ຂປລ. ພະຍາດໄຂ້ຍຸງລາຍ ເປັນອີກພະຍາດໜຶ່ງ ທີ່ພວກເຮົາບໍ່ຄວນເບິ່ງຂ້າມ ແລະ ຕ້ອງໄດ້ເອົາໃຈໃສ່ ເຝົ້າລະວັງຢ່າງເຂັ້ມງວດ, ເຊິ່ງແຕ່ລະປີເຊື້ອພະຍາດດັ່ງກ່າວ ໄດ້ພາກຊີວິດຂອງມະນຸດ ໄປຫລາຍຮ້ອຍຄົນ, ປັດຈຸບັນ, ຢູ່ ສປປ ລາວ ພະຍາດໄຂ້ຍຸງລາຍ ໄດ້ແຜ່ລະບາດໜັກໃນທົ່ວປະເທດ (ຍົກ​ເວັ້ນ​ແຂວງ​ຊຽງ​ຂວາງ) ແລະ ຍັງມີທ່າອ່ຽງເພີ່ມຂຶ້ນເລື້ອຍໆ ເຮັດໃຫ້ມີຜູ້ຕິດເຊື້ອ ທັງໝົດເຖິງ 2.004 ຄົນ,​ ໃນ​ນັ້ນ ແຂວງທີ່ມີການລາຍງານ ຫລາຍກວ່າໝູ່ແມ່ນ ນະຄອນຫລວງວຽງຈັນ ເຊິ່ງມີເຖິງ 434 ຄົນ. ຈຳນວນຜູ້ເສຍຊີວິດ ຍ້ອນພະຍາດໄຂ້ຍຸງລາຍມີ ທັງໝົດ 5 ຄົນ, ໃນນັ້ນນະຄອນຫລວງ 2 ຄົນ, ບໍລິຄຳໄຊ 1 ຄົນ, ຄຳມ່ວນ 1 ຄົນ ແລະ ໄຊຍະບູລີ 1 ຄົນ.

ຕໍ່​ກັບ​ບັນຫາ​ດັ່ງກ່າວ​, ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກໍໄດ້ແນະນຳ ແລະ ຮຽກຮ້ອງໃຫ້ທຸກຄົນ, ທຸກພາກສ່ວນເອົາໃຈໃສ່ ໃນການອະນາໄມ ແລະ ປະ ຕິບັດມາຕະການ 5ປ ຢ່າງເຄັ່ງຄັດ ເປັນປະຈຳ ​ເພື່ອທຳລາຍແຫລ່ງ ເພາະພັນຂອງຍຸງລາຍໄດ້ ຄື: ປິດ ຝາພາຊະນະ ທີ່ເກັບນ້ຳໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງລາຍມາໄຂ່ໃສ່; ປ່ຽນ ນ້ຳໃນພາຊະນະ ເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ; ປ່ອຍ ປາຫາງນົກຍຸງເພື່ອກິນໜອນນ້ຳ; ປັບປຸງ ການອະນາໄມ ສິ່ງແວດລ້ອມອ້ອມເຮືອນ ບໍ່ໃຫ້ມີກະໂປະກະປ໋ອງ, ຢາງຕີນລົດເກົ່າທີ່ມີນ້ຳຂັງ; ແລະ ປະຕິບັດ ໃຫ້ເປັນນິໄສ ປະຈຳທຸກໆອາທິດ, ຖ້າເປັນໄຂ້ໃຫ້ໄປພົບແພດໝໍດ່ວນ, ຫາກທຸກຄົນປະຕິບັດໄດ້ຕາມ 5ປ ຢ່າງເຂັ້ມງວດ ກໍຈະສາມາດຫລຸດຜ່ອນ, ປ້ອງກັນການເຈັບເປັນ ແລະ ສະກັດກັ້ນການແຜ່ລະບາດ ຂອງເຊື້ອພະຍາດ ໄຂ້ຍຸງລາຍ ໃຫ້ຫລຸດລົງເທື່ອລະກ້າວ, ພ້ອມ​ນີ້ ຍັງຮຽກຮ້ອງໃຫ້ພໍ່ແມ່ປະຊາຊົນ ທຸກພາກສ່ວນໃນສັງຄົມ ຈົ່ງສືບຕໍ່ປະຕິບັດຕາມແຈ້ງການ, ຄຳແນະນຳ ແລະ ມາດຕະການຂອງຂະແໜງການ ສາທາລະນະສຸກວາງອອກຢ່າງເຂັ້ມງວດ ແລະ ດ້ວຍຄວາມຮັບຜິດຊອບສູງ.

ຂ່າວ: ມະນີທອນ

ເນື້ອໃນ: ຂປລ