ໂທລະເລກອວຍພອນ ວັນປົດປ່ອຍພາກໃຕ້, ທ້ອນໂຮມ
ປະເທດຊາດຫວຽດນາມ ເປັນເອກະພາບ ຄົບຮອບ 50 ປີ
ຂປລ. ເນື່ອງໃນໂອກາດວັນປົດປ່ອຍພາກໃຕ້, ທ້ອນໂຮມປະເທດຫວຽດນາມ ເປັນເອກະພາບ ຄົບຮອບ 50 ປີ (30/4/1975-30/4/2025), ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ, ສະພາແຫ່ງຊາດ, ລັດຖະບານ, ແນວລາວສ້າງຊາດ ໄດ້ສົ່ງໂທລະເລກອວຍພອນ ເຖິງ ຄະນະບໍລິຫານງານສູນກາງພັກ ກອມມູນິດຫວຽດນາມ, ປະທານປະເທດ, ສະພາແຫ່ງຊາດ, ລັດຖະບານ ແລະ ຄະນະກໍາມະການສູນກາງ ແນວໂຮມປະເທດຊາດຫວຽດນາມ.
ເນື້ອໃນໂທລະເລກໄດ້ລະບຸວ່າ: ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ, ສະພາແຫ່ງຊາດ, ລັດຖະບານ, ແນວລາວສ້າງຊາດ ຂໍສົ່ງຄໍາອວຍພອນໄຊອັນປະເສີດ ແລະ ຄວາມສາມັກຄີ ມິດຕະ ພາບອັນສະໜິດສະໜົມ ຖານສະຫາຍອ້າຍນ້ອງ ມາຍັງຄະນະບໍລິຫານງານສູນກາງພັກ ກອມມູນິດຫວຽດນາມ, ປະ ທານປະເທດ, ສະພາແຫ່ງຊາດ, ລັດຖະບານ, ແນວໂຮມປະເທດຊາດຫວຽດນາມ.
ມະຫາໄຊຊະນະ ລະດູບານໃໝ່ ໃນບັ້ນຮົບໂຮ່ຈີ່ມິງ ວັນທີ 30 ເມສາ 1975 ປົດປ່ອຍພາກໃຕ້ຫວຽດນາມ ໄດ້ຢ່າງສົມບູນ ແລະ ທ້ອນໂຮມປະເທດ ເປັນເອກະພາບອັນໜຶ່ງອັນດຽວ ແມ່ນເຫດການທີ່ສຳຄັນຖືກຈາລຶກໄວ້ ໃນປະຫວັດສາດຂອງໂລກ, ແມ່ນຂີດໝາຍປະຫວັດສາດ ອັນສະຫວ່າງສະໄຫວຂອງ ພັກກອມມູນິດຫວຽດນາມ ທີ່ໄດ້ນຳພາປະເທດຊາດ ແລະ ປະຊາຊົນກ້າວເຂົ້າສູ່ສັງກາດໃໝ່ ແຫ່ງເອກະລາດ, ເອກະພາບ ແລະ ສັງຄົມນິຍົມ. ໄຊຊະ ນະດັ່ງກ່າວ ບໍ່ພຽງແຕ່ແມ່ນໄຊຊະນະ ຂອງກອງທັບ ແລະ ປະຊາຊົນຫວຽດນາມ ເທົ່ານັ້ນ ຫາກຍັງແມ່ນໄຊຊະນະລວມ ຂອງຄວາມສາມັກຄີ ຮ່ວມສຳພັນສູ້ຮົບແບບພິເສດ ລາວ-ຫວຽດນາມ ກໍຄື ໄຊຊະນະລວມຂອງ ປະຊາຊົນສາມຊາດອິນດູຈີນ ລາວ-ຫວຽດນາມ-ກໍາປູເຈຍ. ໄຊຊະນະດັ່ງກ່າວ ຍັງໄດ້ເປັນບົດຮຽນ, ເປັນກຳລັງໃຈ ແລະ ເປັນແຮງບັນດານໃຈໃຫ້ແກ່ບັນດາປະຊາຊາດໃນໂລກ ທີ່ຮັກຫອມສັນຕິພາບ ທີ່ພວມຕໍ່ສູ້ເພື່ອເສລີພາບ ແລະ ເອກະລາດແຫ່ງຊາດຂອງຕົນ.
ພວກຂ້າພະເຈົ້າ ມີຄວາມປິຕິຊົມຊື່ນ ແລະ ຕີລາຄາສູງຕໍ່ບັນດາຜົນສຳເລັດອັນໃຫຍ່ຫລວງ, ຮອບດ້ານ ແລະ ມີຄວາມໝາຍປະຫວັດສາດທີ່ ປະຊາຊົນ ຫວຽດນາມ ອ້າຍນ້ອງ ຍາດມາໄດ້ຕະຫລອດໄລຍະທີ່ຜ່ານມາ ໂດຍສະເພາະແມ່ນ ບັນດາຜົນສຳເລັດຮອບດ້ານ ໃນພາລະກິດປ່ຽນແປງໃໝ່ ອັນໄດ້ເຮັດໃຫ້ ສສ ຫວຽດນາມ ມີສະຖຽນລະພາບທາງດ້ານການເມືອງຢ່າງໜັກແໜ້ນ; ເສດຖະກິດມີການຂະຫຍາຍຕົວດ້ວຍຈັງຫວະໄວ ແລະ ຕໍ່ເນື່ອງ; ຊີວິດການເປັນຢູ່ຂອງປະຊາຊົນ ໄດ້ຮັບການປັບປຸງດີຂຶ້ນເລື້ອຍໆ; ການປ້ອງກັນຊາດ, ປ້ອງກັນຄວາມສະຫງົບ ມີຄວາມເຂັ້ມແຂງ; ການພົວພັນຮ່ວມມືກັບ ຕ່າງປະເທດໄດ້ຮັບການເປີດກວ້າງ, ບົດບາດອິດທິພົນຂອງພັກກອມມູນິດ ຫວຽດນາມ, ສາທາລະນະລັດ ສັງຄົມນິຍົມຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ. ພວກຂ້າພະເຈົ້າ ຂໍສະແດງຄວາມຊົມເຊີຍຢ່າງສຸດອົກສຸດໃຈ ແລະ ຖືບັນດາໄຊຊະນະດັ່ງກ່າວ ເປັນເໝືອນດັ່ງຂອງຕົນເອງ, ທັງເປັນກຳລັງໃຈອັນແຮງກ້າໃຫ້ແກ່ ພວກຂ້າພະເຈົ້າ ໃນການນຳພາພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຂອງຕົນ; ເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນຳພາອັນສະຫລາດສ່ອງໃສ ແລະ ຖືກຕ້ອງຂອງ ພັກກອມມູນິດຫວຽດນາມ ໂດຍແມ່ນ ສະຫາຍ ເລຂາທິການໃຫຍ່ ໂຕ ເລິມ ເປັນຜູ້ນຳໜ້ານັ້ນ, ປະຊາຊົນຫວຽດນາມ ຈະສືບຕໍ່ຍາດໄດ້ຜົນສຳເລັດໃໝ່ ໃຫຍ່ຫລວງກວ່າເກົ່າ ໃນການປະຕິບັດມະຕິ ກອງປະຊຸມໃຫຍ່ ຄັ້ງທີ XIII ຂອງພັກ ໃນໄລຍະທ້າຍສະໄໝໄດ້ຢ່າງມີໄຊ ແລະ ກ້າວໄປສູ່ການດໍາເນີນກອງປະຊຸມໃຫຍ່ ຄັ້ງທີ XIV ຂອງພັກ ໃຫ້ສໍາເລັດຜົນຢ່າງຈົບງາມ ເພື່ອສືບຕໍ່ສ້າງປະເທດຊາດຫວຽດນາມ ໃຫ້ກາຍເປັນປະເທດ ອຸດສະຫະກຳທີ່ທັນສະໄໝ, ບັນລຸເປົ້າໝາຍເຮັດໃຫ້ປະຊາຊົນຮັ່ງມີ, ປະເທດຊາດມັ່ງຄັ່ງເຂັ້ມແຂງ, ປະຊາທິປະໄຕ, ຍຸຕິທຳ ແລະ ສີວິໄລ.
ພວກຂ້າພະເຈົ້າ ມີຄວາມພາກພູມໃຈເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ ແລະ ຫວຽດນາມ ທີ່ ປະທານ ໂຮ່ຈີ່ມິງ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົາລົບຮັກ ເປັນຜູ້ລິເລີ່ມ ແລະ ໄດ້ຜ່ານການທົດສອບໃນແປວໄຟປະຕິວັດ ມາເປັນເວລາຫລາຍທົດສະວັດນັ້ນ ໄດ້ກາຍເປັນມູນມໍລະດົກລວມອັນລ້ຳຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວ ຂອງສອງຊາດ, ເປັນໜຶ່ງໃນປັດໄຈຕັດສິນ ໄຊຊະນະຂອງການປະຕິວັດ ຢູ່ແຕ່ລະປະເທດ ແລະ ມາເຖິງປັດຈຸບັນ ຍິ່ງໄດ້ຮັບການເອົາໃຈໃສ່, ຖະນຸຖະໜອມ, ເພີ່ມພູນຄູນສ້າງ ແລະ ເສີມຂະຫຍາຍເຂົ້າສູ່ລວງເລິກໃນທຸກຂົງເຂດ ແລະ ແຕກດອກອອກຜົນຢ່າງບໍ່ຢຸດຢັ້ງ, ນຳເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ລາວ-ຫວຽດນາມ; ສະແດງຄວາມຮູ້ບຸນຄຸນຢ່າງເລິກ ເຊິ່ງ ແລະ ຂອບໃຈຢ່າງຈິງໃຈມາຍັງ ພັກ, ລັດ ແລະ ປະຊາຊົນ ຫວຽດນາມ ອ້າຍນ້ອງ ທີ່ໄດ້ໃຫ້ການຊ່ວຍເຫລືອອັນໃຫຍ່ຫລວງ, ລ້ຳຄ່າ, ມີປະສິດທິຜົນ ແລະ ທັນການ ບົນຈິດໃຈ ສະຫາຍອ້າຍນ້ອງ, ແບບເຂົ້າເມັດຫັກຜັກເສັ້ນແບ່ງ, ບໍລິສຸດຜຸດຜ່ອງ ແກ່ພາລະກິດຕໍ່ສູ້ປົດປ່ອຍປະເທດຊາດ ໃນເມື່ອກ່ອນ ກໍຄື ໃນພະລະກິດປົກປັກຮັກສາ ແລະ ສ້າງສາພັດທະນາປະເທດ ພວກຂ້າພະເຈົ້າ ໃນປັດຈຸບັນ.
ຂໍອວຍພອນໃຫ້ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ຈົ່ງສວຍສົດງົດງາມ ແລະ ໝັ້ນຄົງຂະນົງແກ່ນຊົ່ວກາລະນານ.
--------------------------------------------------------------------------------
ສານສະແດງຄວາມເສົ້າສະຫລົດໃຈ
ຂປລ. ວັນທີ 16 ເມສາ 2025 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄວາມເສົ້າສະຫລົດໃຈ ເຖິງ ທ່ານ ອັນວາ ອິບຣາຮິມ ນາຍົກລັດຖະມົນຕີ ແຫ່ງ ມາເລເຊຍ ຕໍ່ການເສຍຊີວິດຂອງ ທ່ານ ຕຸນອັບດຸນລາ ອາມັດ ບາດາວີ ອະດີດນາຍົກລັດຖະມົນຕີຄົນທີ 5 ແຫ່ງມາເລເຊຍ.
ເນື້ອໃນສານໄດ້ລະບຸວ່າ: ຂ້າພະເຈົ້າມີຄວາມໂສກເສົ້າເປັນຢ່າງຍິ່ງ ທີ່ໄດ້ຮັບຂ່າວການເສຍຊີວິດຂອງ ທ່ານ ຕຸນອັບດຸນລາ ອາມັດ ບາດາວີອະດີດນາຍົກລັດຖະມົນຕີຄົນທີ5 ແຫ່ງມາເລເຊຍ ໃນວັນທີ14 ເມສາ2025 ທີ່ຜ່ານມາ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄືໃນນາມສ່ວນຕົວ ຂ້າພະເຈົ້າ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ແລະ ຂໍແບ່ງເບົາຄວາມໂສກເສົ້າ ມາຍັງລັດຖະບານ ແລະ ປະຊາຊົນ ມາເລເຊຍ ກໍຄື ຄອບຄົວ ແລະ ຍາດພີ່ນ້ອງຂອງ ທ່ານ ອັບດຸນລາ ອາມັດ ບາດາວີຕໍ່ການສູນເສຍໃນຄັ້ງນີ້.
ໃນວັນດຽວກັນ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍໄດ້ສົ່ງໂທລະເລກເສົ້າສະຫລົດໃຈ ເຖິງ ທ່ານ ໂມຮາມັດ ຮັດຊານ ລັດຖະມົນຕີກະຊວງການຕ່າງປະເທດ ມາເລເຊຍ ຕໍ່ການເສຍຊີວິດຂອງ ທ່ານ ຕຸນອັບດຸນລາ ອາມັດ ບາດາວີ ອະດີດນາຍົກລັດຖະມົນຕີຄົນທີ 5 ແຫ່ງມາເລເຊຍ ຕໍ່ການເສຍຊີວິດຂອງ ທ່ານ ຕຸນອັບດຸນລາ ອາມັດ ບາດາວີ ອະດີດນາຍົກລັດຖະມົນຕີຄົນທີ 5 ແຫ່ງມາເລເຊຍ ເຊັ່ນດຽວກັນ.
-------------------------------------------------------------------------
ສານສະແດງຄວາມເສົ້າສະຫລົດໃຈ
ຂປລ. ໃນວັນທີ 4 ເມສາ 2025 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບສານສະແດງຄວາມເສົ້າສະຫລົດໃຈຈາກ ສົມເດັດພະກະນິດຖາທິຣາດເຈົ້າ ກົມສົມເດັດພະເທບພະຣັດຣາຊະສຸດາ ສະຫຍາມບໍຣົມຣາດຊະກຸມາຣີ ຕໍ່ການເຖິງແກ່ມໍລະນະກຳຂອງ ທ່ານ ພົນເອກ ຄຳໄຕ ສີພັນດອນ.
ເນື້ອໃນສານລະບຸວ່າ: ຂ້າພະເຈົ້າ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງກັບທ່ານ ແລະ ຄອບຄົວ ສີພັນດອນ ຕໍ່ການເຖິງແກ່ມໍລະນະກຳຂອງ ທ່ານ ພົນເອກ ຄຳໄຕ ສີພັນດອນ ເຊິ່ງເປັນບິດາອັນເປັນ ທີ່ແສນເຄົາລົບຮັກ ຂອງຄອບຄົວ. ຂ້າພະເຈົ້າ ໄດ້ມີໂອກາດຫລາຍຄັ້ງ ໃນການພົບປະ ແລະ ໂອ້ລົມກັບ ທ່ານ ພົນເອກ ຄຳໄຕ ສີພັນດອນ ໃນໂອກາດຢ້ຽມຢາມ ສປປ ລາວ ແລະ ໄດ້ມີໂອກາດຢ້ຽມ ຢາມບ້ານເກີດ ຂອງທ່ານ ພົນເອກ ຄໍາໄຕ ສີພັນດອນ ທີ່ຈໍາປາສັກ.
ທ່ານ ພົນເອກ ຄໍາໄຕ ສີພັນດອນ ເປັນບຸກຄົນທີ່ມີຄວາມສະຫລາດສ່ອງໃສ ແລະ ມີປະສົບການຊີວິດອັນກວ້າງຂວາງ ທຸກຄັ້ງທີ່ໄດ້ສົນທະນາ ໂອ້ລົມກັບທ່ານ, ຂ້າພະເຈົ້າລ້ວນແຕ່ໄດ້ຮັບຄວາມຮູ້ ແລະ ຂໍ້ຄິດຢ່າງເລິກເຊິ່ງ. ທ່ານ ພົນເອກ ຄໍາໄຕ ສີພັນດອນ ເປັນບຸກຄົນທີ່ີມີບົດບາດສຳຄັນຢ່າງຍິ່ງ ໃນການເສີມຂະຫຍາຍຄວາມເຂັ້ມແຂງ ແລະ ສ້າງສາພັດທະນາປະເທດຊາດ, ຜົນງານ ແລະ ຄຸນງາມຄວາມດີທັງໝົດ ທີ່ທ່ານອຸທິດໃຫ້ແກ່ ປະເທດຊາດອັນເປັນທີ່ຮັກ ຈະຖືກຈາລຶກໄວ້ຢ່າງບໍ່ມີວັນລືມ.
---------------------------------------------------------------
ສານສະແດງຄວາມເສົ້າສະຫລົດໃຈຈາກການນໍາຂັ້ນສູງ ຣາຊະອານາຈັກກໍາປູເຈຍ
ຂປລ. ວັນທີ 4 ເມສາ 2024 ຜ່ານມາ, ພະບາດ ສົມເດັດ ພະບໍຣົມມະນຽດ ໂນໂຣດົມ ສີຫາມຸນີ ພະມະຫາກະສັດ ແຫ່ງ ຣາຊະອານາຈັກ ກຳປູເຈຍ ໄດ້ສົ່ງສານສະແດງຄວາມເສົ້າສະຫລົດໃຈ ເຖິງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ຕໍ່ການມໍລະນະກຳ ຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານ ສູນກາງພັກປະຊາຊົນ ປະຕິວັດລາວ, ອະດີດປະ ທານປະເທດ ແຫ່ງ ສປປ ລາວ.
ເນື້ອໃນສານ ໄດ້ລະບຸວ່າ: ທ່ານປະທານປະເທດທີ່ນັບຖືຢ່າງສູງ ແລະ ຮັກແພງ, ຂ້າພະເຈົ້າໄດ້ຮັບຂ່າວທີ່ແສນເສົ້າສະຫລົດໃຈ ກ່ຽວກັບການມໍລະນະກຳຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານຄະນະ ບໍລິຫານງານສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແຫ່ງ ສປປ ລາວ ເມື່ອວັນທີ 2 ເມສາ 2025 ລວມອາຍຸ 102 ປີ.
ຂ້າພະເຈົ້າຂໍສະແດງຄວາມໂສກເສົ້າເສຍໃຈເປັນຍ່າງຍິ່ງ ຕໍ່ການມໍລະນະກຳຂອງ ທ່ານ ພົນເອກຄຳໄຕ ສີພັນດອນ ເຊິ່ງເປັນການສູນເສຍຜູ້ຊົງ ຄຸນວຸທິທາງການເມືອງແຫ່ງຊາດ ແລະ ວິລະບູລຸດທີ່ດີເດັ່ນຜູ້ໜຶ່ງຂອງປະເທດ ແລະ ປະຊາຊົນລາວ ຊຶ່ງໄລຍະຜ່ານມາທ່ານ ໄດ້ປະກອບສ່ວນຢ່າງຕັ້ງໜ້າໃນພາລະ ກິດການສ້າງສາ ແລະ ພັດທະນາ ສາທາລະນະລັດ ປະຊາທິປະໄຕ ປະຊາຊົນລາວ.
ສົມເດັດພະຣາຊີນີ ພະຣາຊະມານດາ ແຫ່ງຊາດກໍາປູເຈຍ ແລະ ຂ້າພະເຈົ້າ ພ້ອມທັງຄະນະນຳທຸກຂັ້ນ ແລະ ປະຊາຊົນ ໃນຣາຊະອານາຈັກກຳປູເຈຍ ຂໍສະແດງຄວາມເສົ້າສະຫລົດໃຈ ແລະ ອາໄລອາວອນມາຍັງຄອບຄົວ ແລະ ປະຊາຊົນລາວ. ຂ້າພະເຈົ້າ ຂໍໃຫ້ດວງວິນຍານຂອງ ທ່ານ ພົນເອກ ຄຳໄຕ ສີພັນດອນ ຈົ່ງໄປສູ່ສຸຂະຕິດ້ວຍເທີ້ນ.
ໂອກາດດຽວກັນ, ສົມເດັດ ອັກຄະມະຫາເສນາບໍດີ ເຕໂຈຮຸນເຊນ ຮັກສາການປະມຸກລັດແຫ່ງ ຣາຊະອານາຈັກກຳປູເຈຍ ກໍໄດ້ສົ່ງໂທລະເລກສະແດງຄວາມເສົ້າສະຫລົດໃຈ ເຖິງ ທ່ານ ສອງໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ຕໍ່ການມໍລະນະກຳ ຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານ ສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແຫ່ງ ສປປ ລາວ ເຊິ່ງເນື້ອໃນສານໄດ້ລະບຸວ່າ: ຂ້າພະເຈົ້າ ຮູ້ສຶກເສົ້າສະຫລົດໃຈຢ່າງສຸດຊຶ້ງ ທີ່ໄດ້ຮັບຂ່າວການຈາກໄປຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານ ສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແລະ ອະດີນາຍົກລັດຖະມົນຕີ ແຫ່ງ ສປປ ລາວ ທີ່ນະຄອນຫລວງວຽງຈັນ. ການເສຍຊີວິດຂອງທ່ານ ແມ່ນການສູນເສຍພໍ່ທີ່ແສນເຄົາລົບຮັກຂອງທ່ານແລະ ປະຊາຊົນລາວທັງຊາດ, ທັງເປັນການສູນເສຍບຸກຄົນທາງດ້ານການເມືອງ ແລະ ລັດຖະບຸລຸດທີ່ດີເດັ່ນ ຂອງປະຫວັດສາດແຫ່ງຊາດລາວ ທີ່ໄດ້ປະກອບສ່ວນນຳພາ ການສ້າງສາຄວາມຈະເລີນຮຸ່ງເຮືອງ.
ທ່ານ ພົນເອກ ຄຳໄຕ ສີພັນດອນ ຈະຖືກຈົດຈຳໄວ້ຕະຫລອດໄປ ຄືເພື່ອນມິດທີ່ຍິ່ງໃຫຍ່ ແລະ ຄູ່ຮ່ວມມືຂອງກຳປູເຈຍ ໃນຖານະເປັນນາຍົກລັດຖະມົນຕີ ແລະ ອະດີດປະທານ ປະເທດ ເຊິ່ງທ່ານໄດ້ມີບົດບາດ ໃນການສ້າງມິດຕະພາບ ລະຫວ່າງ ສອງປະເທດພວກເຮົາ. ການປະກອບສ່ວນອັນສຳຄັນຂອງ ທ່ານໄດ້ຮັດແໜ້ນສາຍພົວພັນ ຂອງສອງພັກພວກເຮົາ ທີ່ປະໄວ້ເປັນມໍລະດົກ ແລະ ປະຫວັດສາດອັນຍາວນານຮ່ວມກັນຂອງພວກເຮົາ.
ໃນທາມກາງການໄວ້ອາໄລຄັ້ງນີ້, ໃນນາມປະຊາຊົນກຳປູເຈຍ, ຂ້າພະເຈົ້າຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ແລະ ຄວາມເຫັນອົກເຫັນໃຈມາຍັງ ທ່ານ ແລະ ຄອບຄົວ ກໍຄື ປະຊາຊົນລາວ ແລະ ພັກປະຊາຊົນປະຕິວັດລາວ ທີ່ໄດ້ສູນເສຍຄັ້ງຍິ່ງໃຫຍ່, ຂໍໃຫ້ດວງວິນຍານຂອງທ່ານໄປສູ່ສຸຂະຕິຊົ່ວນິລັນດອນ.
ພ້ອມກັນນີ້, ສົມເດັດ ມະຫາ ບໍວໍ ທິບໍດີ ຮຸນ ມາແນດ ນາຍົກລັດຖະມົນຕີ ແຫ່ງ ຣາຊະອານາ ຈັກ ກຳປູເຈຍ ກໍໄດ້ສົ່ງໂທລະເລກສະແດງ ຄວາມເສົ້າສະຫລົດໃຈ ເຖິງ ທ່ານ ສອງໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ຕໍ່ການມໍລະນະກຳຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານ ສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແຫ່ງ ສປປ ລາວ ເຊັ່ນດຽວກັນ.
--------------------------------------------------------------
ໂທລະເລກເສົ້າສະຫລົດໃຈ ຈາກການນໍາຂັ້ນສູງ ສປປ ເກົາຫລີ
ຂປລ. ໃນວັນທີ 6 ເມສາ 2025 ນີ້, ສະຫາຍ ກິມ ເຈິງ ອຸນ ເລຂາທິການໃຫຍ່ພັກແຮງງານເກົາຫລີ, ປະທານກິດຈະການແຫ່ງລັດ ແຫ່ງ ສປປ ເກົາຫລີ ໄດ້ສົ່ງໂທລະເລກເສົ້າສະຫລົດໃຈ ເຖິງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ຕໍ່ການມໍລະນະກຳຂອງ ສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ ໃນວັນທີ 2 ເມສາ 2025 ຜ່ານມາ.
ເນື້ອໃນສານ ໄດ້ລະບຸວ່າ: ຂ້າພະເຈົ້າ ໄດ້ຮັບຂ່າວເສົ້າສະຫລົດໃຈວ່າ ສະຫາຍ ພົນເອກ ຄຳໄຕ ສີພັນດອນ ໄດ້ເຖິງແກ່ມໍລະນະກຳ, ຕາງໜ້າ ພັກແຮງງານເກົາຫລີ, ລັດຖະບານ ແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫລີ ແລະ ປະຊາຊົນເກົາຫລີ ກໍຄື ໃນນາມສ່ວນຕົວ ຂໍສະແດງຄວາມໂສກເສົ້າເສຍໃຈ ອັນສຸດຊຶ້ງ ມາຍັງ ສະຫາຍ ເລຂາທິການໃຫຍ່ ແລະ ໂດຍຜ່ານ ສະຫາຍ ໄປຍັງ ພັກ, ລັດຖະບານ, ປະຊາຊົນລາວ ແລະ ຄອບຄົວ ສີພັນດອນ.
ຂ້າພະເຈົ້າ ເຊື່ອໝັ້ນວ່າ ພັກ, ລັດຖະບານ ແລະ ປະຊາຊົນລາວ ຈະຜ່ານຜ່າຄວາມທຸກໂສກຕໍ່ການສູນເສຍຄັ້ງນີ້ ແລະ ສືບຕໍ່ຄວາມປະສົງຂອງ ສະຫາຍ ພົນເອກ ຄຳໄຕ ສີພັນດອນ ພັກ-ລັດ ແລະ ປະຊາຊົນລາວ ຈະສືບຕໍ່ຍາດໄດ້ຜົນສໍາເລັດອັນຍິ່ງໃຫຍ່ກວ່າເກົ່າ ໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕາມທິດສັງຄົມນິຍົມໃຫ້ມີຄວາມຈະເລີນຮຸ່ງເຮືອງ.
---------------------------------------------------------------------------------------------------------
ສານສະແດງຄວາມເສົ້າສະຫລົດໃຈຈາກ ສ ນິກາຣາກົວ
ຂປລ. ໃນວັນທີ 7 ເມສາ 2025 ນີ້, ສະຫາຍ ດານຽວ ອໍເຕກາ ຊາເວດຣາ ເລຂາທິການໃຫຍ່ພັກແນວໂຮມປົດປ່ອຍຊາດ ຊັງດິນິດສະຕາ, ປະທານາທິບໍດີ ແຫ່ງ ສ ນິກາຣາກົວ ແລະ ສະຫາຍ ນາງ ໂຣຊາຣິໂອ ມູຣິໂລ ຮອງປະທານາທິບໍດີ ສ ນິກາຣາກົວ ໄດ້ສົ່ງສານສະແດງຄວາມເສົ້າສະຫລົດໃຈ ເຖິງ ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຕໍ່ການຈາກໄປຂອງ ສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານເທດ ແຫ່ງ ສປປ ລາວ.
ເນື້ອໃນສານ ໄດ້ລະບຸວ່າ: ໃນນາມ ພັກ, ລັດຖະບານ ແລະ ປະຊາຊົນນິກາຣາກົວ ຂອງພວກຂ້າພະເຈົ້າ ຂໍສະແດງຄວາມເສຍໃຈຢ່າງສຸດຊຶ້ງ ຕໍ່ການຈາກໄປ ຂອງ ສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານ ສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ພວກຂ້າພະເຈົ້າ ຂໍສົ່ງຄວາມອາໄລອາວອນ ມາຍັງຄອບຄົວ ໂດຍສະເພາະ ສະຫາຍ ສອນໄຊ ສີພັນດອນ ນາຍົກລັດຖະມົນຕີ ເເຫ່ງ ສປປ ລາວ ແລະ ປະຊາຊົນລາວທຸກຖ້ວນໜ້າ. ພວກຂ້າພະເຈົ້າ ຂໍແບ່ງເບົາຄວາມໂສກເສົ້ານີ້ ໃນໄລຍະເວລາແຫ່ງ ຄວາມໂສກເສົ້າເສຍໃຈ ເພື່ອບັນເທົາຄວາມໂສກເສົ້າ ຂອງພວກສະຫາຍ ແລະ ຈົດຈໍາການຕໍ່ສູ້ປະຕິວັດຂອງ ອະດີດ ປະທານ ຄໍາໄຕ ສີພັນດອນ.
---------------------------------------------------------------------------------------------------------------------
ສານສະແດງຄວາມເສົ້າສະຫລົດໃຈຈາກການນໍາຂັ້ນສູງ ສ ກູບາ
ຂປລ. ວັນທີ 3 ເມສາ 2025, ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບສານສະແດງຄວາມເສົ້າສະຫລົດໃຈຈາກ ສະຫາຍ ມີແກັນ ດີເອັສ-ກາແນນ ເບີມູເດັສ ເລຂາທິການທີໜຶ່ງ ຄະນະບໍລິຫານງານສູນກາງພັກກອມມູນິດກູບາ, ປະທານປະເທດ ແຫ່ງ ສ ກູບາ ແລະ ພົນເອກ ຣາອູນ ກາດສໂຕຣ ຣູດ ຜູ້ນໍາປະຕິວັດກູບາ ຕໍ່ການມໍລະນະກໍາຂອງ ສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ເນື້ອໃນສານໄດ້ລະບຸວ່າ: ພວກຂ້າພະເຈົ້າ ຂໍສະແດງຄວາມເສຍໃຈຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ພົນເອກ ຄຳໄຕ ສີພັນດອນ.
ສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກປະຊາຊົນ ປະຕິວັດລາວ, ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ເປັນບຸກຄົນທີ່ີມີບົດບາດສຳຄັນ ທີ່ໄດ້ຕໍ່ສູ້ເພື່ອການປະຕິວັດປົດປ່ອຍຊາດ ເພື່ອຍາດເອົາຄວາມເປັນເອກະລາດແຫ່ງຊາດ ມາໃຫ້ແກ່ປະເທດລາວ ແລະ ຍັງໄດ້ປະກອບສ່ວນເຂົ້າໃນການຮັດແໜ້ນສາຍພົວພັນມິດຕະພາບກັບ ສ ກູບາ ໃຫ້ມີຄວາມໝັ້ນຄົງ ກາຍເປັນມໍລະດົກທີ່ລໍ້າຄ່າ ແລະ ຍືນຍົງ ສືບທອດມາສູ່ປະຊາຊົນຮຸ່ນລູກຫລານ ແລະ ໄດ້ກາຍເປັນແບບຢ່າງອັນດີງາມໃຫ້ກັບນັກປະຕິວັດໃນທົ່ວໂລກ.
ພວກຂ້າພະເຈົ້າ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ແລະ ຂໍແບ່ງເບົາຄວາມໂສກເສົ້ານີ້ ມາຍັງ ຄອບຄົວສີພັນດອນ ແລະ ສະຫາຍເພື່ອນມິດ ໃນຊ່ວງເວລາແຫ່ງຄວາມໂສກເສົ້າເສຍໃຈນີ້ດ້ວຍ.
--------------------------------------------------------------------
ສານສະແດງຄວາມເສົ້າສະຫລົດໃຈຈາກ ສາທາລະນະລັດ ເວເນຊູເອລາ
ຂປລ. ໃນວັນທີ 2 ເມສາ 2025 ຜ່ານມາ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ຮັບສານເສົ້າສະຫລົດໃຈຈາກ ທ່ານ ອີວານ ກີວ ລັດຖະມົນຕີກະຊວງການຕ່າງປະເທດ ແຫ່ງ ໂບລີວາຣຽນ ສາທາລະນະລັດ ເວເນຊູເອລາ ຕໍ່ການມໍລະນະກໍາຂອງ ສະຫາຍ ພົນເອກ ຄຳໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ເນື້ອໃນສານໄດ້ລະບຸວ່າ: ໃນນາມປະຊາຊົນ ແລະ ລັດຖະບານ ແຫ່ງ ໂບລີວາຣຽນ ສາທາລະນະລັດ ເວເນຊູເອລາ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈຢ່າງສຸດຊຶ້ງ ຕໍ່ການເສຍຊີວິດ ຂອງ ທ່ານ ພົນເອກ ຄຳໄຕ ສີພັນດອນ ຜູ້ນຳທີ່ມີວິໄສທັດ ແລະ ເປັນວິລະບຸລຸດທ່ານໜຶ່ງທີ່ສຳຄັນໃນປະຫວັດສາດຂອງລາວ.
ຈາກດິນແດນ ແຫ່ງ ໂບລີວາຣຽນ ສັງຄົມນິຍົມ ຂອງ ພວກຂ້າພະເຈົ້າ, ຂໍຍົກຍ້ອງຜົນງານຂອງ ທ່ານ ພົນເອກ ຄຳໄຕ ສີພັນດອນ ທີ່ໄດ້ອຸທິດຊີວິດ ແລະ ກໍາລັງແຮງຂອງຕົນ ເຂົ້າໃນການນໍາພາ-ຊີ້ນໍາ ຕໍ່ສູ້ເພື່ອປະເທດຊາດ ແລະ ທັງໄດ້ປະກອບສ່ວນສຳຄັນເຂົ້າໃນການສ້າງສາພັດທະນາປະເທດ ນໍາເອົາຄວາມຜາສຸກມາສູ່ປວງຊົນລາວທັງຊາດ, ອັນໄດ້ຖືກຈາລຶກໄວ້ໃຫ້ແກ່ຮຸ່ນລູກຫລານຂອງພວກເຮົາ.
ຂ່າວທີ່ເສົ້າສະຫລົດໃຈຄັ້ງນີ້, ລັດຖະບານ ເວເນຊູເອລາ ໃນຖານະເປັນເພື່ອນມິດທີ່ຮັກແພງ, ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ມາຍັງປະຊາຊົນລາວອ້າຍນ້ອງເພື່ອນມິດທີ່ຮັກແພງ ຂອງອະດີດປະທານປະເທດ ໂດຍສະເພາະ ຄອບຄົວຂອງ ທ່ານນາຍົກລັດຖະມົນຕີ ສອນໄຊ ສີພັນດອນ ໃນການສູນເສຍຜູ້ທີ່ເປັນບິດາ ແລະ ຂໍແບ່ງເບົາຄວາມໂສກເສົ້າໃນຄັ້ງນີ້ດ້ວຍ.
---------------------------------------------------------------------------------
ສານສະແດງຄວາມເສົ້າສະຫລົດໃຈຈາກນາຍົກລັດຖະມົນຕີ ຍີ່ປຸ່ນ
ຂປລ. ທ່ານ ອິຊິບະ ຊິເງະຣຸ ນາຍົກລັດຖະມົນຕີ ແຫ່ງ ປະເທດຍີ່ປຸ່ນ ໄດ້ສົ່ງສານສະແດງຄວາມເສົ້າສະຫລົດໃຈ ເຖິງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານເທດ ແຫ່ງ ສປປ ລາວ.
ເນື້ອໃນສານໄດ້ລະບຸວ່າ: ໃນນາມຕາງໜ້າລັດຖະບານ ແລະ ປະຊາຊົນ ຍີ່ປຸ່ນ, ຂ້າພະເຈົ້າ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງ ມາຍັງທ່ານ, ຄອບຄົວສີພັນດອນທຸກທ່ານ, ລັດຖະບານ ແລະ ປະຊາຊົນ ແຫ່ງ ສາທານະ ລັດ ປະຊາທິປະໄຕ ປະຊາຊົນລາວ ຕໍ່ການຈາກໄປຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຜູ້ເຊິ່ງເປັນບິດາຂອງທ່ານ.
ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ແມ່ນຜູ້ທີ່ປະກອບສ່ວນອັນໃຫຍ່ຫລວງເຂົ້າໃນການສ້າງສາ ພັດທະນາປະເທດຊາດ ໃນຍຸກສະໄໝທີ່ປະເທດລາວມີການປ່ຽນແປງ. ນອກຈາກນີ້, ທ່ານຍັງໄດ້ໄປຢ້ຽມຢາມປະເທດຍີ່ປຸ່ນ ໃນນາມນາຍົກລັດຖະມົນຕີ ໃນເວລານັ້ນ ແລະ ໄດ້ເອົາໃຈໃສ່ປະກອບສ່ວນຢ່າງຫ້າວຫັນເຂົ້າໃນການພັດທະນາສາຍພົວພັນມິດຕະພາບກັບປະເທດຍີ່ປຸ່ນ. ຂ້າພະເຈົ້າ ເຊື່ອວ່າ ຄວາມໂສກເສົ້າເສຍໃຈຕໍ່ກັບການຈາກໄປຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ທີ່ເປັນບຸກຄົນທີ່ແສນເຄົາລົບຮັກຂອງທ່ານ ແລະ ປວງຊົນລາວຢ່າງຫລວງຫລາຍ ແມ່ນບໍ່ສາມາດພັນລະນາອອກມາເປັນຄໍາເວົ້າໄດ້.
ອີກເທື່ອໜຶ່ງ, ຂ້າພະເຈົ້າ ຂໍສະແດງຄວາມອາໄລຢ່າງສຸດຊຶ້ງ ເຖິງດວງວິນຍານຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ທີ່ໄດ້ອຸທິດຕົນເຂົ້າໃນການພັດທະນາປະເທດຊາດ ຕະຫລອດຊີວິດຜ່ານມາຂອງທ່ານ ແລະ ຂໍໃຫ້ດວງວິນຍານຂອງທ່ານ ຈົ່ງໄປສູ່ສຸຂະຕິດ້ວຍເຖີ້ນ.
---------------------------------------------------------------------------------------
ໂທລະເລກສະແດງຄວາມເສົ້າສະຫລົດໃຈຈາກປະທານາທິບໍດີ ຣັດເຊຍ
ຂປລ. ວັນທີ 3 ເມສາ 2025 ນີ້, ທ່ານ ວາລາດີເມຍ ປູຕິນ ປະທານາທິບໍດີ ແຫ່ງ ສ ຣັດເຊຍ ໄດ້ສົ່ງໂທລະເລກສະແດງຄວາມເສົ້າສະຫລົດໃຈ ເຖິງ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານເທດ ແຫ່ງ ສປປ ລາວ.
ເນື້ອໃນໂທລະເລກ ໄດ້ລະບຸວ່າ: ຂ້າພະເຈົ້າ ຂໍສະແດງຄວາມເສຍໃຈຢ່າງສຸດຊຶ້ງ ຕໍ່ການເສຍຊີວິດຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກປະຊາຊົນ ປະຕິວັດລາວ, ອະດີດປະທານເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ບັນດາເຫດການສຳຄັນໃນປະຫວັດສາດສະໄໝໃໝ່ຂອງ ສປປ ລາວ ແມ່ນຕິດພັນກັບຊື່ສຽງຂອງນັກການເມືອງທີ່ໂດດເດັ່ນ, ຊຶ່ງ ທ່ານ ພົນເອກ ຄຳໄຕ ສີພັນດອນ ກໍແມ່ນໜຶ່ງໃນບັນດາຜູ້ນຳທີ່ໄດ້ຕໍ່ສູ້ເພື່ອປະເທດຊາດ ແລະ ໄດ້ປະກອບສ່ວນຕົນຢ່າງໃຫຍ່ຫລວງ ໃນການສະຖາປະນາ ສປປ ລາວ.
ສະຫະພັນຣັດເຊຍ ຈະຈົດຈຳຄຸນງາມຄວາມດີຂອງທ່ານ ໃນຖານະທີ່ເປັນຜູ້ນຳ ໃຫ້ການສະໜັບສະໜູນ ແບບສະເໝີຕົ້ນສະເໝີປາຍຜູ້ໜຶ່ງ ຕໍ່ການພັດທະນາການພົວພັນເພື່ອນມິດ ລະຫວ່າງ ສອງປະເທດພວກເຮົາ, ຊຶ່ງປະກອບສ່ວນຢ່າງໃຫຍ່ຫລວງ ຕໍ່ການຮັດແໜ້ນການຮ່ວມມືສອງຝ່າຍ ແບບຕ່າງຝ່າຍຕ່າງໄດ້ຮັບຜົນປະໂຫຍດ.
ຂ້າພະເຈົ້າ ຂໍສົ່ງຄວາມເຫັນໃຈຢ່າງສຸດຊຶ້ງ ແລະ ແບ່ງເບົາຄວາມທຸກໂສກ ມາຍັງຄອບຄົວ ແລະ ເພື່ອນມິດຂອງ ທ່ານ ອະດີດປະທານປະເທດ ກໍຄື ຕໍ່ປວງຊົນລາວທັງຊາດ.
-----------------------------------------------------------------------------------------------------------------
ສານສະແດງຄວາມເສົ້າສະຫລົດໃຈຈາກເຈົ້າຊີວິດ ແລະ ລັດຖະບານ ຣາຊະອານາຈັກໄທ
ຂປລ. ພະບາດສົມເດັດ ມະຫາວະຊິຣາລົງກອນ ພະວະຊິຣະເກົ້າເຈົ້າຢູ່ຫົວ ແຫ່ງຣາຊະອານາຈັກໄທ ໄດ້ສົ່ງສານສະແດງຄວາມເສົ້າສະຫລົດໃຈ ເຖິງ ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາ ທິປະໄຕ ປະຊາຊົນລາວ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານເທດ ແຫ່ງ ສປປ ລາວ.
ເນື້ອໃນສານໄດ້ລະບຸວ່າ: ຂ້າພະເຈົ້າ ແລະ ພະຣາຊີນີ ຮູ້ສຶກເສົ້າອາໄລຢ່າງຍິ່ງ ທີ່ໄດ້ຮັບຂ່າວການເຖິງແກ່ມໍລະ ນະກຳຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ການຈາກໄປຂອງທ່ານນັ້ນ ນັບເປັນການສູນເສຍຜູ້ນໍາ ແລະ ລັດຖະບຸລຸດທີ່ສໍາຄັນຍິ່ງທ່ານໜຶ່ງ ຂອງລາວ. ພາຍໃຕ້ການນໍາພາຂອງ ທ່ານອະດີດປະທານປະເທດ, ການປະຕິຮູບ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ດໍາເນີນໄປຢ່າງມີສະຖຽນລະພາບ ແລະ ຄວາມໝັ້ນຄົງ ໂດຍສະເພາະ ການພັດທະນາເສດຖະກິດ ແລະ ສັງຄົມ ໃນຂະນະທີ່ ທ່ານອະດີດປະທານປະເທດ ດໍາລົງຕໍາແໜ່ງນາຍົກລັດຖະມົນຕີ ກໍໄດ້ມີບົດບາດທີ່ສໍາຄັນ ໃນການເສີມຂະຫຍາຍສາຍພົວພັນ ລາວ-ໄທ ໃນຖານະເພື່ອນບ້ານທີ່ໃກ້ຊິດ ປຽບສະເໝືອນຄອບຄົວດຽວກັນ ໃຫ້ແໜ້ນແຟ້ນຍິ່ງຂຶ້ນ.
ໃນນາມຂອງປະຊາຊົນຊາວໄທ ຂ້າພະເຈົ້າ ຂໍສະແດງຄວາມເສຍໃຈຢ່າງສຸດຊຶ້ງມາຍັງ ທ່ານປະທານປະເທດ ຕະຫລອດເຖິງປະຊາຊົນຊາວລາວ ໂດຍສະເພາະຢ່າງຍິ່ງ ຕໍ່ຄອບຄົວຂອງ ທ່ານອະດີດປະທານປະເທດ ໃນການສູນ ເສຍທີ່ບໍ່ອາດທົນແທນໄດ້ໃນຄັ້ງນີ້.
ໃນໂອກາດນີ້, ທ່ານ ແພທອງທານ ຊິນນະວັດ ນາຍົກລັດຖະມົນຕີ ແຫ່ງ ຣາຊະອານາຈັກໄທ ກໍໄດ້ສົ່ງສານສະແດງຄວາມເສົ້າສະຫລົດໃຈເຖິງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິ ປະໄຕ ປະຊາຊົນລາວ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານເທດ ແຫ່ງ ສປປ ລາວ ເຊິ່ງມີເນື້ອໃນດັ່ງນີ້: ຂ້າພະເຈົ້າ ແລະ ປະຊາຊົນໄທ ຂໍສະແດງຄວາມເສົ້າສະຫລົດໃຈຢ່າງສຸດຊຶ້ງກັບ ທ່ານນາ ຍົກລັດຖະມົນຕີ ສອນໄຊ ແລະ ຄອບຄົວ ຕໍ່ການເຖິງແກ່ມໍລະນະກຳ ຂອງ ທ່ານ ພົນເອກ ຄຳໄຕ ສີພັນດອນ ອະດີດປະທານປະເທດ ແລະ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ2 ເມສາ 2025.
ທ່ານ ພົນເອກ ຄຳໄຕ ສີພັນດອນ ເປັນບຸກຄົນທີ່ີມີບົດບາດສຳຄັນຢ່າງຍິ່ງ ໃນການພັດທະນາ ສາທາລະນະ ລັດ ປະຊາທິປະໄຕ ປະຊາຊົນລາວ ແລະ ສາຍພົວພັນ ລະຫວ່າງ ຣາຊະອານາຈັກໄທ ແລະ ສາທາລະນະລັດ ປະຊາ ທິປະໄຕ ປະຊາຊົນລາວ ໃຫ້ມີຄວາມໝັ້ນຄົງ ແລະ ຍືນຍົງ ຕະຫລອດໄລຍະກວ່າ7 ທົດສະວັດ ຜ່ານມາ.
ການຢ້ຽມຢາມ ຣາຊະອານາຈັກໄທ ຢ່າງເປັນທາງການ ຂອງ ທ່ານ ພົນເອກ ຄຳໄຕ ສີພັນດອນ ໃນເດືອນ ກຸມພາ1992 ຖືເປັນຫລັກໝາຍສໍາຄັນຂອງສາຍພົວພັນລະຫວ່າງສອງປະເທດ ແລະ ເປັນພື້ນຖານສໍາຄັນຂອງການ ຮ່ວມມື ລະຫວ່າງ ປະເທດໄທ ແລະ ສາທາລະນະລັດ ປະຊາທິປະໄຕ ປະຊາຊົນລາວ ທີ່ຈະເລີນງອກງາມ ແລະ ມີຜົນປະໂຫຍດຕໍ່ຄວາມຢູ່ດີກິນດີ ຂອງປະຊາຊົນ ໄທ-ລາວ ມາຈົນເຖິງປັດຈຸບັນນີ້.
ຂ້າພະເຈົ້າ ແລະ ປະຊາຊົນໄທ ຂໍຮ່ວມໄວ້ອາໄລ ກັບ ທ່ານນາຍົກລັດຖະມົນຕີ ສອນໄຊ ແລະ ຄອບຄົວ ສີພັນດອນ ຕະຫລອດເຖິງ ປະຊາຊົນລາວ ໃນຊ່ວງເວລາແຫ່ງຄວາມເສົ້າໂສກເສຍໃຈນີ້ດ້ວຍ.
ພ້ອມກັນນີ້, ທ່ານ ມາຣິດ ສະງ່ຽງພົງ ລັດຖະມົນຕີວ່າການກະຊວງການຕ່າງປະເທດ ແຫ່ງ ຣາຊະອານາຈັກໄທ ກໍໄດ້ສົ່ງ ສານສະແດງຄວາມເສົ້າສະຫລົດໃຈ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະ ທານເທດ ແຫ່ງ ສປປ ລາວ ເຖິງ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ເຊັ່ນດຽວກັນ.
-------------------------------------------------------------------------------------------------------------------------------------------
ສານສະແດງຄວາມເສົ້າສະຫລົດໃຈ ຈາກນາຍົກລັດຖະມົນຕີ ຍີ່ປຸ່ນ
ຂປລ. ທ່ານ ອິຊິບະ ຊິເງະຣຸ ນາຍົກລັດຖະມົນຕີ ແຫ່ງ ປະເທດຍີ່ປຸ່ນ ໄດ້ສົ່ງສານສະແດງຄວາມເສົ້າສະ ຫລົດໃຈເຖິງ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຕໍ່ການມໍລະນະກໍາຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານເທດ ແຫ່ງ ສປປ ລາວ.
ເນື້ອໃນສານໄດ້ລະບຸວ່າ: ໃນນາມຕາງໜ້າລັດຖະບານ ແລະ ປະຊາຊົນ ຍີ່ປຸ່ນ, ຂ້າພະເຈົ້າ ຂໍສະແດງຄວາມ ເສົ້າສະຫລົດໃຈຢ່າງສຸດຊຶ້ງ ມາຍັງທ່ານ, ຄອບຄົວສີພັນດອນທຸກທ່ານ, ລັດຖະບານ ແລະ ປະຊາຊົນ ແຫ່ງ ສາທານະ ລັດ ປະຊາທິປະໄຕ ປະຊາຊົນລາວ ຕໍ່ການຈາກໄປຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຜູ້ເຊິ່ງເປັນບິດາຂອງທ່ານ.
ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ແມ່ນຜູ້ທີ່ປະກອບສ່ວນອັນໃຫຍ່ຫລວງເຂົ້າໃນ ການສ້າງສາພັດທະນາປະເທດຊາດ ໃນຍຸກສະໄໝທີ່ປະເທດລາວມີການປ່ຽນແປງ. ນອກຈາກນີ້, ທ່ານຍັງໄດ້ໄປ ຢ້ຽມຢາມປະເທດຍີ່ປຸ່ນ ໃນນາມນາຍົກລັດຖະມົນຕີໃນເວລານັ້ນ ແລະ ໄດ້ເອົາໃຈໃສ່ປະກອບສ່ວນຢ່າງຫ້າວຫັນ ເຂົ້າໃນການພັດທະນາສາຍພົວພັນ ມິດຕະພາບກັບປະເທດຍີ່ປຸ່ນ. ຂ້າພະເຈົ້າ ເຊື່ອວ່າ ຄວາມໂສກເສົ້າເສຍໃຈ ຕໍ່ກັບ ການຈາກໄປຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ທີ່ເປັນບຸກຄົນທີ່ແສນເຄົາລົບຮັກຂອງ ທ່ານ ແລະ ປວງຊົນລາວ ຢ່າງຫລວງຫລາຍ ແມ່ນບໍ່ສາມາດພັນລະນາອອກມາເປັນຄໍາເວົ້າໄດ້.
ອີກເທື່ອໜຶ່ງ, ຂ້າພະເຈົ້າ ຂໍສະແດງຄວາມອາໄລຢ່າງສຸດຊຶ້ງ ເຖິງດວງວິນຍານຂອງ ທ່ານ ພົນເອກ ຄໍາໄຕ ສີພັນດອນ ອະດີດປະທານປະເທດ ທີ່ໄດ້ອຸທິດຕົນເຂົ້າໃນການພັດທະນາປະເທດຊາດ ຕະຫລອດຊີວິດຜ່ານມາຂອງ ທ່ານ ແລະ ຂໍໃຫ້ດວງວິນຍານຂອງທ່ານ ຈົ່ງໄປສູ່ສຸຂະຕິດ້ວຍເຖີ້ນ.
-------------------------------------------------------------------
ໂທລະເລກສະແດງຄວາມເສົ້າສະຫລົດໃຈ ຈາກການນໍາຂັ້ນສູງ ສປ ຈີນ
ຂປລ. ໃນວັນທີ 2 ເມສາ 2025, ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ ໄດ້ສົ່ງໂທລະເລກສະແດງຄວາມເສົ້າສະຫລົດໃຈ ເຖິງ ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປປ ລາວ, ປະທານປະເທດ ແຫ່ງ ສປປ ລາວ ຕໍ່ການມໍລະນະກໍາຂອງ ສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານປະເທດ ແຫ່ງ ສປປ ລາວ.
ເນື້ອໃນໂທລະເລກ ໄດ້ລະບຸວ່າ: ຂ້າພະເຈົ້າ ຂໍຕາງໜ້າໃຫ້ ພັກກອມມູນິດຈີນ, ລັດຖະບານຈີນ, ປະຊາຊົນຈີນ ແລະ ໃນນາມສ່ວນຕົວ, ຂໍສະແດງຄວາມເສົ້າສະຫລົດໃຈ ແລະ ອາໄລອາວອນຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ພົນເອກ ຄໍາໄຕ ສີພັນດອນ ແລະ ສະແດງຄວາມເຫັນໃຈຢ່າງຈິງໃຈ ມາຍັງຄອບຄົວ ຂອງ ສະຫາຍ ພົນເອກ ຄໍາໄຕ ສີພັນດອນ.
ສະຫາຍ ພົນເອກ ຄໍາໄຕ ສີພັນດອນ ແມ່ນນັກກອມມູນິດທີ່ໜັກແໜ້ນ, ແມ່ນການນໍາທີ່ດີເດັ່ນ ຂອງການນໍາລຮຸ່ນອະວຸໂສຂອງພັກ ແລະ ລັດລາວ, ແມ່ນສະຫາຍ ແລະ ເພື່ອນມິດທີ່ສະໜິດສະໜົມຂອງພັກ ແລະ ປະຊາຊົນຈີນ, ເພິ່ນໄດ້ອຸທິດສະຕິປັນຍາ ແລະ ກຳລັງວັງຊາຕະຫລອດຊີວິດ ເພື່ອພາລະກິດປ່ຽນແປງໃໝ່ ແລະ ການສ້າງສາສັງຄົມນິຍົມຂອງປະເທດລາວ, ໄດ້ປະກອບ ສ່ວນສໍາຄັນເຂົ້າໃນການພັດທະນາສາຍພົນພັນສອງພັກ, ສອງລັດ ຈີນ-ລາວ, ພັກ, ລັດ ແລະ ປະຊາ ຊົນຈີນ ຈະລະນຶກເຖິງ ສະຫາຍ ຄໍາໄຕ ຕະຫລອດໄປ.
ປະເທດຈີນ ກັບ ປະເທດລາວ ແມ່ນປະເທດສັງຄົມນິຍົມບ້ານໃກ້ເຮືອນຄຽງ ທີ່ມີສາຍພູ, ສາຍນໍ້າຕິດຈອດກັນ, ແມ່ນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີ ແລະ ຄູ່ຮ່ວມມືທີ່ດີ. ຝ່າຍຈີນ ຖືສໍາຄັນໃນລະດັບສູງຕໍ່ການເສີມສ້າງ ແລະ ເສີມຂະຫຍາຍສາຍພົວພັນມິດຕະພາບທີ່ເປັນມູນເຊື້ອລະຫວ່າງ ສອງພັກ, ສອງລັດ ຈີນ-ລາວ, ຝ່າຍຈີນ ຍິນດີພະຍາຍາມຮ່ວມກັນກັບຝ່າຍລາວ ຊຸກຍູ້ການສ້າງຄູ່ຮ່ວມຊາຕາກໍາ ຈີນ-ລາວ ແລະ ການສ້າງສາພາລະກິດສັງຄົມນິຍົມຂອງແຕ່ລະປະເທດ ໃຫ້ມີການພັດທະນາຍິ່ງໆຂຶ້ນຢ່າງບໍ່ຢຸດຢັ້ງ.
ຂໍອວຍພອນໃຫ້ພາລະກິດກໍ່ສ້າງພັກ ແລະ ປະເທດລາວ ປະສົບຜົນສຳເລັດອັນໃໝ່, ໃຫຍ່ຫລວງກວ່າເກົ່າຢ່າງບໍ່ຢຸດຢັ້ງ ພາຍໃຕ້ການນໍາພາອັນໜັກແໜ້ນ ຂອງສູນກາງພັກປະຊາຊົນ ປະຕິວັດລາວ ທີ່ຖື ສະຫາຍ ທອງລຸນ ສີສຸລິດ ເປັນເລຂາທິການໃຫຍ່.
ສະຫາຍ ພັນເອກ ຄໍາໄຕ ສີພັນດອນ ຍືນຍົງໃນພາລະກິດປະຕິວັດລາວ ຊົ່ວກາລະນານ.
-------------------------------------------------------------------------------------------------
ໂທລະເລກເສົ້າສະຫລົດໃຈ
ຂປລ. ຄະນະບໍລິຫານງານສູນກາງພັກກອມມູນິດຫວຽດນາມ, ປະທານປະເທດ, ລັດຖະບານ, ສະພາແຫ່ງຊາດ, ຄະນະກໍາມະການສູນກາງ ແນວໂຮມປະເທດຊາດຫວຽດນາມ ໄດ້ສົ່ງໂທລະເລກເສົ້າສະຫລົດໃຈ ມາຍັງຄະນະບໍລິຫານງານສູນກາງພັກປະຊາຊົນ ປະຕິວັດລາວ, ປະທານປະເທດ, ລັດຖະ ບານ, ສະພາແຫ່ງຊາດ, ສູນກາງແນວລາວສ້າງຊາດ ຕໍ່ການມໍລະນະກໍາຂອງ ສະຫາຍ ພົນເອກ ຄໍາໄຕ ສີພັນດອນ ອະດີດປະທານຄະນະບໍລິຫານງານສູນກາງພັກ, ອະດີດປະທານເທດ ແຫ່ງ ສປປ ລາວ.
ເນື້ອໃນໂທລະເລກ ໄດ້ລະບຸວ່າ: ຄະນະບໍລິຫານງານສູນກາງພັກກອມມູນິດຫວຽດນາມ, ປະ ທານປະເທດ, ລັດຖະບານ, ສະພາແຫ່ງຊາດ, ຄະນະກຳມະການສູນກາງແນວໂຮມ ປະເທດຊາດຫວຽດ ນາມ ແລະ ປະຊາຊົນຫວຽດນາມ ຂໍສະແດງຄວາມເສົ້າສະຫລົດໃຈ ແລະ ອາໄລອາວອນຢ່າງສຸດຊຶ້ງເມື່ອໄດ້ຮັບຂ່າວ ສະຫາຍ ພົນເອກ ຄຳໄຕ ສີພັນດອນ ອະດີດປະທານພັກ, ອະດີດປະທານປະເທດ ແຫ່ງ ສປປ ລາວ ໄດ້ເຖິງແກ່ມໍລະນະກຳ ໃນວັນທີ 2 ເມສາ 2025.
ສະຫາຍ ພົນເອກ ຄຳໄຕ ສີພັນດອນ ແມ່ນການນຳທີ່ດີເດັ່ນຮຸ່ນທຳອິດ, ເປັນແກນນໍາຫລັກແຫລ່ງຂອງສູນກາງພັກປະຊາຊົນ ປະຕິວັດລາວ, ເປັນຜູ້ນຳທີ່ແສນເຄົາລົບຮັກ ຂອງປະຊາຊົນລາວບັນດາ ເຜົ່າ, ເປັນນັກຮົບປະຕິວັດທີ່ຈົງຮັກພັກດີ, ຕະຫລອດຊີວິດໄດ້ເສຍສະລະສູ້ຊົນ ເພື່ອຄວາມເປັນເອກະ ລາດຂອງຊົນຊາດ, ສິດເສລີພາບ, ຄວາມຜາສຸກຂອງປະຊາຊົນ ແລະ ການພັດທະນາຄວາມຈະເລີນຮຸ່ງເຮືອງຂອງປະເທດຊາດ.
ການຈາກໄປຂອງ ສະຫາຍ ພົນເອກ ຄຳໄຕ ສີພັນດອນ ເປັນການສູນເສຍອັນໃຫຍ່ຫລວງ ສຳ ລັບພັກ, ລັດ, ປະຊາຊົນລາວ ແລະ ຄອບຄົວຂອງສະຫາຍ. ພັກ, ລັດ, ກອງທັບ ແລະ ປະຊາຊົນຫວຽດນາມ ໄດ້ສູນເສຍຜູ້ເປັນເພື່ອນມິດທີ່ຍິ່ງໃຫຍ່, ສະຫາຍອ້າຍນ້ອງທີ່ສະໜິດສະໜົມທີ່ສຸດ ທີ່ເຄີຍໄດ້ຕໍ່ສູ້ຄຽງບ່າຄຽງໄຫລ່ ໃນການຕໍ່ຕ້ານອັນ ຍືດເຍື້ອຍາວນານ ຂອງສອງປະເທດ. ສະຫາຍ ຍາມໃດກໍສະໜັບສະໜູນຕໍ່ ພາລະກິດສ້າງສາ ແລະ ປົກປັກຮັກສາປະເທດຊາດຂອງປະຊາຊົນຫວຽດນາມ ແລະ ໄດ້ມີການປະກອບສ່ວນສຳຄັນຫລວງຫລາຍໃນການສ້າງສາ, ຮັດແໜ້ນ ແລະ ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ-ລາວ.
ພັກ, ລັດ ແລະ ປະຊາຊົນຫວຽດນາມ ຕີລາຄາສູງຕໍ່ບັນດາການອຸທິດອັນໃຫຍ່ຫລວງຂອງ ສະ ຫາຍ ພົນເອກ ຄໍາໄຕ ສີພັນດອນ ໃນພາລະກິດຕໍ່ສູ້ຍາດເອົາເອກະລາດແຫ່ງຊາດຂອງປະຊາຊົນລາວ ໃນເມື່ອກ່ອນ ກໍຄື ໃນພາລະກິດປ່ຽນແປງໃໝ່, ປົກປັກຮັກສາ, ສ້າງສາ ແລະ ພັດທະນາຊາດຂອງ ສປປ ລາວ ໃນປັດຈຸບັນ.
ພັກ, ລັດ, ຄະນະກຳມະການສູນກາງແນວໂຮມ ປະເທດຊາດຫວຽດນາມ ແລະ ປະຊາຊົນຫວຽດນາມ ຂໍແບ່ງເບົາຄວາມເສົ້າສະຫລົດໃຈອັນສຸດຊຶ້ງ ແລະ ແບ່ງປັນຄວາມທຸກໂສກທີ່ສຸດ ມາຍັງ ພັກ, ລັດ, ຄະນະກຳມະການສູນກາງແນວລາວສ້າງຊາດ, ປະຊາຊົນລາວ ແລະ ຄອບຄົວຂອງ ສະຫາຍ ຄຳໄຕ ສີພັນດອນ ມານະໂອກາດນີ້ດ້ວຍ.
ພວກຂ້າພະເຈົ້າ ມີຄວາມເຊື່ອໝັ້ນວ່າ ພັກ, ລັດ, ປະຊາຊົນລາວ ອ້າຍນ້ອງ ແລະ ຄອບຄົວຂອງ ສະຫາຍ ຄຳໄຕ ສີພັນດອນ ຈະຜ່ານຜ່າຄວາມທຸກໂສກເສຍດາຍອັນໃຫຍ່ຫລວງນີ້ ໂດຍໄວ ແລະ ສືບຕໍ່ພາລະກິດສ້າງສາປະເທດລາວ ໃຫ້ນັບມື້ພັດທະນາຈະເລີນຮຸ່ງເຮືອງ.
------------------------------------------------------------------------------------------------------------------------------------
ໂທລະສານສະແດງຄວາມເຫັນໃຈຕໍ່ເຫດການແຜ່ນດິນໄຫວ ຢູ່ມຽນມາ
ຂປລ. ໃນວັນທີ 29 ມີນາ 2025 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ສົ່ງໂທລະສານສະແດງຄວາມເຫັນໃຈ ເຖິງ ທ່ານ ພົນເອກ ອາວຸໂສ ມິນ ອອງ ລາຍ ປະທານສະພາບໍລິຫານ ແຫ່ງ ລັດ, ນາຍົກລັດຖະມົນຕີ ແຫ່ງ ສາທາລະນະລັດ ສະຫະພາບມຽນມາ ຕໍ່ເຫດການແຜ່ນດິນໄຫວທີ່ເກີດຂຶ້ນ ຢູ່ ສສ ມຽນມາ ໃນວັນທີ 28 ມີນາ 2025 ຜ່ານມາ.
ເນື້ອໃນໂທລະສານ ໄດ້ລະບຸໄວ້ວ່າ: ຂ້າພະເຈົ້າ ໄດ້ຮັບຂ່າວດ້ວຍຄວາມເສົ້້າເສຍໃຈ ຕໍ່ເຫດການແຜ່ນດິນໄຫວທີ່ເກີດຂຶ້ນ ຢູ່ ສາທາລະນະລັດ ສະຫະພາບມຽນມາ ໃນວັນທີ 28 ມີນາ 2025 ຜ່ານມາ ເຊິ່ງໄດ້ສ້າງຄວາມເສຍຫາຍທາງດ້ານຊິວິດ ແລະ ສັັບຊິນ ແກ່ປະຊາຊົນມຽນມາ.
ຂ້າພະເຈົ້້າ ຕາງໜ້າໃຫ້ລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ ຂໍສະແດງຄວາມເຫັນໃຈ ແລະ ເສົ້້າສະຫລົດໃຈມາຍັງທ່ານ, ລັດຖະບານ ແລະ ປະຊາຊົນ ມຽນມາ ໂດຍສະເພາະ ບັນດາຄອບຄົວຂອງຜູ້ໄດ້ຮັບເຄາະຮ້າຍ ຈາກເຫດການແຜ່ນດີນໄຫວໃນຄັ້ງນີ້.
ຂ້າພະເຈົ້າ ເຊື້ອໝັ້ນວ່າ ດ້ວຍຄວາມເອົາໃຈໃສ່ ຂອງທ່ານ ແລະ ລັດຖະບານ, ປະຊາຊົນມຽນມາ ຈະຜ່ານຜ່າຄວາມຫຍຸ້ງຍາກທີ່ເກີດຂຶ້ນ ແລະ ຟື້ນຟູເຂດທີ່ໄດ້ຮັບຜົນກະທົບ ໃຫ້ກັບຄືນສູ່ສະພາບປົກກະຕິໂດຍໄວ.
ໃນໂອກາດດຽວກັນ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ກໍໄດ້ສົ່ງ ໂທລະສານສະແດງຄວາມເຫັນໃຈ ເຖິງທ່ານ ອູ ທັນ ສະເວ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ ມຽນມາ ເຊັ່ນດຽວກັນ.
---------------------------------------------------------------------------------------------
ໂທລະສານສະແດງຄວາມເຫັນໃຈ
ຂປລ. ໃນວັນທີ 29 ມີນາ 2025 ນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ສົ່ງ ໂທລະສານສະແດງຄວາມເຫັນໃຈ ເຖິງທ່ານ ນາງ ແພທອງທານ ຊິນນະວັດ ນາຍົກລັດຖະມົນຕີ ແຫ່ງ ຣາຊະອານາຈັກໄທ ຕໍ່ສະພາບການແຜ່ນດິນໄຫວຮຸນແຮງ ຢູ່ ຣາຊະອານາຈັກໄທ ໃນວັນທີ 28 ມີນາ 2025 ຜ່ານມາ.
ເນື້ອໃນໂທລະສານ ໄດ້ລະບຸວ່າ: ຂ້າພະເຈົ້າ ໄດ້ຮັບຂ່າວສະພາບການແຜ່ນດິນໄຫວຮຸນແຮງ ຢູ່ ຣາຊະອານາຈັກໄທ ໃນວັນທີ 28 ມີນາ 2025 ຜ່ານມາ, ຊຶ່ງໄດ້ເຮັດໃຫ້ມີຜູ້ໄດ້ຮັບບາດເຈັບ, ເສຍຊີວິດ ແລະ ຊັບສິນຂອງ ປະຊາຊົນ ເສຍຫາຍເປັນຈໍານວນຫລວງຫລາຍ.
ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນອົກເຫັນໃຈຢ່າງສຸດຊຶ້ງ ມາຍັງ ທ່ານ ແລະ ຜ່ານທ່ານ ໄປຍັງ ລັດຖະບານ ແລະ ປະຊາຊົນໄທ ໂດຍສະເພາະ ຕໍ່ຄອບຄົວຜູ້ທີ່ໄດ້ຮັບຜົນກະທົບ ຈາກເຫດການແຜ່ນ ດິນໄຫວໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ພາຍໃຕ້ການຊີ້ນຳ-ນຳພາ ຢ່າງໃກ້ຊິດ ຂອງທ່ານ ກໍຄື ລັດຖະບານ ແລະ ການສະໜັບສະໜູນ ໃນການຮ່ວມມືຂອງທຸກພາກສ່ວນໃນສັງຄົມ, ລັດຖະບານ ແລະ ປະຊາຊົນໄທ ຈະສາມາດຜ່ານຜ່າ ຄວາມຫຍຸ້ງຍາກໃນຄັ້ງນີ້ ແລະ ເຮັດໃຫ້ສະພາບການກັບຄືນສູ່ປົກກະຕິໂດຍໄວ.
ໃນໂອກາດດຽວກັນ, ທ່ານ ທອງສະຫວັນ ພົມວິຫານ ລັດຖະມົນຕີກະຊວງ ການຕ່າງປະເທດ ແຫ່ງ ສປປ ລາວ ກໍໄດ້ສົ່ງໂທລະສານສະແດງຄວາມເຫັນໃຈເຖິງ ທ່ານ ມາຣິດ ສະງ່ຽມພົງ ລັດຖະມົນຕີວ່າການກະຊວງ ການຕ່າງປະເທດ ແຫ່ງ ຣາຊະອານາຈັກໄທ ຕໍ່ສະພາບການແຜ່ນດິນໄຫວຮຸນແຮງ ຢູ່ ຣາຊະອານາຈັກໄທ ເຊັ່ນດຽວກັນ.
----------------------------------------------------------------------------
ສານອວຍພອນວັນຊາດ ສີລັງກາ ຄົບຮອບ 77ປີ
ຂປລ. ເມື່ອບໍ່ດົນມານີ້, ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາ ທິປະໄຕ ປະຊາຊົນລາວ ໄດ້ສົ່ງສານອວຍພອນ ເຖິງ ທ່ານ ອານຸຣາ ກູມາຣາ ດິດສານາຍາເກ ປະທານາ ທິບໍດີ ແຫ່ງ ສາທາລະນະລັດ ປະຊາທິປະໄຕ ສັງຄົມນິຍົມ ສີລັງກາ ໃນໂອກາດວັນຊາດ ແຫ່ງ ສາທາລະ ນະລັດປະຊາທິປະໄຕ ສັງຄົມນິຍົມ ສີລັງກາ ຄົບຮອບ 77 ປີ.
ເນື້ອໃນສານໄດ້ລະບຸວ່າ: ໃນນາມປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍອັນອົບອຸ່ນມາຍັງທ່ານ ແລະ ປະຊາ ຊົນ ສີລັງກາ ທຸກຖ້ວນໜ້າ ເນື່ອງໃນໂອກາດວັນຊາດ ແຫ່ງ ສາທາລະນະລັດ ປະຊາທິປະໄຕ ສັງຄົມນິຍົມ ສີລັງກາ ຄົບຮອບ 77 ປີ.
ຂ້າພະເຈົ້າ ມີຄວາມປິຕິຍິນດີທີ່ເຫັນວ່າ ສປປ ລາວ ແລະ ສີລັງກາ ມີສາຍພົວພັນມິດຕະພາບ ແລະ ມີການຮ່ວມມືອັນດີຕະຫລອດໄລຍະທີ່ຜ່ານມາ. ຂ້າພະເຈົ້າເຊື່ອໝັ້ນວ່າ ການພົວພັນທີ່ດີດັ່ງກ່າວ ຈະສືບຕໍ່ໄດ້ຮັບການຮັດແໜ້ນ ແລະ ເສີມຂະຫຍາຍ ໃນຊຸມປີຕໍ່ໜ້າ ເພື່ອຜົນປະໂຫຍດຂອງປະຊາຊົນສອງຊາດພວກເຮົາ.
ຂ້າພະເຈົ້າ ຂໍຖືໂອກາດອັນສະຫງ່າລາສີນີ້, ອວຍພອນມາຍັງທ່ານ ຈົ່ງມີພະລານາໄມທີ່ສົມບູນ, ມີຄວາມຜາສຸກ ແລະ ປະສົບຜົນສຳເລັດ ໃນໜ້າທີ່ອັນມີກຽດສູງສົ່ງຂອງທ່ານ ແລະ ຂໍອວຍພອນໃຫ້ ປະ ຊາຊົນ ສີລັງກາ ຈົ່ງສືບຕໍ່ມີຄວາມກ້າວໜ້າ ແລະ ວັດທະນະຖາວອນ.
ໂອກາດນີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດ ປະຊາຊທິປະໄຕ ປະຊາຊົນລາວ ກໍໄດ້ສົ່ງສານອວຍພອນວັນຊາດເຖິງ ທ່ານ ນາງ ຮາຣີນີ ອາມາຊາສຸຣິຍານາຍົກ ລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ສັງຄົມນິຍົມ ສີລັງກາ ແລະ ທ່ານ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍໄດ້ສົ່ງສານອວຍພອນວັນຊາດເຖິງ ທ່ານ ວິຈິດຖາ ເຮຣາດ ລັດຖະມົນຕີກະຊວງການຕ່າງປະ ເທດ, ການຈ້າງງານການຕ່າງປະເທດ ແລະ ການທ່ອງທ່ຽວແຫ່ງ ສາທາລະນະລັດ ປະຊາທິປະໄຕ ສັງຄົມນິຍົມ ສີລັງກາ ໃນໂອກາດວັນຊາດ ແຫ່ງ ສາທາລະນະລັດ ປະຊາທິປະໄຕ ສັງຄົມນິຍົມ ສີລັງກາ ຄົບຮອບ 77 ປີ ເຊັ່ນດຽວກັນ.
---------------------------------------------------------------------------------------------------------
ສານສະແດງຄວາມຊົມເຊີຍ
ຂປລ. ເມື່ອບໍ່ດົນມານີ້, ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄວາມຊົມເຊີຍເຖິງ ທ່ານ ໂດນັນ ທຣໍາ ໃນໂອກາດທີ່ໄດ້ຮັບໄຊຊະນະ ການເລືອກຕັ້ງ ແລະ ສາບານຕົນເຂົ້າຮັບຕຳແໜ່ງ ເປັນປະທານາທິບໍດີຄົນທີ 47 ຂອງ ສະຫະລັດ ອາເມລິກາ.
ເນື້ອໃນສານໄດ້ລະບຸວ່າ: ເນື່ອງໃນໂອກາດທີ່ ທ່ານໄດ້ຮັບໄຊຊະນະການເລືອກຕັ້ງ ແລະ ສາບານຕົນເຂົ້າຮັບຕຳແໜ່ງເປັນ ປະທານາທິບໍດີຄົນທີ 47 ຂອງ ສະຫະລັດ ອາເມລິກາ, ຕາງໜ້າໃຫ້ລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າຂໍສົ່ງຄວາມຊົມເຊີຍຢ່າງຈິງໃຈ ແລະ ພອນໄຊອັນປະເສີດ ມາຍັງທ່ານ ແລະ ເຊື່ອໝັ້ນຢ່າງຍິ່ງວ່າ ພາຍໃຕ້ການນໍາພາອັນປີຊາສາມາດ ຂອງທ່ານ, ສະຫະລັດ ອາເມລິກາ ຈະສືບຕໍ່ມີການພັດທະນາ ແລະ ວັດທະ ນະຖາວອນ.
ຂ້າພະເຈົ້າ ມີຄວາມຍິນດີ ແລະ ພ້ອມທີ່ຈະເຮັດວຽກຮ່ວມກັບທ່ານ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືອັນດີງາມ ທີ່ມີມາແລ້ວນັ້ນລະຫວ່າງ ສາທາລະນະລັດ ປະຊາ ທິປະໄຕ ປະຊາຊົນລາວລາວ ແລະ ສະຫະລັດ ອາເມລິກາ ບົນພື້ນຖານການເປັນຄູ່ຮ່ວມມືແບບກວມ ລວມໃຫ້ນັບມື້ນັບເຂັ້້ມແຂງ ເພື່ອຜົນປະໂຫຍດລວມຂອງ ປະຊາຊົນສອງຊາດພວກເຮົາ ກໍຄື ເພື່ອສັນຕິ ພາບ, ສະຖຽນລະພາບ ແລະ ການພັດທະນາແບບຍືນຍົງ ຢູ່ໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດນີ້ ອວຍພອນໃຫ້ທ່ານ ມີພະລານາໄມສົມບູນ, ມີຄວາມຜາສຸກ ແລະ ປະຜົນສໍາເລັດໃນໜ້າທີ່ອັນສູງສົ່ງຂອງທ່ານ, ອວຍພອນໃຫ້ປະຊາຊົນ ອາເມລິກາ ເພື່ອນມິດ ສືບຕໍ່ມີຄວາມສົມບູນພູນສຸກ ແລະ ຈະເລີນຮຸ່ງເຮືອງຕະຫລອດໄປ.
------------------------------------------------------------------------------------------------
ສານຊົມເຊີຍວັນຊາດອິນເດຍ ຄົບຮອບ 75 ປີ
ຂປລ. ໃນວັນທີ 26 ມັງກອນ 2025 ນີ້, ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງ ສານສະແດງຄວາມຊົມເຊີຍ ເຖິງ ທ່ານ ນາງ ດຣໍປາດິ ມູ່ມູ ປະທານາທິບໍດີ ແຫ່ງ ສາທາລະນະລັດ ອິນເດຍ ເນື່ອງໃນໂອກາດວັນຊາດ ແຫ່ງ ສາທາລະນະລັດ ອິນເດຍ ຄົບຮອບ 75 ປີ.
ເນື້ອໃນສານໄດ້ລະບຸວ່າ: ຕາງໜ້າປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ແລະ ສົ່ງພອນໄຊອັນປະເສີດ ມາຍັງ ທ່ານ ແລະ ປະຊາຊົນອິນເດຍ ເພື່ອນມິດ ທຸກຖ້ວນໜ້າ ເນື່ອງໃນໂອກາດວັນຊາດ ແຫ່ງ ສາທາລະນະລັດ ອິນເດຍ ຄົບຮອບ 75 ປີ.
ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ອິນເດຍ ໄດ້ຮັບການສືບຕໍ່ພັດທະນາຢ່າງຕໍ່ເນື່ອງໃນຫລາຍຂົງເຂດ ຕະຫລອດໄລຍະຫລາຍປີຜ່ານມາ. ຂ້າພະເຈົ້າ ເຊື່ອໝັ້ນວ່າ ດ້ວຍຄວາມພະຍາຍາມຮ່ວມກັນຂອງພວກເຮົາ, ສາຍພົວພັນມິດຕະພາບອັນດີງາມ ແລະ ການຮ່ວມມືອັນມີໝາກຜົນທີ່ມີມາແຕ່ດົນນານ ລະຫວ່າງ ສອງປະເທດພວກເຮົາ ຈະສືບຕໍ່ໄດ້ຮັບການເສີມຂະຫຍາຍ ແລະ ແຕກດອກອອກຜົນຍິ່ງໆຂຶ້ນ ໃນຊຸມປີຕໍ່ໜ້າ ເພື່ອຜົນປະໂຫຍດຮ່ວມກັນ ຂອງປະຊາຊົນສອງຊາດພວກເຮົາ ກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊໃຫ້ ທ່ານ ຈົງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ວຽກງານອັນສູງສົ່ງຂອງທ່ານ ແລະ ຂໍອວຍພອນໃຫ້ປະຊາຊົນອິນເດຍ ເພື່ອນມິດຈົງສືບຕໍ່ມີຄວາມກ້າວໜ້າ ແລະ ວັດທະນະຖາວອນຕະຫລອດໄປ.
------------------------------------------------------------------
ໂທລະເລກສະແດງຄວາມເສົ້າສະຫລົດໃຈ
ຂປລ. ວັນທີ 22 ມັງກອນ 2025 ນີ້, ທ່ານ ທອງລຸນ ສີສຸລິດ ປະທານປະເທດ ແຫ່ງ ສາທາ ລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງໂທລະເລກສະແດງຄວາມເສົ້າສະຫລົດໃຈ ເຖິງ ທ່ານ ຄູເຣລສຸກຄ໌ ໂອຄະນາ ປະທານາທິບໍດີ ແຫ່ງ ມົງໂກລີ ຕໍ່ການມໍລະນະກໍາຂອງ ທ່ານ Punsalmaa Ochirbat ອະດີດ ປະທານາທິບໍດີ ແຫ່ງ ມົງໂກລີ (ຜູ້ທໍາອິດ) ໃນວັນທີ 17 ມັງກອນ 2025 ຜ່ານມາ.
ເນື້ອໃນໂທລະເລກ ໄດ້ລະບຸວ່າ: ຂ້າພະເຈົ້າ ມີຄວາມເສົ້າສະຫລົດໃຈຢ່າງສຸດຊຶ້ງ ເມື່ອໄດ້ຊາບຂ່າວວ່າ ທ່ານ Punsalmaa Ochirbat ອະດີດປະທານາທິບໍດີ ແຫ່ງ ມົງໂກລີ (ຜູ້ທໍາອິດ) ໄດ້ເຖິງແກ່ມໍລະນະກໍາ ໃນວັນທີ 17 ມັງກອນ 2025.
ການຈາກໄປຂອງ ທ່ານ Punsalmaa Ochirbat ແມ່ນເປັນການສູນເສຍອັນຍິ່ງໃຫຍ່ ສຳລັບລັດຖະບານມົງໂກລີ, ຕະຫລອດເຖິງປະຊາຊົນ ມົງໂກລີ ທຸກຖ້ວນໜ້າ ເນື່ອງຈາກວ່າ ຕະຫລອດໄລຍະການເຄື່ອນໄຫວວຽກງານ ຂອງ ທ່ານ Punsalmaa Ochirbat, ໄດ້ອຸທິດທຸກເຫື່ອແຮງ, ສະຕິປັນຍາຂອງຕົນເຂົ້າໃນພາລະກິດການປະຕິວັດ, ການປົກປັກຮັກສາ ແລະ ສ້າງສາພັດທະນາປະເທດຊາດຂອງ ມົງໂກລີ ໂດຍສະເພາະແມ່ນການຊີ້ນຳ-ນໍາພາພາລະກິດການປະຕິຮູບການປົກຄອງ ແລະ ການປະຕິຮູບເສດຖະກິດຂອງມົງໂກລີ, ຮັບປະກັນຄວາມເປັນເອກະພາບ, ຄວາມເຂົ້າໃຈຂອງສັງຄົມໃນຂອບເຂດທົ່ວປະເທດໃນການຫັນໄປສູ່ປະຊາທິປະໄຕ ແລະ ເສດຖະກິດຕະຫລາດ.
ໃນນາມຕາງໜ້າໃຫ້ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫລົດໃຈຈາກໃຈຈິງ ແລະ ຂໍແບ່ງເບົາຄວາມທຸກໂສກ ມາຍັງທ່ານ ແລະ ຜ່ານທ່ານ ໄປຍັງຄອບຄົວຂອງຜູ້ກ່ຽວ ລວມທັງປະຊາຊົນ ມົງໂກລີ ທຸກຖ້ວນໜ້າ ມານະໂອກາດນີ້ດ້ວຍ.
ຂໍໃຫ້ດວງວິນຍານ ຂອງ ພະນະທ່ານ Punsalmaa Ochirbat ຈົ່ງໄປສູ່ສຸຂະຕິ.
--------------------------------------------------------------------------------------------------------------------------------
ສານສະແດງຄວາມເຫັນໃຈ
ຂປລ. ໃນວັນທີ 17 ມັງກອນ 2025 ຜ່ານມາ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ສົ່ງສານສະແດງຄວາມເຫັນໃຈ ເຖິງ ທ່ານ ໂຈເຊັບ ໄບເດັນ ປະທານາທິບໍດີ ແຫ່ງ ສະຫະລັດ ອາເມລິກາ ຕໍ່ເຫດການ ໄຟໄໝ້ປ່າ ຢ່າງຮ້າຍແຮງ ທີ່ແຜ່ລາມ ທົ່ວພາກພື້ນທາງຕອນໃຕ້ຂອງ ລັດຄາລິໂຟເນຍ ໃນ ສະຫະລັດ ອາເມລິກາ.
ເນື້ອໃນສານ ລະບຸໄວ້ວ່າ: ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາ ທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສົ້າສະຫລົດໃຈ ແລະ ເຫັນອົກເຫັນໃຈຢ່າງສຸດຊຶ້ງ ມາຍັງ ລັດຖະບານ ແລະ ຜູ້ປະສົບເຄາະຮ້າຍ ທີ່ໄດ້ຮັບຜົນກະທົບຈາກໄຟ ໄໝ້ປ່າຢ່າງຮ້າຍແຮງ ທີ່ແຜ່ລາມທົ່ວພາກພື້ນທາງຕອນໃຕ້ຂອງ ລັດຄາລິໂຟເນຍ ໃນສະຫະລັດ ອາເມລິກາ.
ໄຟໄໝ້ປ່າ ຄັ້ງນີ້, ຖືເປັນໄຟໄໝ້ທີ່ຮ້າຍແຮງທີ່ສຸດ ທີ່ບໍ່ເຄີຍເກີດຂຶ້ນມາກ່ອນ ເຊິ່ງໄດ້ສ້າງຄວາມສູນເສຍທາງດ້ານຊີວິດຂອງປະຊາຊົນ ຈຳນວນບໍ່ໜ້ອຍ, ທັງທຳລາຍທີ່ພັກອາໄສ ຂອງປະຊາຊົນຢ່າງຫລວງຫລາຍ ແລະ ເຮັດໃຫ້ປະຊາຊົນຫລາຍພັນຄົນ ຂາດທີ່ພັກອາໄສ ໃນຂົງເຂດດັ່ງກ່າວ. ຂ້າພະເຈົ້າ ຂໍຊົມເຊີຍເຈົ້າໜ້າທີ່ກູ້ໄພທີ່ເຮັດວຽກຢ່າງບໍ່ຮູ້ອິດຮູ້ເມື່ອຍ ເພື່ອຄວບຄຸມສະຖານະການ ແລະ ຊ່ວຍ ເຫລືອຜູ້ທີ່ຕ້ອງການ ການຊ່ວຍເຫລືອ.
ຂ້າພະເຈົ້າ ກໍຄື ປະຊາຊົນລາວ ຂໍຢືນຄຽງຂ້າງ ລັດຖະບານ ແລະ ປະຊາຊົນ ສະຫະລັດ ອາເມລິ ກາ ແລະ ເຊື່ອໝັ້ນວ່າ ພາຍໃຕ້ການນຳພາຂອງທ່ານ, ຈະສາມາດຜ່ານຜ່າຄວາມຫຍຸ້ງຍາກ, ຟື້ນຟູຊີວິດການເປັນຢູ່ຂອງປະຊາຊົນ ແລະ ພື້ນທີ່ໄດ້ຮັບຜົນກະທົບ ໃຫ້ກັບຄືນສູ່ສະພາບປົກກະຕິ.
--------------------------------------------------------------------------------------------------------------------------
ສານສະແດງຄວາມຊົມເຊີຍ ວັນສ້າງຕັ້ງສານພົວພັນການທູດ ລາວ-ຟີລິບປິນ
ຂປລ. ໃນວັນທີ 13 ມັງກອນ 2025 ຜ່ານມາ, ທ່ານ ທອງລຸນ ສີສຸລິດ ປະທານປະເທດ ແລະ ທ່ານ ສອນໄຊ ສີພັນດອນ ນາຍົກລັດຖະມົນຕີ ສົ່ງສານສະແດງຄວາມຊົມເຊີຍ ເຖິງ ທ່ານ ເຟີດີນານ ມາກອດ ຈູເນຍ ປະທານາ ທິບໍດີ ແຫ່ງ ສາທາລະນະລັດ ຟິລິບປິນ ເນື່ອງໃນໂອກາດ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຟີລິບປິນ.
ເນື້ອໃນສານ ໄດ້ລະບຸວ່າ: ເນື່ອງໃນໂອກາດ ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດ ລະ ຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ສາທາລະນະລັດ ຟີລິບປິນ (14/01/1955-14/01/2025), ຕາງໜ້າລັດຖະບານ, ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງ ທ່ານ, ລັດຖະບານ ແລະ ປະຊາຊົນ ຟີລິບປິນ ເພື່ອນມິດ ທຸກຖ້ວນໜ້າ.
ຂ້າພະເຈົ້າ ມີຄວາມປິຕິຊົມຊື່ນເປັນຢ່າງຍິ່ງ ທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືອັນດີ ທີ່ມີມາຢ່າງຍາວນານ ລະຫວ່າງ ສອງປະເທດພວກເຮົາ ສືບຕໍ່ໄດ້ຮັບການພັດທະນາຢ່າງຕໍ່ເນື່ອງ ແລະ ກວ້າງຂວາງໃນຫລາຍຂົງເຂດ ໃນຕະຫລອດໄລຍະເວລາ 7 ທົດສະວັດ ທີ່ຜ່ານມາ ແລະ ມີຄວາມເຊື່ອໝັ້ນຢ່າງໜັກແໜ້ນວ່າ ດ້ວຍຄວາມພະຍາຍາມຮ່ວມກັນ, ສາຍພົວພັນມິດຕະພາບ ແລະ ການຮ່ວມມືທີ່ດີ ຂອງພວກເຮົາ ທີ່ມີຢູ່ແລ້ວນັ້ນ ຈະສືບຕໍ່ໄດ້ຮັບການເພີ່ມພູນຄູນສ້າງ ແລະ ແຕກດອກອອກຜົນຍິ່ງໆຂຶ້ນ ໃນຊຸມປີຕໍ່ໜ້າ ເພື່ອນໍາເອົາຜົນປະໂຫຍດລວມມາສູ່ ປະຊາຊົນສອງຊາດພວກເຮົາ ກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ ຢູ່ໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊອັນປະເສີດ ມາຍັງ ທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດອັນມີກຽດສະຫງ່າ ຂອງທ່ານ ແລະ ຂໍໃຫ້ປະຊາຊົນຟີລິບປິນ ເພື່ອນມິດ ຈົ່ງສືບຕໍ່ມີຄວາມກ້າວໜ້າ ແລະ ຈະເລີນຮຸ່ງເຮືອງ ຍິ່ງໆຂຶ້້ນ.
---------------------------------------------------------------------------
ແຈ້ງການຂອງກະຊວງການຕ່າງປະເທດ
ຂປລ. ໂດຍຕອບຮັບຕາມການເຊື້ອເຊີນ ຂອງ ທ່ານ ອິຊິບະ ຊິເງະຣຸ ນາຍົກລັດຖະມົນຕີ ແຫ່ງ ປະເທດຍີ່ປຸ່ນ, ທ່ານ ສອນໄຊ ສີພັນດອນນາຍົກລັດຖະມົນຕີ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ພ້ອມດ້ວຍພັນລະຍາ ແລະ ຄະນະ ຈະເດີນທາງໄປຢ້ຽມຢາມ ເຮັດວຽກທາງການ ຢູ່ ປະເທດຍີ່ປຸ່ນ ໃນລະຫວ່າງວັນທີ 20 -23 ມັງກອນ 2025 ເພື່ອສືບຕໍ່ເພີ່ມທະວີຮັດແໜ້ນ ສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມືອັນດີງາມ ໃນໂອກາດສະເຫລີມສະຫລອງ ວັນສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ຍີ່ປຸ່ນ ຄົບຮອບ 70 ປີ.
-----------------------------------------------------------------------------
ໂທລະເລກຊົມເຊີຍ
ຂປລ. ວັນທີ 8 ມັງກອນ 2025 ຜ່ານມາ, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສາທາລະນະລັດປະຊາທິປະໄຕ ປະຊາຊົນລາວ ໄດ້ສົ່ງໂທລະເລກຊົມເຊີຍ ເຖິງ ສະຫາຍ ປາກ ແທ ຊອງ ທີ່ໄດ້ຮັບການແຕ່ງຕັ້ງໃຫ້ດຳລົງຕໍາແໜ່ງເປັນ ນາຍົກລັດຖະມົນຕີແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫລີ.
ເນື້ອໃນໂທລະເລກໄດ້ລະບຸວ່າ: ຂ້າພະເຈົ້າ ຂໍສະແດງຄວາມຊົມເຊີຍຢ່າງອົບອຸ່ນມາຍັງ ສະຫາຍ ທີ່ໄດ້ຮັບການແຕ່ງຕັ້ງໃຫ້ດຳລົງຕໍາແໜ່ງເປັນ ນາຍົກລັດຖະມົນຕີແຫ່ງ ສາທາລະນະລັດ ປະຊາຊົນ ປະຊາທິປະໄຕ ເກົາຫລີ ໃນກອງປະຊຸມເປີດກວ້າງຄົບຄະນະ ບໍລິຫານງານສູນກາງພັກເເຮງງານເກົາຫລີ ຄັ້ງທີ 11, ສະໄໝທີ 8 ໃນຄັ້ງວັນທີ 23-27 ທັນວາ 2024 ທີ່ຜ່ານມາ.
ຂ້າພະເຈົ້າ ມີຄວາມເຊື່ອໝັ້ນວ່າ ດ້ວຍສາຍພົວພັນມິດຕະພາບ ແລະ ການຮ່ວມມືທີ່ເປັນມູນ ເຊື້ອ ລະຫວ່າງ ສອງປະເທດພວກເຮົາທີ່ມີມາແລ້ວນັ້ນ ແລະ ດ້ວຍປະສົບການທີ່ຫລາກຫລາຍອັນອຸ ດົມຮັ່ງມີຂອງສະຫາຍ, ສາຍພົວພັນມິດຕະພາບ ແລະ ການຮ່ວມມືຂອງສອງປະເທດພວກເຮົາ ຈະໄດ້ຮັບການສືບຕໍ່ເສີມຂະຫຍາຍຢ່າງບໍ່ຢຸດຢັ້ງ. ຂ້າພະເຈົ້າ ຫວັງຢ່າງຍິ່ງວ່າ ຈະໄດ້ຮ່ວມເຮັດວຽກກັບສະ ຫາຍຢ່າງໃກ້ຊິດ ເພື່ອຊຸກຍູ້ ແລະ ເສີມຂະຫຍາຍການພົວພັນຮ່ວມມື ລະຫວ່າງສອງປະເທດພວກເຮົາ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນ ສປປ ລາວ-ສປປ ເກົາຫລີ, ພ້ອມທັງເປັນການປະກອບ ສ່ວນສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພ່ື່ອການພັດທະນາຢູ່ໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດນີ້ອວຍພອນມາຍັງສະຫາຍ ຈົ່ງມີພາລະນາໄມສົມບູນ, ມີຄວາມຜາສຸກ ແລະ ສືບຕໍ່ປະສົບຜົນສຳເລັດອັນໃໝ່ໃນໜ້າທີ່ອັນມີກຽດຂອງສະຫາຍ.
----------------------------------------------------------------------------------------
ໂທລະເລກສະແດງຄວາມເຫັນໃຈ
ຂປລ. ໃນວັນທີ 8 ມັງກອນ 2025 ນີ້, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດ ແຫ່ງ ສປປ ລາວ ໄດ້ສົ່ງໂທລະເລກສະແດງຄວາມເຫັນໃຈ ເຖິງ ສະຫາຍ ສີ ຈິ້ນຜິງ ເລຂາທິການໃຫຍ່ ຄະນະກໍາມະການສູນກາງພັກກອມມູນິດຈີນ, ປະທານປະເທດ ແຫ່ງ ສປ ຈີນ ຕໍ່ເຫດການ ແຜ່ນດິນໄຫວຂະໜາດ 6,8 ຣິກເຕີ ຢູ່ເຂດຕີ້ງຢື້ ເຂດປົກຄອງຕົນເອງ ທິເບດ ສປ ຈີນ.
ເນື້ອໃນໂທລະເລກໄດ້ລະບຸວ່າ: ຂ້າພະເຈົ້າໄດ້ຮັບຂ່າວດ້ວຍຄວາມເສົ້າສະຫລົດໃຈວ່າ ໃນຕອນເຊົ້າຂອງວັນທີ 7 ມັງກອນ 2025 ເວລາ 09:05 ໂມງ ໄດ້ເກີດເຫດແຜ່ນດິນໄຫວຂະໜາດ 6,8 ຣິກເຕີ ຢູ່ເຂດຕີ້ງຢື້ (Dingri) ເຂດປົກຄອງຕົນເອງ ທິເບດ, ສປ ຈີນ ເຊິ່ງໄດ້ສ້າງຄວາມເສຍຫາຍອັນໃຫຍ່ຫລວງ ອັນເປັນເຫດໃຫ້ມີຄົນເສຍຊີວິດ, ຫາຍຊາບສູນ ແລະ ໄດ້ຮັບບາດເຈັບເປັນຈໍານວນຫລາຍ ແລະ ສ້າງຄວາມເສຍຫາຍໃຫ້ແກ່ຕຶກອາຄານ, ເຮືອນຊານບ້ານຊ່ອງ ແລະ ຊັບສິນຂອງປະຊາຊົນ ລວມທັງພື້ນຖານໂຄງລ່າງ ຢ່າງຫລວງຫລາຍໃນເຂດດັ່ງກ່າວ.
ຕາງໜ້າໃຫ້ພັກ, ລັດຖະບານ ແລະ ປະຊາຊົນ ລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະ ແດງຄວາມເສົ້າສະຫລົດໃຈ ແລະ ເຫັນໃຈຢ່າງສຸດຊຶ້ງ ຕໍ່ເຫດການໄພພິບັດທາງທໍາມະຊາດ ໃນຄັ້ງນີ້ ມາຍັງ ສະຫາຍ ແລະ ຜ່ານສະຫາຍ ໄປຍັງພັກ, ລັດຖະບານ ແລະ ປະຊາຊົນ ຈີນ ໂດຍສະເພາະ ຕໍ່ຄອບຄົວຜູ້ໄດ້ຮັບເຄາະຮ້າຍໃນຄັ້ງນີ້.
ຂ້າພະເຈົ້າເຊື່ອໝັ້ນວ່າ ພາຍໃຕ້ການຊີ້ນໍາ-ນໍາພາຂອງ ສະຫາຍ ພ້ອມດ້ວຍການນຳຂອງພັກ ແລະ ລັດຖະບານ ຂອງສູນກາງ ແລະ ທ້ອງຖິ່ນຂອງ ສປ ຈີນ ລວມທັງຄອບຄົວຜູ້ໄດ້ຮັບເຄາະຮ້າຍ ຈະສາ ມາດຜ່ານຜ່າເວລາທີ່ໂສກເສົ້ານີ້ໄດ້ ແລະ ຟື້ນຟູເຂດທີ່ໄດ້ຮັບຜົນກະທົບ ແລະ ສະພາບຈິດໃຈ ຂອງຄອບຄົວຜູ້ເສຍຊີວິດ ໃຫ້ກັບຄືນສູ່ປົກກະຕິ.
---------------------------------------------------------------------------------------------------------------------------------------------------
ສານຊົມເຊີຍຄູ່ຮ່ວມຕໍາແໜ່ງ
ຂປລ. ໃນວັນທີ 1 ມັງກອນ 2025 ນີ້, ທ່ານ ທອງລຸນ ສີສຸລິດ ປະທານປະເທດ ໄດ້ສົ່ງສານຊົມເຊີຍ ເຖິງທ່ານ ນາງ ກາຣິນ ແກນແລກ ຊຸດແຕກ ປະທານາທິບໍດີ ແຫ່ງ ສະມາພັນທະລັດ ສະວິດ ເນື່ອງໃນໂອກາດທີ່ ທ່ານໄດ້ຮັບການເລືອກຕັ້ງໃຫ້ດຳລົງຕຳແໜ່ງເປັນ ປະທານາທິບໍດີ ແຫ່ງ ສະມາພັນ ທະລັດ ສະວິດ.
ເນື້ອໃນສານໄດ້ລະບຸວ່າ: ເນື່ອງໃນໂອກາດທີ່ ທ່ານໄດ້ຮັບການເລືອກຕັ້ງໃຫ້ດຳລົງຕຳແໜ່ງເປັນ ປະທານາທິບໍດີ ແຫ່ງ ສະມາພັນທະລັດ ສະວິດ, ໃນນາມ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສົ່ງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ທ່ານ.
ຂ້າພະເຈົ້າ ເຊື່ອໝັ້ນຢ່າງຍິ່ງວ່າ ດ້ວຍບົດຮຽນ ແລະ ປະສົບການອັນອຸດົມສົມບູນແຫ່ງການນຳ ພາ ຂອງ ທ່ານ, ສະມາພັນທະລັດ ສະວິດ ຈະສືບຕໍ່ໄດ້ຮັບການພັດທະນາ ໃຫ້ຈະເລີນກ້າວໜ້າ ແລະ ປະຊາຊົນສະວິດ ເພື່ອນມິດ ສືບຕໍ່ມີຄວາມຜາສຸກ ແລະ ວັດທະນະຖາວອນ.
ຂ້າພະເຈົ້າ ມີຄວາມຍິນດີຢ່າງຍິ່ງ ທີ່ຈະໄດ້ຮ່ວມເຮັດວຽກກັບ ທ່ານ ຢ່າງໃກ້ຊິດ ເພື່ອສືບຕໍ່ເພີ່ມທະວີສາຍພົວພັນມິດຕະພາບ ແລະ ການຮ່ວມມືທີ່ມີໝາກຜົນ ລະຫວ່າງ ສາທາລະນະລັດ ປະຊາທິ ປະໄຕ ປະຊາຊົນລາວ ແລະ ສະມາພັນທະລັດ ສະວິດ ໃຫ້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນ ເພື່ອຜົນປະໂຫຍດ ຂອງປະຊາຊົນສອງຊາດລາວ ແລະ ສະວິດ ກໍຄື ເພື່ອສັນຕິພາບ, ສະ ຖຽນລະພາບ ແລະ ການຮ່ວມມືເພື່ອການພັດທະນາແບບຍືນຍົງ ໃນພາກພື້ນ ແລະ ໃນທົ່ວໂລກ.
ຂ້າພະເຈົ້າ ຂໍຖືໂອກາດນີ້ ອວຍພອນໃຫ້ ທ່ານ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດທຸກປະການ ໃນໜ້າທີ່ອັນສູງສົ່ງຂອງ ທ່ານ.
---------------------------------------------------------------------------------------------------------------------------------------------------
ໂທລະສານສະແດງຄວາມເສົ້າສະຫລົດໃຈ
ຂປລ. ໃນວັນທີ 30 ທັນວາ 2024 ຜ່ານມາ, ທ່ານ ທອງລຸນ ສີສຸລິດ ປະທານປະເທດ ແຫ່ງ ສປປ ລາວ ໄດ້ສົ່ງໂທລະສານສະແດງຄວາມເສົ້າສະຫລົດໃຈ ເຖິງ ທ່ານ ຊອຍ ຊັງ ມອກຮັກສາການ ປະທານາທິບໍດີ ແຫ່ງ ສາທາລະນະລັດ ເກົາຫລີ ຕໍ່ເຫດການອຸບັດຕິເຫດເຮືອບິນຕົກ ຢູ່ສະໜາມບິນສາກົນ ມຸອັນ ທາງພາກຕາເວັນຕົກສ່ຽງໃຕ້ ຂອງ ສາທາລະນະລັດ ເກົາຫລີ ໃນວັນທີ 29 ທັນວາ 2024 ຜ່ານມາ.
ເນື້ອໃນໂທລະສານ ລະບຸໄວ້ວ່າ: ຂ້າພະເຈົ້າ ຮູ້ສຶກເສົ້າສະຫລົດໃຈ ທີ່ໄດ້ຮັບຊາບຂ່າວເຫດການອຸບັດຕິເຫດເຮືອບິນຕົກ ຢູ່ສະໜາມບິນສາກົນ ມຸອັນ ທາງພາກຕາເວັນຕົກສ່ຽງໃຕ້ຂອງ ສາທາລະນະລັດ ເກົາຫລີ ໃນວັນທີ 29 ທັນວາ 2024 ຜ່ານມາ ເຊິ່ງໄດ້ສ້າງຄວາມເສຍຫາຍໃຫ້ແກ່ຊີວິດ ແລະ ຊັບສິນຂອງປະຊາຊົນ ຢ່າງຫລວງຫລາຍ.
ຕາງໜ້າໃຫ້ ລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ກໍຄື ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເສຍໃຈ ແລະ ເຫັນໃຈຢ່າງສຸດຊຶ້ງມາຍັງ ທ່ານ ແລະ ຜ່ານທ່ານໄປຍັງລັດຖະບານ ກໍຄື ປະຊາຊົນ ສ ເກົາຫລີ ໂດຍສະເພາະຜູ້ທີ່ຖືກເຄາະຮ້າຍ ແລະ ຄອບຄົວຂອງເຂົາເຈົ້າ ຈາກເຫດການອຸບັດຕິເຫດໃນຄັ້ງນີ້.
ຂ້າພະເຈົ້າ ເຊື່ອໝັ້ນວ່າ ດ້ວຍຄວາມເອົາໃຈໃສ່ຢ່າງໃກ້ຊິດຂອງລັດຖະບານ ສ ເກົາຫລີ, ປະຊາ ຊົນ ສ ເກົາຫລີ ຈະສາມາດຜ່ານຜ່າຄວາມຫຍຸ້ງຍາກໃນຄັ້ງນີ້ ແລະ ໃຫ້ກັບຄືນສູ່ສະພາບປົກກະຕິໂດຍໄວ.
----------------------------------------------------------------------------------------------------------------------------------
ສານອວຍພອນວັນຊາດ ສາທາລະນະລັດ ກູບາ ຄົບຮອບ 66ປີ
ຂປລ. ໃນວັນທີ 1 ມັງກອນ 2025 ນີ້, ສະຫາຍ ທອງລຸນສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ປະທານປະເທດແຫ່ງ ສປປ ລາວ ໄດ້ສົ່ງສານອວຍພອນ ເຖິງ ສະຫາຍ ມີເກັນ ດຽດກາເນັນສເບີຣມູເດດ ເລຂາທິການທີໜຶ່ງຄະນະບໍລິຫານງານ ສູນກາງພັກກອມມູນິດກູບາ, ປະທານປະເທດ ແຫ່ງສາທາລະນະລັດກູບາ ເນື່ອງໃນໂອກາດ ສະເຫລີມສະຫລອງວັນຊາດ ແຫ່ງ ສາທາລະນະລັດ ກູບາ ຄົບຮອບ 66 ປີ.
ເນື້ອໃນສານໄດ້ລະບຸວ່າ: ເນື່ອງໃນໂອກາດສະເຫລີມສະຫລອງວັນຊາດ ແຫ່ງ ສາທາລະນະລັດ ກູບາ ຄົບຮອບ 66 ປີ, ໃນນາມພັກປະຊາຊົນປະຕິວັດລາວ, ລັດຖະບານ, ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າຂໍ ຖືເປັນກຽດສົ່ງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ສະຫາຍ ແລະ ຜ່ານສະຫາຍ ໄປຍັງປະຊາຊົນກູບາ ອ້າຍນ້ອງທຸກຖ້ວນໜ້າ.
ຂ້າພະເຈົ້າເຊື່ອໝັ້ນວ່າບົນພື້ນຖານ ແຫ່ງຄວາມເຂົ້າອົກເຂົ້າໃຈຢ່າງເລິກເຊິ່ງ ກໍຄື ຄວາມເປັນມິດສະຫາຍ, ຄວາມສາມັກຄີອັນແໜ້ນແຟ້ນ, ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີທີ່ມີມາແຕ່ດົນນານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດພວກເຮົາ ຈະສືບຕໍ່ໄດ້ຮັບການຮັດແໜ້ນ ແລະ ເສີມຂະຫຍາຍຍິ່ງໆຂຶ້ນເພື່ອຜົນປະໂຫຍດລວມ ຂອງປະຊາຊົນສອງຊາດ ລາວ ແລະ ກູບາກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ ແບບຍືນຍົງ ຢູ່ໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໄຊໃຫ້ສະຫາຍ ມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດ ໃນໜ້າທີ່ອັນສູງສົ່ງຂອງສະຫາຍ, ອວຍພອນໃຫ້ປະຊາຊົນກູບາ ອ້າຍນ້ອງສືບຕໍ່ມີຄວາມກ້າວໜ້າ ແລະ ຈະເລີນຮຸ່ງເຮືອງຍິ່ງໆຂຶ້ນ.
ໃນໂອກາດດຽວກັນ, ສະຫາຍ ສອນໄຊ ສີພັນດອນ ນາຍົກລັດຖະມົນຕີ ກໍໄດ້ສົ່ງສານອວຍ ພອນ ເຖິງສະຫາຍ ມານູເອັນ ມາເຣໂຣ ກຣູຊ໌ ນາຍົກລັດຖະມົນຕີ ແຫ່ງ ສາທາລະນະລັດ ກູບາ ແລະ ສະຫາຍ ທອງສະຫວັນ ພົມວິຫານ ລັດຖະມົນຕີກະຊວງການຕ່າງປະເທດ ກໍໄດ້ສົ່ງເຖິງ ສະຫາຍ ບຣູໂນ ໂຣດຣີເກັຊ໌ ປາຣີຢາ ລັດຖະມົນຕີກະຊວງການຕ່າງປະເທດ ແຫ່ງ ສາທາລະນະລັດ ກູບາ ເນື່ອງໃນໂອກາດສະເຫລີມສະຫລອງວັນຊາດ ແຫ່ງ ສາທາລະນະລັດ ກູບາ ຄົບຮອບ 66 ປີ ເຊັ່ນດຽວກັນ.
