ຂປລ. ທະນາຄານພັດທະນາອາຊີ (ADB) ຮ່ວມກັບ ກະຊວງການເງິນ ຈັດກອງປະຊຸມປຶກສາຫາລື ກ່ຽວກັບການຂະຫຍາຍການສະໜອງທຶນ ເພື່ອການເຕີບໂຕທີ່ທົນທານ ຕໍ່ການປ່ຽນແປງດິນຟ້າອາ ກາດໃນ ສປປ ລາວ ໃນວັນທີ 3 ເມສາ 2025 ຢູ່ແຂວງຫລວງພະບາງ ໂດຍມີພາກສ່ວນ​ກ່ຽວຂ້ອງຂອງລັດຖະບານ, ຄູ່ຮ່ວມພັດທະນາ ແລະ ຊ່ຽວຊານຈາກຂະແໜງການຕ່າງໆ ເຂົ້າຮ່ວມ.

ທ່ານ ສຸລິວັດ ສຸວັນນະຈູມຄໍາ ຮອງລັດຖະມົນຕີກະຊວງການເງິນ ໄດ້ໃຫ້ຮູ້ວ່າ: ການປຶກສາຫາລືກ່ຽວກັບຄວາມບອບບາງ ແລະ ສິ່ງທ້າທາຍໃນການຮັບມືກັບ ໄພພິບັດທຳມະຊາດ ແລະ ການຂະຫຍາຍຂອບເຂດ ການແກ້ບັນຫາທາງການເງິນ ຈະຊ່ວຍໃຫ້ສາມາດກຳນົດຍຸດທະສາດຂອງ ລັດຖະບານ ໂດຍສະເພາະແມ່ນ ກະຊວງການເງິນ ໄດ້ໂດຍກົງ ໃນຂະນະທີ່ພວກເຮົາກຳລັງປັບປຸງ​ ແຜນການ​ລົງທຶນ​ຂອງ​ປະ​ເທດ​ ໃຫ້​ສອດຄ່ອງ​ກັບ​ສະພາບ​ອາກາດການປ່ຽນແປງດິນຟ້າອາກາດ ​ແລະ ລໍາດັບຄວາມສຳຄັນຂອງ​ການ​ພັດທະນາປະເທດ.

ໂອກາດນີ້, ທ່ານ ພູວົງ ຫລວງໄຊຊະນະ ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ກ່າວວ່າ: ກອງປະຊຸມປຶກສາຫາລືໃນຄັ້ງນີ້, ລະບຸເຖິງໄພພິບັດສຳຄັນທີ່ເກີດຈາກ ສະພາບດິນຟ້າອາກາດ ທີ່ສົ່ງຜົນກະທົບຢ່າງຮ້າຍແຮງຕໍ່ ສປປ ລາວ, ພ້ອມທັງເນັ້ນໜັກເຖິງ ຄວາມສຳຄັນ ຂອງການເພີ່ມທະວີການຮ່ວມມື ໃນລະດັບພາກພື້ນ ແລະ ສາກົນ ເພື່ອເຂົ້າເຖິງແຫລ່ງທຶນ ໂດຍ ແນໃສ່​ສົ່ງເສີມຄວາມທົນທານ ຄວາມອາດສາມາດປັບຕົວຕໍ່​ກັບ​ສະພາບການ​ປ່ຽນ​ແປງດິນ​ຟ້າ​ອາກາດ, ພ້ອມ​ທັງການ​ປະສານສົມທົບກັນ​ພິຈາລະນາ ເຖິງສະພາບ​ຂອງ​ດິນ​ຟ້າ​ອາກາດ ເຂົ້າ​ໃນ​ການ​ວາງ​ແຜນ​ລະດັບຊາດ. ບັນດາໜ່ວຍງານລັດຖະບານ ທັງຂັ້ນສູນກາງ ແລະ ຂັ້ນແຂວງ ໄດ້ປຶກສາຫາລືກັນກ່ຽວກັບຄວາມບອບບາງ ແລະ ສິ່ງທ້າທາຍຂອງ ສປປ ລາວ ໃນການຮັບມືກັບໄພນໍ້າຖ້ວມ ແລະ ໄພແຫ້ງແລ້ງທີ່ເກີດຂຶ້ນເລື້ອຍໆ ແລະ ຮຸນແຮງຂຶ້ນ ຊຶ່ງສົ່ງຜົນກະທົບຕໍ່ ຫລາຍຂະແໜງການ ລວມທັງຂະແໜງການເງິນ, ໂຍທາ, ສິ່ງແວດລ້ອມ, ກະສິກຳ, ການຄ້າ ແລະ ອຸດສາຫະກຳ, ສາທາລະນະສຸກ, ການທ່ອງທ່ຽວ ແລະ ການພັດທະນາຕົວເມືອງ.

ທ່ານນາງ ແຊນນີ ແຄັມເບລ ຫົວໜ້າຫ້ອງການ ADB ປະຈໍາ ສປປ ລາວ ໄດ້ໃຫ້ຮູ້ວ່າ: ADB ປະສົມປະສານການສະໜອງທຶນ ກັບຄວາມຊ່ຽວຊານ ທາງດ້ານເຕັກນິກວິຊາການຢ່າງເລິກເຊິ່ງ ເພື່ອຊ່ວຍ ສປປ ລາວ ຜັນຂະຫຍາຍບັນດາເປົ້າໝາຍ ດ້ານຄວາມທົນທານຕໍ່ສະພາບການ ປ່ຽນແປງດິນຟ້າອາກາດ ຂອງຕົນໃຫ້ເປັນໂຄງການທີ່ດຶງດູດ ການລົງທຶນທີ່ຍືນຍົງຈາກຕະຫລາດທຶນ, ກອງປະຊຸມປຶກສາຫາລືຄັ້ງນີ້, ຖືເປັນບາດກ້າວສໍາຄັນ ໃນການວາງແນວທາງການລົງທຶນຂອງລັດຖະບານ ໃຫ້ສອດຄ່ອງກັບເປົ້າໝາຍ ດ້ານຄວາມທົນທານ ຕໍ່ສະພາບດິນຟ້າອາກາດ,  ຜູ້ຊ່ຽວຊານຈາກ ADB ແລະ ລັດຖະບານ ຍັງໄດ້ຮ່ວມກັນລະດົມຄວາມຄິດວ່າ ບັນດາຂະແໜງການຂອງເສດຖະກິດ ທີ່ແຕກຕ່າງກັນສາມາດລົງທຶນ ໃນມາດຕະການສ້າງຄວາມທົນທານໄດ້ແນວໃດ ​ເຊິ່ງເຂົາເຈົ້າໄດ້ກໍານົດໂອກາດ ສໍາລັບແຜນໂຄງການສະໜັບສະໜູນຂອງ ADB ເພື່ອເພີ່ມທະວີຄວາມທົນທານ ແລະ ໄດ້ປຶກສາຫາລືເຖິງວິທີການ ເຂົ້າເຖິງແຫລ່ງທຶນ, ພ້ອມທັງການຊ່ວຍເຫລືອ ທາງດ້ານວິຊາການສໍາລັບໂຄງການເຫລົ່ານີ້. ADB ຈະສືບຕໍ່ສະໜັບສະໜູນກະຊວງການເງິນ ແລະ ບັນດາກະຊວງອື່ນໆ ໃນການພັດທະນາໂຄງການລົງທຶນ  ໃໝ່ ທີ່ຈະຊຸກຍູ້ການເຕີບໂຕ ທີ່ທົນທານຕໍ່ການປ່ຽນແປງ ດິນຟ້າອາກາດ ໂດຍການປຶກສາຫາລືຢ່າງໃກ້ຊິດ ກັບກັບບັນດາຄູ່ຮ່ວມພັດທະນາຕ່າງໆ.

KPL