*ສະບັບ​ກ່ອນ​ໄດ້​ຍົກ​ເອົາ​ບາງ​ຕົວຢ່າງ​ຈາກ​ປະ​ເທດ​ເພື່ອນ​ບ້ານ ທີ່​ເຫລົ່າຢູທູບ​ເບີ (Youtuber), ຕິກ​ຕ໋ອກ​ເກີ (TikToker) ຫລື ອິນ​ຟລູ​ເອນ​ເຊີ (Influencer) ຕ້ອງ​ໄດ້​ມອບ​ພັນທະ​ອາກອນ​ໃຫ້​ລັດ ພາຍຫລັງ​ມີ​ລາຍ​ຮັບ​ຈາກ​​ແພ​ລັດ​ຟອມສື່​ອອນ​ລາຍ​ຕ່າງໆ. ມາສະ​ບັບນີ້ ຂໍ​ນໍາ​ສະ​ເໜີ ກ່ຽວ​ກັບການ​ເສຍ​ພັນທະ​ອາກອນ ຈາກ​ສິນຄ້າ​ດິຈິ​ຕອນ ຢູ່​ສປປ ລາວ.

ໃນວັນທີ 24 ກຸມພາ 2024, ກະຊວງການເງິນ ໄດ້ອອກແຈ້ງການ ເລກທີ 0560/ກງ ເຖິງບຸກຄົນ, ນິຕິບຸກຄົນ ແລະ ການຈັດຕັ້ງ ທີ່ດໍາເນີນທຸລະກິດ ແລະ ຜູ້ມີລາຍໄດ້ ກ່ຽວກັບການສະໜອງສິນຄ້າດິຈິຕອນ ແລະ ບໍລິການຮູບດິຈິຕອນ (Digital Platform) ຫລື ກິດຈະ ກໍາການຄ້າທາງເອເລັກໂຕຣນິກ ​ໃນ​ນັ້ນ ​ໄດ້​ລະບຸ​ເຖິງ​ຈຸດປະສົງ​ຂອງ​ແຈ້ງ​ການ ກໍ​ຄື ການປະຕິບັດພັນທະອາກອນຈາກ ສິນຄ້າດິຈິຕອນ ແລະ ບໍລິການຮູບແບບດິຈິຕອນ ຫລື ກິດຈະກໍາການຄ້າທາງເລັກໂຕຣນິກ.

ການ​ຄ້າ​ເອ​ເລັກ​ໂຕຣນິກ ໝາຍ​ເຖິງ​ການ​ຊື້​ຂາຍ, ການ​ແລກ​ປ່ຽນ​ສິນຄ້າ ຫລື ການ​ບໍລິການ ລະຫວ່າງ​ຜູ້​ຄ້າ ​ແລະ ລູກ​ຄ້າ ​ໂດຍ​ນໍາ​ໃຊ້​ຊ່ອງ​ທາງ​ເອ​ເລັກ​ໂຕຣນິກ, ສ່ວນ​ຊ່ອງ​ທາງ​ເອ​ເລັກ​ໂຕຣນິກ ກໍ​ຄື ຜູ້​ຄ້າ, ບຸກຄົນ ຫລື ນິຕິບຸກຄົນ ທີ່​ເປັນ​ເຈົ້າ​ຂອງ​ເວັບ​ໄຊ ຫລື ​​ໂປຣ​ແກຣມການ​ຄ້າ​ທາງ​ເອ​ເລັກ​ໂຕຣນິກ.

​ໃນ​ແຈ້ງ​ການ​ສະບັບ​ດັ່ງກ່າວ, ​ໄດ້​ກໍານົດ​ແຕ່ລະ​ປ​ະ​ເພດ​ຜູ້​ເສຍ​ອາກອນ ທີ່​ເປັນ​ທັງ​ວິ​ສາ​ຫະກິດ​ທີ່​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ; ຈຸນ​ລະວິ​ສາ​ຫະກິດ ​ແລະ ພາກສ່ວນ​ບຸກຄົນ, ນິຕິບຸກຄົນ ​ແລະ ການ​ຈັດ​ຕັ້ງ ທີ່​ເຄື່ອນ​ໄຫວ​ມີ​ລາຍ​ໄດ້ ​ເຊິ່ງ​ແຕ່​ລະ​ປະ​ເພດ ​ໄດ້​ຖືກ​ກໍານົດ​ກ່ຽວ​ກັບ​ຂັ້ນ​ຕອນ ​ແລະ ວິທີ​ການ​ຈົດ​ທະບຽນ​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ, ການ​ຍື່ນ​ໃບ​ແຈ້ງ​ອາກອນ​ລາຍ​ໄດ້​ດ້ວຍ​ຕົນ​ເອງ ​ແລະ ອື່ນໆ, ​ແຕ່​ບໍ່​ໄດ້​ກໍານົດ​ວ່າ ຕ້ອງ​ມີ​ລາຍ​ໄດ້​ຈາກ​ການ​ຄ້າ ຫລື ການ​ບໍລິການ​ດິຈິ​ຕອນ ​ເທົ່າ​ໃດ ຈຶ່ງຈະ​ຕ້ອງ​ລົງທະບຽນ​ເຂົ້າ​ສູ່​ລະບົບ​ອາກອນ​ມູນ​ຄ່າ​ເພີ່ມ ມີ​ພຽງ​ກໍານົດ​ໄວ້​ໃນປະ​ເພດ ຈຸນ​ລະວິ​ສາ​ຫະກິດ​ ເທົ່າ​ນັ້ນ,​ໂດຍ​ລະບຸ​ໄວ້​ໃນ​ໜ້າ​ທີ 3 ຂອງ​ແຈ້ງ​ການ​ວ່າ: ຜ່ານ​ກາ​ນດໍາ​ເນີນ ທຸລະ​ກິດ ຖ້າ​ມີ​ຂໍ້​ມູນລາຍ​ຮັບ​ປະ​ຈໍາປີ​ເກີນ ສີ່​ຮ້ອຍ​ລ້ານ​ກີບ​ຂຶ້ນ​ໄປ (400 ລ້ານ​ກີບ) ຂຶ້ນ​ໄປ ຕ້ອງ​ເຂົ້າ​ສູ່​ລະບົບ​ອາກອນ​ມູນ​ຄ່າ​ເພີ່ມ, ປະຕິບັດ​ພັນທະ​ອາກອນ​ປະ​ເພດ​ຕ່າງໆ. ກໍລະນີ ຈຸນ​ລະວິ​ສາ​ຫະກິດ ບໍ່​ຄົບ​​ເງື່ອນ​ໄຂ​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ ​ແຕ່​ຢູ່​ລະບົບ​ອາກອນ​ລາຍ​ໄດ້​ແມ່ນ ສາມາດ​ສະໝັກ​ໃຈ​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ​ໄດ້ ​ແລະ ​ໃຫ້​ປະຕິບັດ ພັນທະ​ອາກອນ​ປະ​ເພດ​ຕ່າງໆ ຕາມ​ທີ່​ໄດ້​ກໍານົດ​ໄວ້​ໃນ​ຂໍ້ 1 ຂອງ​ຄໍາ​ແນະນຳ​ສະບັບ​ນີ້ (1.ວິ​ສາ​ຫະກິດ​ທີ່​ເຂົ້າ​ໃນ​ລະບົບ​ອາກອນ​ມູນ​ຄ່າ​ເພີ່ມ).

ຢ່າງ​ໃດ​ກໍ​ຕາມ, ​ໃນ​ດໍາລັດວ່າ​ດ້ວຍ​ການ​ຄ້າ​ທາງ​ເອ​ເລັກ​ໂຕຣນິກ ​ເລກທີ 296/ລບ ລົງ​ວັນ​ທີ 12 ທັນວາ 2021 ​​ໃນພາກ​ທີ III ໝວດ​ທີ I ມາດຕາ 10 ​ໄດ້​ກ່າວ​ເຖິງ​ການ​ແຈ້ງ​ການ​ຄ້າ​ທາງ​ເອ​ເລັກ​ໂຕຣນິກ ໝາຍວ່າ ບຸກຄົນ ຫຼື ນິຕິບຸກຄົນ ທີ່ດໍາເນີນທຸລະກິດການຄ້າທາງເອເລັກ ໂຕຣນິກ ຕ້ອງ​ໄດ້​ສະໜອງ​ຂໍ້​ມູນໃຫ້ຂະແໜງອຸດສາຫະກຳ ແລະ ການຄ້າ ເພື່ອເກັບກໍາຂໍ້ມູນ ແລະ ຕິດຕາມການເຄື່ອນໄຫວ.

ບຸກຄົນ ຫລື ນິຕິບຸກຄົນ ທີ່ໄດ້ດຳເນີນການຄ້າຜ່ານຊ່ອງທາງເອເລັກໂຕຣນິກຂອງຕົນ ຫລື ການຄ້າໃນ ຕະຫລາດທາງເອເລັກໂຕຣນິກ ກ່ອນດຳລັດສະບັບນີ້ ຕ້ອງແຈ້ງການດໍາເນີນທຸລະກິດ ພາຍໃນ ເກົ້າສິບ ວັນ ນັບແຕ່ ວັນທີ່ດໍາລັດສະບັບນີ້ມີຜົນບັງຄັບໃຊ້ ເປັນຕົ້ນໄປ. ຖ້າບໍ່ ມາແຈ້ງຕາມກຳນົດເວລາດັ່ງກ່າວ ຈະຖືກປະຕິບັດມາດ ຕະການ ຕາມທີ່ກຳນົດໄວ້ ໃນກົດໝາຍ ແລະ ລະບຽບການ.

ສັງ​ລວມ​ແລ້ວ, ​ໃນ​ດໍາລັດວ່າ​ດ້ວຍ​ການ​ຄ້າ​ທາງ​ເອ​ເລັກ​ໂຕຣນິກ ​ແລະ ​ແຈ້ງ​ການກ່ຽວ​ກັບ​ການ​ປະຕິບັດ​ພັນທະ​ອາກອນ​ຈາກ​ສິນຄ້າ ດິຈິ​ຕອນ ​ແລະ ບໍລິການຮູບດິຈິຕອນ (Digital Platform) ຫລື ກິດຈະກໍາການຄ້າທາງເອເລັກໂຕຣນິກ ບໍ່​ໄດ້​ລະບຸ​ແຈ້ງ​ກ່ຽວ​ກັບ​ການ​ກໍານົດ​ລາຍ​ໄດ້ຢ່າງ​ລະອຽດ  ຫລື​ເປັນອັນສະ​ເພາະ​ ຕໍ່​ຜູ້​ມີ​ລາຍ​ໄດ້​ຈາກ​ການ​ຄ້າ​ດິຈິ​ຕອນ ຫລື ການ​ບໍລິການ​ດິຈິ​ຕອນ ວ່າ​ ຕ້ອງມອບ​ພັນ​ທະ​ໃຫ້​ລັດ​ຈັກ​ສ່ວນ​ຮ້ອຍ​ຂອງ​ລາຍ​ຮັບ, ຕ້ອງ​ມີ​ລາຍ​ໄດ້​ເທົ່າ​ໃດ​ຕໍ່​ປີ ຈຶ່ງ​ມອບ​ພັນທະ​ອາກອນ. ດັ່ງ​ນັ້ນ, ບັນດາ​ທ່ານ​ທີ່​ເຮັດ​ການ​ຄ້າ ຫລື ການ​ບໍລິການ​ດ້ານ​ນີ້ ອາດ​ຈະ​ສອບ​ຖາມ ພົວພັນກັບສະມາຄົມ​ການ​ຄ້າ​ເອ​ເລັກ​ໂຕຣນິກ ຫລື ພາກສ່ວນ​ກ່ຽວຂ້ອງກ່ຽວ​ກັບ​ລາຍ​ລະອຽດ​ຕື່ມ ​ເພາະ​ອາດ​ຈະ​ຖືກ​ກໍານົດ​ຢູ່​ໃນ​ນິຕິ​ກໍາ ຫລື ​ແຈ້ງ​ການ​ອື່ນໆ ທີ່​ກ່ຽວ​ພັນ​​ກັນ. ​ແລະຖ້າ​ໄດ້​ຂໍ້​ມູນ​ຈາກ​ພາກສ່ວນ​ກ່ຽວຂ້ອງ​ເພີ່ມ​ເຕີມ ຈະ​​ເອົາ​ມາ​ນໍາ​ສະ​ເໜີ​ໃຫ້​ບັນດາ​ທ່ານ​ໄດ້​ຮັບ​ຊາບຕໍ່​ໄປ.

KPL