ຂປລ
ສານເຄມີທາງກະສິກຳ ທີ່ໃຊ້ສຳລັບຂ້າແມງໄມ້, ຂ້າຫຍ້າ, ກຳຈັດເຊື້ອລາ ແລະ ອື່ນໆ ລວມທັ້ງສານຂ້າໜູ ລ້ວນມີປະໂຫຍດໃນການປ້ອງກັນບໍ່ໃຫ້ເກີດຄວາມເສຍຫາຍຕໍ່ພືດ, ເພີ່ມຜົນຜະລິດ ແລະ ເພີ່ມລາຍໄດ້.
ສານເຄມີທາງກະສິກຳ ທີ່ໃຊ້ສຳລັບຂ້າແມງໄມ້, ຂ້າຫຍ້າ, ກຳຈັດເຊື້ອລາ ແລະ ອື່ນໆ ລວມທັ້ງສານຂ້າໜູ ລ້ວນມີປະໂຫຍດໃນການປ້ອງກັນບໍ່ ໃຫ້ເກີດຄວາມເສຍຫາຍຕໍ່ພືດ, ເພີ່ມຜົນຜະລິດ ແລະ ເພີ່ມລາຍໄດ້.
ແຕ່ຫາກໃຊ້ບໍ່ລະມັດລະວັງ ອາດມີຜົນກະທົບ ຕໍ່ສຸຂະພາບຂອງກະສິກອນ ແລະ ປະຊາຊົນຜູ້ບໍລິໂພກ ເຮັດໃຫ້ເກີດການເຈັບເປັນຢ່າງຮຸນແຮງ ເຊັ່ນ: ຕຸ່ມຄັນ, ຕຸ່ມແດງ, ເຈັບຫົວ, ມຶນງົງ, ແສບຕາ, ນ້ຳຕາໄຫລ, ອ່ອນເພຍ, ປວດຮາກ ແລະ ບາງຄົນອາດຮຸນແຮງ ເຖິງຂັ້ນ ເສຍຊີວິດ. ນອກນີ້ ຍັງເປັນສານຕົກຄ້າງ ສົ່ງຜົນຕໍ່ສຸຂະພາບ ໃນໄລຍະຍາວ ເຮັດໃຫ້ເກີດພະຍາດມະເຮັງ ແລະ ພະຍາດທາງລະບົບປະສາດ.
ດັ່ງນັ້ນ ກະຊິກອນ ຄວນຫລີກລ່ຽງ 3 ສານເຄມີທີ່ອັນຕະລາຍຕໍ່ສຸຂະພາບ ເຊັ່ນ: ສານ ພາຣາຄວອດ (Paraquat) ເປັນສານທີ່ມີພິດສູງ ບໍ່ມີຢາຕ້ານພິດ ແລະ ໄດ້ມີການຍົກເລີກການ ໃຊ້ຢູ່ຫລາຍປະເທດທົ່ວໂລກ ຊຶ່ງພິດເຮັດໃຫ້ແສບຕາ, ຫາກຜິວໜັງ ມີບາດ ແຜສານເຄມີ ກໍຈະຊຶມເຂົ້າສູ່ຮ່າງກາຍຢ່າງໄວວາ ເຂົ້າໄປກັດບາດແຜ ແລະ ມີຜົນໄລຍະຍາວຕໍ່ລະບົບປະສາດ ເຮັດໃຫ້ເກີດພະຍາດພາກກິນສັນ (Parkinson). ສານ ຄໍໄພຣິຟອສ (Chlorpyrifos) ຜົນວິໄຈໃນຕ່າງປະເທດ ກວດພົບວ່າ ສົ່ງຜົນຕໍ່ພັດທະນາ ການທາງສະ ໝອງຂອງເດັກນ້ອຍ ທີ່ແມ່ໄດ້ຮັບສານ ລະຫວ່າງຖືພາ ເຮັດໃຫ້ເດັກນ້ອຍພັດທະນາຊ້າ, ຄວາມຈຳສັ້ນ IQ ຕ່ຳ ສົ່ງຜົນຕໍ່ລະບົບໄທຣອຍ ກະຕຸ້ນການຂະຫຍາຍຕົວ ຂອງເຊື້ອມະເຮັງລຳໄສ້. ສານ ໄກໂຟເຊັດ (Glyphosate) ສະຖາບັນວິໄຈມະເຮັງ ຂອງອົງການອານະໄມ ໂລກ ກຳນົດໃຫ້ເປັນສານ ທີ່ເຮັດໃຫ້ເກີດມະເຮັງf ກະຕຸ້ນການຂະຫຍາຍຕົວ ຂອງເຊື້ອມະເຮັງເຕົ້ານົມ, ເຮັດໃຫ້ເກີດພະຍາດ ໝາກໄຂ່ຫລັງຊໍາເຮື້ອ ແລະ ກະຕຸ້ນການເກີດ ພະຍາດຫລາຍຊະນິດເຊັ່ນ: ເບົາຫວານ, ພະຍາດຕຸ້ຍ, ຄວາມຈໍາເຊື່ອມ ແລະ ອື່ນໆ.
ການນຳໃຊ້ສານເຄມີທາງກະສິກຳ ບໍ່ວ່າຈະເປັນຊະນິດໃດ ກໍເປັນອັນຕະລາຍຕໍ່ຮ່າງກາຍ ທັງແບບຮຸນແຮງ ແລະ ຊຳເຮື້ອໄດ້ ປະຊາຊົນຈຶ່ງບໍ່ຄວນໃຊ້ ຫລື ສຳຜັດສານເຄມີຕ່າງໆ ແລະ ຄວນປ້ອງກັນຕົນເອງ. ແຕ່ຫາກຈຳເປັນຕ້ອງໃຊ້ ກໍໃຫ້ລະມັດລະວັງ ສຳຄັນ ຕ້ອງປະກອບຊຸດເຄື່ອງແບບ, ຜ້າອັດປາກ, ອັດດັງ ໃຫ້ດີ ຊຶ່ງກໍສາມາດຊ່ວຍໄດ້ລະດັບໜຶ່ງ ແຕ່ໃຫ້ດີແທ້ບໍ່ຄວນໃຊ້ເລີຍ.
KPL
