ້າງຕາມ ການບໍລິໂພກ ແອລກໍຮໍ ໃນປີ 2019, ຊຶ່ງເປັນ ຕົວເລກ ສະຖິຕິ ຫລ້າສຸດ ແລະ ກວມເອົາ 4,7% ຂອງ ການ ເສຍຊີວິດ ທົ່ວໂລກ ໃນປີດັ່ງກ່າວ ແລະ ເກືອບ 3 ໃນ 4 ຂອງ ກຸ່ມຜູ້ເສຍຊີວິດ ເປັນຜູ້ຊາຍ. ການໃຊ້ສານ ເສບຕິດ ສົ່ງຜົນເສຍ ຕໍ່ສຸຂະພາບ ຂອງຄົນ ຢ່າງຮຸນແຮງ ແລະ ເພີ່ມຄວາມສ່ຽງ ຕໍ່ການເປັນ ພະຍາດຊໍາເຮື້ອ, ບັນຫາ ສຸຂະພາບຈິດ ແລະ ເຮັດໃຫ້ ມີຄົນເຈັບ ເສຍຊີວິດ ຫລາຍລ້ານຄົນ ຕໍ່ປີ.
ໃນຂະນະທີ່ ດັບເບີລຢູເອຊໂອ ເຕືອນວ່າ ລະດັບ ແລະ ຄວາມຖີ່ ຂອງ ການດື່ມ ເຄື່ອງດື່ມ ແອລກໍຮໍ ມີສ່ວນກ່ຽວຂ້ອງ ກັບ ຄວາມສ່ຽງ ທີ່ ເພີ່ມຂຶ້ນ ຂອງ ບັນຫາ ສຸຂະພາບ ຕ່າງໆ ລວມເຖິງ ການພິການ ແລະ ການເສຍຊີວິດ ຊຶ່ງ ປັບປຸງ ການເຂົ້າເຖິງ ແລະ ບຳບັດ ທີ່ມີ ຄຸນນະພາບ ສຳລັບ ຄວາມຜິດປົກກະຕິ ຈາກ ການໃຊ້ ສານເສບຕິດ ຖືເປັນສິ່ງສຳຄັນ. /
KPL
