*ປີໃໝ່ສາກົນເລີ່ມຕົ້ນມາໄດ້ 9 ມື້ ຖືວ່າຍັງອຸ່ນໆກໍ່ວ່າໄດ້, ໄລຍະນີ້ອຸນຫະພູມອາກາດອ່າວເຢັນແດ່, ການຮັກສາສຸຂະພາບຮ່າງກາຍໃຫ້ອົບອຸ່ນບໍ່ສ່ຽງຕໍ່ການເປັນຫວັດເປັນໄອໄຂ້ປ່ວຍແມ່ນສໍາຄັນ. ມາພ້ອມໄລຍະອາກາດເຢັນລະດູແລ້ງຜັກ ນາງອາງຫຍ້າເຫັນວ່າອຸດົມສົມບູນຂຶ້ນ, ລາຄາພໍຟັງວ່າຊັ້ນ ເພາະເປັນໄລຍະເວລາການປູກພືດລະດູແລ້ງ ເຊິ່ງແຕ່ໃດມາພໍເຖິງຍາມນີ້ການປູກຜັກຊະນິດຕ່າງໆແມ່ນເປັນຂະບວນຄຶກຄື້ນທີ່ສຸດໃນຫລາຍເຂດທົ່ວປະເທດ. ການປູກ-ການລ້ຽງປະຕິບັດຢ່າງແຂງແຮງຕາມທິດ ສອຈ ສ້າງເສດຖະກິດເອກະລາດເປັນເຈົ້າຕົນເອງ.

     ປີ 2024 ຜ່ານມາ ສະເພາະຢູ່ນະຄອນຫລວງວຽງຈັນ ຂໍ້ມູນຈາກພະແນກອຸດສາຫະກໍາ ແລະ ການຄ້າໃຫ້ຮູ້ແລ້ວວ່າການຜະລິດສະບຽງອາຫານແມ່ນສາມາດຕອບສະໜອງໄດ້ໂດຍພື້ນຖານຄວາມຕ້ອງການເປັນຕົ້ນເຂົ້າ 234.400 ກວ່າໂຕນ, ຜັກ 116.400 ກວ່າ ໂຕນ,  ຊີ້ນ-ປາ-ໄຂ່ ໄດ້ 82.000 ກວ່າໂຕນ ເວົ້າຕົວເລກມົນ. ບັນດາໝາກຜົນທີ່ໄດ້ຮັບແມ່ນມາຈາກການຜະລິດແບບກຸ່ມ-ສະຫະກອນ, ຄອບຄົວເຊິ່ງມີກຸ່ມການຜະລິດ ທັງໝົດ 143 ກຸ່ມ, ມີສະມາຊິກກວ່າ 5.200 ຄອບຄົວ, ມີເນື້ອທີ່ການປູກກວ່າ 6.000 ເຮັກຕາ ເຊິ່ງມີການຕີລາຄາວ່າໃນຈໍານວນກຸ່ມການຜະລິດນັ້ນ ມີເຖິງ 97 ກຸ່ມ ທີ່ມີຄວາມເຂັ້ມແຂງ, ປານກາງ 43 ກຸ່ມ.

    ບັນດາຜັກທີ່ປູກໄດ້ປະກອບມີຜັກກາດ, ສະຫລັດ, ຫອມລາບ, ບົວລະພາ, ຫອມເປ, ຫອມປ້ອມ, ບົ່ວໃບ, ຜັກບົ້ງ, ຜັກອີຕູ່, ເຫັດນາງ ລົມ-ຂອນຂາວ, ຖົ່ວຊັ້ງ ຫລື ຖົ່ວຟັກຍາວ, ໝາກເຂືອ-ແຕງ-ບວບ... ເຊິ່ງການສະໜອງຜັກແມ່ນຍັງບ່ໍທັນພຽງພໍໃນໄລຍະລະດູຝົນເປັນກະລໍ່າປີ, ກາລົດ, ຫົວຜັກບົ່ວ-ຜັກທຽມ...ສ່ວນຈໍານວນຜະລິດໄດ້ຊີ້ນ-ປາ-ໄຂ່ ເຫັນວ່າເຫລືອເຟືອ, ໝາຍວ່າເກີນຄວາມຕ້ອງການຈາກຜົນຜະລິດບັນດາຟາມເປັນຕົ້ນຟາມໝູຊີ້ນມີ 131 ຟາມ, ຟາມໄກ່ພັນຊີ້ນ 61 ແຫ່ງ, ໄກ່ໄຂ່ 219 ແຫ່ງ.

    ເຖິງຢ່າງໃດກໍ່ດີບັນດາທີ່ຖືກຕັ້ງຂຶ້ນປະເດັນໜຶ່ງແມ່ນການສືບຕໍ່ຂະຫຍາຍພື້ນຖານການຜະລິດປູກ- ລ້ຽງ ສະໜອງສະບຽງອາຫານໃຫ້ພຽງພໍຕະຫລອດປີ, ສ້າງຄວາມເຂັ້ມແຂງເປັນເອກະລາດກຸ້ມຕົນເອງໄດ້ ເພື່ອເປັນພື້ນຖານໃຫ້ແກ່ແຜນຍາວໄກສົ່ງອອກແຂ່ງຂັນຕະຫລາດນອກປະເທດ. ຈະເຮັດໄດ້ເຖິງຈຸດນັ້ນແນ່ນອນວ່າ ພວກເຮົາຕ້ອງຊຸກຍູ້ສົ່ງເສີມໃຫ້ມີການຜະລິດຢ່າງແຂງແຮງຢູ່ພາຍໃນ ຈາກປະລິມານໄປສູ່ຄຸນນະພາບເຮັດໃຫ້ຜົນຜະລິດທີ່ກາຍເປັນສິນຄ້າຫລາຍທາງເລືອກ ເໝາະສົມທຸກສະພາບຖົງເງິນຂອງແຕ່ລະຄອບຄົວ, ການຊຸກຍູ້ສົ່ງເສີມໃຫ້ມີຄວາມເຂັ້ມແຂງດ້ານການຜະລິດກະສິກໍາ ກ່ໍຄືບັນດາດ້ານຕ່າງກັນໄປນັ້ນກໍ່ຕ້ອງອາໄສປັດໄຈທີ່ເປັນທ່າແຮງພາຍໃນເປັນພື້ນຖານປູທາງໃຫ້ແໜ້ນ, ນະໂຍບາຍມີຖືກຕ້ອງຈະແຈ້ງ, ຂອດຊຸກຍູ້ຕ້ອງແຂງແຮງ, ພາກຜະລິດແຂງແຮງເອົາຈິງເອົາຈິງໃນການພັດທະນາປັບຕົວໃຫ້ທັນສະພາບ, ສັງຄົມສະໜັບສະໜູນແຂງແຮງ, ຄວາມເຂັ້ມແຂງທີ່ເຮົາຢາກໄດ້ກໍ່ໃກ້ມືຍື້ເຖິງ.

    ສະຫລຸບວ່າການສະໜອງສະບຽງອາຫານມາຮອດປັດຈຸບັນມີພື້ນຖານດີສົມຄວນແລ້ວ, ແນ່ນອນ ບໍ່ອາດປາສະຈາກຈຸດຂາດຕົກບົກພ່ອງທີ່ບໍ່ທັນສາມາດສະໜອງໄດ້, ແຕ່ຖ້າຫາກວ່າທຸກພາກສ່ວນທີ່ເຮັດວຽກໃນຕ່ອງໂສ້ດຽວກັນເຮັດຢ່າງຂະຫຍັນພຽນ ແລະ ສັງຄົມໃຫ້ໂອກາດສະໜັບສະໜູນຢ່າງແຂງແຮງຄວາມເປັນເອກະລາດ ດ້ານສະບຽງອາຫານກໍ່ຈະເປັນຂອງພວກເຮົາ ແລະ ກ້າວໄປເຖິງການສົ່ງອອກຕື່ມອີກ.

ໂດຍ: ຄ້ອງໃໝ່

KPL