ຂປລ. ໃນໂອກາດເຂົ້າຮ່ວມ ກອງປະຊຸມຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ ຄັ້ງທີ 8 ທີ່ແຂວງຫລວງພະບາງ ໃນວັນທີ 23 ມິຖຸນາ ນີ້, ທ່ານ ບຸນທອງ ຈິດມະນີ ກໍາມະການກົມການເມືອງສູນກາງພັກ, ຄະນະເລຂາທິການສູນກາງພັກ, ຮອງນາຍົກລັດຖະມົນຕີ, ປະທານຄະນະກວດກາສູນກາງພັກ, ປະທານອົງການກວດກາລັດຖະບານ ແລະ ຫົວໜ້າອົງການຕ້ານການສໍ້ລາດບັງຫລວງຂັ້ນສູນກາງ, ທັງເປັນຫົວໜ້າຄະນະ ຊີ້ນໍາໂຄງການກໍ່ສ້າງທາງລົດໄຟລາວ-ຈີນ ພ້ອມຄະນະ ໄດ້ໄປຢ້ຽມຢາມ, ຕິດຕາມ, ກວດກາ, ແລະ ການລາຍງານຄວາມຄືບໜ້າ ຂອງການກໍ່ສ້າງ ຂອງໂຄງການກໍ່ສ້າງທາງລົດໄຟລາວ-ຈີນ ຢູ່ຈຸດຂົວຂ້າມແມ່ນໍ້າຂອງ ນະຄອນຫລວງພະບາງ, ເຊິ່ງເປັນຂົວຂ້າມແມ່ນໍ້າທີ່ຍາວທີ່ສຸດໃນໂຄງການມີຄວາມຍາວ 1.485 ແມັດ ໄດ້ສ້າງສໍາເລັດເມື່ອເດືອນຕຸລາ 2019 ຜ່ານມານີ້ ເປັນຈຸດເຊື່ອມຕໍ່ ລະຫວ່າງອຸໂມງສະນົກ ພູຫວດ ເມືອງຈອມເພັດ ແລະ ອຸໂມງຜ່າບ່ອງ ນະຄອນຫລວງພະບາງ.
ໂຄງການກໍ່ສ້າງທາງລົດໄຟ ແຕ່ຊາຍແດນ ລາວ-ຈີນ ຫານະຄອນຫລວງວຽງຈັນ ມີຄວາມຍາວເສັ້ນທາງຜ່ານແຂວງຫລວງພະບາງ 80 ກິໂລແມັດ ໂດຍຜ່ານ 2 ເມືອງ, 1 ນະຄອນ ແລະ 28 ບ້ານ, ມີສະຖານີທັງໝົດ 6 ແຫ່ງ, ໃນນີ້ສະຖານີໃຫຍ່ 1 ແຫ່ງ ຢູ່ນະຄອນຫລວງພະບາງ; ມີຂົວທັງໝົດ 33 ແຫ່ງ ໃນນີ້ຂົວຂ້າມນໍ້າຂອງ 1 ແຫ່ງ ແລະ ຂົວຂ້າມນໍ້າຄານ 3 ແຫ່ງ, ມີອຸໂມງ 23 ແຫ່ງ, ອັດຕາສ່ວນ ຂົວ ແລະ ອຸໂມງກວມເອົາ 83,69% ຂອງໄລຍະທາງທັງໝົດ. ມາຮອດປັດຈຸບັນ ໄດ້ລົງມືກໍ່ສ້າງສະຖານນີ 5 ແຫ່ງ, ຍັງ 1 ແຫ່ງ; ຂົວນ້ອຍໃຫຍ່ 33 ແຫ່ງ ສໍາເລັດການກໍ່ສ້າງແລ້ວຈໍານວນໜຶ່ງ ບາງຕໍານວນກໍາລັງກ່າຍຂາງຂົວ; ອຸໂມງ 23 ແຫ່ງ ເຈາະຊອດແລ້ວ 17 ແຫ່ງ. ສໍາລັບວຽກງານໄກ່ເກ່ຍ, ເວນຄືນ ແລະ ຊົດເຊີຍປະຊົນທີ່ໄດ້ຮັບຜົນກະທົບ ແມ່ນໄດ້ສໍາເລັດການເກັບກໍາຂໍ້ມູນຜົນກະທົບຕາມແລວທາງ ແລະ ສະຖານີທັງໝົດ ພ້ອມທັງໄກ່ເກ່ຍທີ່ດິນກັບປະຊາຊົນ ແລະ ມອບທີ່ດິນໃຫ້ແກ່ບໍລິສັດຮັບຜິດຊອບກໍ່ສ້າງ ດໍາເນີນການກໍ່ສ້າງສໍຳເລັດ 100%.
ໂອກາດນີ້, ທ່ານຮອງນາຍົກລັດຖະມົນຕີ ກໍໄດ້ສະແດງຄວາມຍ້ອງຍໍຊົມ ເຊີຍຕໍ່ຄະນະຮັບຜິດຊອບທີ່ໄດ້ເອົາໃຈໃສ່ໃນການກໍ່ສ້າງ, ເຮັດໃຫ້ການກໍ່ສ້າງດໍາເນີນໄປຢ່າງຄ່ອງແຄ້ວ ແລະ ສໍາເລັດຕາມຄາດໝາຍ.