KPL
ຂປລ. ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ກອງປະຊຸມ ຜ່ານຮ່າງຂໍ້ຕົກລົງ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ຈັດຂຶ້ນໃນວັນທີ 4 ພະຈິກ 2024 ທີ່ເມືອງລອງ ເພື່ອໃຫ້ມີເນື້ອໃນ ຄົບຖ້ວນສົມບູນ ແລະ ສອດຄ່ອງກັບສະພາບຕົວຈິງ
ຂປລ. ແຫລ່ງຂ່າວຈາກ ແຂວງຫລວງນ້ຳທາ ໃຫ້ຮູ້ວ່າ: ກອງປະຊຸມ ຜ່ານຮ່າງຂໍ້ຕົກລົງ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ຈັດຂຶ້ນໃນວັນທີ 4 ພະຈິກ 2024 ທີ່ເມືອງລອງ ເພື່ອໃຫ້ມີເນື້ອໃນ ຄົບຖ້ວນສົມບູນ ແລະ ສອດຄ່ອງກັບສະພາບຕົວຈິງ ໂດຍການເຂົ້າຮ່ວມຂອງທ່ານ ພັທ ອາລຸນຍະເດດ ບົວສີສະຫວັດ ຫົວໜ້າພະແນກກວດກາ ແລະ ຄອບຄຸມຢາເສບຕິດ, ມີທ່ານ ນາງ ຈັນຄໍາ ທໍຄໍາເໝົາ ຮອງເຈົ້າເມືອງໆລອງ, ສອງກອງບັນຊາການປກຊ-ປກສ ແລະ ພາກສ່ວນທີ່ກ່ຽວຂ້ອງອ້ອມຂ້າງເມືອງເຂົ້າຮ່ວມ.
ທ່ານ ຄໍາຮຸ່ງ ກຸໂພຄໍາ ຮອງຫົວໜ້າ ຂະແໜງໂຄສະນາກົດໝາຍ ພະແນກຍຸຕິທໍາແຂວງຫລວງນໍ້າທາ ໄດ້ຜ່ານຂໍ້ຕົກລົງຂອງເຈົ້າແຂວງເລກທີ 1042/ຈຂ, ລົງວັນທີ 4 ຕຸລາ 2024 ວ່າດ້ວຍການແຕ່ງຕັ້ງຄະນະຮັບຜິດຊອບ ຮ່າງຂໍ້ຕົກລົງຂອງເຈົ້າແຂວງ, ຜ່ານຮ່າງຂໍ້ຕົກລົງ ວ່າດ້ວຍກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ປະກອບມີ 8 ໝວດ, 30 ມາດຕາ ຊຶ່ງຂໍ້ຕົກລົງສະບັບນີ້ ໄດ້ກໍານົດຫລັກການ, ລະບຽບການຄຸ້ມຄອງ, ນໍາໃຊ້ ແລະ ກວດກາກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ເພື່ອລະດົມ ແລະ ສະສົມທຶນ ຈາກພາຍໃນ ແລະ ຕ່າງປະເທດ ແນໃສ່ສະໜອງທຶນແກ່ວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ແລະ ວຽກງານອື່ນໆ ທີ່ຕິດພັນກັບຢາເສບຕິດ ໃຫ້ມີຄວາມຍືນຍົງ, ໂປ່ງໄສ ແລະ ສາມາດກວດສອບໄດ້ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ.
ທ່ານ ພັທ ອາລຸນຍະເດດ ບົວສີສະຫວັດ ຫົວໜ້າພະແນກກວດກາ ແລະ ຄວບຄຸມຢາເສບຕິດ ໄດ້ຊີ້ແຈ້ງບາງບັນຫາ ແລະ ເນັ້ນໃຫ້ຂະແໜງການທີ່ກ້ຽວຂ້ອງຂັ້ນເມືອງ ຈົ່ງເອົາໃຈໃສ່ເຄື່ອນໄຫວ, ຈັດຕັ້ງປະຕິບັດ ວຽກງານຄວບຄຸມ, ສະກັດກັ້ນ ແລະ ຕ້ານບັນຫາຢາເສບຕິດ, ສຶກສາອົບຮົມ, ປູກຈິດສໍານຶກໃຫ້ທົ່ວສັງຄົມ, ພໍ່ແມ່ປະຊາຊົນບັນດາເຜົ່າໄດ້ຮັບຮູ້ ແລະ ເຂົ້າໃຈເຖິງພິດໄພຜົນຮ້າຍຂອງຢາເສບຕິດໃຫ້ກວ້າງຂວາງ.
ຂ່າວ: ເຂັມຄໍາ ຄອນມະນີ
KPL
