ຂປລ. ​ຄະນະສະເພາະກິດ ຢຶນຢັນວ່າ: ມາ​ຮອດວັນ​ທີ 1 ພະຈິກ 2021 ນີ້, ສປປ ລາວ ກວດ​ພົບ​ຜູ້​ຕິ​ດ​ເຊື້ອ​ໂຄ​ວິດ-19 ​ເພີ່ມ​ຂຶ້ນ​ໃໝ່ 685 ຄົນ, ​ໃນ​ນັ້ນ ຕິດເຊື້ອນໍາເຂົ້າ 12 ຄົນ ຈາກນະຄອນຫລວງວຽງ​ຈັນ 4 ຄົນ, ສະຫວັນນະເຂດ 4 ຄົນ,  ຈໍາປາສັກ 2 ຄົນ ​ແລະ ບໍລິຄໍາໄຊ 2 ຄົນ. ສໍາລັບ​ການຕິດເຊື້ອພາຍໃນມີ 673 ຄົນ ​ແມ່ນ​ຈາກນະຄອນຫລວງວຽງ​ຈັນ 345 ຄົນ,​ ແຂວງຫລວງພະບາງ 102 ຄົນ, ແຂວງວຽງຈັນ 75 ຄົນ, ບໍ່ແກ້ວ 35 ຄົນ,  ສະຫວັນນະເຂດ 19 ຄົນ, ຫລວງ​ນໍ້າ​ທາ 20 ຄົນ, ອຸດົມໄຊ 19 ຄົນ, ຈໍາປາສັກ 15 ຄົນ, ບໍລິຄໍາໄຊ 12 ຄົນ, ຄໍາມ່ວນ 14 ຄົນ,​ ເຊກອງ 9 ຄົນ, ​ໄຊ​ສົມບູນ 5 ຄົນ, ສາລະ​ວັນ 2 ຄົນ ​ແລະ ​ແຂວງອັດ​ຕະປື 1 ຄົນ. ລວມຕົວເລກຜູ້ຕິດເຊື້ອສະສົມ 40.956 ຄົນ, ເສຍຊີວິດສະສົມ 67 ຄົນ, ປິ່ນປົວ​ຫາຍ​ດີ​ 2.19ຄົນ, ກໍາລັງປິ່ນປົວ 7.381ຄົນ.

ສຳລັບ ກໍລະນີຜູ້ເສຍຊີວິດໃໝ່ 2 ຄົນ ມີຄື: ຜູ້ທີ 1: ເປັນເພດຊາຍ, ອາຍ 46 ປີ, ສັນຊາດ: ລາວ, ບ້ານໂພນສະຫວາດ, ເມືອງໂພນໂຮງ, ແຂວງວຽງຈັນ (ເສຍຊີວິດຢູ່ນະຄອນຫລວງວຽງຈັນ), ຜູ້ກ່ຽວໄດ້ກັກໂຕ ຢູ່ຄ້າຍຄຸມຂັງນາໄຫ-ນາໂນ ຍ້ອນເສບຢາ ແລະ ກໍານົດໂທດເປັນເວລາ 2 ປີ, ປະຫວັດພະຍາດຜ່ານມາ: ຄົນເຈັບບໍ່ມີອາການສະແດງອອກ, ຄົນເຈັບນອນປ່ວຍ ຕິດຕຽງຊ່ວຍເຫລືອຕົນເອງບໍ່ໄດ້ ແລະ ຄົນເຈັບເປັນພະຍາດ ວັນນະໂລກປອດ ເລີ້ມປີ່ນປົວແຕ່ວັນທີ 13 ກັນຍາ 2021, ເວລາ 09:00 ໂມງວັນທີ 31 ຕຸລາ 2021 ຜູ້ກ່ຽວໄດ້ເສຍຊີວິດ ​ແລະ ຜູ້ທີ 2 ເປັນເພດຍິງ, ອາຍຸ 48ປີ, ອາຊີບ: ປະຊາຊົນ, ບ້ານຢູ່ປະຈຸບັນ ບ້ານໜອງປຸ່ງ ເມືອງໂພນໂຮງ, ແຂວງວຽງຈັນ, ຄອບຄົວທັງໝົດມີ 4 ຄົນລວມທັງຜູ້ກ່ຽວ, ພະຍາດປະຈໍາຕົວ: ຄົນເຈັບເປັນຄວາມດັນ ເລືອດສູງບໍ່ໄດ້ກິນຢາປະຈໍາ ແລະ ພະຍາດຫືດ ບໍ່ໄດ້ກິນຢາປະຈຳ, ໄດ້ຮັບການສັກວັກຊິນ 2 ເຂັມຄົບແລ້ວ, ມີອາການປວດຕົນໂຕ, ໄອ, ອິດເມື່ອຍ, ເປັນຫວັດຕະ ຫລອດ, ຄະນະສະເພາະກິດເມືອງ ຈຶ່ງໄດ້ໄປເກັບຕົວຢ່າງ ໃນວັນທີ 25 ຕຸລາ 2021, ວັນທີ 26 ຕຸລາ 2021: ຜົນກວດແມ່ນພົບເຊື້ອ ພະຍາດໂຄວິດ-19 ຈຶ່ງໄດ້ເຂົ້າ ນອນປີ່ນປົວ ຢູ່ສູນປີ່ນປົວໂຄວິດ-19 ຢູ່ ມສ ໂພນໂຮງ ແຂວງວຽງຈັນ, ໄລຍະທີ່ນອນປິ່ນປົວຢູ່ໂຮງໝໍ ແຕ່ວັນທີ 26-31 ຕຸລາ 2021 ເປັນເວລາ 5 ວັນ, ເວລາ 14:30 ໂມງຂອງວັນທີ 31 ຕຸລາ 2021: ມີອາການໄອຢ່າງຕໍ່ເນື່ອງ, ເຈັບແໜ້ນໜ້າເອິກ ແລະຫາຍໃຈຝືດ, ມາຮອດເວລາ 19:30 ໂມງຂອງມືດຽວກັນ ຄົນເຈັບບໍ່ໄດ້ສະຕິ, ບໍ່ຕອບສະໜອງຕໍ່ການກະຕຸ້ນ, ຄົນເຈັບຢຸດຫາຍໃຈ, ຫົວໃຈຢຸດເຕັ້ນ, ໄດ້ເຊິດຊູຄົນເຈັບ, ຄົນເຈັບບໍ່ຕອບສະໜອງ ເເລະ ເສຍຊີວິດເວລາຕໍ່ມາ.

ທ່ານ​ນາງ ບົວຜັນ ຄຳພາພົງຜ່ານ ຮອງຫົວໜ້າສູນວິເຄາະ ແລະ ລະບາດວິທະຍາ, ກະຊວງສາທາລະນະສຸກ ລາຍ​ງານ​ໃຫ້​ຮູ້​ໃນ​ວັນ​ທີ 1 ພະຈິກ 2021 ວ່າໃນບັນດາແຂວງພາກໄຕ້ມີທ່າອ່ຽງຫລຸດລົງ ແຕ່ແຂວງພາກເໜືອເຊັ່ນ: ຫລວງພະບາງ ແລະ ອຸດົມໄຊ ຍັງຕິດເຊື້ອພົ້ນເດັ່ນ. ຂະນະ​ທີ່ການຕິດເຊື້ອໃນ ນະຄອນຫລວງວຽງຈັນ ຍັງສູງ ສະເລ່ຍ ປະມານ 300 ຄົນຕໍ່ມື້, ພ້ອມ​ກັນ​ນີ້​ຢູ່ແຂວງເຊກອງ ເຖິງວ່າຈະມີຄົນຕິດເຊື້ອ ພຽງແຕ່ 9 ຄົນ ແຕ່ອັດຕາການ ກວດພົບ ເຊື້ອສູງເຖິງ 18%. ສວ່ນແຂວງວຽງຈັນ ກໍ່ເຊັ່ນກັນພົບວ່າກວດ 100 ຄົນໃດ ສາມາດພົບປະມານ 18 ຄົນຕິດເຊື້ອ. ອັດຕາການກວດພົບເຊື້ອສູງ ຂອງບັນດາ ແຂວງເຫລົ່ານີ້ ເປັນສັນຍານເຕືອນວ່າ ອາດຈະມີການລະບາດ ແລະ ພົບຄົນຕິດເຊື້ອ ຫລາຍກວ່າເກົ່າ ໃນວັນຂ້າງໜ້າສະນັ້ນ ປະຊາຊົນຂອງ ບັນດາແຂວງ ທີ່ກ່າວມານີ້ ຈົ່ງເພີ່ມສະຕິ ແລະ ປະຕິບັດການປ້ອງກັນ ໃຫ້ເຂັ້ມງວດທີ່ສຸດ ເພື່ອສະກັດກັ້ນ ການແຜ່ເຊື້ອລາມກວ້າງ.

ຂ່າວ: ກິດ​ຕາ

ເນື້ອໃນ: ຂປລ