ຂປລ
ປັດຈຸບັນ ການດຳເນີນທຸລະກິດການບໍລິການແມ່ນມີຫລາຍເປັນ ຕົ້ນແມ່ນການບໍລິການເຮືອນພັກ, ໂຮງແຮມ, ຮ້ານອາຫານ, ເປີດບໍລິການສະຖານທີ່ທ່ອງທ່ຽວແບບເປັນສ່ວນເປັນຟາມກໍມີຫລາຍ, ໂດຍສະເພາະແມ່ນສວນດອກໄມ້ທ່ີກຳລັງເປັນທ່ີນິຍົມຊົມຊອບຈາກຊາວນະຄອນຫລວງວຽງຈັນ.
*ປັດຈຸບັນ ການດຳເນີນທຸລະກິດການບໍລິການແມ່ນມີຫລາຍເປັນ ຕົ້ນແມ່ນການບໍລິການເຮືອນພັກ, ໂຮງແຮມ, ຮ້ານອາຫານ, ເປີດບໍລິການສະຖານທີ່ທ່ອງທ່ຽວແບບເປັນສ່ວນເປັນຟາມກໍມີຫລາຍ, ໂດຍສະເພາະແມ່ນສວນດອກໄມ້ທ່ີກຳລັງເປັນທ່ີນິຍົມຊົມຊອບຈາກຊາວນະຄອນຫລວງວຽງຈັນ, ເພາະຜູ້ປະກອບການເພິ່ນໄດ້ນໍາເອົາດອກໄມ້ຫລາກຫລາຍຊະນິດ ມາປູກເພື່ອໃຫ້ນັກທ່ອງທ່ຽວໄດ້ເຂົ້າມາພັກຜ່ອນ, ເຮັດກິດຈະກຳກັບຄອບຄົວ, ນັກຊົມສວນດອກ ດອກໄມ້ທີ່ກໍາລັງເບັງບານໃນມື້ວັນພັກວັນເສົາ, ວັນອາທິດ ຫລື ເວລາຫວ່າງ ຂອງຄົນທີ່ເວລາໜ້ອຍ ຢາກພາຄອບຄົວມາພັກຜ່ອນ. ພ້ອມນັ້ນ ກໍຍັງເປັນການສ້າງລາຍຮັບໃຫ້ແກ່ຜູ້ປະກອບການໄດ້ມີລາຍຮັບຫລາຍລ້ານກີບຕໍ່ມື້ ແລະ ຍັງເປັນການສ້າງວຽກເຮັດງານທຳໃຫ້ປະຊາຊົນເຂດດັ່ງກ່າວມີວຽກເຮັດງານທຳມີລາຍໄດ້ເຂົ້າຄອບຄົວເໝືອນດັ່ງສວນດອກໄມ້ງາມຟາມ ສະຖານທີ່ທ່ອງທ່ຽວແຫ່ງໃໝ່ ຂອງນະຄອນຫລວງວຽງຈັນ ທີ່ກໍາໄດ້ຮັບຄວາມນິຍົມຊົມຊອບ ເນື່ອງຈາກວ່າສະຖານທີ່ແຫ່ງນີ້ ຢູ່ໃກ້ກັບຕົວເມືອງການໄປ, ການມາກ່ໍສະດວກສະບາຍ ມີດອກໄມ້ຫລາຍສາຍພັນ ທີ່ປູກປະດັບປະດາຢ່າງເປັນລະບຽບຮຽບຮ້ອຍໃນເນື້ອ ທີ່ 6 ເຮັກຕາ ໄວ້ຄ່ອຍບໍລິການນັກທ່ອງທ່ຽວເຂົ້າມາທ່ຽວ ເຊິ່ງສາມາດສ້າງລາຍຮັບຫລາຍລ້ານກີບຕໍ່ມື້.
ທ່ານ ນາງ ອຸໄລພອນ ວົງຄໍາມຸນຕີ ເຈົ້າຂອງສວນດອກໄມ້ງາມຟາມໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວວ່າ: ຈຸດເລີ່ມຕົ້ນຂອງສວນດອກໄມ້ງາມຟາມ ຍ້ອນເມື່ອກ່ອນຕົນເອງກໍເຮັດສວນດອກໄມ້ ປູກດອກດາວເຮືອງຂາຍໃນວັນສິນ, ງານດອງຢູ່ແລ້ວ ແລະ ດ້ວຍຄວາມມັກໃນການເຮັດກະສິກຳຢູ່ແລ້ວ ກໍຄືປູກດອກໄມ້ຈຶ່ງເປັນ ແຮງບັນດານໃຈໃນການປູກ. ອີກຢ່າງໜຶ່ງ ຍ້ອນເຫັນວ່າປະຊາຊົນຢູ່ບໍລິເວນນີ້ ນິຍົມປູກດອກດາວເຮືອງພື້ນບ້ານເຊິ່ງມັນຢູ່ບໍ່ໄດ້ດົນຈຶ່ງມີແນວຄວາມຄິດຢາກປູກດອກໄມ້ພັນຕ່າງໆທີ່ມັນຢູ່ໄດ້ດົນຈຶ່ງປຶກສາກັບໝູ່ທີ່ເພີ່ນຮຽນຈົບ ດ້ານການກະເສດມາຈາກປະເທດຍີ່ປຸ່ນ ສຶກສາເອົາດອກໄມ້ທີ່ຢູ່ ໄດ້ດົນເຂົ້າກັບອາກາດບ້ານເຮົາ ແລະ ດອກໃຫຍ່ມາພັດທະນາປູກໃນສວນເຫັນວ່າໄດ້ຮັບຜົນດີ ຈຶ່ງເຮັດເປັນສວນຟາມດອກໄມ້ ແຫ່ງນີ້ຂຶ້ນ. ພ້ອມນັ້ນກໍຍັງໄດ້ ແນະນໍາວິທີການປູກສໍາລັບຄົນທີ່ສົນໃຈໃນການປູກດອກໄມ້ ໂດຍສະເພາະແມ່ນດອກດາວເຮືອງ. ກ່ອນຈະເປີດສ່ວນດອກໄມ້ງາມຟາມນີ້ ຕົນເອງລິເລີ່ມຈາກປະສົບການເຮັດສວນດອກດາວເຮືອງ ເປັນເວລາຫລາຍປີມາແລ້ວບວກກັບການສຶກສາດອກໄມ້ຊະນິດອື່ນໆນຳພ້ອມຈຶ່ງໄດ້ປູກດອກຕາເວັນ, ດອກ 3 ປີ ຫລື ວ່າສ້ອຍໄກ່ເສີມ. ເມື່ອປີຜ່ານມາເຫັນວ່າມີ ຄວາມສວຍງາມຈຶ່ງເປີດບໍລິການໃຫ້ນັກທ່ອງທ່ຽວເຂົ້າມາທ່ຽວຊົມຄວາມສວຍງາມຂອງດອກໄມ້ ເຊິ່ງພາຍຫລັງເປີດສວນເຫັນວ່າມີນັກທ່ອງທ່ຽວຫລ່ັງໄຫລເຂົ້າມາເປັນຈໍານວນຫລວງຫລາຍ ໂດຍສະເພາະແມ່ນໄລຍະແລງໆ, ວັນເສົາ, ວັນທິດນັກທ່ອງທ່ຽວຈະມາເລາະຖ່າຍຮູບ, ນັ່ງພັກຜ່ອນຢອນໃຈກິນອາຫານແຊບໆ, ຟັງເພງມ່ວນໆຈາກການບໍລິການທາງຮ້ານພວກເຮົາເພື່ອເຮັດໃຫ້ລູກຄ້າສົດຊື່ນ, ແຈ່ມໃສຄາຍ ຄວາມອິດເມື່ອຍຈາກການເຮັດວຽກງານ. ນອກນ້ັັນ, ໃນສວນຍັງໄດ້ແບ່ງເຂດດອກໄມ້ເພື່ອຖ່າຍຮູບ, ມີສະຖານທີ່ກິດຈະກິດໃຫ້ເດັກນ້ອຍຫລິ້ນ ແລະ ທີ່ສຳຄັນທາງສວນຍັງໄດ້ເປີດໃຫ້ຄວາມຮູ້ສຳລັບຜູ້ທີ່ຕ້ອງການຮຽນຮູ້ເພື່ອໄປປະກອບອາຊີບ, ໃນນັ້ນທາງສວນກໍຍັງມີດອກໄມ້ໄວຈຳໜ່າຍໃຫ້ລູກຄ້ານຳອີກ. ຈຸດພິເສດທາງສວນຫລັກໆແມ່ນເນັ້ນກຸ່ມລູກຄ້າທີ່ເປັນຄອບຄົວ ເພາະຈະມີບ່ອນຫລີ້ນເດັກນ້ອຍ, ມີກິດຈະກຳໃຫ້ເດັກນ້ອຍລະບາຍສີຝຶກສະມາທິໃຫ້ເດັກນ້ອຍບໍ່ຫລິ້ນໂທລະສັບຕະຫລອດເວລາ ແລະ ກໍມີດອກໄມ້ງາມໆໄວ້ໃຫ້ລູກຄ້າໄດ້ຖ່າຍຮູບ.
ສໍາລັບ ການບໍລິການຄ້າເຂົ້າສວນຜູ້ໃຫຍ່ ແມ່ນ 20.000 ກີບ, ເດັກນ້ອບແມ່ນບໍ່ໄດ້ເສຍຄ່າເຂ້ົາ, ສ່ວນອາຫານຂອງຮ້ານບໍ່ຫລາກຫລາຍມີແຕ່ປະເພດຈືນປີກໄກ່, ຂາໄກ່, ລູກຊີ້ນ, ຮ໋ອດດ໋ອກ, ປີ້ງເປັດ ແລະ ປະເພດຕໍາຈະມີເທົ່ານີ້ບໍ່ຫລາຍເພາະເຮົາຈະຖະນັດ ເລື່ອງສວນຫລາຍກວ່າ. ນອກຈາກນີ້ແລ້ວ ສວນເຮົາຍັງມີເບ້ຍດອກດາວເຮືອງຂາຍເບ້ຍລະ 1.000 ກີບ ເຊິ່ງມື້ໜຶ່ງຈະໄດ້ຂາຍເບ້ຍດອກດາວເຮືອງປະມານ 400-500 ເບ້ຍຕໍ່ມື້ສ້າງລາຍຮັບຫລາຍລ້ານກີບຕໍ່ມື້ເຊິ່ງຈຸດນີ້ ມັນໄດ້ສ້າງຜົນດີຫລາຍຢ່າງບໍ່ວ່າຈະເປັນສູນສຶກສາຮຽນຮູ້ສໍາລັບຄົນທີ່ມີຄວາມສົນໃຈປູກດອກໄມ້ປະດັບ, ອັນທີສອງແມ່ນປະກອບສ່ວນສ້າງວຽກເຮັດງານທໍາໃຫ້ປະຊາຊົນ ເນື່ອງຈາກວ່າສວນ ເຮົາກໍມີທັງພະນັກງານປະຈໍາ ແລະ ພະນັກງານເສີມເປັນບາງຄັ້ງຄາວ.
ທ່ານ ນາງ ອຸໄລພອນ ເວົ້າຕື່ມວ່າ: ສໍາລັບການເປີດສວນດອກໄມ້ ແມ່ນຈະເປີດລະດູດຽວ ຄືໄລຍະລະດູໜາວ, ສ່ວນໄລຍະລະດູຮ້ອນຈະປິດ ເພາະອາກາດຮ້ອນຫລາຍເຮັດໃຫ້ຕົ້ນດອກໄມ້ຍຸບຈະບໍ່ງາມ. ສະນັ້ນ, ຈຶ່ງເລືອກເປີດບໍລິການແຕ່ລະດູໜາວຈະເໝາະສົມກວ່າລະດູຮ້ອນ. ສໍາລັບທ່ານໃດທີ່ສົນໃຈ ທ່ີກໍາລັງເບິ່ງຫາສະຖານທີ່ພັກຜ່ອນຢ່ອນໃຈ ທີ່ສວຍງາມໃກ້ຕົວເມືອງ ຢາກຂໍແນະນໍາສວນດອກໄມ້ງາມຟາມເລີຍ ຮັບຮອງວ່າບໍໍ່ຜິດຫວັງແນ່ນອນສະຖານທີ່ຕັ້ງຢູ່ທາງ 450 ບ້ານນາບຽນເມືອງໄຊເສດຖາ ນະຄອນຫລວງວຽງຈັນ ຫລື ສອບຖາມລາຍລະອຽດໄດ້ທີ່ເບີ 020 58064669.
ໂດຍ: ມາລີດາ
KPL
