*ເມື່ອເວົ້າເຖິງແຫລ່ງທ່ອງ​ທ່ຽວ​ ບໍ່ວ່າຈະເປັນແຫລ່ງທ່ອງ​ທ່ຽວທາງທໍາມະຊາດ,​ ປະຫວັດ​ສາດ,​ ວັດທະນະທຳແລ້ວ​ຢູ່ປະເທດເຮົາແມ່ນບໍ່ໜ້ອຍໜ້າປະເທດອື່ນ​​ ເພາະຢູ່ເມືອງລາວມີສະຖານທ່ີທ່ອງທ່ຽວທ່ົວທຸກແຂວງທີ່ສວຍສົດງົດງາມ​ສາມາດສ້າງຄວາມປະທັບ ໃຈໃຫ້ນັກທ່ອງທ່ຽວທາງພາຍໃນ​ ແລະ​ ຕ່າງປະເທດ​ ເຖິງແນວໃດ​ກໍດີ​ ມື້ນີ້ຜູ້ຂຽນໄດ້ນໍາບາງແຫລ່ງທ່ອງທ່ຽວທີ່ໜ້າຄົ້ນຫາມານຳສະ​ເໜີໂດຍສະເພາະ​ຖ້ຳກອງລໍ​ ສະ​ຖານທີ່ທ່ອງທ່ຽວຊື່ດັງຂອງແຂວງ ຄຳມ່ວນ​ ຕັ້ງຢູ່ລະຫວ່າງເຂດບ້ານກອງລໍ-ນາຕານ​ ຫ່າງຈາກເທສະບານ​ເມືອງຄູນຄຳ​ແຂວງຄຳມ່ວນ ປະມານ ​46​ ກິໂລແມັດ.

    ຖ້ຳກອງລໍ​ ມີຄວາມງົດງາມຫລາຍ​ເປັນຖ້ຳທີ່ມີສາຍນໍ້າຫີນບູນ​ ໄຫລຜ່ານອຸມົງຂອງພູຫີນປູນ,​ ພາຍໃນຖ້ຳມີແກ້ງ,​ ມີຫີນຍ້ອຍ,​ ຫິນງອກ​ແລະ​ຫາດຊາຍ​ຈໍານວນ ​20 ​ກວ່າຈຸດ,​ ສາມາດຂີ່ເຮືອຂຶ້ນລ່ອງເຂົ້າໄປໃນຖ້ຳ.​ ລະດູແລ້ງ​ເປັນໄລຍະທີ່​ເໝາະສົມຫລາຍ​ໃນການເຂົ້າໄປ​ທ່ຽວຊົມສີສັນຂອງຖ້ຳແຫ່ງນີ້​ເພາະ​ລະດັບນໍ້າຫລຸດລົງ, ​ເມື່ອຂີ່ເຮືອເຂົ້າໄປກໍ່ສາມາດລົງຍ່າງເລາະຫລີ້ນຕາມຫາດຊາຍຂາວ​ເພື່ອສໍາຜັດກັບອາກາດເຢັນສະບາຍພາຍໃນຖ້ຳ.​

    ສຳລັບການປະຈົນໄພໃນຖ້ຳກອງລໍ​ ນັກທ່ອງທ່ຽວສາມາດສຳຫລວດຖ້ຳໄດ້ດ້ວຍການລ່ອງເຮືອຫາງຍາວ​ ໂດຍຈະມີຊາວບ້ານໃນເຂດດັ່ງກ່າວພາເຂົ້າໄປໃນຖ້ຳ​ ດ້ວຍໄຟສາຍຄົນລະອັນເພື່ອໃຊ້ໃນການສ່ອງເບິ່ງຖ້ຳ​ ແລະ ​ເສັ້ນທາງໃນຂະນະທີ່ລ່ອງເຮືອ, ​ພາຍໃນຖ້ຳຈະມີຫ້ອງໂຖງໃຫຍ່​ ເມື່ອເຂົ້າໄປແລ້ວນັກທ່ອງທ່ຽວຈະໄດ້ສຳຜັດກັບຫີນຍ້ອຍ,​ ຫີນງອກ,​ ຫີນປູນເຫລົ່ານ້ີ້ເປັນຕົ້ນ​ ເຊິ່ງຫີນຍ້ອຍດັ່ງ​ກ່າວເມື່ອກະທົບໃສ່ແສງໄຟແລ້ວຈະມີແສງລະຍິບລະຍັບຢ່າງງົດ​ງາມເຊິ່ງເຮັດໃຫ້ນັກທ່ອງທ່ຽວ ທຸກຄົນທີ່ໄດ້ເຫັນຮູ້ສຶກປະທັບໃຈກັບຄວາມສວຍງາມຂອງຖ້ຳນັ້ນ,​ ເມື່ອໄປຮອດບໍລິເວນປາຍຖ້ຳ​ທ່ານຈະໄດ້ເຫັນແສງແດດທີ່ຄ່ອຍໆສາດສ່ອງເຂົ້າມາໃນຖ້ຳ.​ ນອກຈາກນັ້ນ,​ ນັກທ່ອງທ່ຽວຍັງຈະໄດ້ໄປຢ້ຽມ​ຢາມໝູ່ບ້ານນ້ອຍໆຊື່ວ່າ:​ ບ້ານ​ນາຕານ​ ເຊິ່ງຈະມີຮ້ານຄ້າທີ່ທ່ານສາມາດຊື້ອາຫານຫວ່າງ​ ແລະ​ ເຄື່ອງຫັດຖະກຳຕ່າງໆໄດ້​ ແລະ ​ຍັງມີລົດຖີບໃຫ້ນັກທ່ອງທ່ຽວໄດ້ເຊົ່າ​ ແລະ ​ຂີ່ສຳຫລວດພູເຂົາຕື່ມອີກ.

   ຄໍາວ່າ​ ກອງລໍ​ ມີຄວາມໝາຍມາຈາກ​“ກອງທັບລໍຖ້າໃນສະໄໝ ທີ່ກອງທັບຂອງອານາຈັກລ້ານຊ້າງ​ ພວມສະກັດລັດຕີຕ້ານການເຂົ້າມາຮຸກຮານຂອງກອງທັບສັກ​ດີນາສະຫຍາມ.​ ຖ້ຳດັ່ງກ່າວມີຄວາມຍາວປະມານ​7,5 ​ກິໂລແມັດ​ ກວ້າງ​ 30​ ແມັດ​ ແລະ​ ສູງແຕ່ 20-100 ​ແມັດ, ​ເລີ່ມເປີດໃຫ້ເຂົ້າ​ທ່ຽວຊົມຢ່າງເປັນທາງການໃນປີ​2002​ເປັນຕົ້ນມາ ​ແລະ ​ໄດ້ມີ​ການພັດທະນາຢ່າງຕໍ່ເນື່ອງໂດຍ​ການສະໜັບສະໜູນຈາກຫລາຍພາກສ່ວນເປັນຕົ້ນອົງການຈັດຕັ້ງພາກລັດ,​ ອົງການຈັດຕັ້ງສາກົນ​ເຮັດໃຫ້ການພັດທະນາແຫລ່ງທ່ອງ​ ທ່ຽວດັ່ງກ່າວໄດ້ຮັບການປັບປຸງດີຂຶ້ນເລື້ອຍໆ​ໂດຍສະເພາະແມ່ນດ້ານການບໍລິການ,​ ດ້ານການຮັກສາສິ່ງແວດລ້ອມລວມເຖິງບັນດາກິດຈະກຳຕ່າງໆກໍໄດ້ເນັ້ນໃສ່ການມີສ່ວນຮ່ວມຂອງປະຊາຊົນ ​ແລະ ​ໄດ້ຖືກຮັບຮອງເປັນບ້ານມາດຕະຖານການທ່ອງທ່ຽວແບບປະຊົາຊົນມີສ່ວນຮ່ວມອາຊຽນ​ໃນປີ​2017.

ໂດຍ:​ແສງສະຫວັນ

KPL