ຂປລ. ຄະນະ​ຜູ້​ແທນ​ລາວ ນໍາ​ໂດຍ ທ່ານ ພົນໂທ ຄຳລຽງ ອຸທະໄກສອນ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ສຳເລັດການເຂົ້າຮ່ວມກອງປະຊຸມ ລັດຖະມົນຕີປ້ອງກັນປະເທດອາຊຽນ-ວົງແຄບ (ADMM Retreat) ທີ່ເມືອງປີນັງ, ປະເທດມາເລເຊຍ ໃນວັນທີ 26 ກຸມພາ 2025 ໂດຍການເປັນປະທານ ຂອງ ທ່ານ ດາໂຕະ ເຊີຣີ ໂມຮາມັດ ຄາເລັດ ບິນນໍດິນ ລັດຖະມົນຕີກະ ຊວງປ້ອງກັນປະເທດມາເລເຊຍ, ມີລັດຖະມົນຕີກະຊວງປ້ອງກັນປະເທດ ບັນດາປະເທດສະມາຊິກອາ ຊຽນ, ຕີມໍ-ແລັດສະເຕ ໃນນາມປະເທດສັງເກດການ ແລະ ຮອງເລຂາທິການໃຫຍ່ອາຊຽນ ເຂົ້າຮ່ວມ.

ກອງປະຊຸມຄັ້ງນີ້, ໄດ້ດໍາເນີນພາຍໃຕ້ຄຳຂວັນ “ການເພີ່ມທະວີຄວາມສາມັກຄີຂອງອາຊຽນ ແລະ ການຮ່ວມມືຂອງພາກພື້ນ ເພື່ອຮັບມືກັບສິ່ງທ້າທາຍ ທີ່ພົ້ນເດັ່ນຕໍ່ຄວາມໝັ້ນຄົງ”. ຕໍ່ກັບບັນຫາດັ່ງ ກ່າວ, ບັນດາລັດຖະມົນຕີປ້ອງກັນປະເທດອາຊຽນ ໄດ້ແລກປ່ຽນທັດສະນະກ່ຽວກັບ ການເສີມສ້າງຄວາມສາມັກຄີ ແລະ ພື້ນຖານແນວຄວາມຄິດອາຊຽນ ໃນການສົ່ງເສີມການພົວພັນຮ່ວມມືຂອງພາກພື້ນ ເພື່ອຮັບມືກັບບັນດາສິ່ງທ້າທາຍທີ່ພົ້ນເດັ່ນ ເຊິ່ງສົ່ງຜົນກະທົບຕໍ່ການປົກປັກຮັກສາສັນຕິພາບ, ສະ ຖຽນລະພາບ ແລະ ຄວາມໝັ້ນຄົງຂອງອາຊຽນ ເພື່ອປະກອບສ່ວນເຂົ້າໃນ ການເອື້ອອໍານວຍຄວາມສະ ດວກໃຫ້ແກ່ການສ້າງສາ ພັດທະນາເສດຖະກິດ-ສັງຄົມຂອງພາກພື້ນ.

ໃນກອງປະຊຸມ ADMM Retreat ຄັ້ງນີ້, ຍັງໄດ້ຮັບຮອງເອົາ “ຖະແຫລງການຮ່ວມຂອງລັດ ຖະມົນຕີປ້ອງກັນປະເທດອາຊຽນ ວ່າດ້ວຍການຮ່ວມມືດ້ານວຽກງານປັນຍາປະດິດ ໃນຂະແໜງການປ້ອງກັນຊາດ” ເຊິ່ງເອກະສານດັ່ງກ່າວ, ໄດ້ສະແດງຄວາມໝັ້ນໝາຍ ໃນການສົ່ງເສີມຄວາມໂປ່ງໃສ ແລະ ຄວາມຮັບຜິດຊອບ ໃນການນໍາໃຊ້ປັນຍາປະດິດ ໃນຂະແໜງການປ້ອງກັນຊາດຂອງອາຊຽນ ໃຫ້ສອດ ຄ່ອງລະບຽບກົດໝາຍສາກົນ ແລະ ບັນດາແຜນງານ ພາຍໃຕ້ຂອບການຮ່ວມມືຂອງອາຊຽນ; ສົ່ງເສີມຂໍ້ລິເລີ່ມການຮ່ວມມື ໃນການພັດທະນາຂີດຄວາມສາມາດ ທາງດ້ານເຕັກໂນໂລຊີ ໃນບັນດາຂະແໜງການປ້ອງກັນຊາດ ເພື່ອເສີມສ້າງ ການຮ່ວມມືໃນການຂັບເຄື່ອນ ແລະ ຮັດແຄບຄວາມແຕກໂຕນ ທາງດ້ານການພັດທະນາ ວຽກງານປັນຍາປະດິດ ໃນບັນດາປະເທດສະມາຊິກອາຊຽນ; ພັດທະນາການຮ່ວມມືດ້ານ ວຽກງານປັນຍາປະດິດ ໃນຂະແໜງການປ້ອງກັນຊາດ ເພື່ອເພີ່ມທະວີ ແລະ ສ້າງຄວາມຮູ້ສາມາດ ທາງດ້ານປັນຍາປະດິດ ໂດຍຜ່ານກົນໄກການ ຮ່ວມມືທີ່ກ່ຽວຂ້ອງຂອງອາຊຽນ ແລະ ຊຸກຍູ້ສົ່ງເສີມວຽກງານປັນຍາປະດິດ ເຂົ້າໃນກິດຈະກໍາທີ່ເໝາະສົມຂອງໜ່ວຍງານຜູ້ຊ່ຽວຊານ ໃນຂອບກອງປະຊຸມລັດ ຖະມົນຕີປ້ອງກັນປະເທດອາຊຽນ-ບວກ ເພື່ອນໍາເອົາຜົນປະໂຫຍດສູງສຸດມາສູ່ອາຊຽນ ແລະ ທັງເປັນການເສີມສ້າງຂີດຄວາມສາມາດ ໃນການແກ້ໄຂບັນດາສິ່ງທ້າທາຍ ຕໍ່ຄວາມໝັ້ນຄົງຂອງພາກພື້ນ.

ພ້ອມ​ນີ້, ກອງປະຊຸມ ຍັງໄດ້ປຶກສາຫາລືວຽກງານອື່ນໆ ທີ່ກ່ຽວຂ້ອງ ໂດຍສະເພາະ ການພິຈາລະ ນາ ແລະ ການເຫັນດີເປັນເອກະພາບຂອງອາຊຽນ ໃນການຮັບຮອງເອົາປະເທດ ເຢຍລະມັນ ແລະ ຕວກກີ ເຂົ້າຮ່ວມສັງເກດການ ໃນບັນດາໜ່ວຍງານຜູ້ຊ່ຽວຊານ ໃນຂອບກອງປະຊຸມ ADMM-ບວກ ໃນຮອບວຽນປີ 2024-2027.

ຂ່າວ-ພາບ: ທອງມາ ໄຊຍະເພັງສາ

KPL