ຂປລ. ໃນວັນທີ 26 ມັງກອນ 2022 ທີ່ສໍານັກງານສູນກາງ ສະຫະພັນກໍາມະບານລາວ ໄດ້ຈັດຖະແຫລງຂ່າວ ກ່ຽວກັບການກຽມ ຈັດຫລາຍ ກິດຈະກໍາ ເພື່ອສະເຫລີມສະຫລອງ ວັນສ້າງຕັ້ງອົງການ ຈັດຕັ້ງກຳມະບານລາວ ຄົບຮອບ 66 ປີ (1/2/1956-1/2/2022) ເພື່ອໃຫ້ເຕັມໄປດ້ວຍ ບັນຍາກາດທີ່ຟົດຟື້ນ ແລະ ໃຫ້ມີຄວາມໝາຍທີ່ເລິກເຊິ່ງ, ພ້ອມທັງຮັບປະກັນ ການປ້ອງກັນ ພະຍາດໂຄວິດ-19.

ທ່ານ ພອນສານ ວິໄລເມັ້ງ ຮອງປະທານຄະນະ ບໍລິຫານງານ ສູນກາງສະຫະພັນ ກໍາມະບານລາວ ໃຫ້ຮູ້ວ່າ: ວັນທີ 1 ກຸມພາ ຂອງທຸກປີ ແມ່ນວັນສັ້ງຕັ້ງ ກໍາມະບານລາວ, ເຊິ່ງເປັນປາງບຸນໃຫຍ່ ຂອງອົງການກໍາມະບານ ແລະ ຜູ້ອອກແຮງງານ. ປີນີ້, ສູນກາງສະຫະພັນ ກໍາມະບານລາວ ໄດ້ອອກແຈ້ງການ ໃຫ້ສະຫະພັນ ກໍາມະບານລາວທຸກຂັ້ນ ໃນຂອບເຂດທົ່ວປະເທດ ຈັດຕັ້ງເຊື່ອມຊຶມເລົ່າປະຫວັດ ຫວນຄືນມູນເຊື້ອ ວັນສໍາຄັນ ດັ່ງກ່າວ, ເພື່ອໃຫ້ສະມາຊິກກໍາມະບານ ແລະ ຜູ້ອອກແຮງງານ ໄດ້ຮັບຮູ້ເຊື່ອມຊຶມ ແລະ ເຂົ້າໃຈເຖິງຜົນງານ ການປະກອບສ່ວນ ຂອງອົງ ການກໍາມະບານ ໃນພາລະກິດ ປະຕິວັດຊາດ, ປະຊາທິປະໄຕ, ປົກປັກຮັກສາ ແລະ ພັດທະນາປະເທດຊາດ ຂອງອົງການຈັດຕັ້ງ ກໍາມະບານລາວ ຕະຫລອດໄລຍະ 66 ປີ ຜ່ານມາ.

ສໍາລັບສູນກາງສະຫະພັນ ກໍາມະບານລາວ ຈະໄດ້ຈັດຫລາຍກິດຈະກໍາ ເປັນຕົ້ນ ການໂຄສະນາເຜີຍແຜ່ ໃຫ້ສະມາຊິກກໍາມະບານ ແລະ ຜູ້ອອກແຮງ ໃນທົ່ວປະເທດຮັບຮູ້ ພ້ອມກັນຈັດຕັ້ງປະຕິບັດ 2 ວາລະແຫ່ງຊາດ ຂອງລັດຖະບານ ແນ່ໃສ່ປະກອບສ່ວນ ຊ່ວຍແກ້ໄຂຄວາມ ຫຍຸ້ງຍາກ ທາງດ້ານເສດ ຖະກິດ-ການເງິນ ແລະ ບັນຫາຢາເສບຕິດ ພາຍໃນປະເທດ ໃຫ້ນັບມື້ຫລຸດລົງ, ຈັດປາຖະກະຖາ ເພື່ອເຮັດໃຫ້ສະມາຊິກ ກໍາມະບານ ແລະ ຜູ້ອອກແຮງງານ ຢູ່ອົງການຈັດຕັ້ງ ທັງພາກລັດ ແລະ ເອກະຊົນ ໄດ້ຮັບຮູ້ເຂົ້າໃຈກ່ຽວກັບມູນເຊື້ອ ແລະ ການເຕີບໃຫຍ່ຂະຫຍາຍຕົວ ຂອງສະຫະພັນ ກໍາມະບານລາວ ທີ່ຕິດພັນຂອງມູນເຊື້ອ ແຕ່ລະໄລຍະ ຂອງການຕໍ່ສູ້ກູ້ຊາດ ຈົນມາເຖິງປັດຈຸບັນ ເພື່ອເປັນການສຶກສາອົບຮົມ ທາງດ້ານການເມືອງ-ແນວຄິດ, ປຸກລະດົມ ແລະ ສ້າງຈິດສໍານຶກໃຫ້ເຂົາເຈົ້າ ເຂົ້າໃນຂະບວນການ ປະຕິບັດໜ້າທີ່ວຽກງານ ວິຊາສະເພາະ, ມີລະບຽບວິໄນໃນ ການອອກແຮງງານ ແລະ ປະຕິບັດຂໍ້ແຂ່ງຂັນ 5 ເປັນເຈົ້າ ໂດຍຕິດພັນກັບ ຂໍ້ແຂ່ງຂັນຮັກຊາດ ແລະ ພັດທະນາ ໃຫ້ນັບມື້ໄດ້ ຮັບຜົນສໍາເລັດ. ພ້ອມກັນນີ້, ຍັງກະກຽມຈັດການບໍລິຈາກເລືອດ ເພື່ອຊ່ວຍເຫລືອສັງຄົມ ລວມເຖິງຈັດການແຂ່ງ ຂັນກິລາ ແລະ ສິລະປະໃນທ້ອງຖິ່ນ ຫລື ສໍານັກງານ-ອົງການທີ່ມີເງື່ອນໄຂເໝາະສົມ.

ທ່ານໃຫ້ຮູ້ຕື່ມວ່າ: ສໍາລັບທຸກກິດຈະກໍາທີ່ຈະຈັດຂຶ້ນ ຕ້ອງມີມາດຕະການ ປ້ອງກັນພະຍາດໂຄວິດ-19 ຕາມທີ່ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ-19 ວາງອອກຢ່າງເຂັ້ມງວດ. ຂໍຮຽກຮ້ອງມາຍັງ ທຸກສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານທຸກຄົນ ຕະຫລອດຮອດພໍ່ແມ່ ພີ່ນ້ອງປະຊາຊົນລາວ ບັນດາເຜົ່າ ທີ່ອາໃສຢູ່ພາຍໃນປະເທດ ແລະ ຕ່າງປະເທດ ຈົ່ງພ້ອມພາກັນເອົາໃຈໃສ່ ຮັກສາມູນເຊື້ອ ອັນດີງາມຂອງຊາດລາວ ໂດຍສະເພາະ ມູນເຊື້ອປະຕິວັດ ຂອງວັນສ້າງຕັ້ງ ກໍາມະບານລາວ ເຂົ້າໃນການສ້າງສາ ພັດທະນາປະເທດຊາດ ກໍ່ຄື ການພັດທະນາ ວຽກງານກໍາມະບານ ໃຫ້ມີການພັດທະນາ ແລະ ຂະຫຍາຍຕົວຢ່າງແຂງ ແຮງ. ຕາມຄໍາຂວັນຂອງ ກໍາມະບານລາວ ໄດ້ກ່າວໄວ້ວ່າ “ກໍາມະບານລາວເຂັ້ມແຂງ ທັນສະໄໝ ສາ ມັກຄີ ມີວິໄນ ແລະ ນໍ້າໃຈສາກົນກໍາມະຊີບ”.

ຂໍ້ມູນ: ສູນກາງສະຫະພັນກໍາມະບານລາວ 

KPL