ຂປລ. ໃນ​ໂອກາດ ມອບລາງວັນທຸລະກິດຊັ້ນນຳດີເດັ່ນ ​ໃຫ້​ນັກທຸລະກິດ​ລາວ ຂອງສະພາການຄ້າ ແລະ ອຸດສາຫະກຳ ແຫ່ງຊາດລາວ (ສຄອຊ)  ໃນໄລຍະໂຄວິດ-19 ປະຈໍາປີ 2021 ໃນວັນທີ 29 ທັນວາ 2021 ນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີ ​ແຫ່ງ ສປປ ລາວ ໄດ້ເນັ້ນໃຫ້ພາກລັດ ແລະ ພາກທຸລະກິດ ເອົາໃຈໃສ່ຮ່ວມກັນ 4 ບັນຫາສຳຄັນ ເພື່ອກະຕຸກຊຸກຍູ້, ຂັບ​ເຄື່ອນ ເຮັດໃຫ້ການສົ່ງເສີມການລົງທຶນ ແລະ ດຳເນີນທຸລະກິດ ຂອງ​ຜູ້​ປະກອບ​ການ ຢູ່ ສປປ ລາວ ​ໃຫ້ດີຂຶ້ນເທື່ອລະກ້າວ, ແນໃສ່ເຮັດໃຫ້ເສດຖະກິດ ຂອງ ສປປ ລາວ ໄດ້ຮັບການພັດທະນາ ແລະ ຂະ ຫຍາຍຕົວ ຂຶ້ນໄປເລື້ອຍໆ.

ທ່ານ ພັນຄໍາ ວິພາວັນ ໄດ້ເນັ້ນ 4 ບັນຫາສຳຄັນ ທີ່ພາກລັດ ແລະ ພາກທຸລະກິດ ຄວນເອົາ ໃຈໃສ່ຮ່ວມກັນ ຄື: 1). ສະພາການຄ້າ ແລະ ອຸດສາຫະກໍາ, ສະມາຄົມ ແລະ ກຸ່ມທຸລະກິດ ຕ້ອງໄດ້ສືບຕໍ່ປຸກລະດົມ ບັນດາຫົວໜ່ວຍທຸລະກິດ ເຂົ້າເປັນສະມາຊິກ, ເຕົ້າໂຮມຄວາມສາມັກຄີ, ປັບປຸງກົງຈັກການຈັດຕັ້ງ ຂອງສະພາການຄ້າ ທັງຢູ່ສູນກາງ ແລະ ທ້ອງຖິ່ນ ໃຫ້ເຂັ້ມແຂງໄປຄຽງຄູ່ກັບ ການພັດທະນາ, ສົ່ງເສີມ ແລະ ສ້າງຄວາມອາດສາມາດ ໃຫ້ຫົວໜ່ວຍທຸລະກິດ  ເປັນມືອາຊີບຫລາຍຂຶ້ນ; 2). ນັກ ທຸລະກິດ ແລະ ຜູ້ປະກອບການ ດ້ານ​ຕ່າງໆ ຕ້ອງໄດ້ປັບປຸງຮູບແບບ ແລະ ວິທີການດໍາເນີນທຸລະກິດ ໃຫ້ແທດເໝາະກັບສະພາບ ການປ່ຽນແປງໃໝ່, ຫັນປ່ຽນຈິນຕະນາການ ເພື່ອໃຫ້ແທດເໝາະກັບ ວິຖີຊີວິດໃໝ່, ແຂ່ງຂັນກັນເພື່ອສ້າງຜົນງານ, ປັບປຸງຄຸນນະພາບ ແລະ ປະສິດທິພາບໃຫ້ສູງຂຶ້ນ ລວມທັງກຳຈັດປັດເປົ່າ ແນວຄິດຄັບແຄບ, ໃຈນ້ອຍ, ອິດສາບັງບຽດກັນ, ຢ້ານລື່ນຢ້ານເຫລືອກັນ, ທັບຖົມໂຈມຕີກັນ, ຕ້ອງຮັກແພງສາມັກຄີຊ່ວຍເຫລືອກັນ, ແຂ່ງຂັນກັນພັດທະນາຄວາມດີ ເພື່ອຊາດບ້ານເມືອງ, ອັນສຳຄັນຕ້ອງຮ່ວມມືກັບພາຍໃນ ແລະ ຕ່າງປະເທດ; 3). ໃນໄລຍະເປີດກວ້າງ ແລະ ເຊື່ອມໂຍງກັບພາກພື້ນ, ນັກທຸລະກິດຂອງພວກເຮົາ ຕ້ອງໄດ້ປັບປຸງຕົນເອງ ໃຫ້ສາມາດຜະລິດເພື່ອສົ່ງອອກ ແລະ ຖືເອົາກາລະໂອກາດ ໃນການຂະຫຍາຍທຸລະກິດ ຂອງຕົນໄປຍັງພາກພື້ນ ແລະ ສາກົນ ໃຫ້ເພີ່ມຂຶ້ນ ໂດຍນຳໃຊ້ເສັ້ນທາງ ລົດໄຟ ລາວ-ຈີນ ຊຶ່ງມີຄວາມຈຳເປັນ ຕ້ອງຮ່ວມມືກັນ ຈັດຕັ້ງການຜະລິດຄືນ ໃໝ່, ທັງຫາຄູ່ຮ່ວມພັດທະນາ ກັບນັກທຸລະກິດຕ່າງປະເທດ. ນອກຈາກນັ້ນ, ກໍສົ່ງເສີມນັກທຸລະກິດ ເຂົ້າມີສ່ວນຮ່ວມ ໃນການພັດທະນາຊົນນະບົດ ຕິດພັນກັບ ການແກ້ໄຂຄວາມທຸກຍາກ ໃຫ້ປະຊາຊົນຫລາຍຂຶ້ນ, ​ເຊິ່ງລັດຖະບານ ຈະສ້າງໂອກາດໃຫ້ ບັນດາວິສາຫະກິດ ລາວ-ຕ່າງປະເທດ ໄດ້ຈັບຄູ່ກັນ ເພື່ອຮ່ວມກັນຢ່າງໝັ້ນຄົງຍາວນານ ຫລີກເວັ້ນການເປັນນາຍໜ້າ ແບບຕົວະຍົວະຫລອກລວງ ​ເຊິ່ງຈະສ້າງຄວາມເສຍຫາຍ ໃຫ້ແກ່ສ່ວນລວມ ​ແລະ ຕົນເອງ, 4). ສືບຕໍ່ຊຸກຍູ້ສົ່ງເສີມນັກທຸລະກິດ, ຫົວໜ່ວຍທຸລະກິດທີ່ດີເດັ່ນ ແລະ ດໍາເນີນທຸລະກິດຖືກຕ້ອງຕາມກົດໝາຍ, ປະກອບສ່ວນ ພັນທະໃຫ້ລັດຖືກຕ້ອງ, ຄົບຖ້ວນ ແລະ ທັນເວລາ ເພື່ອຊຸກຍູ້ການເຮັດແທ້ທຳຈິງ, ການຄັດເລືອກຍ້ອງຍໍນັກທຸລະກິດ ແລະ ຫົວໜ່ວຍທຸລະກິດດີເດັ່ນ ບໍ່ໃຫ້ມີລັກ ສະນະສະເລ່ຍ ຫລື ເບິ່ງຕາມຕໍາແໜ່ງຫລາຍກວ່າ ເບິ່ງຜົນງານຕົວຈິງ, ​ເຊິ່ງໃນໄລຍະຜ່ານມາ ສຄອຊ ຈັດຕັ້ງປະຕິບັດໄດ້ດີແລ້ວ ແລະ ໃຫ້ສືບຕໍ່ປັບປຸງໃຫ້ດີຂຶ້ນ.

ທ່ານ ພັນຄໍາ ວິພາວັນ ໄດ້ກ່າວຕື່ມວ່າ: ພາກລັດ ແລະ ພາກທຸລະກິດ ແມ່ນຫຸ້ນສ່ວນສຳຄັນຮ່ວມກັນ ແລະ ຕັດແຍກອອກຈາກກັນບໍ່ໄດ້ ໃນຂະບວນການພັດທະນາ ປະເທດຊາດ ໃຫ້ຈະເລີນກ້າວໜ້າ. ຈາກນີ້, ພາກລັດຕ້ອງຫັນປ່ຽນ ທັດສະນະແນວຄິດ ແລະ ການກະທຳຂອງຕົນ ຈາກທີ່ຊິນເຄີຍເປັນ ຜູ້ຄວບຄຸມແຕ່ດ້ານດຽວ ມາເປັນຜູ້ບໍລິຫານຈັດການ, ​ເຊິ່ງໃນນັ້ນມີໜ້າທີ່ເຮັດ ການບໍລິການຮັບໃຊ້ປະຊາຊົນເປັນອັນສຳຄັນ, ພາກທຸລະກິດ ແລະ ຜູ້ປະກອບການ ກໍ່ຕ້ອງຫັນປ່ຽນປັບປຸງ ແກ້ໄຂຂອດອ່ອນ, ພັດທະນາຍົກສູງຄວາມ ອາດສາມາດຂອງຕົນເອງ ໃຫ້ຫລາຍຂຶ້ນກວ່າເກົ່າ ໃນຫລາຍດ້ານ.

ຂ່າວ: ທະນູ​ທອງ ພາບ: ​ເກດສະໜາ

ເນື້ອໃນ: ຂປລ