ຂປລ
ສປ ຈີນ ແລະ 10 ປະເທດ ສະມາຊິກ ອາຊຽນ ເປັນເຈົ້າພາບ ຈັດກອງປະຊຸມໜ່ວຍງານປະສົມຄັ້ງທີ 50 ໃນການຈັດຕັ້ງປະຕິບັດ “ຖະແຫລງການ ວ່າດ້ວຍ ການປະພຶດ ຂອງບັນດາຝ່າຍຢູ່ ທະເລຈີນໃຕ້” ຫລື DOC ຢູ່ນະຄອນຄຸນໝິງ ແຂວງຢຸນນານ ຂອງ ສປ ຈີນ.
ຂປລ.ວິທະຍຸ-ໂທລະພາບ ສູນກາງຈີນ, ເມື່ອບໍ່ດົນມານີ້, ສປ ຈີນ ແລະ 10 ປະເທດ ສະມາຊິກ ອາຊຽນ ເປັນເຈົ້າພາບ ຈັດກອງປະຊຸມໜ່ວຍງານປະສົມຄັ້ງທີ 50 ໃນການຈັດຕັ້ງປະຕິບັດ “ຖະແຫລງການ ວ່າດ້ວຍ ການປະພຶດ ຂອງບັນດາຝ່າຍຢູ່ ທະເລຈີນໃຕ້” ຫລື DOC ຢູ່ນະຄອນຄຸນໝິງ ແຂວງຢຸນນານ ຂອງ ສປ ຈີນ. ບັນດາຝ່າຍໄດ້ລົງເລິກ ແລກປ່ຽນຄວາມເຫັນ ກ່ຽວກັບ ຫົວຂໍ້ຕ່າງໆ ເຊັ່ນ: ສະຖານະການຢູ່ທະເລຈີນໃຕ້ ໃນປັດຈຸບັນ, ການຈັດຕັ້ງປະຕິບັດ DOC, ການຮ່ວມມື ຕົວຈິງທາງທະເລ ແລະ ອື່ນໆ ພ້ອມທັງ ຊຸກຍູ້ການປຶກສາຫາລື ກ່ຽວກັບ “ກົດແຫ່ງການປະພຶດ ຢູ່ທະເລຈີນໃຕ້. ບັນດາຝ່າຍເຫັນດີ ເປັນເອກະພາບກັນໃຫ້ສືບຕໍ່ ຈັດຕັ້ງປະຕິບັດ DOC ຢ່າງບັງເກີດຜົນ ແລະ ຮອບດ້ານ, ລົງເລິກການຮ່ວມມືໃນຂົງເຂດອະນຸລັກສິ່ງແວດລ້ອມທາງທະເລ, ການຄົ້ນຄວ້າວິທະຍາສາດ, ການຊ່ວຍເຫຼືອທາງທະເລ ແລະ ອື່ນໆ, ເລັ່ງຊຸກຍູ້ການປຶກສາຫາລື “ກົດແຫ່ງການປະພຶດຢູ່ທະເລຈີນໃຕ້”, ພະຍາຍາມໃຫ້ບັນລຸ “ກົດແຫ່ງການປະພຶດຢູ່ທະເລຈີນໃຕ້” ໂດຍໄວ ເພື່ອຮ່ວມກັນປົກປັກຮັກສາສັນຕິພາບ ແລະ ສະຖຽນລະພາບຢູ່ທະເລຈີນໃຕ້./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
