ຂປລ
*ວັນທີ 13 ສິງຫາ ແມ່ນວັນສື່ມວນຊົນແຫ່ງຊາດ ແລະ ການພິມຈຳໜ່າຍ ຊຶ່ງປີນີ້ ໝູນວຽນມາບັນຈົບຄົບ ຮອບ 72 ປີ.
*ວັນທີ 13 ສິງຫາ ແມ່ນວັນສື່ມວນຊົນແຫ່ງຊາດ ແລະ ການພິມຈຳໜ່າຍ ຊຶ່ງປີນີ້ ໝູນວຽນມາບັນຈົບຄົບ ຮອບ 72 ປີ. ຂະນະທີ່ຫລາຍສິບປີຜ່ານມາ, ອົງການສື່ ລວມເຖິງສື່ມວນຊົນ ໄດ້ເຮັດພາລະບົດບາດ ໜ້າທີ່ຂອງຕົນ ດ້ວຍຄວາມຮັບຜິດຊອບສູງ ແລະ ມີ ຫລັກໝັ້ນ ການເມືອງຈະແຈ້ງ ເພື່ອໂຄສະນາເຜີຍແຜ່ ຜົນສຳເລັດຂອງ ການປະຕິບັດພາລະກິດ 2 ໜ້າທີ່ຍຸດທະສາດ ຂອງພັກວາງອອກຄື ປົກປັກຮັກສາ ແລະ ສ້າງສາພັດທະນາປະເທດຊາດ.
ປັດຈຸບັນ ບຸກຄະລາກອນສື່ມວນຊົນ ນອກຈາກໄດ້ພັດທະນາຕົນເອງແລ້ວ ຍັງໄດ້ພັດທະນາສີສັນ ຜະລິດຕະພັນ, ເຄື່ອງມືສື່ສານ ໄປຕາມຍຸກຕາມສະໄໝ ເພື່ອໃຫ້ຜູ້ບໍລິໂພກຂ່າວ ເຊື່ອໝັ້ນ ເຂົ້າເຖິງຂໍ້ມູນຂ່າວສານ ທີ່ຖືກຕ້ອງ ແລະ ເປັນປະໂຫຍດ ຕໍ່ສັງຄົມຕໍ່ປະ ເທດຊາດ. ຍິ່ງໃນປັດຈຸບັນ, ສື່ອອນລາຍ ມີການຂະຫຍາຍຕົວ ຢ່າງວ່ອງໄວ ເຮັດໃຫ້ສັງຄົມ ສາມາດເຂົ້າເຖິງ ແຫລ່ງຂໍ້ມູນຂ່າວສານ ໄດ້ທຸກບ່ອນ, ທຸກເວລາ ການນຳສະເໜີຂ່າວ ຂອງສື່ມວນຊົນ ໂດຍສະເພາະແມ່ນ ສື່ທາງການ ກໍໄດ້ປັບປ່ຽນ ໃຫ້ທັນຍຸກທັນສະໄໝ ເພື່ອ ເຜີຍແຜ່ຂໍ້ມູນທີ່ຖືກຕ້ອງ ໃຫ້ສັງຄົມໄດ້ຮັບຮູ້. ຕໍ່ກັບການນຳສະເໜີ ຂໍ້ມູນຂ່າວສານ ຂອງສື່ມວນຊົນ ໃນສະພາບປັດຈຸບັນນີ້ ສາມາດຕອບສະໜອງ ຂໍ້ມູນໃຫ້ສັງຄົມ ໄດ້ຢ່າງທົ່ວເຖິງ ຫລື ບໍ່ ?.
ຄໍລຳມື້ນີ້ ຈຶ່ງນຳເອົາຫາງສຽງຂອງສັງຄົມ ກໍຄືຜູ້ບໍໂພກຂ່າວມານຳສະເໜີ ຊຶ່ງກໍມີຄວາມຄິດເຫັນ ແຕກຕ່າງກັນ ເປັນຕົ້ນ: ທ່ານ ສອນໄຊ ໃບຍະວົງ ພະນັກງານບຳນານ ໄດ້ໃຫ້ທັດສະນະວ່າ: ປັດຈຸບັນ ວຽກງານສື່ມວນຊົນ ຂອງປະເທດເຮົາ ຂະຫຍາຍຕົວ ພໍສົມ ຄວນ ຊຶ່ງສະແດງອອກ ໃນການກະຈາຍຂໍ້ມູນຂ່າວສານ ແມ່ນກວ້າງຂວາງ ທົ່ວສັງຄົມ ໂດຍການໝູນໃຊ້ ສື່ອອນລາຍເຂົ້າ ໃນການເຜີຍແຜ່ ຂໍ້ມູນຂ່າວສານ ຊຶ່ງປັດຈຸບັນກໍເຫັນວ່າ ສື່ທາງການຂອງລັດ ກໍໄດ້ມີການນຳໃຊ້ ສື່ອອນລາຍ ເພື່ອໂຄສະນາ ແນວທາງນະໂຍບາຍ ຂອງ ພັກ-ລັດ ອອກໃຫ້ສັງຄົມ ໄດ້ຮັບຮູ້ ແລະ ເຂົ້າໃຈ ຢ່າງເລິກເຊິ່ງຕໍ່ແນວທາງ, ນະໂຍບາຍ ແລະ ແຜນພັດທະນາ ເສດຖະກິດ-ສັງຄົມຂອງຊາດ. ຂະນະດຽວກັນ ກໍຍັງສາມາດ ເປັນກະບອກສຽງຂອງ ພັກ-ລັດ ໃນການຕອບໂຕ້ ກະແສຂ່າວທີ່ບິດເບືອນ, ໃສ່ຮ້າຍປ້າຍສີ ຕໍ່ການ ສ້າງສາພັດທະນາ ປະເທດຊາດ ໄດ້ດີພໍສົມຄວນ. ຍິ່ງໃນຍຸກໃນປັດຈຸບັນ ທີ່ສື່ອອນລາຍ ພວມມີອິດທິພົນ ຕໍ່ການດຳລົງຊີວິດ ຂອງປະຊາຊົນນີ້ ສື່ມວນຊົນລາວ ຄວນເພີ່ມທະວີ ການນຳສະເໜີຂ່າວ ໃຫ້ວ່ອງໄວ, ຊັດເຈນ ແລະ ເຈາະເລິກບັນຫາ ທີ່ສັງຄົມໃຫ້ຄວາມສົນໃຈ ຫລາຍກວ່າເກົ່າ ເພື່ອຕີຖອຍຂ່າວປອມ ທີ່ເກີດຂຶ້ນໃນສັງຄົມ ເພາະຖ້າຂ່າວຈາກສື່ຫລັກ ວ່ອງໄວທັນເຫດການແລ້ວ ເຊື້ອວ່າຫລາຍຄົນ ຕ້ອງໃຫ້ຄວາມສົນໃຈຫລາຍກວ່ານີ້.
ພ້ອມດຽວກັນນີ້, ນາງ ສຸວັນນີ ອາຊີບນັກສຶກສາ ກໍໄດ້ສະແດງທັດສະນະວ່າ: ຢາກໃຫ້ສື່ມວນຊົນລາວ ເພີ່ມທະວີການນຳສະເໜີ ຂໍ້ມູນຂ່າວສານ ໃຫ້ຫລາກຫລາຍ, ມີຮູບແບບສີສັນ ທີ່ສາມາດດຶງດູດ ແລະ ສ້າງຄວາມສົນໃຈ ໃຫ້ສັງຄົມ. ສຳລັບເນື້ອໃນ ການນຳ ສະເໜີຂໍ້ມູນຂ່າວສານ ແມ່ນຢາກໃຫ້ເພີ່ມສິ່ງທີ່ເປັນ ບົດຮຽນທາງດ້ານ ວິທະຍາສາດ, ວິທະຍາການ, ການສຶກສາຄົ້ນຄວ້າ ທີ່ໂດດເດັ່ນຂອງລາວ ໃຫ້ຫລາຍຂຶ້ນ ເພາະເຫັນວ່າໃນປັດຈຸ ໄວໜຸ່ມລາວແມ່ນມີຄວາມຮູ້, ຄວາມສາມາດ ພໍສົມຄວນໃນດ້ານນີ້ ແລະ ຍັງສາມາດເຂົ້າ ຮ່ວມແຂ່ງຂັນ ໃນເວທີພາກພື້ນ ແລະ ສາກົນ ຈຶ່ງຄວນນຳເອົາບົດຮຽນ ແລະ ປະສົບການເຫລົ່ານີ້ ມາເຜີຍແຜ່ໃຫ້ສັງຄົມຮັບຮູ້ ເພື່ອເປັນການ ປູກຈິດສຳນຶກ ແລະ ຕໍ່ຍອດຜົນສຳເລັດ ດັ່ງກ່າວໃຫ້ສູງຍິ່ງໆຂຶ້ນໄປ.
ສັງລວມແລ້ວບັນດາຂໍ້ຄິດເຫັນຕ່າງໆຂອງສັງຄົມລ້ວນແຕ່ປະກອບສ່ວນ ໃນການພັດທະນາ ວຽກງານສື່ມວນຊົນລາວ ໃຫ້ມີການພັດທະນາຍິ່ງໆຂຶ້ນ, ໃຫ້ສົມກັບຖານະນາມ ທີ່ເປັນກະບອກສຽງ ຂອງພັກ, ລັດ ແລະ ຮັບໃຊ້ປະເທດຊາດ ແລະ ປະຊາຊົນຢ່າງ ແທ້ຈິງ ເພື່ອຕອບສະໜອງ ກັບຄວາມຮຽກຮ້ອງຕ້ອງການ ໃນໄລຍະໃໝ່ ຍິ່ງຮຽກຮ້ອງ ໃຫ້ສື່ມວນຊົນລາວ ຂອງພວກເຮົາ ຕ້ອງໄດ້ສືບຕໍ່ເຊີດຊູ ມູນເຊື້ອອັນດີງາມ ທີ່ສື່ມວນຊົນຮຸ້ນກ່ອນ ໄດ້ສ້າງເອົາໄວ້ ແລະ ເສີມຂະຫຍາຍ ໃຫ້ນັບມື້ດີຂຶ້ນໄປເລື້ອຍ, ບັນດາເນື້ອໃນ ໃຫ້ຮັບປະກັນໄດ້ລັກສະນະຕົວຈິງ, ລັກສະນະສຶກສາອົບຮົມ, ລັກສະນະຊີ້ນຳ ແລະ ລັກສະນະຕໍ່ສູ້ ຕາມທີ່ກຳນົດໄວ້ ໃນກົດໝາຍສື່ມວນຊົນ ດ້ວຍຫລາຍຮູບຫລາຍສີ ແຫລມຄົມ, ອຸດົມສົມບູນ, ວ່ອງໄວ ທັນການ./.
ໂດຍ: ພິດສະໄໝ
KPL