ຂປລ
ທ່ານ ສີ ຈິ້ນຜິງ ປະທານປະເທດຈີນ ເຄີຍກ່າວວ່າ: “ການພັດທະນາສີຂຽວ ເປັນສີສັນທາດແທ້ ແຫ່ງການພັດທະນາ ທີ່ມີຄຸນນະພາບສູງ, ກຳລັງການຜະລິດ ໃນຄຸນນະພາບໃໝ່ ກໍແມ່ນກຳລັງການຜະລິດສີຂຽວ.”
ຂປລ.ວິທະຍຸ-ໂທລະພາບ ສູນກາງຈີນ, ທ່ານ ສີ ຈິ້ນຜິງ ປະທານປະເທດຈີນ ເຄີຍກ່າວວ່າ: “ການພັດທະນາສີຂຽວ ເປັນສີສັນທາດແທ້ ແຫ່ງການພັດທະນາ ທີ່ມີຄຸນນະພາບສູງ, ກຳລັງການຜະລິດ ໃນຄຸນນະພາບໃໝ່ ກໍແມ່ນກຳລັງການຜະລິດສີຂຽວ.” ນັບແຕ່ກອງປະຊຸມໃຫຍ່ ຜູ້ແທນທົ່ວປະເທດ ຄັ້ງທີ 18 ຂອງພັກກອມມູນິດຈີນ ເມື່ອປີ2012ເປັນຕົ້ນມາ, ທ່ານ ສີ ຈິ້ນຜິງ ເລຂາທິການໃຫຍ່ ຄະນະກຳມະການ ສູນກາງພັກ ກອມມູນິດຈີນ ໄດ້ກ່າວເນັ້ນໜັກ ມາຫລາຍເທື່ອໃຫ້ກ້າວເດີນຕາມເສັ້ນທາງ ການພັດທະນາ ຕາມທິດສີຂຽວ ແລະ ກາກບອນຕ່ຳ ທັງຮຽກຮ້ອງ ໃຫ້ເລັ່ງບົ່ມເພາະ ແລະພັດທະນາ ອຸດສາຫະກຳສີຂຽວ ແລະ ກາກບອນຕ່ຳ ໃຫ້ເຕີບໃຫຍ່ ຂະຫຍາຍຕົວ, ຕັ້ງໜ້າພັດທະນາ ເຕັກໂນໂລຊີສີຂຽວ, ຜະລິດຕະພັນສີຂຽວ, ຍົກສູງລະດັບການຫັນປ່ຽນ ສູ່ເສດຖະກິດສີຂຽວ, ເສີມສ້າງທ່າແຮງ ແລະ ກຳລັງບົ່ມຊ້ອນດ້ານການພັດທະນາ. ໃນໄລຍະປະຕິບັດ ແຜນພັດທະນາ ເສດຖະກິດສັງຄົມ ແຫ່ງຊາດ 5 ປີຄັ້ງທີ 14 (2021-2025), ສປ ຈີນ ໄດ້ບັນລຸເປົ້າໝາຍການປະກອບສ່ວນ ຢ່າງເປັນເຈົ້າການ ເພື່ອຮັບມືກັບ ການປ່ຽນແປງ ຂອງດິນຟ້າອາກາດ ຮອດ ປີ 2030 ກ່ອນກຳນົດເວລາ ໃນດ້ານຍອດປະລິມານກຳລັງ ຕິດຕັ້ງໄຟຟ້າ ພະລັງງານລົມ ແລະ ໄຟຟ້າພະລັງງານ ແສງຕາເວັນ, ໄດ້ສຳເລັດການສ້າງ ແລະ ປັບປຸງມາດຕະຖານ ລະບາຍມົນລະພິດ 32 ປະການ, ໄດ້ບັນລຸການຄຸ້ມຄອງ ແລະ ຄວບຄຸມຢ່າງມີປະສິດທິຜົນ ຕໍ່ປະລິມານການລະບາຍ ກາກບອນດີອົກຊິດ ຫລາຍກວ່າ 60% ຂອງທົ່ວປະເທດ. ຂໍ້ມູນຕົວເລກລະອຽດເຫລົ່ານີ້ ໄດ້ພິສູດໃຫ້ເຫັນຢ່າງຊັດເຈນວ່າ ສປ ຈີນ ກຳລັງຖືເອົາການປະຕິຮູບ ແລະ ປະດິດສ້າງເປັນແຮງຂັບເຄື່ອນ, ຕໍ່ຍອດການພັດທະນາ ທີ່ມີຄູນນະພາບສູງ ໃຫ້ມີລັກສະນະແບບສີຂຽວ ຫລາຍກວ່າເກົ່າ. ວັນທີ 31 ມັງກອນ 2024, ເວລາກ່າວຄຳປາໄສ ໃນການຮ່ຳຮຽນລວມໝູ່ຄັ້ງທີ 11 ຂອງກົມການເມືອງສູນກາງພັກ ກອມມູນິດຈີນສະໄຫມທີ 20, ທ່ານ ສີ ຈິ້ນຜິງ ໄດ້ກ່າວວ່າ: “ຕ້ອງປູກຈິດສຳນຶກ ໃຫ້ໜັກແໜ້ນ ແລະ ປະຕິບັດຕົວຈິງ ຕາມແນວຄິດພູຂຽວນ້ຳໃສກໍແມ່ນພູເງິນພູຄຳ, ກ້າວເດີນຕາມເສັ້ນທາງສິ່ງແວດລ້ອມ ທຳມະຊາດ ເປັນບູລິມະສິດ ແລະ ການພັດທະນາຕາມທິດສີຂຽວ ຢ່າງເດັດດ່ຽວ ຫນຽວແຫນ້ນ.” ປີ 2024, ການສິ້ນເປືອງພະລັງງານ ຕໍ່ຫົວໜ່ວຍລວມຍອດຜະລິດຕະພັນພາຍໃນ ຫລື GDP ຂອງ ສປ ຈີນ ໄດ້ຫລຸດລົງ 11,6% ເມື່ອທຽບໃສ່ ໄລຍະປະຕິບັດ ແຜນການ 5 ປີຄັ້ງທີ 13（2016—2020）, ໝາຍຄວາມວ່າ ການສິ້ນເປືອງພະລັງານ ໃນການສ້າງ GDP ແຕ່ລະ 100 ຢວນແມ່ນໄດ້ຫລຸດລົງ 11,6% ຫລື ເທົ່າກັບການຫລຸດຜ່ອນ ການລະບາຍກາກບອນດີອົກຊິດ 1,1 ຕື້ໂຕນ. ເດືອນພຶດສະພາປີ 2024, ໃນເວລາລົງເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງຊ່ານຕົ່ງ, ທ່ານ ສີ ຈິນຜິງ ໄດ້ຊີ້ນຳວ່າ: “ຕ້ອງອອກແຮງ ຊຸກຍູ້ການຫັນປ່ຽນ ຮູບແບບ ການພັດທະນາ ຕາມທິດສີຂຽວ ແລະ ກາກບອນຕ່ຳ, ຊຸກຍູ້ ການປະດິດສ້າງ ດ້ານວິທະຍາສາດເຕັກໂນໂລຊີ ແລະ ການພັດທະນາອຸດສາຫະກຳສີຂຽວທີ່ເປັນມິດກັບສິ່ງແວດລ້ອມ.” ນັບມາຮອດ ທ້າຍປີ2024, ທົ່ວປະເທດຈີນ ໄດ້ບົ່ມເພາະ ໂຮງງານສີຂຽວ ລະດັບຊາດ 6.430 ແຫ່ງ, ເຂດນິຄົມອຸດສາຫະກຳ ສີຂຽວ 491 ແຫ່ງ, ໃນນີ້, ມູນຄ່າ ການຜະລິດ ຂອງໂຮງງານ ສີຂຽວລະດັບຊາດ ໄດ້ກວມອັດຕາສ່ວນ ຫລາຍກວ່າ 20%. ວັນທີ 31 ມັງກອນ 2024, ເວລາກ່າວຄຳປາໄສ ໃນການຮ່ຳຮຽນ ລວມໝູ່ ຄັ້ງທີ 11 ຂອງກົມການເມືອງສູນກາງພັກ ກອມມູນິດຈີນ ສະໄຫມທີ 20, ທ່ານ ສີ ຈິ້ນຜິງ ໄດ້ກ່າວເນັ້ນໜັກວ່າ: “ຕ້ອງພັດທະນາ ອຸດສາຫະກຳ ການຜະລິດສີຂຽວ ໃຫ້ເຂັ້ມແຂງ, ພັດທະນາຂະແໜງ ບໍລິການສີຂຽວ, ພັດທະນາ ອຸດສາຫະກຳ ພະລັງງານສີຂຽວ ໃຫ້ເຕີບໃຫຍ່ ຂະຫຍາຍຕົວ, ພັດທະນາອຸດສາຫະກຳ ແລະ ຕ່ອງໂສ້ການສະໜອງ ແບບສີຂຽວ ແລະ ກາກບອນຕ່ຳ.” ໃນໄລຍະປະຕິບັດແຜນການ 5 ປີຄັ້ງທີ 14, ສປ ຈີນ ໄດ້ປະຖິ້ມການໃຊ້ລົດລະບາຍ ມົນລະພິດສູງ ເກືອບ 20.000.000 ຄັນ. ນັບມາຮອດ ທ້າຍປີ 2024, ທົ່ວປະເທດຈີນ ມີປະລິມານລົດພະລັງງານໃໝ່ ບັນລຸເຖິງ 31.400.000 ຄັນ, ກວມຍອດ ປະລິມານລົດຍົນເຖິງ 8,9%, ໄດ້ເພີ່ມຂຶ້ນຫລາຍກວ່າ 5 ເທົ່າເມື່ອທຽບໃສ່ ໄລຍະປະຕິບັດ ແຜນການ 5 ປີຄັ້ງທີ 13. ວັນທີ 18 ທັນວາ 2015, ໃນກອງປະຊຸມວຽກງານເສດຖະກິດຂັ້ນສູນກາງຂອງ ສປ ຈີນ, ທ່ານ ສີ ຈິ້ນຜິງ ໄດ້ຊີ້ອອກວ່າ: “ຕ້ອງກ້າວເດີນໄປຕາມເສັ້ນທາງ ການພັດທະນາ ຕາມທິດສີຂຽວ, ກາກບອນຕ່ຳ ແລະ ໝູນວຽນຢ່າງເດັດດ່ຽວໜຽວແໜ້ນ, ສ້າງລະບົບອຸດສາຫະກຳສີຂຽວ ແລະ ສະພາບພື້ນທີ່ສີຂຽວ.” ນັບມາຮອດ ເດືອນກໍລະກົດປີ 2024, ຄວາມສາມາດ ການສົ່ງໄຟຟ້າ ຂອງໂຄງການສົ່ງໄຟຟ້າ ຈາກພາກຕາເວັນຕົກ ໄປສູ່ພາກຕາເວັນອອກຂອງ ສປ ຈີນ ໄດ້ບັນລຸ ຫລາຍກວ່າ 300 ລ້ານກິໂລວັດ, ເຊິ່ງໄດ້ຕອບສະໜອງກັບ ຄວາມຕ້ອງການຊົມໃຊ້ໄຟຟ້າ ປະມານ 20% ຂອງເຂດພາກກາງ ແລະ ພາກຕາເວັນອອກຂອງ ສປ ຈີນ. ທະເລຊາຍ ແລະ ແດນເຮື້ອກັນດານພາກຕາເວັນຕົກ ໄດ້ຈັດຕັ້ງກັງຫັນລົມ ແລະ ແຜງຜະລິດໄຟຟ້າ ແສງຕາເວັນເປັນຈຳນວນຫລວງຫລາຍ ຢ່າງກວ້າງຂວາງ ເຊິ່ງໄດ້ກາຍເປັນ “ແຫລ່ງພະລັງງານໄຟຟ້າສີຂຽວ”.
ວັນທີ 17 ກໍລະກົດ 2023, ເວລາກ່າວຄຳປາໄສໃນກອງປະຊຸມອະນຸລັກສິ່ງແວດລ້ອມທຳມະຊາດທົ່ວປະເທດຈີນ, ທ່ານ ສີຈິ້ນຜິງ ໄດ້ກ່າວວ່າ: “ອອກແຮງສົ່ງເສີມ ທັດສະນະຄະຕິ ການດຳລົງຊີວິດ ແລະ ຮູບການບໍລິໂພກ ແບບລຽບງ່າຍ, ເໝາະສົມ, ສີຂຽວ, ກາກບອນຕ່ຳ, ສິວິໄລ ແລະມີສຸຂະພາບດີ, ເຮັດໃຫ້ການອອກເດີນທາງ ແບບສີຂຽວ, ການປະຢັດນ້ຳ ແລະໄຟຟ້າ, ‘ການເຄື່ອນໄຫວກ້ຽງຈານ’ ເພື່ອຕ້ານການຟູມເຟື້ອຍ ອາຫານການກິນ, ການຄັດແຍກປະເພດຂີ້ເຫຍື້ອ ແລະ ອື່ນໆ ກາຍເປັນຄວາມຊິນເຄີຍ.”
ພາຍໃຕ້ການຊຸກຍູ້ ຈາກນະໂຍບາຍ “ປັບປ່ຽນອຸປະກອນໃໝ່ ຢ່າງຂະໜາດໃຫຍ່ ແລະ ການຊື້ເຄື່ອງບໍລິໂພກແບບເກົ່າແລກໃໝ່”, ໃນຈຳນວນເຄື່ອງໃຊ້ໄຟຟ້າ ໃນເຮືອນ 8 ປະເພດໃຫຍ່ເຊັ່ນ: ຕູ້ເຢັນ, ຈັກຊັກເຄື່ອງ, ໂທລະພາບ, ຄອມພິວເຕີ ແລະອື່ນໆ ທີ່ໄດ້ຮັບເງິນອຸດໜູນ ຈາກນະໂຍບາຍເກົ່າແລກໃໝ່, ຍອດມູນຄ່າ ການຈຳໜ່າຍ ຜະລິດຕະພັນທີ່ປະສິດທິພາບ ການນຳໃຊ້ ພະລັງງານລະດັບໜຶ່ງ ຫລື ໄດ້ມາດຕະຖານສາກົນ ໄດ້ກວມຫລາຍກວ່າ 90%. ທຸກມື້ນີ້, ການບໍລິໂພກຜະລິດຕະພັນສີຂຽວ ຢູ່ ສປ ຈີນ ພວມຟົດຟື້ນ, ກຳລັງການຜະລິດສີຂຽວ ພວມເລັ່ງບົ່ມເພາະຢູ່, ໃນຂະນະທີ່ສ້າງທ່າແຮງໃໝ່ ໃນດ້ານການພັດທະນາ ອຸດສາຫະກຳນັ້ນ ໄດ້ເພີ່ມພະລັງແຮງ ຂັບເຄື່ອນ ຢ່າງເຂັ້ມແຂງ ໃຫ້ແກ່ການພັດທະນາ ທີ່ມີຄຸນນະພາບສູງ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
