KPL
ເມື່ອບໍ່ດົນມານີ້, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສ່ົງໂທລະເລກສະແດງຄວາມເສົ້າສະຫລົດໃຈເຖິງ ສະຫາຍ ຫລີ ສຽງ ນາຍົກລັດ ຖະມົນຕີ ແຫ່ງ ສາທາລະນະລັດ ປະຊາຊົນ ຈີນ ຕ່ໍກັບການຈາກໄປຂອງສະຫາຍ ຈູ່ ຢົງຈີ່ ອະດີດກຳມະການກົມການເມືອງສູນກາງ ພັກກອມມູນິດຈີນ ຊຸດທີ 14 ແລະ 15, ອະດີດນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນ ຈີນ.
ຂປລ. ເນື້ອໃນສານໄດ້ລະບຸວ່າ: ຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າຮູ້ສຶກເສົ້າສະຫລົດໃຈທີ່ໄດ້ຮັບຊາບຂ່າວ ການຈາກໄປຂອງສະຫາຍ ຈູ່ ຢົງຈີ່ ອະດີດກຳມະການກົມການເມືອງສູນກາງພັກກອມມູນິດຈີນ ຊຸດທີ 14 ແລະ 15, ອະດີດນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນຈີນ, ໃນວັນທີ 12 ສິງຫາ 2026 ທີ່ຜ່ານມາ.
ສະຫາຍ ຈູ່ ຢົງຈີ່ ແມ່ນໜຶ່ງ ໃນການນຳຫລັກແຫລ່ງທີ່ສໍາຄັນ ຂອງສູນກາງພັກກອມມູນິດຈີນ ທີ່ໄດ້ອຸທິດສະຕິປັນຍາ ແລະ ເຫື່ອແຮງຂອງຕົນເຂົ້າໃນພາລະກິດ ການປົກປັກຮັກສາ ແລະ ສ້າງສາພັດທະນາ ສາທາລະນະລັດ ປະຊາຊົນຈີນ. ສະຫາຍແມ່ນການນໍາຜູ້ໜຶ່ງທີ່ມີບົດບາດສໍາຄັນ ແລະ ປະກອບສ່ວນຢ່າງຕັ້ງໜ້າໃນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງສອງປະເທດ ລາວ-ຈີນ, ຈີນ-ລາວ ເປັນການພົວພັນຮ່ວມມືຮອບດ້ານທີ່ໝັ້ນຄົງຍາວນານ, ມີໄມຕີຈິດຖານບ້ານໃກ້ເຮືອນຄຽງ ແລະ ໄວ້ເນື້ອເຊື່ອໃຈເຊິ່ງກັນ ແລະ ກັນ. ການຈາກໄປຂອງສະຫາຍ ຈູ່ ຢົງຈີ່ ບໍ່ເປັນພຽງແຕ່ການສູນເສຍບຸກຄົນທີ່ສໍາຄັນຂອງພັກ, ລັດຖະບານ ແລະ ປະຊາຊົນຈີນ ອ້າຍນ້ອງ, ແຕ່ຍັງເປັນການສູນເສຍເພື່ອນມິດສະຫາຍຂອງພັກ, ລັດຖະບານ ແລະ ປະຊາຊົນລາວຂອງພວກຂ້າພະເຈົ້າອີກດ້ວຍ.
ໃນທ່າມກາງບັນຍາກາດທ່ີໂສກເສົ້າເສຍໃຈນີ້, ຂ້າພະເຈົ້າຕາງໜ້າ ໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຂໍແບ່ງເບົາຄວາມທຸກໂສກນໍາ ສະຫາຍ ແລະ ຜ່ານສະຫາຍໄປຍັງຄອບຄົວຂອງສະຫາຍ ຈູ່ ຢົງຈ່ ມານະໂອກາດນີ້ດ້ວຍ.
KPL
