ໃນທ່າມກາງສະພາບຫຍຸ້ງຍາກຂອງເສດຖະກິດ-ການເງິນ, ອັນເນື່ອງມາຈາກບັນດາປັດໄຈພາຍນອກ ແລະ ພາຍໃນ ເຊິ່ງລັດຖະບານພວມສຸມໃສ່ແກ້ໄຂຢ່າງເອົາການເອົາງານ,​ ຮຽກຮ້ອງທົ່ວສັງຄົມເປັນເຈົ້າປະເທດຊາດ ສ້າງຄວາມເຂັ້ມແຂງດ້ວຍຕົນ ໃນດ້ານຕ່າງໆນັ້ນ ພວກສັດຕູ ແລະ ອິດທິກໍາລັງທີ່ເປັນປໍລະປັກ ກໍ່ພະຍາຍາມເຮັດທຸກສິ່ງຢ່າງ ໂດຍສະເພາະການໂຄສະນາເຜີຍແຜ່ ຂໍ້ມູນຂ່າວສານຜ່ານສື່ອອນລາຍ ບິດເບືອນຄວາມເປັນຈິງ, ສ້າງຂ່າວປອມ, ໃສ່ຮ້າຍປ້າຍສີ ຕໍ່ການພັດທະນາປະເທດເຮົາ, ຍຸແຍ່ສ້າງຄວາມແຕກແຍກຄວາມສາມັກຄີພາຍໃນຕ່າງໆນາໆ. ບັນຫານີ້ຖ້າຄົນລາວທີ່ຮັກຊາດຂາດສະຕິ ແມ່ນຈະຕົກເປັນເຫຍື່ອຂອງການໂຄສະນາ ຂອງພວກຄົນບໍ່ດີ. ພວກເຮົາຕ້ອງເຂົ້າໃຈນໍາກັນວ່າ ພວກອິດທິກໍາລັງທີ່ເປັນປໍລະປັກ ຍາມໃດກໍ່ບໍ່ລົດລະທາດແທ້ ຂອງ ພວກເຂົາ, ບໍ່ມີຈະມາຍ້ອງຍໍຊົມເຊີຍ ຫລື ໃຫ້ການສະໜັບສະໜູນພັດທະນາ.

          ບັນຫາສື່ສັງຄົມອອນລາຍ ເປັນລາຍບຸກຄົນແມ່ນນັບມື້ຫລວງຫລາຍ, ຍ້ອນສາມາດເຂົ້າເຖິງສັນຍານອິນເຕີເນັດ ແລະ ບັນດາເຄື່ອງມືຕິດຕໍ່ສື່ສານຂໍ້ມູນຂ່າວສານມີລາຄາຖືກລົງເມື່ອສົມທຽບໃສ່ຫລາຍສິບປີຜ່ານມານີ້, ໂດຍສະເພາະໂທລະສັບທັນສະໄໝ ມີຫລາຍຍີ່ຫໍ້ ລາຄາແຕກຕ່າງກັນ, ຄ່າອິນເຕີເນັດກໍ່ສາມາດເຂົ້າເຖິງໄດ້ ຖືວ່າລາຄາບໍ່ແພງເກີນຄວາມສາມາດ ກໍ່ຄືຖົງເງິນຂອງແຕ່ລະ ຄົນ. ເມື່ອທຸກຄົນສາມາດເຂົ້າເຖິງການບໍລິການອິນເຕີເນັດ ໄດ້ສະດວກສະບາຍ, ສາມາດເປັນເຈົ້າຂອງບັນຊີເພຈ ກໍ່ຄືແອັບພລີເຄເຊິນຕ່າງໆໄດ້ ກໍ່ສົມມຸດຕົນເອງເປັນສໍານັກຂ່າວ, ຢາກເຜີຍແຜ່ຫຍັງກໍ່ຕາມໃຈຕົນເອງ ໂດຍລືມລະບຽບກົດໝາຍ, ປະຕິບັດເປັນໃຫຍ່ເໜືອລະບຽບການ...ບັນຫານີ້ພວກກຸ່ມຄົນບໍ່ດີ ແລະ ອິດທິກໍາລັງທີ່ເປັນປໍລະປັກ ຕໍ່ລະບອບຂອງພວກເຮົາ ສຸມທຸກວິທີໃຊ້ສື່ ອອນລາຍບິດເບືອນຂໍ້ມູນຄວາມເປັນຈິງ, ໃສ່ຮ້າຍປ້າຍສີລາວເຮົາຕ່າງໆນາໆ ໂດຍອາໄສເວລາທີ່ປະເທດເຮົາ ພວມມີຄວາມຫຍຸ້ງຍາກທາງດ້ານເສດຖະກິດ-ການເງິນ, ສະພາບເງິນ-ອັດຕາແລກປ່ຽນເງິນຕາຕ່າງປະເທດ, ລາຄາສິນຄ້າ...ໂຄສະນາວ່າການບໍລິຫານຈະຫລົ້ມຈົມຫລົ້ມເຫລວ, ຈະກາຍເປັນປະເທດອື່ນ...ຕ່າງໆນາໆ ເຊິ່ງບັນດາຂໍ້ມູນຂ່າວສານທີ່ບິດເບືອນນີ້ ມີເປັນຄືດັ່ງໃບປິວໆ ໄປໃນ ສື່ອອນລາຍ ຖ້າພວກເຮົາຄົນລາວທີ່ຮັກຊາດ ຮັກບ້ານເກີດເມືອງນອນ ຂາດສະຕິພິຈາລະນາ, ອາດຈະຕົກໃນເລ່ກົນ ແລ້ວມີຄໍາເຫັນອັນເປັນລົບ, ກົດໄລ ກົດແຊ ໄປ, ນັ້ນຖືເປັນການຕົກເປັນເຄື່ອງມືຂອງຄົນບໍ່ດີ, ທັງທີ່ສະພາບຕົວຈິງບໍ່ໄດ້ເປັນເຖິງຂັ້ນນັ້ນ, ລັດພວມສຸມທຸກຄວາມພະຍາຍາມໃນການແກ້ໄຂບັນດາຂໍ້ຫຍຸ້ງຍາກ, ແກ້ມາໄດ້ຫລາຍປີແລ້ວ, ບໍ່ແມ່ນລັດເຮົາຫາ ກໍ່ເຫັນບັນຫາມື້ນີ້ມື້ ວານ, ກ່ອນນີ້ຫລາຍປີ ໄດ້ສຸມໃສ່ປະຕິບັດແນວທາງປ່ຽນແປງໃໝ່ ຮອບດ້ານຢ່າງມີຫລັກການຂອງພັກ, ນະໂຍບາຍສີ່ບຸກທະລຸ... ຜັນຂະຫຍາຍເຂົ້າສູ່ທຸກວຽກງານຢ່າງໄດ້ຮັບໝາກຜົນ, ໂດຍສະເພາະແມ່ນການແກ້ຄວາມຫຍຸ້ງຍາກ ທາງເສດຖະກິດ-ການເງິນ, ແຕ່ສະພາບລະບາດຂອງໂຄວິດ-19 ໄລຍະສາມປີກວ່າ ໄດ້ເຮັດໃຫ້ສະພາບຍິ່ງຫຍຸ້ງຍາກ ຍ້ອນຄວາມບອບບາງທາງເສດຖະກິດ ແລະ ມີປັດໄຈພາຍນອກອື່ນກະທົບ ໂດຍບໍ່ສາມາດຫລີກເວັ້ນໄດ້ ເປັນຕົ້ນ ລາຄານໍ້າມັນເຊື້ອໄຟ ທີ່ຕ້ອງນໍາເຂົ້າ ເພື່ອມາຮັບໃຊ້ໃຫ້ແກ່ການພັດທະນາ. ການກໍານົດສອງວາລະແຫ່ງຊາດ ກ່ຽວກັບການແກ້ໄຂບັນຫາຫຍຸ້ງຍາກ ດ້ານເສດຖະກິດ-ການເງິນ ແລະ ບັນຫາຢາເສບຕິດ ນັບແຕ່ປີ 2021 ເປັນຕົ້ນມາ ກໍ່ສະທ້ອນໃຫ້ເຫັນແຈ້ງ ແນວທາງນະໂຍບາຍຂອງພັກ-ລັດ ເຮົາໃນການເອົາໃຈໃສ່ຢ່າງບໍ່ ລົດລະ ເພື່ອແກ້ໄຂບັນຫາ, ຈະໃຫ້ໄດ້ມື້ໜຶ່ງຍາມດຽວແມ່ນເປັນບໍ່ໄດ້ ໃນສະພາບຈຸດພິເສດ ແລະ ເງື່ອນໄຂຕົວຈິງຂອງພວກເຮົາ, ຕ້ອງອາໄສທຸກກໍາລັງແຮງທົ່ວສັງຄົມ ແລະ ເວລາພໍສົມຄວນ ຈຶ່ງຈະສາມາດແກ້ໄຂຕາມຈຸດປະສົງ - ເປົ້າໝາຍໄດ້.

          ບັນຫານໍາມາແລກປ່ຽນແມ່ນຂໍໃຫ້ພວກເຮົາເປັນຈິດໜຶ່ງໃຈດຽວຢູ່ອ້ອມຂ້າງພັກ-ລັດ ໃນການເປັນເຈົ້າການປະກອບສ່ວນແກ້ໄຂບັນດາບັນຫາຫຍຸ້ງຍາກ ໃຫ້ຜ່ານໄປດ້ວຍດີ, ມີແຕ່ສາມັກຄີເປັນຈິດໜຶ່ງໃຈດຽວເທົ່ານັ້ນ ຈຶ່ງຈະມີໄຊຊະນະໄດ້ໃນບັ້ນຮົບຕ່າງໆ ທັງການຕໍ່ສູ້ກັບຄວາມທຸກຍາກ, ປະກົດການຫຍໍ້ທໍ້ໃນສັງຄົມ, ສູ້ກັບພວກສັດຕູ-ຝ່າຍກົງກັນຂ້າມ...ເວົ້າສະເພາະກັບພວກສັດຕູ ແລະ ອິດທິກໍາລັງທີ່ເປັນປໍລະປັກ ພວກເຮົາຕ້ອງເຂົ້າໃຈວ່າທາດແທ້ ຂອງພວກເຂົາຍາມໃດກໍ່ບໍ່ປ່ຽນແປງຢູ່ແລ້ວ, ສໍາຄັນຂໍແຕ່ພວກເຮົາສາມັກຄີກັນໃຫ້ແໜ້ນ ເຊື່ອໝັ້ນຕໍ່ການນໍາພາຂອງພັກ-ລັດ, ພວກມັນຈະໂຄສະນາທັບຖົມແນວໃດ, ບິດເບືອນແນວໃດ ເມື່ອຫລັກໝັ້ນເຮົາບໍ່ຄອນແຄນ, ພວກມັນກໍ່ແບ່ງແຍກພວກເຮົາບໍ່ໄດ້, ພວກເຮົາຕ້ອງມີຄວາມເຊື່ອໝັ້ນເຊິ່ງກັນ ແລະ ກັນ, ມີສະຕິ ແລະ ບໍ່ຫລົງເຊື່ອການຍຸແຍ່ຕ່າງໆນາໆ. ຄືກໍລະນີທີ່ທະນາຄານແຫ່ງ ສປປ ລາວ ໄດ້ອອກໜັງສືແຈ້ງການເຖິງທົ່ວສັງຄົມ ໃຫ້ມີສະຕິລະວັງຕົວຕໍ່ການຮັບຂໍ້ມູນຂ່າວສານ ທີ່ບໍ່ມີມູນຄວາມຈິງຕາມສື່ອອນລາຍ ທີ່ເຄື່ອນໄຫວປ່ອຍຂ່າວ ວ່າ “ຜູ້ໃດຫາກມີບັນຊີເງິນຝາກ ທີ່ເປັນເງິນຕາຕ່າງປະເທດ ຫລື ການເງິນມາຈາກຕ່າງປະເທດ ເພື່ອເຂົ້າບັນຊີຂອງຕົນທີ່ຝາກໄວ້ ນໍາທະນາຄານທຸລະກິດຢູ່ລາວ ຈະບໍ່ສາ ມາດຖອນເງິນດັ່ງກ່າວເປັນສະກຸນເງິນຕາຕ່າງປະເທດ ເລີ່ມແຕ່ເດືອນກັນຍາ 2023 ເປັນຕົ້ນໄປ” ຂໍ້ມູນໃນສື່ອອນລາຍດັ່ງກ່າວນັ້ນບໍ່ແມ່ນຄວາມຈິງແຕ່ປະການໃດ ເຊິ່ງອີງໃສ່ນິຕິກໍາການຄຸ້ມຄອງເງິນຕາຕ່າງປະເທດ ແລະ ລະບຽບການທີ່ກ່ຽວຂ້ອງແມ່ນ ບຸກຄົນ, ນິຕິບຸກຄົນ, ການຈັດຕັ້ງພາຍໃນ ແລະ ຕ່າງປະເທດ ທີ່ມີບັນຊີເງິນຝາກເປັນເງິນຕາຕ່າງປະເທດ ທີ່ຝາກໄວ້ນໍາທະນາຄານທຸລະກິດຢູ່ ສປປ ລາວ ແມ່ນສາມາດຮັບດອກເບ້ຍ ແລະ ຖອນເປັນເງິນຕາຕ່າງປະເທດໄດ້ຕາມລະບຽບການ.

          ສະຫລຸບວ່າ ສໍາຄັນແມ່ນສະຕິ ການຈໍາແນກມິດ-ສັດຕູ ຕ້ອງໃຫ້ຈະແຈ້ງແທ້ ຈຶ່ງບໍ່ຕົກເປັນເຄື່ອງມື ຫລື ເລ່ກົນຂອງພວກເຂົາ, ບໍ່ມີຈັກເທື່ອທີ່ສັດຕູ ແລະ ພວກຄົນບໍ່ດີທີ່ປໍລະປັກ ຈະເຂົ້າຂ້າງ-ເປັນໃຈເຮົາ ຫລື ມາຊ່ວຍເຮົາພັດທະນາ. 

* ຄ້ອງໃໝ່

KPL