KPL
ທາງການ ສປຈີນ ປະກາດ ມາດຕະການ ຊຸດໃໝ່ ເພື່ອສົ່ງເສີມການໃຊ້ຈ່າຍ ໃນພາກສ່ວນວັດທະນະທຳ ແລະ ການທ່ອງທ່ຽວ ເນື່ອງຈາກ ເສດຖະກິດ ຂອງ ປະເທດ ພະຍາຍາມຟື້ນຕົວ ຈາກ ການບໍລິໂພກ ທີ່ ຫລຸດລົງ.
ຂປລ. ສຳນັກຂ່າວ ເອເອຟພີ ລາຍງານຈາກ ນະຄອນຫລວງ ປັກກິ່ງ ປະເທດ ສປຈີນ, ທາງການ ສປຈີນ ປະກາດ ມາດຕະການ ຊຸດໃໝ່ ເພື່ອສົ່ງເສີມການໃຊ້ຈ່າຍ ໃນພາກສ່ວນວັດທະນະທຳ ແລະ ການທ່ອງທ່ຽວ ເນື່ອງຈາກ ເສດຖະກິດ ຂອງ ປະເທດ ພະຍາຍາມຟື້ນຕົວ ຈາກ ການບໍລິໂພກ ທີ່ ຫລຸດລົງ. ໂດຍ ວິກິດການ ໃນພາກສ່ວນ ອະສັງຫາລິມະຊັບ, ອັດຕາ ການວ່າງງານ ຂອງ ເຍົາວະຊົນ ໃນລະດັບສູງ ແລະ ຄວາມເຊື່ອໝັ້ນ ຂອງຜູ້ບໍລິໂພກຫລູດ ສົ່ງຜົນໃຫ້ ຄວາມຕ້ອງການ ຂອງ ຜູ້ບໍລິໂພກ ໃນສປຈີນ ຫລຸດລົງ.
ເຖິງແມ່ນວ່າ ລັດຖະບານ ສປຈີນ ປະກາດນະໂຍບາຍຕ່າງໆ ຕັ້ງແຕ່ເດືອນກັນຍາ ທີ່ຜ່ານມາ. ໃນນັ້ນລວມເຖິງ ການຍົກເລີກ ຂໍ້ຈຳກັດ ໃນການຊື້ອະສັງຫາລິມະຊັບ, ການຫລຸດອັດຕາ ດອກເບ້ຍ ແລະ ການໃຫ້ເງິນອຸດໜູນ ສຳລັບ ເຄື່ອງໃຊ້ໃນຄົວເຮືອນ ເພື່ອພະຍາຍາມ ກະຕຸ້ນເສດຖະກິດ, ເຖິງຢ່າງໃດກໍຕາມ ນະໂຍບາຍເບື້ອງຕົ້ນ ບໍ່ສາມາດ ສົ່ງເສີມ ກິດຈະກຳ ຜູ້ບໍລິໂພກໄດ້ ເນື່ອງຈາກ ອັດຕາເງິນເຟີ້ ຍັງຄົງຢູ່ ໃນລະດັບຕໍ່າຫລາຍ.
ສະນັ້ນ, ຄະນະ ລັດຖະມົນຕີ ສປຈີນ ຈຶ່ງໄດ້ອອກ ມາດຕະການ ຊຸດໃໝ່ ທີ່ມີເປົ້າໝາຍ ເພື່ອເສີມສ້າງ ຮູບແບບ ແລະ ສະຖານະການ ການບໍລິໂພກ ລວມເຖິງ ການປູກຝັງ ວັດທະນະທຳ ແລະ ການທ່ອງທ່ຽວ ໃຫ້ກາຍເປັນ ອຸດສາຫະກຳຂອງປະເທດ. ມາດຕະການ ດັ່ງກ່າວ ໄດ້ຮຽກຮ້ອງໃຫ້ ໜ່ວຍງານທ້ອງຖິ່ນ ສະເໜີ ບັດລາງວັນ ແລະ ສ່ວນຫລຸດ ເພື່ອສົ່ງເສີມ ການໃຊ້ຈ່າຍ ແລະ ເພີ່ມການລົງທຶນ ໃນຜະລິດຕະພັນ ທາງວັດທະນະທຳ ແລະ ການທ່ອງທ່ຽວ. /
KPL
