ຂປລ
ຂປລ. ກອງປະຊຸມເຈົ້າໜ້າທີ່ອາວຸໂສ ເສົາຄ້ຳວັດທະນະທໍາ-ສັງຄົມອາຊຽນ ຄັ້ງທີ 37 ຈັດຂຶ້ນໃນວັນທີ 25 ກັນຍາ 2024 ນີ້, ຢູ່ນະຄອນຫລວງວຽງຈັນ ສປປ ລາວ ເພື່ອປຶກສາຫາລື ແລະ ທົບທວນຄືນ ຫລາຍບັນຫາສຳຄັນ ຂອງບັນດາກອງປະຊຸມກ່ຽວຂ້ອງ
ຂປລ. ກອງປະຊຸມເຈົ້າໜ້າທີ່ອາວຸໂສ ເສົາຄ້ຳວັດທະນະທໍາ-ສັງຄົມອາຊຽນ ຄັ້ງທີ 37 ຈັດຂຶ້ນໃນວັນທີ 25 ກັນຍາ 2024 ນີ້, ຢູ່ນະຄອນຫລວງວຽງຈັນ ສປປ ລາວ ເພື່ອປຶກສາຫາລື ແລະ ທົບທວນຄືນ ຫລາຍບັນຫາສຳຄັນ ຂອງບັນດາກອງປະຊຸມກ່ຽວຂ້ອງ ທີ່ໄດ້ຈັດຂຶ້ນຜ່ານມາ ໂດຍການເປັນປະທານຂອງ ທ່ານ ຄຳພູ ເພັຍສັກຂາ ຮອງຫົວໜ້າກົມແຜນການ ແລະ ການຮ່ວມ ມືສາກົນ, ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ທັງເປັນຫົວ ໜ້າທີ່ອາວຸໂສວັດທະນະທຳ-ສັງຄົມອາຊຽນ ຂອງ ສປປ ລາວ ໂດຍມີບັນດາເຈົ້າໜ້າທີ່ ອາວຸໂສເສົາຄ້ຳ ວັດທະນະທຳ-ສັງຄົມອາຊຽນ, ປະເທດຕີມໍແລັດສະເຕ, ຮອງເລຂາທິການໃຫຍ່ອາຊຽນ ແລະ ຄະນະຜູ້ແທນຈາກປະເທດສະມາ ຊິກອາຊຽນເຂົ້າຮ່ວມ.
ກອງປະຊຸມຄັ້ງນີ້,ໄດ້ຮັບຟັງການລາຍງານຜົນ ຂອງບັນດາກອງປະຊຸມທີ່ກ່ຽວຂ້ອງຈໍານວນໜຶ່ງ ເປັນຕົ້ນ ກອງປະຊຸມໜ່ວຍງານພັດທະນາ ແຜນຍຸດທະສາດວຽກງານ ວັດທະນະທໍາ-ສັງຄົມ ອາຊຽນ ຫລັງປີ 2025 ເຊິ່ງລວມທັງຜົນລາຍງານ ຄວາມຄືບໜ້າການສະຫລຸບທ້າຍສະໄໝ ການຈັດຕັ້ງປະຕິບັດ ແຜນຍຸດທະສາດ ຂອງເສົາຄ້ຳວັດທະນະທໍາ-ສັງຄົມອາຊຽນ 2025. ພ້ອມນີ້, ຍັງໄດ້ປຶກສາຫາລື ກ່ຽວກັບທິດທາງ ແຜນການໃນຕໍ່ໜ້າ ແລະ ກອງປະຊຸມໜ່ວຍງານ ວ່າດ້ວຍຖະແຫລງການ ກ່ຽວກັບວັດທະນະທໍາ ການປ້ອງກັນເຫດ ຄັ້ງທີ 7 ເພື່ອທົບທວນ ຄືນບັນດາແຜນວຽກ ທີ່ໄດ້ຈັດຕັ້ງປະຕິບັດ ໃນໄລຍະຜ່ານມາ ລວມທັງການຄົ້ນຄວ້າປຶກ ຫາລືແຜນວຽກຈໍານວນໜຶ່ງ ແນໃສ່ຊຸກຍູ້ສົ່ງເສີມ ການຈັດຕັ້ງຜັນຂະຫຍາຍ ຖະແຫລງການ ດັ່ງກ່າວໃຫ້ມີປະສິດທິຜົນຍິ່ງຂຶ້ນ.
ພ້ອມກັນນີ້, ຍັງໄດ້ປຶກຫາສາລື ແລະ ທົບທວນຄືນຢ່າງລະອຽດຖີ່ຖ້ວນ ບັນດາເອກະສານສໍາຄັນ ຈໍານວນໜຶ່ງ ລວມທັງບັນຫາອື່ນໆທີ່ກ່ຽວຂ້ອງ ພາຍໃຕ້ເສົາຄ້ຳ ວັດທະນະທໍາ-ສັງຄົມ ອາຊຽນ ເພື່ອກຽມຄວາມພ້ອມ ດ້ານເນື້ອໃນໃຫ້ແກ່ປະຊຸມ ສະພາລັດຖະມົນຕີວັດທະນະທໍາ-ສັງຄົມອາຊຽນ ຄັ້ງທີ 32 ທີ່ຈະຈັດຂຶ້ນໃນວັນທີ 26 ກັນຍາ 2024 ເພື່ອພິຈາລະນາຄົ້ນຄວ້າ ກ່ອນທີ່ຈະສືບຕໍ່ນໍາສະເໜີ ຕໍ່ຜູ້ນໍາອາຊຽນ ຮັບຮອງໃນກອງປະຊຸມສຸດຍອດ ຄັ້ງທີ 44 ແລະ 45 ທີ່ຈະໄຂຂຶ້ນໃນມໍ່ໆນີ້.
ພາບ: ເກດສະໜາ
KPL
