ຂປລ. ໃນວັນທີ 8 ກຸມພາ 2019, ຢູ່ສໍານັກງານ ວາລະສານໂຄສະນາຂອງຄະນະໂຄສະ ນາອົບຮົມສູນກາງພັກ (ໜອງບອນ), ທ່ານ ໄມອອນ ທໍາມະວົງ ຫົວໜ້າຄະນະອໍານວຍການໂຮງ ພິມແຫ່ງລັດ ໄດ້ນໍາເອົາຄອມພິວເຕີ ຕັ້ງໂຕະ ຈໍານວນ 1 ຊຸດ, ມູນຄ່າ 8 ລ້ານກວ່າກີບ, ມາມອບໃຫ້ຄະນະບັນນາທິການ ວາລະສານໂຄສະນາ, ໂດຍ ທ່ານ ໂພເມກ ວິໄລສັກ ຫົວໜ້າຄະນະບັນ ນາທິການວາລະສານດັ່ງກ່າວ ຕາງໜ້າ ພະນັກງານກ່າວຮັບ, ພ້ອມດ້ວຍພາກສ່ວນກ່ຽວຂ້ອງ ເຂົ້າຮ່ວມເປັນສັກຂີພິຍານ.

ທ່ານ ໄມອອນ ທໍາມະວົງ ກ່າວວ່າ: ຈຸດປະສົງການມອບຄອມພິວເຕີໃນຄັ້ງນີ້, ກໍເພື່ອເປັນ ການປະກອບສ່ວຍຊ່ວຍເຫລືອ ໃນການປະຕິບັດໜ້າທີ່ ວຽກງານວິຊາສະເພາະ ຂອງວາລະສານ ໃຫ້ມີຄວາມມີທັນສະໄໝ, ຄວາມສະດວກ, ວ່ອງໄວ ແລະ ທ່ວງທັນກັບສະພາບການຕົວຈິງ.

ໂອກາດ​ນີ້, ທ່ານ ນາງ ສົມພອຍ ພົມມະຈັກ ຄະນະພັກ, ຫົວໜ້າຫ້ອງການຄະນະໂຄສະນາ ອົບຮົມສູນກາງພັກ ກໍໄດ້​ສະແດງ​ຄວາມຂອບໃຈ ແລະ ຊົມເຊີຍ​ມາ​ຍັງທ່ານຜູ້ອໍານວຍການໂຮງພິມແຫ່ງລັດ ທີ່​ໄດ້​ປະກອບສ່ວນ​ ຊ່ວຍເຫລືອໃນຄັ້ງນີ້, ພ້ອມ​ທັງ​ອວຍພອນ ​ໃຫ້​ໂຮງພິມດັ່ງກ່າວ ດຳເນີນ​ທຸລະ​ກິດປະສົບ​ຜົນສຳເລັດ ແລະ ຫວັງຢ່າງ​ຍິ່ງ​ວ່າ​ໂອກາດ​ໜ້າ​ ຈະ​ໄດ້​ຮັບການ​ຊ່ວຍເຫລືອ​ຕື່ມ​ອີກ.

 ພາບ-ຂ່າວໂດຍ: ມີໄຊ ພູນວິໄຊ

ເນື້ອໃນ: ຂປລ