ຂປລ. ໃນວັນທີ 23 ກຸມພາ 2022 ກະຊວງການຕ່າງປະເທດ ໄດ້ຈັດກອງປະຊຸມສະຫລຸບຜົນງານການເຄື່ອນໄຫວວຽກງານປະຈໍາປີ 2021 ແລະ ທິດທາງແຜນການ ສຳລັບປີ 2022, ພາຍໃຕ້ການເປັນປະທານ ຂອງ ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການຕ່າງປະເທດ, ໂດຍມີບັນດາຄະນະພັກ-ຄະນະນຳກະຊວງ, ຄະນະກົມ, ຄະນະພະແນກ, ພ້ອມດ້ວຍພະນັກງານກະຊວງການຕ່າງປະເທດ ເຂົ້າຮ່ວມ.
  ທ່ານ ບຸນທັນ ກຸສົນສະໜອງ ຮັກສາການຫົວໜ້າຫ້ອງການ ກະຊວງການຕ່າງປະເທດ ໄດ້ຍົກໃຫ້ເຫັນສະພາບການພົ້ນເດັ່ນຂອງພາກພື້ນ ແລະ ສາກົນ ທີ່ສືບຕໍ່ຜັນແປໄປຢ່າງສັບສົນ, ສະຫລັບສັບຊ້ອນ ແລະ ຄາດຄະເນໄດ້ຍາກ, ລວມທັງໄພພິບັດທາງທຳມະຊາດ ແລະ ໂລກລະບາດຕ່າງໆ ເປັນ ຕົ້ນ ການລະບາດຂອງພະຍາດໂຄວິດ-19 ທີ່ແກ່ຍາວ. ໃນທ່າມກາງສະພາບການດັ່ງກ່າວ, ກະຊວງການຕ່າງປະເທດ ກໍ່ໄດ້ສືບຕໍ່ເຄື່ອນໄຫວປະຕິບັດໜ້າທີ່ ຕາມພາລະບົດບາດຢ່າງຕັ້ງໜ້າ ແລະ ຢູ່ໃນທ່າບຸກ, ໂດຍຍຶດໝັ້ນໃນ​ແນວທາງການຕ່າງປະເທດ “ສັນຕິພາບ, ​ເອກະລາດ, ມິດຕະພາບ ​ແລະ ການ​ຮ່ວມ​ມື” ​ແລະ ປະຕິບັດຕາມຄຳຂວັນຂອງ ກອງປະຊຸມວຽກງານການຕ່າງປະເທດ ຄັ້ງທີ 14 ຄື: ການທູດປ້ອງກັນເຫດ ແລະ ບຸກທະລຸ ເພື່ອປົກປັກຮັກສາ ແລະ ພັດທະນາປະເທດຊາດ; ເພີ່ມທະວີປະສິດທິພາບການຈັດຕັ້ງປະຕິບັດ ຜົນການເຄື່ອນໄຫວຕ່າງປະເທດ ໃຫ້ປະກົດຜົນເປັນຮູບປະທຳ; ເຊິ່ງຂະແໜງການຕ່າງປະເທດ ໄດ້ປັບປຸງແບບແຜນວິທີເຮັດວຽກໃໝ່ ໃຫ້ມີຄວາມວ່ອງໄວທັນສະໄໝ, ມີວິທະຍາສາດ ແລະ ແທດເໝາະກັບເງື່ອນໄຂສະພາບການໃໝ່ ຂອງການພົວພັນສາກົນ,ໂດຍໃນໄລຍະນີ້ ການເຂົ້າຮ່ວມກອງປະຊຸມສາກົນ ແລະ ການພົບປະຕ່າງໆ ສ່ວນຫລາຍໄດ້ຫັນເປັນຮູບແບບວີດີໂອທາງໄກ, ແຕ່ໃນຂະນະດຽວກັນ ກໍສາມາດຄົ້ນຄວ້າ ແລະ ຈັດໃຫ້ມີຫລາຍການເຄື່ອນໄຫວທີ່ສຳຄັນ ເຊັ່ນ: ການນຳຂັ້ນສູງຂອງລາວ ແລະ ປະເທດເພື່ອນມິດ ໄດ້ມີການແລກປ່ຽນການຢ້ຽມຢາມທາງການ ແລະ ພົບປະໂດຍກົງ ເຊິ່ງກັນ ແລະ ກັນ ບົນພື້ນຖານການປະຕິບັດຕາມມາດຕະການຂອງຄະນະສະເພາະກິດປ້ອງກັນ ແລະ ຄວບຄຸມພະຍາດໂຄວິດ-19 ຂອງແຕ່ລະປະເທດວາງອອກ.
  ນອກຈາກນີ້, ສປປ ລາວ ຍັງໄດ້ຂະຫຍາຍສາຍພົວພັນການທູດ ກັບປະເທດເພື່ອນມິດໃໝ່, ສືບຕໍ່ຂົນຂວາຍຍາດແຍ່ງເອົາການຊ່ວຍເຫລືອ ແລະ ປົກປ້ອງສິດຜົນປະໂຫຍດແຫ່ງຊາດຂອງລາວ ຢູ່ໃນເວທີພາກພື້ນ ແລະ ສາກົນ. ໃນນັ້ນ, ບັນດາສໍານັກງານຕາງໜ້າ ແຫ່ງ ສປປ ລາວ ປະຈໍາຕ່າງ ປະເທດ ກໍໄດ້ປະກອບສ່ວນເຄື່ອນໄຫວວຽກງານການທູດການເມືອງ, ການທູດເສດຖະກິດ ແລະ ການທູດວັດທະນະທໍາຢ່າງຕັ້ງໜ້າ, ອັນໄດ້ປະກອບສ່ວນສໍາຄັນ ເຂົ້າໃນການສົ່ງເສີມການພົວພັນຮ່ວມມື ລະ ຫວ່າງ ສປປ ລາວ ກັບຕ່າງປະເທດ, ສາມາດປົກປ້ອງສິດຜົນປະໂຫຍດຂອງຊາດ ໃນລະດັບອັນແນ່ນອນ ແລະ ທັງເປັນການຍາດແຍ່ງເອົາການຊ່ວຍເຫລືອຈາກສາກົນ, ດຶງດູດການລົງທຶນ ແລະ ການພົວພັນດ້ານເສດຖະກິດ ມາສູ່ປະເທດຊາດ,​ ເປີດກວ້າງການ​ພົວພັນ​ສາກົນ​ຢ່າງ​ມີ​ຈຸດ​ສຸມ ​ແລະ ຍາດ​ແຍ່ງ​ຜົນ​ປະ​​ໂຫຍດຕົວ​ຈິງ​ມາ​ໃຫ້​ປະ​ເທດ​ຊາດ; ກະຊວງການຕ່າງປະເທດ ໄດ້ກຳນົດທິດທາງ, ແຜນການ ແລະ ວຽກງານຈຸດສຸມໃນ ປີ 2022 ດັ່ງນີ້: ສືບຕໍ່ຍົກສູງບົດບາດເປັນເສນາທິການ ໃຫ້ຂັ້ນເທິງດ້ານການຕ່າງປະເທດ, ​ປັບປຸງກົນໄກການປະສານງານ ແລະ ​ຄຸ້ມ​ຄອງ​ວຽກ​ງານ​ການ​ຕ່າງປະ​ເທດ ​ຜ່ານ​ປະຕູ​ດຽວ; ສູ້​ຊົນ​ແກ້​ໄຂ​ຈຸດ​ຄົງ​ຄ້າງ​​ເສັ້ນ​ຊາຍ​ແດນ​ ກັບປະ​ເທດ​ເພື່ອນ​ບ້ານ ​​ໃຫ້​ສຳ​ເລັດ​ໂດຍ​ພື້ນຖານ; ປັບປຸງ​ການຈັດ​ຕັ້ງ ​ແລະ ພື້ນຖານໂຄງລ່າງ, ບຸກທະລຸໃນການກໍ່ສ້າງບໍາລຸງພະນັກງານ, ສ້າງຄວາມເຂັ້ມແຂງໃຫ້ແກ່ຂະແໜງການຕ່າງປະເທດ ເພື່ອຮັບປະກັນ​ຄວາມ​ພ້ອມ​ສຳ​ລັບການ​ເຊື່ອ​ມ​ໂຍງ​ພາກ​ພື້ນ ​ແລະ ສາກົນ; ພ້ອມທັງສືບຕໍ່ຕິດຕາມສະພາບການລະບາດຂອງພະຍາດໂຄວິດ-19 ທີ່ຍັງສືບຕໍ່ລະບາດຢູ່ທົ່ວໂລກ ແລະ ຂົນຂວາຍຍາດແຍ່ງການຊ່ວຍເຫລືອ ແລະ ຮ່ວມມືດ້ານສາທາ ລະນະສຸກ ກັບບັນດາປະເທດຕ່າງໆ; ຫັນການພົວພັນຮ່ວມມືກັບປະເທດຕ່າງໆ ເຂົ້າສູ່ລວງເລິກ ແລະ ມີປະສິດທິຜົນ; ເສີມຂະຫຍາຍການພົວພັນຮ່ວມມືກັບບັນດາປະເທດຕ່າງໆ ຕາມເງື່ອນໄຂຕົວຈິງ, ຈັດຕັ້ງຜັນຂະຫຍາຍ ບັນດາໝາກຜົນການເຄື່ອນໄຫວ ຕ່າງປະເທດຂອງການນຳພັກ-ລັດ ໃຫ້ມີໝາກຜົນເປັນຮູບປະທຳ; ເປັນເຈົ້າການເຄື່ອນໄຫວໃນຂອບອາຊຽນ, ສປຊ, ເພີ່ມທະວີການເຊື່ອມໂຍງ, ເຊື່ອມຈອດກັບພາກພື້ນ ແລະ ອະນຸພາກພື້ນ ໃຫ້ມີຜົນສຳເລັດເປັນຮູບປະທຳ; ຍາດແຍ່ງການຮ່ວມມືຊ່ວຍເຫລືອຈາກສາກົນ ເພື່ອປະກອບສ່ວນເຂົ້າໃນການປະຕິບັດ ແຜນພັດທະນາເສດຖະກິດ-ສັງຄົມແຫ່ງ​ຊາດ ເພື່ອປະຕິບັດໄລຍະຂ້າມຜ່ານ ໃນການບັນລຸເປົ້າໝາຍການພັດທະນາແບບຍືນຍົງ (SDGs) ຢ່າງມີປະສິດທິຜົນ, ກະກຽມຄວາມພ້ອມດ້ານ​ຕ່າງໆ ເພື່ອເປັນປະທານອາຊຽນໃນປີ 2024 ແລະ ອື່ນໆ.
  ໃນໂອກາດດັ່ງກ່າວ, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຊົມເຊີຍ ຕໍ່ຜົນງານ ແລະ ໄດ້ສັງເກດຕີລາຄາສະພາບການຂອງພາກພື້ນ ແລະ ສາກົນ, ທົບທວນຄືນຜົນການເຄື່ອນໄຫວວຽກງານການຕ່າງປະເທດໃນໄລຍະ 1 ປີຜ່ານມາ, ພ້ອມທັງໄດ້ສະແດງຄວາມເປັນເອກະພາບຕໍ່ບົດສະຫລຸບຕີລາຄາການເຄື່ອນໄຫວວຽກງານການຕ່າງປະເທດ ປະຈຳປີ 2021 ແລະ ທິດທາງວຽກງານຈຸດສຸມຂອງ ປີ 2022, ເຊິ່ງເຫັນວ່າ ໃນປີຜ່ານມາ ການລະບາດຢ່າງໜັກໜ່ວງຂອງພະຍາດໂຄວິດ-19 ໄດ້ສ້າງຄວາມຫຍຸ້ງຍາກ ໃນການປະຕິບັດວຽກງານການຕ່າງປະເທດຂອງ ສປປ ລາວ ພໍສົມ ຄວນ, ແຕ່ດ້ວຍຄວາມຕັດສິນໃຈ, ຄວາມເສຍລະຫລະສູງ, ບຸກບືນ, ຍົກສູງຄວາມຮັບຜິດຊອບຂອງຄະນະພັກ, ຄະນະນໍາກະຊວງ ລວມທັງບັນດາພະນັກງານ-ລັດຖະກອນທຸກຂັ້ນ ທັງພາຍໃນ ແລະ ບັນດາສໍານັກງານຕາງໜ້າ ແຫ່ງ ສປປ ລາວ ຢູ່ຕ່າງປະເທດ ຈຶ່ງສາມາດຍາດໄດ້ຜົນສໍາເລັດຫລາຍດ້ານ, ເຊິ່ງເປັນການປະກອບສ່ວນອັນສໍາຄັນ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ລວມທັງສາມາດເສີມສ້າງຖານະບົດບາດຂອງພວກເຮົາ ຢູ່ໃນເວທີພາກພື້ນ ແລະ ສາກົນ ເປັນທີ່ຮັບຮູ້ ແລະ ສູງເດັ່ນຂຶ້ນຢ່າງຕໍ່ເນື່ອງ. ນອກຈາກນີ້, ທ່ານ ສະເຫລີມໄຊ ກົມມະສິດ ຮຽກຮ້ອງໃຫ້ພະນັກງານລັດຖະກອນ ຂອງກະຊວງການຕ່າງປະເທດ ຈົ່ງສືບຕໍ່ເສີມຂະຫຍາຍຜົນສຳເລັດທີ່ຍາດມາໄດ້, ສືບຕໍ່ເອົາໃຈໃສ່ຜັນຂະຫຍາຍແນວທາງນະໂຍບາຍການຕ່າງປະເທດ, ສືບຕໍ່ປະຕິບັດມາດຕະການປ້ອງກັນການລະບາດຂອງພະຍາດໂຄວິດ-19 ຢ່າງມີປະສິດທິຜົນ, ເອົາໃຈໃສ່ເພີ່ມທະວີການເຮັດວຽກງານການເມືອງ-ແນວຄິດ ຕໍ່ພະນັກງານ, ຍົກສູງຄວາມເປັນເຈົ້າການ ແລະ ຄວາມຮັບຜິດ ຊອບຂອງພະນັກງານ-ລັດຖະກອນ, ປັບປຸງແບບແຜນ ແລະ ວິທີການເຮັດວຽກ ໃຫ້ມີປະສິດທິພາບ ໃຫ້ແທດເໝາະກັບສະພາບການໃໝ່, ຍົກລະດັບວຽກງານເສນາທິການວຽກ​ງານ​ວິ​ຊາ​ສະ​ເພາະ ແລະ ວຽກ​ງານຄົ້ນຄວ້າ ແລະ ວິໄຈສະພາບການພາກພື້ນ ແລະ ສາກົນ ໃຫ້ມີປະສິດທິພາບກວ່າເກົ່າ, ເອົາ ໃຈໃສ່ເຮັດວຽກງານກວດກາ, ວຽກບໍລິຫານ-ການເງິນ, ວຽກງານ​ຍົກ​ລະ​ດັບ ແລະ ບຳ​ລຸງ​ສ້າງພະນັກ ງານ ແລະ ວຽກນະໂຍບາຍ, ສະຫວັດດີການຕໍ່ພະນັກງານ, ທັງນີ້ກໍ່ເພື່ອແນ່ໃສ່ເຮັດໃຫ້ຂະແໜງການຕ່າງປະເທດ ມີຜົນສຳເລັດບາດກ້າວອັນໃໝ່.
  ໃນໂອກາດດຽວກັນນີ້, ທ່ານ ສະເຫລີມໄຊ ກົມມະສິດ ກໍ່ໄດ້ໃຫ້ກຽດມອບໃບຍ້ອງຍໍ ເພື່ອຈາ ລຶກຜົນງານອັນດີເດັ່ນ ໃຫ້ແກ່ບັນດາພະນັກງານ-ລັດຖະກອນ ຂອງກະຊວງການຕ່າງປະເທດ ທີ່ໄດ້ປະ ກອບສ່ວນໃນການຈັດຕັ້ງປະຕິບັດວຽກງານໃນ ປີ 2020 ກໍຄື ເນື່ອງໃນໂອກາດວັນການທູດລາວ ຄົບ ຮອບ 75 ປີ (12 ຕຸລາ 2020).

ພາບ: ໄອຄຳ

KPL