KPL
ກອງປະຊຸມເຈົ້າໜ້າທີ່ອາວຸໂສ (SOM) ຂອງຄະນະກຳມາທິການຮ່ວມວ່າດ້ວຍການຮ່ວມມື (JC) ລາວ-ໄທ ຄັ້ງທີ 23 ຈັດຂຶ້ນໃນຕອນບ່າຍວັນທີ 1 ຕຸລາ 2026 ທີ່ແຂວງຫຼວງພະບາງ ໂດຍການເປັນປະທານຮ່ວມຂອງ ທ່ານ ອານຸພາບ ວົງໜໍ່ແກ້ວ ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ທ່ານ ນາງ ເອກສິຣິ ປິນທະຣຸຈິ ຫົວໜ້າຫ້ອງການກະຊວງການຕ່າງປະເທດ ແຫ່ງ ລາຊະອານາຈັກໄທ ພ້ອມດ້ວຍຄະນະຜູ້ແທນຂອງທັງສອງຝ່າຍເຂົ້າຮ່ວມ.
ກອງປະຊຸມເຈົ້າໜ້າທີ່ອາວຸໂສຄັ້ງນີ້ ໄດ້ປຶກສາຫາລືເພື່ອກະກຽມຄວາມພ້ອມຮອບດ້ານໃຫ້ແກ່ກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 23 ທີ່ຈະຈັດຂຶ້ນໃນວັນທີ 2 ຕຸລາ 2026 ທັງທາງດ້ານພາລະທິການ ແລະ ດ້ານເນື້ອໃນ. ໃນນີ້, ໄດ້ມີການຮ່ວມກັນທົບທວນຄືນການຈັດຕັ້ງປະຕິບັດບົດບັນທຶກກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 22 ທີ່ໄດ້ຈັດຂຶ້ນໃນປີ 2021. ຕະຫຼອດໄລຍະ 5 ປີຜ່ານມາ ການຮ່ວມມືຂອງສອງປະເທດແມ່ນມີຄວາມຄືບໜ້າເປັນຮູບປະທຳຫຼາຍໆດ້ານ, ທັງໝົດນັ້ນລ້ວນແຕ່ປະກອບສ່ວນສຳຄັນເຂົ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືຖານບ້ານໃກ້ເຮືອນຄຽງທີ່ດີລະຫວ່າງສອງປະເທດໃຫ້ມີບາດກ້າວອັນໃໝ່ທີ່ດີຍິ່ງຂຶ້ນ.
ກອງປະຊຸມຍັງໄດ້ປຶກສາຫາລືການກຳນົດທິດທາງແຜນການຮ່ວມມືລະຫວ່າງສອງຝ່າຍ ລາວ-ໄທ ໃນຊຸມປີຕໍ່ໜ້າ ແລະ ກ້າວໄປສູ່ການສ້າງບົດບັນທຶກກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມື ລາວ-ໄທ ຄັ້ງທີ 23 ໃຫ້ໄດ້ຢ່າງສົມບູນ ເຊິ່ງຈະເປັນພື້ນຖານອັນສຳຄັນໃຫ້ແກ່ການຮັດແໜ້ນ ແລະ ເສີມຂະຫຍາຍການຮ່ວມມືຖານບ້ານໃກ້ເຮືອນຄຽງທີ່ດີ ກໍຄືການເປັນຄູ່ຮ່ວມຍຸດທະສາດເພື່ອການຈະເລີນເຕີບໂຕ ແລະ ການພັດທະນາແບບຍືນຍົງທີ່ເຕັມໄປດ້ວຍໄມຕີຈິດມິດຕະພາບ ແລະ ການຊ່ວຍເຫຼືອເຊິ່ງກັນ ແລະ ກັນ ລະຫວ່າງສອງປະເທດ ເພື່ອພ້ອມກັນພັດທະນາຢ່າງບໍ່ຢຸດຢັ້ງ.
ກອງປະຊຸມເຈົ້າໜ້າທີ່ອາວຸໂສຄັ້ງນີ້, ໄດ້ດຳເນີນດ້ວຍບັນຍາກາດອັນດີ, ມີຄວາມເຂົ້າອົກເຂົ້າໃຈເຊິ່ງກັນ ແລະ ກັນ, ກົງໄປກົງມາ ແລະ ໄດ້ຮັບຜົນສຳເລັດຕາມຄາດໝາຍທີ່ວາງໄວ້.
ໃນຕອນເຊົ້າວັນດຽວກັນ, ຍັງໄດ້ມີກອງປະຊຸມ 3 ກຸ່ມຍ່ອຍຄື: ກຸ່ມດ້ານການເມືອງ ແລະ ຄວາມໝັ້ນຄົງ; ກຸ່ມດ້ານເສດຖະກິດ ແລະ ກຸ່ມດ້ານສັງຄົມ ແລະ ການພັດທະນາ (ວັດທະນະທຳ-ສັງຄົມ) ເພື່ອທົບທວນຜົນການຈັດຕັ້ງຜັນຂະຫຍາຍບົດບັນທຶກກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືລາວ-ໄທ ຄັ້ງທີ 22, ພ້ອມທັງປຶກສາຫາລືຮ່ວມກັນໃນການກຳນົດແຜນການຮ່ວມມືໃນຊຸມປີຕໍ່ໜ້າດ້ວຍຄວາມເອົາໃຈໃສ່ ແລະ ກົງໄປກົງມາ.
ຂ່າວ: ກົມການຂ່າວ, ກະຊວງການຕ່າງປະເທດ; ພາບ: ເກດສະໜາ
KPL
