ຂປລ. ປະຊາຊົນ​ໃນ 8 ເມືອງ ຢູ່ແຂວງສະຫວັນນະເຂດ ​ທີ່​ໄດ້​ຮັບ​ຜົນ​ກະທົບ​ ຈາກ​ໄພ​ນ້ຳ​ຖ້ວມ ໃນໄລຍະເດືອນກັນຍາ ແລະ ເດືອນຕຸລາ ປີ 2020 ຜ່ານ​ມາ ​ໄດ້​ຮັບ​ເງິນ​ຊ່ວຍ​ເຫລືອ​ຈາກ ບໍລິສັດສະຕາ ໂທລະຄົມ ຫລື ຢູນີ​ເທວ ຜ່ານ​ຊ່ອງ​ທາງ​ຢູມັນ​ນີ (u-money) ລວມມູນຄ່າທົງໝົດ 500 ລ້ານກີບ ພາຍ ຫລັງ​ທີ່ ບໍລິສັດສະຕາໂທລະຄົມ ສາຂາແຂວງສະຫວັນນະເຂດ ສົມທົບກັບອົງການ ຈັດຕັ້ງຂັ້ນແຂວງ ແລະ ເມືອງ ພົວພັນເອົາຂໍ້ມູນລະອຽດ ໃນການຊ່ວຍເຫລືອ ​ເພື່ອ​​ໂອນ​ເງິນຊ່ວຍເຫລືອ ໂດຍກົງຫາກຸ່ມເປົ້າໝາຍ, ​ເຊິ່ງປັດຈຸບັນ ການເບີກຈ່າຍເງິນດັ່ງກ່າວ ໃຫ້ກັບພໍ່ແມ່ປະຊາຊົນ ແມ່ນ​ໄດ້ໂອນເງິນສຳເລັດ 100% ແລ້ວ. ​ໃນ​ນັ້ນ, ປະຊາຊົນ​ຈຳນວນ 1.200 ຄອບຄົວ ​ແມ່ນ​ໄດ້​ຮັບ​ເງິນສະໜັບສະໜູນ ມູນຄ່າ 300.000 ກີບ/ຄອບຄົວ ລວມເປັນ 360 ລ້ານກີບ ແລະ ປະຊາຊົນ 68 ຄອບຄົວ ໄດ້ຮັບເງິນຊ່ວຍເຫລືອ ມູນຄ່າ 2.059.000 ກີບ/ຄອບຄົວ ລວມເປັນ 140 ລ້ານກີບ.

ຊ່ອງທາງຢູມັນນີ (u-money) ໄດ້ກາຍເປັນຊ່ອງທາງ ເລືອກທີ່ດີສຸດສໍາລັບ ການນຳໃຊ້ເຂົ້າເປັນ ຊ່ອງທາງໃນການ ເບີກຈ່າຍເງິນຊ່ວຍເຫລືອຄັ້ງນີ້, ເຊິ່ງຈະຊ່ວຍໃຫ້ພໍ່ແມ່ປະຊາຊົນ ໄດ້ຮັບເງິນໂດຍກົງ, ໄວ ແລະ ປອດໄພ ​ໂດຍ​ປະຊາຊົນ ທີ່ໄດ້ຮັບເງິນຊ່ວຍເຫລືອ ສາມາດຖອນເງິນ ໄດ້ທີ່ສູນບໍລິການ ຂອງຢູນີເທວ, ຮ້ານຕົວແທນ ຫລື ກັບພະນັກງານຂອງຢູນີເທວ ທົ່ວປະເທດ.

ເນື້ອໃນ: ຂປລ