ຂປລ. ​ເມື່ອ​ບໍ່​ດົນ​ມາ​ນີ້, ທ່ານ ຄໍາສວຍ ແກ້ວດາລາວົງ ອະດີດເອກອັກຄະລັດຖະທູດລາວ ປະ​ຈຳ ສ ເກົາຫລີ, ປະທານສະມາຄົມມິດຕະພາບ ລາວ-ສ ເກົາຫລີ ໄດ້ພົບປະ ແລະ ໃຫ້ຂໍ້ມູນແກ່ບັນດາແຮງງານລາວເກືອບ 200 ຄົນທີ່ກຳລັງກະກຽມຈະເດີນທາງໄປເຮັດວຽກຢູ່ ສ ເກົາຫລີ ໂດຍຜ່ານບໍລິສັດສະຫວັນບໍລິການຈັດຫາງານ ຈຳກັດ ຜູ້ດຽວ ທັງ​ນີ້ ກໍເພື່ອເປັນການຊຸກຍູ້, ສົ່ງເສີມ ແລະ ການກະກຽມ​ໃຫ້​ແກ່ແຮງງານລາວທີ່​ຈະໄປເຮັດວຽກຢູ່ ສ ເກົາຫລີ ໃຫ້ມີຄວາມຄ່ອງແຄ້ວຂຶ້ນ​ຕື່ມ ​ໂດຍ​ມີ ທ່ານ ຢັງ ດົງ ຢອກ (Yang Dong Hyuk) ປະທານ ບໍລິສັດສະຫວັນ ບໍລິການຈັດຫາງານ ແລະ ​​ພາກ​ສ່ວນ​ກ່ຽວ​ຂ້ອງ ​ເຂົ້າ​ຮ່ວມ.
      ​ໂອກາດ​ນີ້, ທ່ານ ຄຳສວຍ ແກ້ວດາລາວົງ ​​ໄດ້ໃຫ້ຮູ້ບາງຂໍ້ມູນທີ່ສຳ​ຄັນ ແລະ ຈໍາເປັນໃນການດຳລົງຊີວິດ ແລະ ເຮັດວຽກຢູ່ ສ ເກົາຫລີ ​ ໂດຍ​ສະ​ເພາະ​ໄດ້​ມີ​ການທົບທວນຄືນຮີດຄອງປະເພນີ, ວັດທະນະທຳອັນດີງາມຂອງຊາດລາວເຮົາ ເຊັ່ນ: ຄົນລາວເປັນຄົນອ່ອນນ້ອມຖ່ອມຕົນ, ດຸໝັ້ນຂະຫຍັນພຽນ, ຈິງໃຈ, ບໍລິສຸດສັດຊື່ ເຮັດແທ້ທຳຈິງ ແລະ ອື່ນໆ, ລວມເຖິງປະຫວັດສາດອັນຍາວນານຂອງ ປະເທດເກົາຫລີ ແລະ ພູມສາດອັນສວຍສົດງົດງາມ,  ຮີດຄອງປະເພນີ ແລະ ວັດທະນະທຳອັນ​ດີ​ງາມຂອງ​ຊາດ ແລະ​ ຂອງຄົນເກົາຫລີ ​ໃຫ້ແຮງງານລາວ​ໄດ້​ຮັບ​ຮູ້ ​ແ​ລະ ​ເຂົ້າ​ໃຈ. ພ້ອມ​ນີ້, ​ຍັງ​ຊີ້​ໃຫ້​ເຫັນລະບົບການຈ້າງແຮງງານຕ່າງປະເທດ, ປະເພດແຮງງານຕ່າງປະເທດ ເຊັ່ນ: ແຮງງານຍາວນານຕ້ອງໄດ້ຜ່ານລະບົບການອະນຸຍາດຈ້າງງານ (EPS=employment permit system), ແຮງງານຕາມລະດູການ (Seasional workers) ແລະ ແຮງງານແບບບໍ່ຖືກຕ້ອງຕາມກົດໝາຍ (Illeagal workers). ສ ເກົາຫລີ ໄດ້ນຳເຂົ້າແຮງງານຕ່າງປະເທດຈາກ 17 ປະເທດທີ່ກຳລັງພັດທະນາ ລວມທັງ ສປປ ລາວເຮົາ ທີ່ໄດ້ເລີ່ມຕົ້ນສົ່ງແຮງງານໄປ ສ ເກົາຫລີ  ​​ໃນປີ 2018  ມາເຖິງປັດຈຸບັນ, ແຮງງານລາວທີ່ໄປເຮັດວຽກຢູ່ ສ ເກົາຫລີ ມີ​ທັງ​ໝົດ 554 ຄົນ.
      ຂະ​ນະ​ດຽວ​ກັນ​, ທ່ານ ຄຳສວຍ ແກ້ວດາລາວົງ  ຍັງຍົກໃຫ້ເຫັນຄວາມອັນຕະລາຍ ແລະ ຄວາມສ່ຽງຂອງແຮງງານຜິດກົດ​ໝາຍ ເປັນຕົ້ນ ຖືກຫລອກລວງ, ຖືກຕົວະຕົ້ມ, ບັງຄັບຂົ່ມເຫັງ ເຮັດວຽກບໍ່ໄດ້ຮັບເງິນ ແລະ ອື່ນໆ. ພ້ອມ​ທັງຮຽກຮ້ອງ​ໃຫ້ບັນດາແຮງງານລາວ ຈົ່ງຕັ້ງໃຈເຮັດວຽກຕາມໂມງ​ເວ​ລາ​ຢ່າງ​ເຂັ້ມ​ງວດ, ເຮັດ​ວຽກ​ຢ່າງ​ມີ​ປະ​ສິດ​ທິ​ພາບ ແລະ​ ປະ​ສິດ​ທິ​ຜົນ,  ​ຕ້ອງ​ປະ​ຕິ​ບັດລະບຽບກົດໝາຍ ແລະພັນທະສັນຍາຈ້າງງານ ກັບບໍລິສັດ ສະຫວັນບໍລິການຈັດຫາງານ ໂດຍ​ສະ​ເພາະ​ຕ້ອງໄປ ແລະ ກັບ​ຄືນ​ປະ​ເທດຕາມກຳນົດ​ເວ​ລາ, ຖ້າຕ້ອງການຢາກໄປອີກ ກໍ​ໃຫ້ສະ​ໝັກໃ​ໝ່​ໃນຮອບຕໍ່ໄປ. ​ເມື່ອແຮງງານລາວໄປຮອດ ສ ເກົາຫລີ ແລ້ວ, ໃຫ້ບັນ​ທຶກເບີໂທລະສັບຂອງສະຖານທູດລາວ ປະ​ຈຳ ສ ເກົາ​ຫລີ ໄວ້, ຖ້າຫາກມີຄວາມຈຳເປັນກໍຈະນຳໃຊ້ ແລະ ໃຫ້ບໍລິສັດຈັດສົ່ງລາຍຊື່ຂອງແຮງງານລາວ ໃຫ້ທາງສະຖານທູດ ເພື່ອເປັນຂໍ້ມູນ ແລະ ສາມາດເກັບກຳໄດ້.

ຂ່າວ: ຣັດ​ສະ​ໝີ ດວງ​ສັດ​ຈະ

ເນື້ອໃນ: ຂປລ