ຂປລ. ການຫັນມາປະກອບອາຊີບກະສິກຳ ໂດຍນຳໃຊ້ທ່າແຮງທີ່ຄອບຄົວມີ, ຈັດສັນພື້ນທີ່ຜະລິດຢ່າງເໝາະສົມ ແລະ ວາງແຜນການຜະລິດໃຫ້ສອດຄ່ອງກັບຕະຫລາດ ເປັນໜຶ່ງໃນແນວທາງສ້າງລາຍຮັບ ແລະ ຄວາມໝັ້ນຄົງໃຫ້ແກ່ຄອບຄົວ. ເໝືອນດັ່ງ ນາງ ມົນລະດີ ກົມມະເມືອງ ອາຍຸ 31 ປີ ຢູ່ບ້ານຝັ່ງແດງ ເມືອງໄຊເສດຖາ ແຂວງອັດຕະປື, ຜູ້ທີ່ມຸ່ງໝັ້ນພັດທະນາກະສິກຳປະສົມປະສານ ຈົນສາມາດສ້າງລາຍຮັບໃຫ້ຄອບຄົວຫລາຍກວ່າ 100 ລ້ານກີບຕໍ່ປີ.
  ນາງ ມົນລະດີ ກົມມະເມືອງ ໃຫ້ສຳພາດວ່າ: ພາຍຫລັງຮຽນຈົບສາຍວິຊາສະເພາະດ້ານກົດໝາຍ, ຕົນເອງໄດ້ຕັດສິນໃຈກັບຄືນສູ່ບ້ານເກີດເມືອງນອນ ເພື່ອສືບທອດອາຊີບກະສິກຳຂອງພໍ່ແມ່ ແລະ ສ້າງອະນາຄົດໃຫ້ຕົນເອງ. ນັບແຕ່ປີ 2020 ເປັນຕົ້ນມາ, ໄດ້ນຳເອົາທີ່ດິນຂອງຄອບຄົວມາຈັດສັນ ແລະ ແບ່ງພື້ນທີ່ຜະລິດຢ່າງເໝາະສົມ ໂດຍອາໄສແຮງງານຈາກຄົນໃນຄອບຄົວ ແລະ ທຶນຮອນຂອງຕົນ ເອງເປັນຫລັກ. ໂດຍມີກິດຈະກຳຫລັກ 3 ດ້ານ ຄື: ການປູກເຂົ້າ, ການປູກຜັກ ແລະ ການລ້ຽງສັດ ຊຶ່ງເປັນການສ້າງລາຍຮັບຈາກຫລາຍແຫລ່ງ ແລະ ຊ່ວຍກະຈາຍຄວາມສ່ຽງໃນການຜະລິດ. ສຳລັບການເຮັດນາແມ່ນອາຊີບພື້ນຖານທີ່ໄດ້ສືບທອດຈາກຄອບຄົວ ແລະ ນຳມາປັບປຸງໃຫ້ມີປະສິດທິພາບຫລາຍຂຶ້ນ ໂດຍເນັ້ນການເລືອກແນວພັນເຂົ້າທີ່ມີຄຸນນະພາບ, ການບຳລຸງດິນ ແລະ ນຳໃຊ້ເຕັກນິກການຜະລິດທີ່ເໝາະສົມ. ນອກຈາກການເຮັດນາປີແລ້ວ, ຍັງເຮັດນາແຊງຕາມສະພາບຄວາມເໝາະສົມຂອງພື້ນທີ່, ສາມາດສ້າງລາຍຮັບສະເລ່ຍປະມານ 50-60 ລ້ານກີບຕໍ່ປີ. ສ່ວນການປູກຜັກແມ່ນໄດ້ນຳໃຊ້ພື້ນທີ່ວ່າງອ້ອມເຮືອນ ແລະ ແຄມນາ ປູກຜັກສວນຄົວໝູນວຽນຕາມລະດູການ ເຊັ່ນ: ປູກຜັກກາດ, ຫອມ, ໝາກເຜັດ, ໝາກຖົ່ວ ແລະ ຜັກພື້ນບ້ານຊະນິດຕ່າງໆ. ຜົນຜະລິດທີ່ໄດ້ນອກຈາກບໍລິໂພກໃນຄອບຄົວແລ້ວ, ຍັງນຳໄປຈຳໜ່າຍໃຫ້ແມ່ຄ້າ ແລະ ຕະຫລາດໃນຊຸມຊົນ, ສາມາດສ້າງລາຍຮັບໝູນວຽນປະມານ 30-40 ລ້ານກີບຕໍ່ປີ. ນອກຈາກການປູກພືດແລ້ວ, ຍັງລ້ຽງຄວາຍ, ໝູ, ແບ້, ໄກ່ ແລະ ປາ ໂດຍເນັ້ນການຈັດການລ້ຽງໃຫ້ເໝາະສົມ, ນຳໃຊ້ອາຫານສັດທີ່ຫາໄດ້ຕາມທຳມະຊາດ ຄວບຄູ່ກັບການເບິ່ງແຍງສຸຂະພາບສັດ. ການລ້ຽງສັດບໍ່ພຽງແຕ່ຊ່ວຍໃຫ້ຄອບຄົວມີອາຫານບໍລິໂພກເທົ່ານັ້ນ, ແຕ່ຍັງສາມາດນຳຜົນຜະລິດອອກຈຳໜ່າຍສ້າງລາຍຮັບເສີມປະມານ 20-30 ລ້ານກີບຕໍ່ປີ.

   ນາງ ມົນລະດີ ກ່າວຕື່ມວ່າ: ເຖິງວ່າໃນໄລຍະທຳອິດຈະປະສົບກັບຄວາມຫຍຸ້ງຍາກຫລາຍດ້ານທັງການຂາດປະສົບການ, ບັນຫາສັດຕູພືດ, ພະຍາດສັດ ແລະ ສະພາບດິນຟ້າອາກາດທີ່ບໍ່ເອື້ອອຳນວຍເຮັດໃຫ້ຜົນຜະລິດບາງລະດູການບໍ່ເປັນໄປຕາມເປົ້າໝາຍກໍຕາມ, ແຕ່ບໍ່ໄດ້ຍອມແພ້ຕໍ່ອຸປະສັກ. ຕົນເອງໄດ້ນຳບົດຮຽນຈາກຄວາມຜິດພາດມາປັບປຸງວິທີການຜະລິດ, ສຶກສາຮຽນຮູ້ເຕັກນິກໃໝ່ໆ ແລະ ປັບຕົວໃຫ້ເໝາະສົມກັບສະພາບຕົວຈິງຈົນຜົນຜະລິດຄ່ອຍໆດີຂຶ້ນ. ພ້ອມນີ້, ການຊຸກຍູ້ສົ່ງເສີມຈາກພາກລັດ ທາງດ້ານວິຊາການ ແລະ ການສະໜອງແນວພັນເຂົ້າທີ່ມີຄຸນນະພາບກໍເປັນປັດໄຈສຳຄັນທີ່ຊ່ວຍປັບປຸງການຜະລິດຂອງຄອບຄົວໃຫ້ມີທິດທາງທີ່ດີຂຶ້ນ. ຈາກການປະກອບອາຊີບກະສິກຳປະສົມປະສານທັງ 3 ດ້ານ ຄອບຄົວສ້າງລາຍຮັບລວມໄດ້ຫລາຍກວ່າ 100 ລ້ານກີບຕໍ່ປີ.
   ແນວໃດກໍຕາມ, ສຳລັບຊາວໜຸ່ມທີ່ກຳລັງຊອກຫາແນວທາງສ້າງອາຊີບ, ການເຮັດກະສິກຳປະສົມປະສານເປັນອີກໜຶ່ງທາງເລືອກທີ່ໜ້າສົນໃຈ. ສິ່ງສຳຄັນແມ່ນຄວນເລີ່ມຕົ້ນຈາກທ່າແຮງທີ່ຕົນເອງມີ, ຮຽນຮູ້ວິຊາການຢ່າງຕໍ່ເນື່ອງ, ວາງແຜນການຜະລິດ ແລະ ປັບຕົວໃຫ້ທັນກັບຄວາມຕ້ອງການຂອງຕະຫລາດ. ຫາກມີຄວາມມຸ່ງໝັ້ນ ແລະ ຮູ້ຈັກນຳບົດຮຽນມາປັບປຸງຕົນເອງ, ກໍສາມາດຄ່ອຍໆສ້າງອາຊີບທີ່ໝັ້ນຄົງພ້ອມທັງປະກອບສ່ວນພັດທະນາເສດຖະກິດຂອງຄອບຄົວ ແລະ ຊຸມຊົນໄດ້.
   ໂດຍ: ແສງສຸວັນ ຄຳພັກດີ