KPL
ຈີນ ຈະປັບຫລຸດ ພາສີ ມູນຄ່າເພີ່ມ ເປັນ 3% ສຳລັບການ ນໍາເຂົ້າ ຢາຕ້ານມະເຮັງ ແລະ ຢາປິ່ນປົວ ພະຍາດອື່ນໆ ລວມເຖິງການຜະລິດ ແລະ ຈັດຈຳໜ່າຍ ພາຍໃນປະເທດ .
ຂປລ.ສຳນັກຂ່າວ ຊິນຮວາຂອງ ສປຈີນ ລາຍງານວ່າ: ຈີນ ຈະປັບຫລຸດ ພາສີ ມູນຄ່າເພີ່ມ ເປັນ 3% ສຳລັບການ ນໍາເຂົ້າ ຢາຕ້ານມະເຮັງ ແລະ ຢາປິ່ນປົວ ພະຍາດອື່ນໆ ລວມເຖິງການຜະລິດ ແລະ ຈັດຈຳໜ່າຍ ພາຍໃນປະເທດ . ຖະແຫລງການ ຈາກກະຊວງ ການເງິນຂອງ ຈີນ ແລະ ໜ່ວຍງານ ລັດຖະບານອື່ນໆ ລະບຸວ່າ: ຢາ ແລະ ສານອອກທິນ ທາງການຢາ ລວມ 71 ລາຍການ ຈະໄດ້ຮັບປະໂຫຍດ ຈາກການປັບຫລຸດ ພາສີຊຸດໃໝ່ ຕັ້ງແຕ່ວັນທີ 1 ທັນວາ ປີນີ້ ເປັນຕົ້ນໄປ. ຊຶ່ງການເຄື່ອນໄຫວ ດັ່ງກ່າວ ແນໃສ່ ຫລຸດຕົ້ນທຶນ ສຳລັບຄົນເຈັບ ແລະ ສົ່ງເສີມ ອຸດສາຫະກຳ ການຢາ ຂອງຈີນ, ໂດຍຢາ ແລະ ສານເບື້ອງຕົ້ນ ຖືເປັນຢາ ຕ້ານມະເຮັງ, ຢາປິ່ນປົວ ພະຍາດອື່ນໆ ແລະ ສານອອກທິນ ທາງການຢາ ຊຸດທີ 3 ທີ່ໄດ້ປະໂຫຍດ ຈາກນະໂຍບາຍ ປັບຫລຸດພາສີ ນັບແຕ່ປີ 2018.
(ບັນນາທິການຂ່າວຕ່າງປະເທດ, ຮຽບຮຽງໂດຍ: ນ ດາວັນ).
KPL
