KPL
ກົມປ່າໄມ້, ກະຊວງກະສິກຳ ແລະ ສິ່ງແວດລ້ອມ ຈັດກອງປະຊຸມປຶກສາຫາລືລະດັບຊາດ ວ່າດ້ວຍໄມ້ປ່ອງ, ຫວາຍ ແລະ ເຄື່ອງປ່າຂອງດົງ (NTFPs) ໃນວັນທີ 16 ຕຸລາ 2026 ຢູ່ຕ່າງນະຄອນຫຼວງວຽງຈັນ
ເພື່ອທົບທວນຍຸດທະສາດຂອງກົມປ່າໄມ້ ແລະ ຍຸດທະສາດວຽກງານປ່າໄມ້ບ້ານ, ວຽກງານໄມ້ປ່ອງ ແລະ ຫວາຍ; ທົບທວນບຸລິມະສິດຫຼັກຂອງລັດຖະບານ ແລະ ອົງການຈັດຕັ້ງຕ່າງໆ ພ້ອມທັງຫາລືວິທີການປັບປຸງ ແລະ ເຊື່ອມສານ ເພື່ອບັນລຸວິໄສທັດຮ່ວມກັນ; ເພື່ອແລກປ່ຽນ ແລະ ຖອດຖອນບົດຮຽນຈາກໂຄງການ ແລະ ກິດຈະກຳຕ່າງໆ ທີ່ໄດ້ຈັດຕັ້ງປະຕິບັດຜ່ານມາ ທັງຈາກອົງການຄູ່ຮ່ວມພັດທະນາ, ໂຄງການຮ່ວມມືສອງຝ່າຍ ແລະ ພາກເອກະຊົນ ເພື່ອເປີດໂອກາດໃຫ້ມີການສົນທະນາ, ຫາລືວິທີການຂະຫຍາຍຜົນ ແລະ ເສີມສ້າງການດຳເນີນງານໃຫ້ສອດຄ່ອງກັບບຸລິມະສິດຂອງລັດຖະບານ; ເພື່ອສ້າງການເຊື່ອມໂຍງນຳເອົາຜົນໄດ້ຮັບ ແລະ ບົດຮຽນຈາກກອງປະຊຸມສຳມະນານີ້ ໄປປະກອບເຂົ້າໃນຫົວຂໍ້ຂອງກອງປະຊຸມຄະນະວິຊາການປ່າໄມ້ບ້ານ (VFWG).
ກອງປະຊຸມຈັດຂຶ້ນໂດຍການເປັນປະທານຂອງ ທ່ານ ຄຳເຝືອ ສິຣິວົງ ຮອງຫົວໜ້າກົມປ່າໄມ້, ມີຜູ້ຕາງໜ້າຈາກສູນກາງ ແລະ ທ້ອງຖິ່ນ (ແຂວງຫົວພັນ), ອົງການຄູ່ຮ່ວມພັດທະນາເຂົ້າຮ່ວມ ແລະ ຮັບຟັງການນຳສະເໜີກ່ຽວກັບບຸລິມະສິດຂອງກົມປ່າໄມ້ ເພື່ອການພັດທະນາຂະແໜງໄມ້ປ່ອງ, ຫວາຍ ແລະ ເຄື່ອງປ່າຂອງດົງ; ບຸລິມະສິດທີ່ຕິດພັນກັບຂະແໜງໄມ້ປ່ອງ, ຫວາຍ ແລະ ເຄື່ອງປ່າຂອງດົງ; ຍຸດທະສາດການພັດທະນາໄມ້ປ່ອງ ແລະ ເຄື່ອງປ່າຂອງດົງຂອງແຂວງຫົວພັນ; ບົດຮຽນທີ່ຖອດຖອນໄດ້ຈາກການຈັດຕັ້ງປະຕິບັດໂຄງການຫວາຍ. ພ້ອມນີ້, ຜູ້ເຂົ້າຮ່ວມໄດ້ພ້ອມກັນທົບທວນບຸລິມະສິດຫຼັກຂອງກົມປ່າໄມ້, ພະແນກຄຸ້ມຄອງທຸລະກິດໄມ້ ແລະ ເຄື່ອງປ່າຂອງດົງ, ພະແນກປ່າໄມ້ບ້ານ ແລະ ຍຸດທະສາດການພັດທະນາໄມ້ປ່ອງ ແລະ ເຄື່ອງປ່າຂອງດົງຂອງແຂວງຫົວພັນ ຊຶ່ງຊ່ວຍໃຫ້ທຸກພາກສ່ວນມີຄວາມເຂົ້າໃຈທິດທາງ ແລະ ວິໄສທັດຮ່ວມກັນຢ່າງຈະແຈ້ງຂຶ້ນ ແລະ ບັນດາອົງການຄູ່ຮ່ວມພັດທະນາ ແລະ ພາກເອກະຊົນ ໄດ້ນຳສະເໜີຜົນການຈັດຕັ້ງປະຕິບັດໂຄງການ, ແບ່ງປັນບົດຮຽນຕົວຈິງ ແລະ ຫາລືວິທີການຂະຫຍາຍຜົນການດຳເນີນງານ ເພື່ອໃຫ້ສອດຄ່ອງກັບວຽກງານປ່າໄມ້ຊຸມຊົນ, ການຄຸ້ມຄອງ NTFPs ແລະ ການຮັບຮູ້ສິດໃນການນຳໃຊ້ທີ່ດິນປ່າໄມ້ ແລະ ອື່ນໆ.
ໄມ້ປ່ອງ, ຫວາຍ ແລະ ເຄື່ອງປ່າຂອງດົງ ແມ່ນມີບົດບາດສຳຄັນຫຼາຍ ເຮັດໃຫ້ຊີວິດການເປັນຢູ່ຂອງປະຊາຊົນໃນເຂດຊົນນະບົດ ແລະ ພູດອຍມີຄວາມໝັ້ນຄົງ, ທັງເປັນແຫຼ່ງລາຍຮັບ, ອາຫານ ແລະ ເປັນສິນຄ້າທີ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຢ່າງຍືນຍົງ. ການຄຸ້ມຄອງ, ການສົ່ງເສີມ ແລະ ການປັບປຸງຕ່ອງໂສ້ມູນຄ່າຂອງຜະລິດຕະພັນເຫຼົ່ານີ້ ບໍ່ພຽງແຕ່ຊ່ວຍຟື້ນຟູ ແລະ ປົກປັກຮັກສາຊັບພະຍາກອນປ່າໄມ້ເທົ່ານັ້ນ, ແຕ່ຍັງຕິດພັນກັບວຽກງານປ່າໄມ້ຊຸມຊົນ ແລະ ການຮັບຮູ້ສິດໃນການນຳໃຊ້ທີ່ດິນປ່າໄມ້ຂອງປະຊາຊົນ.
ຂ່າວ-ພາບ: ກົມປ່າໄມ້
KPL
