ຂປລ. ວັນທີ 14 ມັງກອນ 2025 ນີ້, ທ່ານ ທອງລຸນ ສີສຸລິດ ເລຂາທິການໃຫຍ່ພັກ ປປ ລາວ, ປະທານປະເທດ ພ້ອມດ້ວຍຄະນະລົງເຄື່ອນໄຫວ ວຽກງານຢູ່ເມືອງດາກຈຶງ ແຂວງເຊກອງ ໂດຍໄດ້ໄປຢ້ຽຢາມ ແລະ ພົບປະພະນັກງານ ໂຄງການໄຟຟ້າ ພະລັງງານລົມ ມອນຊຸນ 600 ເມກາວັດ (MW), ພົບປະໂອ້ລົມປະຊາຊົນ ເຂດຈຸດສຸມ ບ້ານຊຽງຫລວງ ໂດຍມີ ທ່ານ ເຫລັກໄຫລ ສີວິໄລ ເຈົ້າແຂວງເຊກອງ ພ້ອມດ້ວຍການນໍາແຂວງ ແລະ ເມືອງ ເຂົ້າຮ່ວມຕິດຕາມ.

ໂອກາດນີ້,  ທ່ານປະທານປະເທດ ພ້ອມຄະນະ ໄດ້ຮັບຟັງການລາຍງານສະພາບ ການຈັດຕັ້ງປະຕິບັດໂຄງ ການ ຈາກຄະນະຮັບຜິດຊອບ ໂຄງການໄຟຟ້າພະລັງງານລົມມອນຊຸນ ເຊິ່ງໂຄງການດັ່ງກ່າວ ຕັ້ງຢູ່ເມືອງດາກຈຶງ ແຂວງເຊກອງ ແລະ ສ່ວນໜຶ່ງຂອງ ເມືອງ ຊານໄຊ ແຂວງອັດຕະປື ສປປ ລາວ, ເຊັນສັນຍາສໍາປະທານ ໃນວັນທີ 1 ທັນວາ 2022, ມີກໍາລັງການຜະລິດ 600 ເມກາວັດ, ມີມູນຄ່າໂຄງການ 960 ລ້ານໂດລາສະຫະລັດ ໂດຍແມ່ນ ການໄຟຟ້າ ຫວຽດນາມ (Vietnam Electricity. EVN), ສັນຍາຊື້ໄຟຟ້າ (PPA) ໄລຍະ 25 ປີ, ມີສາຍສົ່ງໄຟ ຟ້າ ທັງພັດ 71 ກິໂລແມັດ(27 ກິໂລແມັດ ຜູ້ເບື້ອງລາວ) ສາຍສົ່ງ 500 ກິໂລເວນ ສົ່ງໄປເຊື່ອມຕໍ່ສະຖານນີໄຟຟ້າ Thanh My, Quang Nam, ສສ ຫວຽດນາມ ໂດຍມີແຜນສົ່ງອອກໄຟຟ້າ (COD) ພາຍໃນ ປີ 2025 ໂດຍແມ່ນ ບໍລິສັດ  PowerChina ເປັນຜູ້ຮັບເໝົາກໍ່ສ້າງ ແລະ ໄດ້ເລີ່ມກໍ່ສ້າງແຕ່ເດືອນມີນາ 2023, ມາຮອດ ເດືອນມັງກອນ 2025 ສໍາເລັດການກໍ່ສ້າງ ແລະ ຕິດຕັ້ງແລ້ວກວ່າ 90% (ຕິດຕັ້ງກົງກັນລົມ 133 ຕົ້ນ),  ຄາດໝາຍ ເຊື່ອມລະບົບສາຍສົ່ງໄຟຟ້າກັບ ການໄຟຟ້າ ສສ ຫວຽດນາມ (EVN) ໃນເດືອນກຸມພາ 2025, ຈະເລີ່ມດໍາເນີນ ການສົ່ງອອກໄຟຟ້າບາງສ່ວນ 300 MW ພາຍໃນໄຕມາດ 2 ປີ 2025 ແລະ ຈະດໍາເນີນການສົ່ງອອກ ໄຟຟ້າທັງໝົດ 600 MW ພາຍໃນໄຕມາດ 3 ປີ 2025. ໃນຕໍ່ໜ້າຈະຂະຫຍາຍໄປຕື່ມ 1.000 ເມກາວັດ ຕື່ມອີກ.

 ການລົງຢ້ຽມຢາມໃນຄັ້ງນີ້, ທ່ານປະທານປະເທດ ທອງລຸນ ສີສຸລິດ ໄດ້ສະແດງຄວາມຊົມເຊີຍ ຕໍ່ບັນດາບໍ ລິສັດ ກໍຄື ຂາຫຸ້ນທີ່ ໄດ້ເອົາໃຈໃສ່ຈັດຕັ້ງປະຕິບັດ ໂຄງການບັນລຸຜົນສໍາເລັດ ຕາມແຜນທີ່ວາງໄວ້. ພ້ອມນີ້, ກໍໄດ້ຊີ້ນໍາໃຫ້ຜູ້ລົງທຶນຈົ່ງເອົາໃຈໃສ່ ທາງດ້ານເຕັກນິກ, ການຮັກສາດ້ານສິ່ງແວດລ້ອມ, ສ້າງວຽກເຮັດງານທໍາໃຫ້ແກ່ ປະຊາຊົນໃນທ້ອງຖິ່ນ, ສິ່ງສໍາຄັນແມ່ນຕ້ອງຢືດໜັ້ນ ໃນສິ່ງທີ່ຖືກຕ້ອງຕ່າງຝ່າຍຕ່າງ ມີຜົນປະໂຫຍດຮ່ວມກັນ ແລະ ຕ້ອງສົ່ງເສີມໃຫ້ປະຊາຊົນ ໃນທ້ອງຖິ່ນ ກ່ຽວກັບການປຸກ-ການລ້ຽງ ເພື່ອສະໜອງ ສະບຽງອາຫານໃຫ້ແກ່ໂຄງການເພື່ອສ້າງລາຍຮັບເພີ່ມ.

  ຫລັງຈາກນັ້ນ, ທ່ານປະທານປະເທດ ພ້ອມຄະນະ ກໍໄດ້ໄປພົບປະຢ້ຽມຢາມພໍ່ແມ່ປະຊາຊົນ ເຂດຈຸດສຸມ ບ້ານຊຽງຫລວງ ເມືອງດາກຈຶງ ໂດຍໄດ້ຮັບຟັງການລາຍງານ ຈາກ ທ່ານ ເພັງນາ ຈັນທະພອນ ເຈົ້າເມືອງດາກຈຶງ ກ່ຽວກັບສະພາບການ ພັດທະນາພາຍໃນບ້ານ ເຊິ່ງບ້ານຊຽງຫລວງ ເປັນບ້ານໜຶ່ງ ທີ່ຕັ້ງຢູ່ລະຫວ່າງກາງ ເທສະບານ ແຂວງເຊກອງ ຫາ ເທສະບານເມືອງດາກຈຶງ, ເນື້ອທີ່ສ່ວນໃຫຍ່ເປັນພູດອຍ ກວມ 95% ຂອງເນື້ອທີ່ທັງໝົດ, ປະຊາຊົນເຂດບ້ານຊຽງຫລວງ ສວນໃຫຍ່ປະກອບອາຊີບ ການເຮັດນາປູກເຂົ້າ ແລະ ລ້ຽງສັດ, ປຸກຝັງ, ອັດຕາ ສ່ວນຄວາມທຸກຍາກ ຂອງປະຊາຊົນບັນດາເຜົ່າຍັງ ກວມເອົາອັດຕາສ່ວນສູງ, ການດໍາລົງຊີວິດ ຂອງປະຊາຊົນເຂດ ຊົນນະບົດຫ່າງໄກສອກຫລີກ ຍັງຕິດພັນກັບ ທຳມະຊາດເປັນສ່ວນໃຫຍ່.

ໃນໂອກາດດຽວກັນ, ທ່ານປະທານປະເທດ ກໍໄດ້ສະຫາຍສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນສໍາເລັດ ຂອງອົງຄະນະພັກທຸກຂັ້ນທີ່ໄດ້ເອົາໃຈໃສ່ ນໍາພາ-ຊີ້ນໍາການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມພາຍໃນແຂວງ ກໍເມືອງ ອັນໄດ້ເຮັດໃຫ້ບັນດາ ພື້ນຖານໂຄງລ່າງຂອງເມືອງ ກໍຄື ກຸ່ມບ້ານໄດ້ຮັບການພັດທະນາດີຂຶ້ນເປັນກ້າວໆ. ພ້ອມນີ້, ທ່ານຍັງໄດ້ເນັ້ນໃຫ້ຄະນະ ນໍາທຸກຂັ້ນພາຍໃນເມືອງ ແລະ ກຸ່ມບ້ານ ເອົາໃຈໃສ່ຊຸກຍູ້, ແກ້ໄຂສະພາບຄວາມຫຍຸ້ງຍາກ ດ້ານເສດຖະກິດ ໃນປັດຈຸບັນ, ເອົາໃຈໃສ່ສຶກສາອົບຮົມ ການເມືອງແນວຄິດ ໃຫ້ແກ່ພະ ນັກງານ, ປະຊາຊົນບັນດາເຜົ່າ, ໃຫ້ຂະແໜງການທີ່ກ່ຽວຂອ້ງ ເອົາໃຈໃສ່ຊຸກຍູ້ສົ່ງເສີມປະຊາຊົນ ທໍາການຜະລິດໃຫ້ ຫລາຍຂຶ້ນ ເຊິ່ງກ່ອນອື່ນໜົດພວກເຮົາ ຕ້ອງເປັນເຈົ້າການໃນການສ້າງເສດຖະກິດເອກະລາດ ເປັນເຈົ້າຕົ້ນເອງ ໂດຍພະນັກງານກ່ຽວຂ້ອງ ຕ້ອງລົງໃຫ້ຄວາມຮູ້ວິຊາການ ດ້ານເຕັກການປູກ-ການລ້ຽງໃຫ້ແກ່ປະຊາຊົນໃຫ້ມີຄວາມຮູ້ສູງຂຶ້ນ, ພ້ອມທັງເອົາໃຈໃສ່ຊຸກຍູ້ ສົ່ງເສີມລູກຫລານໄດ້ເຂົ້າໂຮຽຮຽນຢ່າງທົ່ວເຖິງ ໃນເກນອາຍຸເຂົ້າຮຽນ, ເອົາໃຈໃສ່ເຂົ້າ ໃນການປ້ອງກັນສິ່ງເສບຕິດພາຍໃນກຸ່ມຢ່າງແຂງແຮງ ເພື່ອບໍ່ໃຫ້ລູກຫລານຕົກເປັນເຫຍື່ອຂອງສິ່ງເສບຕິດ. ນອກ ນັ້ນ, ກໍໃຫ້ເອົາໃຈໃສ່ໃນການໄຈ້ແຍກ ສື່ສັງຄົມອອນລາຍ ວ່າອັນໃດຖືກ ຫລື ຜິດ, ອັນໃດທີ່ເປັນສິ່ງຕໍ່ຕ້ານ, ບິດ ເບືອນຕໍ່ແນວທາງຂອງພັກ-ລັດເຮົາ ແລະ ດ້ານອື່ນໆ.

ໃນໂອກາດລົງພົບປະຢ້ຽມຢາມໃນຄັ້ງນີ້, ທ່ານປະທານປະເທດ ຍັງໄດ້ມອບທຶນສົມທົບ ຈໍານວນໜຶ່ງ ເພື່ອນໍາໃຊ້ເຂົ້າໃນ ວຽກງານການພັດທະເມືອງ ກໍຄື ກຸ່ມບ້ານຊຽງຫລວງ ຕື່ມອີກ.

ຂ່າວ-ພາບ: ສຸກສະຫວັນ ພຸນສຸກ

KPL