ຂປລ
ຂປລ. ມະຫາກຳກິລາແຫ່ງຊາດ ຄັ້ງທີ 11 ຫລື ຊຽງຂວາງເກມ ໄດ້ດໍາເນີນໄປຢ່າງ ມີຄວາມສະຫງົບຮຽບຮ້ອຍ, ສ້າງໄດ້ຄວາມເຊື່ອໝັ້ນ ຈາກປະຊາຊົນ ແລະ ມວນຊົນທີ່ມາຮ່ວມງານຄັ້ງນີ້. ທັງໝົດນີ້ແມ່ນໝາກຜົນແຫ່ງ ການປະຕິບັດແນວທາງ ປ້ອງກັນຊາດ-ປ້ອງກັນຄວາມສະຫງົບ ຂັ້ນສູນກາງລົງຮອດທ້ອງຖິ່ນ
ຂປລ. ມະຫາກຳກິລາແຫ່ງຊາດ ຄັ້ງທີ 11 ຫລື ຊຽງຂວາງເກມ ໄດ້ດໍາເນີນໄປຢ່າງ ມີຄວາມສະຫງົບຮຽບຮ້ອຍ, ສ້າງໄດ້ຄວາມເຊື່ອໝັ້ນ ຈາກປະຊາຊົນ ແລະ ມວນຊົນທີ່ມາຮ່ວມງານຄັ້ງນີ້. ທັງໝົດນີ້ແມ່ນໝາກຜົນແຫ່ງ ການປະຕິບັດແນວທາງ ປ້ອງກັນຊາດ-ປ້ອງກັນຄວາມສະຫງົບ ຂັ້ນສູນກາງລົງຮອດທ້ອງຖິ່ນ ໂດຍສະເພາະ ຢູ່ເມືອງພູກູດ ຍ້ອນເປັນເຈົ້າການເຮັດວຽກງານປ້ອງກັນຄວາມສະຫງົບຮຽບຮ້ອຍຂອງກຳລັງປ້ອງກັນຊາດ-ປ້ອງກັນຄວາມສະຫງົບ, ກໍາລັງກອງຫລອນ ແລະ ການປະກອບສ່ວນ ຊຸກຍູ້ວັດຖຸ, ກໍາລັງໃຈ ຈາກປະຊາຊົນຊັ້ນຄົນຕ່າງໆ ຈຶ່ງເຮັດໃຫ້ງານກິລາດັ່ງກ່າວ, ມີຄວາມສະຫງົບປອດໄພດີ.
ສະຫາຍ ພັນໂທ ບຸນຍໍ້ ພົມມະຈັນ ຫົວໜ້າການທະຫານ ກອງບັນຊາການທະຫານ ເມືອງພູກູດ , ຄະນະອະນຸກຳມະການ ປ້ອງກັນກິລາແຫ່ງຊາດ ຊຽງຂວາງເກມ ໄດ້ໃຫ້ຮູ້ວ່າ: ໂດຍອີງຕາມແຜນການ ປ້ອງກັນງານກິລາແຫ່ງຊາດ ຂອງກອງບັນຊາການ ທະຫານແຂວງຊຽງຂວາງ ແລະ ປະຕິບັດຕາມການຕົກລົງ ຂອງຄະນະຮັບຜິດຊອບລວມ ໃນການປ້ອງກັນ ຄວາມສະຫງົບຮຽບຮ້ອຍ ໃຫ້ແກ່ງານກິລາ ແຫ່ງຊາດຊຽງຂວາງເກມ ໂດຍສະເພາະ ກອງບັນຊາການ ທະຫານເມືອງພູກູດ ໄດ້ສ້າງແຜນງານສະເພາະ ໃນການຮັກສາຄວາມສະຫງົບ ຢູ່ແຕ່ລະຈຸດທີ່ສໍາຄັນ ໃນຂອບເຂດຮັບຜິດຊອບ ພ້ອມທັງໄດ້ມີການປະ ສານງານກັບຄະນະຮັບຜິດຊອບລວມ ແລະ ອໍານາດການປົກຄອງ ຂັ້ນຕ່າງໆ ໃນການກະກຽມຄວາມພ້ອມແຕ່ຫົວທີ ເພື່ອຮັບໃຊ້ວຽກງານ ປ້ອງກັນ ຄວາມສະຫງົບທັງກ່ອນ ແລະ ໃນໄລຍະດຳເນີນການແຂ່ງ ຂັນກໍໄດ້ມີການກຽມ ຄວາມພ້ອມທາງກຳລັງ, ເຄື່ອງມືຮັບໃຊ້ວິຊາສະເພາະ ແລະ ອື່ນໆ ຢ່າງຄົບຖ້ວນ. ຜ່ານການເຄື່ອນໄຫວ ຕາມພາລະບົດບາດ ແລະ ໜ້າທີ່ ທີ່ໄດ້ຮັບມອບໝາຍຈາກ ພັກ-ລັດຂັ້ນເທິງ ກົມກອງພວກເຮົາໄດ້ປັບປຸງລະບົບ ປະຈຳການຢ່າງເປັນລະບົບຄົບຊຸດ ໂດຍໄດ້ສ້າງແຜນຄາດ ກະກໍລະນີທີ່ຈະເກີດຂຶ້ນ ແລະ ໄດ້ຈັດຕັ້ງນຳໃຊ້ກຳລັງແບ່ງອອກເປັນ 3 ພາກສ່ວນຄື: ພາກສ່ວນບັນຊາ, ພາກສ່ວນປ້ອງກັນຢູ່ແຕ່ລະຈຸດ ແລະ ພາກສ່ວນກອງຫລອນ ເຄື່ອນໄຫວປ້ອງກັນເວນຍາມ ຕາມສາຍທາງເລກ 7 ແລະ ພູກູດຈອມເຫລັກ, ພ້ອມນັ້ນຍັງປ້ອງກັນໃຫ້ແກ່ສະຖານທີ່ທ່ອງທ່ຽວ ແລະ ບັນດາເຂດເຊື່ອມຕໍ່ລະຫວ່າງເມືອງຕໍ່ເມືອງ, ເມືອງຕໍ່ແຂວງ ແລະ ນໍາໃຊ້ກຳລັງປ້ອງກັນສຳຮອງ ເຄື່ອນໄຫວເວນຍາມ ທາງເຂົ້າ-ອອກບ້ານ ແລະ ສຳນັກງານອົງການຕ່າງໆ.
ສັງລວມແລ້ວ, ຕະຫລອດໄລຍະການຈັດຕັ້ງ ປະຕິບັດປ້ອງກັນເວນຍາມ ໃຫ້ແກ່ງານກິລາຄັ້ງນີ້, ມາຮອດປັດຈຸບັນ ໃນຂອບເຂດຮັບຜິດຊອບ ແມ່ນສາມາດຮັກສາໄດ້ ຄວາມສະຫງົບໂດຍພື້ນຖານ ທັງນີ້, ກໍຍ້ອນໄດ້ຮັບການຊີ້ນຳຢ່າງໃກ້ຊິດ ແລະ ທຸກພາກສ່ວນ ໄດ້ເອົາໃຈໃສ່ ຊີ້ນຳ-ບັນຊາບັນດາກຳລັງ ປ້ອງກັນຊາດ-ປ້ອງກັນຄວາມສະຫງົບເມືອງ ເອົາໃຈໃສ່ປະຕິບັດໜ້າທີ່ ດ້ວຍຄວາມຮັບຜິດຊອບສູງ ແລະ ພໍ່ແມ່ປະຊາຊົນຊັ້ນຄົນຕ່າງໆ ກໍລ້ວນແຕ່ໄດ້ເປັນຫູ ເປັນຕາຊ່ວຍກັນ ຕິດຕາມທຸກການເຄື່ອນໄຫວ ຂອງອິດທິກຳລັງປໍລະປັກ ແລະ ພວກກຸ່ມຄົນບໍ່ຫວັງດີຢ່າງເຂັ້ມແຂງ.
KPL
