ຂປລ.ວິທະຍຸ ກະຈາຍສຽງ ຫວຽດນາມ, ເມື່ອບໍ່ດົນມານີ້, ລັດຖະມົນຕີ ກະຊວງ ການຕ່າງປະເທດ ກຸ່ມ 7 ປະເທດ ອຸດສາຫະກຳ ພັດທະນາ (G7) ໄດ້ຢັ້ງຢືນ ຄືນໃໝ່ ການໜູນຊ່ວຍ ບັນດາປະເທດ ອາຟຣິກາ ມຸ່ງໄປເຖິງ ສັນຕິພາບ, ສະຖຽນ ລະພາບ ແລະ ການພັດທະນາ ແບບຍືນຍົງ, ກໍ່ຄື ສ້າງວຽກເຮັດ ງານທຳ ແລະ ການເຕີບໂຕ. ແຈ້ງການຂອງ G7 ໄດ້ຍົກອອກມາ ພາຍຫລັງ ກອງປະຊຸມຢູ່ ອີຕາລີ ທີ່ມີເນື້ອໃນກ່ຽວກັບ ການພົວພັນ ຄູ່ຮ່ວມມື ກັບບັນດາ ປະເທດ ອາຟຣິກາ, ໃນນັ້ນ ໄດ້ເນັ້ນໜັກ ຈະສືບຕໍ່ ສ້າງການພົວພັນ ຄູ່ຮ່ວມມື ຢ່າງມີຄວາມສະເໝີພາບ ແລະ ຍືນຍົງ ກັບ ອາຟຣິກາ  ໂດຍອີງຕາມ ຂໍ້ລິເລີ່ມຕົວຈິງ, ເໝາະສົມກັບ ໂຄງການ ດຳເນີນງານ 2063 ຂອງສະຫະພາບ ອາຟຣິກາ (AU) ແລະ ບັນດາແຜນການ ຫົວຂໍ້ ປະສົມ ປະສານຂອງ ທະວີບ ອາຟຣິກາ, ເພື່ອແນໃສ່ ພ້ອມກັນແກ້ໄຂ ບັນດາສິ່ງທ້າທາຍ ທົ່ວໂລກ. G7 ແຈ້ງໃຫ້ຊາບວ່າ ຈະສືບຕໍ່ປັບປຸງ ການພົວພັນ ຄູ່ຮ່ວມມື G7 ກ່ຽວກັບ ພື້ນຖານໂຄງລ່າງ ແລະ ການລົງທຶນ ທົ່ວໂລກ (PGII) ຢູ່ທະວີບ ອາຟຣິກາ ກໍ່ຄື ບັນດາ ຂໍ້ລິເລີ່ມຄື: “ປະຕູເຂົ້າອອກທົ່ວໂລກ” ຂອງສະຫະພາບ ເອີຣົບ ເພື່ອຊຸກຍູ້ ພື້ນຖານ ໂຄງລ່າງ ທີ່ມີຄຸນນະພາບ ແບບຍືນຍົງ, ຫລຸດຜ່ອນ ການປ່ອຍ ອາຍພິດ ເຮືອນແກ້ວລົງ, ຮອບດ້ານ, ກ້າແກ່ນ ແລະ ມີຄວາມເປັນໄປໄດ້ສູງກ່ຽວກັບ ດ້ານເສດຖະກິດ, ໄດ້ຮັບໜູນຊ່ວຍ ອີງຕາມບັນດາ ມາດຕະຖານສູງ, ຄັດເລືອກໂຄງການ ທີ່ໂປງໃສ ໃນການຊື້-ຂາຍ ແລະ ການເງິນ./.

(ບັນນາທິການຂ່າວ: ຕ່າງປະເທດ), ຮຽບຮຽງ ຂ່າວໂດຍ: ສະໄຫວ ລາດປາກດີ

KPL