*ວົງຈອນເສັ້ນທາງທ່ອງທ່ຽວຜະຈົນໄພຊຸມຊົນໃນບ້ານນາລັນເໜືອ ໄດ້ຮັບລາງວັນມາດຕະຖານອາຊຽນ ແຂວງຫລວງນໍ້າທາ ມີຄວາມພາກພູມໃຈທີ່ໄດ້ຮັບ 2 ລາງວັນມາດຕະຖານອາຊຽນ ນອກຈາກຫ້ອງນ້ໍາສາທາລະນະສະອາດ ອີກລາງວັນໜຶ່ງແມ່ນ “ວົງຈອນເສັ້ນທາງທ່ອງທ່ຽວຜະຈົນໄພຊຸມຊົນບ້ານນາລັນເໜືອ (Nalan Trail)”, ເມືອງຫລວງນໍ້າທາ ທີ່ໄດ້ຮັບລາງວັນການທ່ອງທ່ຽວແບບປະຊາຊົນມີສ່ວນຮ່ວມມາດຕະຖານອາຊຽນ ຮອບທີ II ທີ່ກອງປະຊຸມລັດຖະມົນຕີທ່ອງທ່ຽວອາຊຽນ ຄ້ັງທີ 28 ລະຫວ່າງວັນທີ 19-20 ມັງກອນ 2025, ທີ່ປະເທດມາເລເຊຍ. ລາງວັນອັນຊົງກຽດນີ້ມັນສ່ອງແສງເຖິງ ຄວາມມຸ່ງໝາຍອັນສໍາຄັນ ແລະ ພິເສດຂອງວົງຈອນເສັ້ນທາງທ່ອງທ່ຽວຜະຈົນໄພຊຸມຊົນບ້ານນາລັນເໜືອ ຕໍ່ກັບການທ່ອງທ່ຽວແບບຍືນຍົງ ລວມທັງການປົກປັກຮັກສາມໍລະດົກທໍາມະຊາດເຂດປ່າສະຫງວນແຫ່ງຊາດນໍ້າຫ້າ.

    ວົງຈອນເສັ້ນທາງທ່ອງທ່ຽວ ຜະຈົນໄພຊຸມຊົນບ້ານນາລັນເໜືອ ຕັ້ງຢູ່ໃນເຂດພື້ນທີ່ປ່າສະຫງວນແຫ່ງຊາດນໍ້າຫ້າ ມໍລະດົກອາຊຽນ, ມີ 6ບ້ານທີ່ມີສ່ວນຮ່ວມ ຄື: ບ້ານຈະເລີນສຸກ, ບ້ານທ່າແສ່, ບ້ານນາລັນເໜືອ, ບ້ານນາໂຮມ, ບ້ານນໍ້າລື ແລະ ບ້ານຫ້ວຍເລືອດ. ເສັ້ນທາງດັ່ງກ່າວ ໄດ້ສະໜອງປະສົບການທີ່ເປັນເອກະລັກ ແລະ ດູດດື່ມສຳລັບຜູ້ທີ່ຮັກມັກທຳມະຊາດ ແລະ ວັດທະນະທຳ. ນັກທ່ອງທ່ຽວສາມາດເຂົ້າຮ່ວມກິດຈະກຳຕ່າງໆ, ລວມທັງການຍ່າງປ່າ, ຕັ້ງແຄ້ມ, ຂີ່ເຮືອຢາງລ່ອງຕາມແມ່ນ້ຳຫ້າ- ນໍ້າທາ ທີ່ຜະຈົນໄພ ແລະ ງຽບສະຫງົບ. ກິດຈະກໍາເຫລົ່ານີ້, ແມ່ນໄດ້ຖືກອອກແບບມາ ເພື່ອສະໜອງຄວາມຕ້ອງການຢ່າງໃກ້ຊິດກັບຄວາມສວຍສົດງົດງາມທາງດ້ານທໍາມະຊາດ ແລະ ຊີວະນາໆພັນຂອງປ່າສະຫງວນແຫ່ງຊາດນໍ້າຫ້າ, ອີກຈຸດເດັ່ນໜຶ່ງທີ່ຜູ້ມາຢ້ຽມຢາມຈະໄດ້ຮັບຈາກປະສົບການຂອງວົງຈອນເສັ້ນທາງທ່ອງທ່ຽວ ຜະຈົນໄພຊຸມຊົນບ້ານນາລັນເໜືອ ແມ່ນໂອກາດທີ່ໄດ້ພົບປະບ້ານຊົນເຜົ່າຂະມຸ.

    ນັກທ່ອງທ່ຽວສາມາດດູດດ່ືມກັບບັນດາມໍລະດົກວັດທະນະທຳອັນລ້ຳຄ່າຂອງເຂົາເຈົ້າ, ເຊິ່ງເປັນຜູ້ທີ່ສືບທອດປົກປັກຮັກສາຮີດຄອງປະເພນີ ແລະ ວິທີການດຳລົງຊີວິດຂອງຕົນ; ລາງວັນການທ່ອງທ່ຽວແບບປະຊາຊົນມີສ່ວນຮ່ວມມາດຕະຖານອາຊຽນນີ້ ເປັນການຢັ້ງຢືນເຖິງຄວາມມານະພະຍາຍາມ ໃນການຮ່ວມມືຂອງຊຸມຊົນທ້ອງຖິ່ນ, ອຳນາດການປົກຄອງ, ຜູ້ປະກອບການທຸລະກິດທ່ອງທ່ຽວໃນການສົ່ງເສີມການທ່ອງທ່ຽວແບບຍືນຍົງ.

KPL