ຂປລ
ຂປລ.ໃນວັນທີ 5 ທັນວາ ທີ່ຜ່ານມານີ້ຢູ່ ນະຄອນຫລວງວຽງຈັນ, ບໍລິສັດ ລ້ານຊ້າງ ມິເນໂຣນສ໌ ລິມິເຕັດ ບໍ່ຄຳ-ທອງ ເຊໂປນ(LXML) ໄດ້ມີການຍ້ອງຍໍພະນັກງານ 434 ຄົນ ທີ່ໄດ້ເຮັດວຽກກັບບໍລິສັດມາໄດ້ຍາວນານແຕ່ 5 ປີ ຫາ 20 ປີ.
ຂປລ.ໃນວັນທີ 5 ທັນວາ ທີ່ຜ່ານມານີ້ຢູ່ ນະຄອນຫລວງວຽງຈັນ, ບໍລິສັດ ລ້ານຊ້າງ ມິເນໂຣນສ໌ ລິມິເຕັດ ບໍ່ຄຳ-ທອງ ເຊໂປນ(LXML) ໄດ້ມີການຍ້ອງຍໍພະນັກງານ 434 ຄົນ ທີ່ໄດ້ເຮັດວຽກກັບບໍລິສັດມາໄດ້ຍາວນານແຕ່ 5 ປີ ຫາ 20 ປີ. ໃນນັ້ນ, ມີພະນັກງານ 132 ຄົນທີ່ເຮັດວຽກກັບ LXML ມາໄດ້ 5 ປີ; 55 ຄົນ ໄດ້ເຮັດວຽກມາ 15 ປີ, 8 ຄົນໄດ້ເຮັດວຽກມາ 20 ປີ ແລະ 1 ຄົນ ເຮັດວຽກມາໄດ້ 25 ປີ. ທັງນີ້ ເພື່ອເປັນການຂ່ຳນັບຮັບຕ້ອນ ວັນຊາດທີ 2 ທັນວາ ຄົບຮອບ 47 ປີ.
ທ່ານ ພໍ ແຮຣິສ໌ ປະທານ LXML ໄດ້ກ່າວຕໍ່ຜູ້ໄດ້ຮັບໃບຍ້ອງຍໍ-ລາງວັນໃນປີນີ້ ວ່າ: ທັກສະ ແລະ ປະສົບການທີ່ພະນັກງານເກັບກ່ຽວໄດ້ ໃນຊຸມປີຜ່ານມາແມ່ນມີຄຸນຄ່າຍິ່ງ ເຊິ່ງທັກສະເຫລົ່ານີ້ຈະເປັນ ຊັບສິນ-ມໍລະດົກຕິດໂຕ ພະນັກງານທຸກຄົນບໍ່ວ່າພວກເຂົາເຈົ້າ ຈະໄປເຮັດວຽກຢູ່ແຫ່ງໃດໃນ ສປປ ລາວ ກໍຕາມ. LXML ຈະສືບຕໍ່ລົງທຶນໃສ່ທຶນມະນຸດຂອງ ສປປ ລາວ ຜ່ານ ການຝຶກອົບຮົມ, ການຝຶກສອນໃນວຽກ ແລະ ຄວາມກ້າວໜ້າໃນອາຊີບການງານ. ໃນປີ 2023 ທີ່ຈະມາເຖິງນີ້, ບໍລິສັດ LXML ຈະສະເຫລີມສະຫລອງ 20 ປີແຫ່ງການດຳເນີນການຂຸດຄົ້ນ-ຜະລິດແຮ່, ຕະຫລອດອາຍຸການຂອງບໍ່ຄຳ-ທອງ ເຊໂປນ ມີພະນັກງານກວ່າ 10.000 ຄົນ ທີ່ໄດ້ປະກອບສ່ວນຕໍ່ການເຕີບໂຕຂອງ LXML, ໄດ້ຮຽນຮູ້ຝຶກຝົນທັກສະວິຊາຊີບ ແລະ ສ້າງຊີວິດການເປັນຢູ່ທີ່ດີຂຶ້ນ.
ໃນຈຳນວນພະນັກງານ ແລະ ຜູ້ຮັບເໝົາທັງໝົດປະມານ 5.000 ຄົນ, 95% ແມ່ນຄົນລາວ, 75% ແມ່ນຄົນທ້ອງຖິ່ນ ແລະ 20% ແມ່ນແມ່ຍິງ. ໃນສອງ-ສາມທົດສະຫວັດຜ່ານມາ LXML ໄດ້ລົງທຶນຫລາຍລ້ານໂດລາສະຫະລັດ ເຂົ້າໃສ່ການພັດທະນາຊັບພະຍາກອນມະນຸດ ລວມທັງ ທຶນການສຶກສາ, ການລົງຝຶກງານກັບບໍລິສັດ ແລະ ການຝຶກອົບຮົມຕົວຈິງ. LXML ສືບຕໍ່ສະໜັບສະໜູນຄວາມກ້າວໜ້າໃນອາຊີບການງານ ແລະ ຄວາມມຸ່ງໝັ້ນຂອງພະນັກງານ ເພື່ອສ້າງວິຊາການມືອາຊີບຄົນລາວ ເພື່ອຜົນປະໂຫຍດຂອງ ສປປ ລາວ. ນອກຈາກນີ້້, ໃນເດືອນສິງຫາ ທີ່ຜ່ານມາບໍລິສັດ LXML ໄດ້ເຊັນບົດບັນທຶກຄວາມເຂົ້າໃຈກັບ ວິທະຍາໄລເຕັກນິກລາວ-ເຢຍລະມັນ ເພື່ອສະໜອງທຶນການຝຶກອົບຮົມ ນັກສຶກສາຊ່າງສີມື ໃຫ້ແກ່ຊຸມຊົນອ້ອມຂ້າງບໍ່ຄຳ-ທອງເຊໂປນ ໃນເມືອງວິລະບູລີ ໂດຍນັກສຶກສາຈາກແຜນງານຝຶກອົບຮົມຊ່າງສີມືທີ່ຖືກຄັດເລືອກ ຈະໄດ້ຮັບການຝຶກອົບຮົມວິຊາຊີບໃນຂະແໜງການ ເຕັກໂນໂລຊີລົດຍົນ, ໄຟຟ້າເອເລັກໂຕຣນິກ, ຈັກກົນໂຮງງານ, ກົນຈັກໜັກ ແລະ ໂລຫະກຳວິທະຍາ. ພາຍຫລັງສຳເລັດຫລັກສູດການຝຶກອົບຮົມ, ນັກສຶກສາດັ່ງກ່າວກໍຈະມີໂອກາດໄດ້ເຂົ້າມາເຮັດວຽກກັບ LXML ເຊິ່ງແຜນງານນີ້ແມ່ນຈະຈັດຕັ້ງປະຕິບັດໄປເຖິງປີ 2027.
ນັບຕັ້ງແຕ່ເລີ່ມດໍາເນີນງານໃນປີ 2003, LXML ໄດ້ລົງທຶນຫລາຍລ້ານໂດລາສະຫະລັດ ໃສ່ການຝຶກອົບຮົມ, ໃຫ້ທຶນການສຶກສາ, ແຜນງານຝຶກອົບຮົມຊ່າງສີມືແຮງງານ, ນັກຮຽນ ແລະ ນັກສຶກສາຝຶກງານ ເຊິ່ງມີນັກສຶກສາຫລາຍກວ່າ 105 ຄົນ ທີ່ໄດ້ສໍາເລັດຫລັກສູດການຝຶກອົບຮົມ ນັກສຶກສາຊ່າງສີມື ແລະ 36 ຄົນ ສໍາເລັດການສຶກຊັ້ນສູງຈາກຕ່າງປະເທດ ທີ່ເປັນທຶນທີ່ບໍລິສັດສະໜັບສະໜູນ. ມາຮອດປັດຈຸບັນ, LXML ໄດ້ສະໜອງການຝຶກອົບຮົມໃຫ້ແກ່ພະນັກງານລາວ ກວ່າ 959.744 ຊົ່ວໂມງ ດ້ວຍການຝຶກອົບຮົມພາຍໃນ, ພາຍນອກ, ໃນໜ້າວຽກ ແລະ ຢູ່ຕ່າງປະເທດ. ໃນເດືອນ ມິຖຸນາ, LXML ໄດ້ຟື້ນຄືນຫລັກສູດທີ່ເປັນທີ່ນິຍົມ ຄື ແຜນງານພັດທະນາຫົວໜ້າຄຸມງານ ແລະ ແຜນງານພັດທະນາການເປັນຜູ້ນໍາ ເພື່ອສ້າງນັກວິຊາການຂຸດຄົ້ນແຮ່ມືອາຊີບຮຸ່ນໃໝ່ຂອງ ສປປ ລາວ.
ຕັ້ງແຕ່ເລີ່ມການດຳເນີນງານເປັນຕົ້ນມາ, ບໍ່ຄຳ-ທອງເຊໂປນໄດ້ ປະກອບສ່ວນເປັນລາຍຮັບໂດຍກົງໃຫ້ແກ່ລັດຖະບານລາວກວ່າ 1,6 ຕື້ໂດລາສະຫະລັດ ຈາກການຈ່າຍພາສີ-ອາກອນ, ຄ່າຊັບພະຍາກອນທຳມະຊາດ ແລະ ເງິນປັນຜົນ. ນອກຈາກນັ້ນ ຍັງໄດ້ປະກອບສ່ວນຫລາຍຮ້ອຍລ້ານໂດລາສະຫະລັດເປັນຜົນປະໂຫຍດທາງອ້ອມ ຈາກການສ້າງວຽກເຮັດງານທຳ, ການຝຶກອົບຮົມ, ການພັດທະນາຊຸມຊົນ ແລະ ທຸລະກິດທ້ອງຖິ່ນ.
ຂ່າວ: ສຸກສະຫວັດ
ຂໍ້ມູນ-ພາບ: LXML
KPL