KPL
ສະພາສູງ ອົດສະຕຣາລີ ໄດ້ຮັບຮອງ ເອົາກົດໝາຍ ວ່າດ້ວຍ ການຫ້າມ ເດັກນ້ອຍ ແລະ ເຍົາວະຊົນ ອົດສະຕຣາລີ ນຳໃຊ້ສື່ສັງຄົມອອນໄລ ນັບແຕ່ ທ້າຍປີ 2025.
ຂປລ.ວິທະຍຸ ກະຈາຍສຽງ ຫວຽດນາມ, ວັນທີ 28 ພະຈິກ, ສະພາສູງ ອົດສະຕຣາລີ ໄດ້ຮັບຮອງ ເອົາກົດໝາຍ ວ່າດ້ວຍ ການຫ້າມ ເດັກນ້ອຍ ແລະ ເຍົາວະຊົນ ອົດສະຕຣາລີ ນຳໃຊ້ສື່ສັງຄົມອອນໄລ ນັບແຕ່ ທ້າຍປີ 2025. ນີ້ແມ່ນ ກົດໝາຍ ສະບັບ ທຳອິດ ໃນໂລກ ແລະ ໄດ້ຮັບຮອງເອົາ ຜ່ານການສະໜັບ ສະໜູນ ຂອງທັງ 2 ພັກໃຫຍ່ ຢູ່ປະເທດນີ້. ກົດໝາຍຮຽກຮ້ອງ ໃຫ້ບັນດາພື້ນຖານ ສື່ສັງຄົມອອນໄລ ຕ້ອງນຳໃຊ້ ບັນດາມາດຕະການ ເຕັກນິກ ເພື່ອບັນລຸ ໄດ້ເປົ້າໝາຍ ທີ່ໄດ້ວາງອອກ. ບັນດາພື້ນຖານ ສື່ສັງຄົມ ອອນໄລ ມີ 1 ປີ ເພື່ອກະກຽມ ສິ່ງນີ້ ຈົນຮອດເວລາ ກົດໝາຍ ສະບັບນີ້ ເລີ່ມມີຜົນບັງຄັບໃຊ້ ໃນທ້າຍປີ 2025. ຈາກນັ້ນ ທ່ານ ແອນໂຕນີ ອໍລບາເນຊີ (Anthony Albanese),ນາຍົກລັດຖະມົນຕີ ອົດສະຕຣາລີ ຢັ້ງຢືນວ່າ: ກົດໝາຍ ສະບັບນີ້ ຈະຊ່ວຍປົກປ້ອງ ເດັກນ້ອຍ ອອກຈາກ ຜົນກະທົບ ຫຍໍ້ທໍ້ ໃນສື່ສັງຄົມອອນໄລ ແລະ ຮຽກຮ້ອງ ບັນດາພື້ນຖານ ສື່ສັງຄົມອອນໄລ ຕ້ອງມຄວາມຮັບຜິດຊອບ ໃນວຽກງານນີ້. ນອກນີ້ ທ່ານ Anthony Albanese ໄດ້ເນັ້ນຕື່ມວ່າ: ປັດຈຸບັນ, ບັນດາ ສື່ສັງຄົມ ຕ້ອງມີ ຄວາມຮັບຜິດຊອບ ຖືຄວາມປອດໄພ ຂອງເດັກນ້ອຍ ເໜືອກວ່າ ສິ່ງໃດໝົດ ແລະ ຮັບປະກັນວ່າ ໃນຊຸມມື້ ຈະມາເຖິງ ຜູ້້້ເປັນພໍ່ແມ່ ຈະໂອ້ລົມ ກັບລູກຂອງຕົນ ກ່ຽວກັບ ບັນຫານີ້./.
(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
