KPL
ກອງປະຊຸມຄະນະຊີ້ນຳລວມ ການຈັດຕັ້ງປະຕິບັດຈຸດເຊື່ອມສານການເງິນ ເພື່ອການປ່ຽນແປງດິນຟ້າອາກາດ ແລະ ຍືນຍົງ ໄດ້ຈັດຂຶ້ນໃນວັນທີ 2 ກັນຍາ 2026 ໂດຍການເປັນປະທານຂອງ ທ່ານ ສິດທິຣົດ ຣາຊະພົນ ຮອງລັດຖະມົນຕີກະຊວງການເງິນ, ມີຜູ້ຕາງໜ້າຈາກບັນດາກະຊວງ-ຂະແໜງການ ພ້ອມດ້ວຍຜູ້ຕາງໜ້າຈາກອົງການສະຫະປະຊາຊາດ ເພື່ອການພັດທະນາ (UNDP) ແລະ ທະນາຄານພັດທະນາອາຊີ (ADB) ເຂົ້າຮ່ວມ.
ຈຸດເຊື່ອມສານການເງິນ ເພື່ອການປ່ຽນແປງດິນຟ້າອາກາດ ແລະ ຍືນຍົງ ແມ່ນກົນໄກການປະສານງານໜຶ່ງ ທີ່ໄດ້ຖືກສ້າງຕັ້ງຂຶ້ນພາຍໃຕ້ ກົມນະໂຍບາຍເສດຖະກິດ ແລະ ການເງິນ, ກະຊວງການເງິນ ໃນປີ 2025, ໜ້າທີ່ຂອງຈຸດເຊື່ອມສານດັ່ງກ່າວ ເພື່ອສ້າງຄວາມເຂັ້ມແຂງໃຫ້ແກ່ການປະສານງານ, ການລະດົມທຶນ, ໃຫ້ຄຳແນະນຳດ້ານນະໂຍບາຍ ແລະ ຈັດສັນການນຳໃຊ້ງົບປະມານ ເພື່ອການປ່ຽນແປງດິນຟ້າອາກາດ ແລະ ຍືນຍົງຢ່າງມີປະສິດທິຜົນ, ໃຫ້ສອດຄ່ອງກັບບັນດາບຸລິມະສິດການພັດທະນາແຫ່ງຊາດ ລວມທັງແຜນພັດທະນາເສດຖະກິດ-ສັງຄົມແຫ່ງຊາດ (NSEDP), ແຜນງານແຫ່ງຊາດການປະກອບສ່ວນແກ້ໄຂບັນຫາການປ່ຽນແປງດິນຟ້າອາກາດ (NDC) ແລະ ແຜນງານແຫ່ງຊາດ ກ່ຽວກັບການປັບຕົວເຂົ້າກັບການປ່ຽນແປງດິນຟ້າອາກາດ (NAP).
ທ່ານ ສິດທິຣົດ ຣາຊະພົນ ໄດ້ເນັ້ນໜັກວ່າ: ວຽກງານການປ່ຽນແປງດິນຟ້າອາກາດ ແລະ ຄວາມຍືນຍົງ ແມ່ນບັນຫາຮີບດ່ວນລະດັບໂລກ ຂອງການພັດທະນາໃນຍຸກປັດຈຸບັນ ສຳລັບ ສປປ ລາວ ໂດຍສະເພາະໃນລະດູຝົນມັກເກີດໄພພິບັດທາງທຳມະຊາດ ໃນຫຼາຍເຂດແຂວງ ຊຶ່ງສົ່ງຜົນກະທົບຕໍ່ການສູນເສຍທາງເສດຖະກິດຫຼາຍສົມຄວນ. ລັດຖະບານ ຈຶ່ງໄດ້ເອົາໃຈໃສ່ສ້າງມາດຕະການຕ່າງໆເພື່ອຮັບມື ໂດຍຈຸດເຊື່ອມສານການເງິນ ເພື່ອການປ່ຽນແປງດິນຟ້າອາກາດ ແລະ ຍືນຍົງ ໄດ້ຖືກສ້າງຕັ້ງຂຶ້ນພາຍໃຕ້ຍຸດທະສາດການເງິນ ເພື່ອສະໜັບສະໜູນແຜນພັດທະນາເສດຖະກິດ-ສັງຄົມແຫ່ງຊາດ ໂດຍໄດ້ຮັບການສະໜັບສະໜູນຕາມແຜນງານຮ່ວມຂອງອົງການສະຫະປະຊາຊາດ ເພື່ອການພັດທະນາ.
ກອງປະຊຸມໃນຄັ້ງນີ້, ໄດ້ສຸມໃສ່ປຶກສາຫາລືໃນ 3 ວຽກຫຼັກ ຄື: ນຳສະເໜີບົດບາດ ແລະ ຄວາມຄືບໜ້າການຈັດຕັ້ງປະຕິບັດຈຸດເຊື່ອມສານການເງິນ ເພື່ອການປ່ຽນແປງດິນຟ້າອາກາດ ແລະ ຍືນຍົງ ໃນໄລຍະຜ່ານມາ ແລະ ແຜນວຽກໃນຕໍ່ໜ້າ; ຮ່າງຍຸດທະສາດການເງິນ ເພື່ອສະໜັບສະໜູນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ X (2026-2030); ປຶກສາຫາລືແຜນການເຄື່ອນໄຫວ ແຕ່ນີ້ຮອດທ້າຍປີ 2026 ແລະ ແຜນປີ 2027.
KPL
