ຂປລ. ບັນດາຫົວໜ້າກົມ, ຮອງຫົວໜ້າກົມ ຈາກອົງການໄອຍະການປະຊາຊົນສູງສຸດ, ອົງການໄອຍະການທະຫານ, ຫົວໜ້າພະແນກ, ພະນັກງານຫລັກແຫລ່ງອ້ອມຂ້າງແຂວງຈຳປາສັກ, ແຂວງສາລະວັນ, ແຂວງເຊກອງ, ແຂວງອັດຕະປື ແລະ ພາກສ່ວນ​ກ່ຽວຂ້ອງ ເຂົ້າຮ່ວມ ກອງປະຊຸມ​ເພື່ອປຶກສາຫາລື ແລະ ແລກປ່ຽນບົດຮຽນກ່ຽວກັບ ລັດທີ່ປົກຄອງດ້ວຍກົດໝາຍ, ກົດໝາຍປົກຄອງ, ການດຳເນີນຄະດີປົກຄອງ, ການວິໄຈອາຊະຍາກຳ ແລະ ມາດຕະການແກ້ໄຂ, ການສ້າງລັດທີ່ປົກຄອງດ້ວຍກົດໝາຍ ຢູ່ ສປປ ລາວ, ການຕິດຕາມກວດກາທົ່ວໄປ ຂອງອົງການໄອຍະການປະຊາຊົນ, ການປ້ອງກັນອາຊະຍາກຳ ແລະ ບົດບາດຂອງອົງການໄອຍະການປະຊາຊົນ, ກົດໝາຍປົກຄອງ ແລະ ການດຳເນີນຄະດີປົກຄອງຂອງຕ່າງປະເທດ; ທົບທວນຄືນການຈັດຕັ້ງປະຕິບັດວຽກງານຕິດຕາມກວດກາທົ່ວໄປຂອງອົງການໄອຍະການປະຊາຊົນ ໃນໄລຍະ 32 ປີຜ່ານມາ ໂດຍຊີ້ໃຫ້ເຫັນຜົນສໍາເລັດ, ຂໍ້ຄົງຄ້າງ, ບັນຫາທີ່ຕັ້ງຂຶ້ນ, ທິດທາງ ແລະ ວິທີການແກ້ໄຂ ໃນຊຸມປີຕໍ່ໜ້າ ຢ່າງມີປະສິດທິຜົນ.
  ກອງ​ປະຊຸມ​ດັ່ງກ່າວ, ຈັດ​ຂຶ້ນ​ໂດຍ​ການເປັນປະທານຮ່ວມຂອງ ທ່ານ ຄໍາເພັດ ສົມວໍລະຈິດ ຮອງຫົວໜ້າອົງການໄອຍະການປະຊາຊົນສູງສຸດ, ທ່ານ ແກ້ວລັດຕະນະ ສີຫາວົງ ຮອງປະທານສະພາປະຊາຊົນແຂວງຈໍາປາສັກ ແລະ ທ່ານ ຈອນ ຄອນໂນລີ ຜູ້ອໍານວຍການສະຖາບັນຊ່ວຍເຫລືອທາງດ້ານກົດໝາຍ ​ເຊິ່ງກອງ​ປະຊຸມ​ໄດ້ໄດ້ຮຽກຮ້ອງໃຫ້ຜູ້ແທນກອງປະຊຸມ ຈົ່ງສຸມຈິດໃຈ ຄົ້ນຄວ້າ, ປະກອບຄຳເຫັນ ແລະ ປຶກສາຫາລືກັນ ຢ່າງກວ້າງຂວາງ ເພື່ອເປັນເອກະພາບກ່ຽວກັບລັດທີ່ປົກຄອງດ້ວຍກົດໝາຍ, ກົດໝາຍປົກຄອງ, ການຕິດຕາມກວດກາທົ່ວໄປຂອງອົງການໄອຍະການປະຊາຊົນ, ຍົກສູງຄຸນນະພາບການເຄົາລົບ, ການປະຕິບັດກົດໝາຍ ແລະ ການຕິດຕາມກວດກາທົ່ວໄປຂອງອົງການໄອຍະການປະຊາຊົນ ຢູ່ປະເທດເຮົາ ໃຫ້ມີບາດກ້າວອັນໃໝ່ທີ່ໜັກແໜ້ນ, ໄດ້ຮັບຜົນດີ, ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍ, ສ້າງເງື່ອນໄຂໃຫ້ປະຊາຊົນ ໄດ້ທໍາມາຫາກິນ, ດໍາລົງຊີວິດຢ່າງຜາສຸກ, ປະກອບສ່ວນສໍາຄັນເຂົ້າໃນການພັດທະນາເສດ ຖະກິດສັງຄົມຂອງປະເທດ​ໃຫ້ຂະຫຍາຍຕົວ ແລະ ຈະເລີນຮຸ່ງເຮືອງ ຢ່າງບໍ່ຢຸດຢັ້ງ ຕາມທິດສັງຄົມນິຍົມ.
  ທ່ານ ຄໍາເພັດ ສົມວໍລະຈິດ ໄດ້ໃຫ້ຮູ້ວ່າ: ການຕິດຕາມກວດກາທົ່ວໄປ ແມ່ນວຽກງານໜຶ່ງ ທີ່ນອນຢູ່ໃນພາລະບົດບາດ, ສິດ ແລະ ໜ້າທີ່ຂອງອົງການໄອຍະ ການປະຊາ ຊົນ, ແມ່ນການຕິດຕາມກວດກາ ການປະຕິບັດກົດໝາຍຂອງບັນດາກະຊວງ, ອົງການ ລັດທຽບເທົ່າກະຊວງ, ແນວລາວສ້າງຊາດ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ, ອົງການປົກຄອງທ້ອງຖິ່ນ, ວິສາຫະກິດ ແລະ ພົນລະເມືອງ ເພື່ອໃຫ້ຖືກຕ້ອງ ແລະ ເປັນເອກະພາບ, ສະກັດກັ້ນ ແລະ ຕ້ານອາຊະຍາກໍາ, ຕິດຕາມກວດກາການອອກນິຕິກຳຂອງ ບັນດາອົງການຈັດຕັ້ງດັ່ງກ່າວ ເພື່ອໃຫ້ສອດຄ່ອງກັບກົດໝາຍ.

ຂ່າວ: ຈະເລິນສິນ

ເນື້ອໃນ: ຂປລ