ຕາມຂ່າວຊິນຮວາ ສປຈີນ, ງານ​ວາງສະ​ແດງ​ອຸປະກອນ​ກໍ່ສ້າງ​ສາກົນ​ ຊາງຊາ ​ຄັ້ງ​ທີ IV (CICEE) ໄດ້ຈັດຂຶ້ນ ​ຢູ່​ເມືອງ​ຊາງຊາ, ​ແຂວງ​ຫູ​ໜານ​ ທາງ​ພາກ​ກາງ​ຂອງ​ສປຈີນ ເປັນເວລາ 4 ວັນ ໄດ້​ອັດ​ລົງ​ ໃນ​ວັນ​ທີ 18 ພຶດສະພາ​ນີ້​ . ງານ​ວາງສະ​ແດງ​ຄັ້ງ​ນີ້​ ສາມາດ ດຶງ​ດູດ​ຜູ້​ແທນ​ ເຂົ້າຮ່ວມ ປະມານ 350.000 ຄົນ ​ທີ່​ມາ​ຈາກ 110 ປະ​ເທດ ​ແລະ ​ເຂດ​ແຄວ້ນ, ​ໂດຍສະເພາະ ຈຳນວນ​ຜູ້​ຊື້​ຈາກ​ຕ່າງປະ​ເທດ ​ໄດ້​ເພີ່ມ​ຂຶ້ນ​ຫລາຍ. ໃນງານ​ວາງສະ​ແດງ ຍັງ​ໄດ້​ເຊື້ອ​ເຊີນ​ ຄະນະ​ຜູ້​ຊື້​ ຈາກ​ປະ​ເທດ​ຄູ່​ຮ່ວມ RCEP ​ແລະ ​ໄດ້​ຈັດ​ກິດຈະກໍາ ການ​ຈັບ​ຄູ່​ທຸລະ​ກິດ​ສາກົນ ພາຍໃຕ້ຫົວ​ຂໍ້ພິເສດ 6 ຄັ້ງອີກດ້ວຍ.

ໃນນັ້ນ ລວມມີ ທັງຜູ້ນຳດ້ານອຸດສາຫະກຳ ລະດັບໂລກ ເຊັ່ນ: Caterpillar ແລະ Hitachi Construction Machinery, ຕະຫລອດຮອດເຄື່ອງຈັກກໍ່ສ້າງ ຂະໜາດໃຫຍ່ຂອງຈີນ ເປັນຕົ້ນ Sany ແລະ Zoomlion. ນອກຈາກນັ້ນ, ບັນດາຜູ້​ຊື້ ຈາກ​ຕ່າງປະ​ເທດ​ ໄດ້​ລົງ​ນາມສັນຍາ​ເບື້ອງຕົ້ນ ກັບ ​ຮ້ານ​ວາງສະ​ແດງສິນຄ້າຫລາຍກວ່າ 600 ຄົນ ​ແລະ ວິ​ສາ​ຫະກິດ ຜູ້ປະກອບການ ​ເຄື່ອງ​ກໍ່ສ້າງ​ ຢູ່​ເມືອງ​ຊາງ​ຊາ 6 ​ວິສາຫະກິດ ດ້ວຍ​ໃບ​ສັ່ງ​ຊື້​ ທີ່​ມີ​ມູນ​ຄ່າຫລາຍກວ່າ 13 ຕື້​​ຢວນ (ປະມານ 1,81 ຕື້​ໂດ​ລາ​ສະຫະລັດ).

ຄຽງຄູ່ກັນນັ້ນ ຍັງມີ ການ​ລົງ​ນາມ ​ເຊັນສັນຍາ​ ກ່ຽວ​ກັບ​ມາດຕະຖານ​ ເຄື່ອງ​ຈັກ​ກໍ່ສ້າງ​ ລະຫວ່າງ​ ສະ​ຖາ​ບັນ​ຄົ້ນຄວ້າ​-ວິໄຈ ມາດຕະຖານ ແລະ ອຸດສາຫະກໍາ ຂອງ​ ມາ​ເລ​ເຊຍ (SIRIM)  ກັບ ​ສູນ​ທົດ​ລອງ​ກົນ​ຈັກ​ກໍ່ສ້າງ​ຈີນ, ​ເຊິ່ງ​ໄດ້​ວາງ​ພື້ນຖານ​ສະພາບແວດລ້ອມ ການຄ້າ ທີ່ໄດ້ມາດ​ຕະຖານ ແລະ ມີ​ຄຸນນະພາບສູງ ລະຫວ່າງ ສອງຝ່າຍ.

ທ່ານ Tsunetaka Mori, ຜູ້ຕາງໜ້າຂອງບໍລິສັດ Hitachi Construction Machinery ເປັນບໍລິສັດໃຫຍ່ຂອງ ຍິ່ປຸ່ນ ຢູ່ໃນຈີນ ໄດ້ຕິລຄາສຸງ ກ່ຽວກັບບົດບາດຂອງເມືອງຊາງຊາ ໃນຖານເປັນສູນກາງການຜະລິດເຄື່ອງຈັກ ຂອງຈີນ ແລະ ອິດທິພົນຂອງ CICEE ທົ່ວໂລກ ໄດ້ເພີ່ມຂຶ້ນ, ທ່ານກ່າວວ່າ: ໃນຂະນະທີ່ ຕະຫລາດໂລກ ມີຄວາມຕ້ອງການເຄື່ອງຈັກກໍ່ສ້າງ ອັດສະລິຍະແບບໃຊ້ໄຟຟ້າ ແລະ ອື່ນໆ./.

KPL