ຂປລ. ກິດຈະ​ກຳ​ແຕ້ມ​ຮູບສິ​ລະ​ປະ​ວັດ​ທະ​ນະ​ທຳ ສອງ​ຝັ່ງ​ຂອງ ລະ​ຫວ່າງ ແຂວງບໍ​ລິ​ຄຳ​ໄຊ ສ​ປ​ປ​ລາວ ແລະ ແຂວງ ບຶງ​ການ ຣາ​ຊາ​ອາ​ນາ​ຈັກ​ໄທ ຈັດ​ຂຶ້ນ​ໃນ​ທ້າ​ຍອາທິ​​ດຜ່ານ​ມາ ຢູ່​ພະ​ແນກຖະ​ແຫລງ​ຂ່າວ, ວັດ​ທະ​ນະ​ທຳ ແລະ ທ່ອງ​ທ​ຽວ(ຖວທ) ແຂວງບໍ​ລິ​ຄຳ​ໄຊ ​ເຊິ່ງ​ນ້ອງ​ນັກ​ຮຽນທີ່​ເຂົ້າ​ຮ່ວມ ​ໄດ້​ແຕ້ມ​ຮູບ​ຕາມ​ໃຈ​ຕົນ​ເອງ ​ໃນ​ຫົວ​ຂໍ້​ທີ່​ມີ​ຄວາມ​ໝາຍ​ກ່ຽວ​ພັນ ​ກັບ​ສິ​ລະ​ປະ​ວັດ​ທະ​ນະ​ທຳ, ຮີດ​ຄອງ​ປະ​ເພ​ນີ ແລະ ການ​ດຳ​ລົງ​ຊີ​ວິດ​ຂອງ​ ພໍ່​ແມ່​ປະ​ຊາ​ຊົນ​ລາວ-ໄທ ທີ່​ອາ​ໃສ​ຢູ່​ລຽບ​ຕາມ​ແຄມ​ຝັ່ງ​ແມ່​ນ້ຳ​ຂອງ ແລະ ຮູບ​ແຕ້ມ​ຕ້ອງ​ສາ​ມາດ​ບົ່ງ​ບອກ​ເຖິງ​ສະ​ຖານ​ທີ່, ວິ​ຖີ່ຊີ​ວິດ,  ຄວາມ​ອຸ​ດົມ​ສົມ​ບູນ​ທາງ​ດ້ານ ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ​ອື່ນໆ ທີ່​ທຸກ​ຄົນ​ເຫັນ​ແລ້ວ​ສາ​ມາດ​ຮັບ​ຮູ້​ໄດ້ ແລະ ເຂົ້າ​ໃຈ​ຄວາມ​ໝາຍ​ຂອງ​ຮູບ​ແຕ້ມ.

ການ​ແຕ້ມ​ຮູບ​ສິ​ລະ​ປະ ​ວັດ​ທະ​ນະ​ທຳ​ສອງ​ຝັ່ງ​ແມ່​ນ້ຳ​ຂອງຄັ້ງ​ນີ້ ເປັນ​ຄັ້ງ​ທະ​ອິດ​ທີ່​ນ້ອ​ງໆ​ນັກ​ຮຽນ​ທີ່​ມີ​ພອນ​ສະ​ຫວັນ​ໃນ​ການ​ແຕ້ມ​ຮູບ​ ​ໄດ້​ຮຽນ​ຮູ້​ເຕັກ​ນິກ, ວິ​ທີ​ການ​ດ້ານ​ຕ່າງໆ​ກ່ຽວ​ກັບ ​ສິລະ​ປະ​ການ​ແຕ້ມ​ຮູບ, ການ​ລະ​ບາຍ​ສີ, ຂັ້ນ​ຕອນ ແລະ ວິ​ທີ​ການ​ດ້ານ​ຕ່າງໆ ​ຂອງ​ການ​ແຕ້ມ​ຮູບ​ຈາກ​ຄະ​ນະ​ທີມ​ງານ ຄູ​ແດງ ບ້ານ​ສິນ​ໄທ ວິ​ທະ​ຍາ​ກອນ​ຈາກ ແຂວງໜອງ​ຄາຍ ຜູ້​ທີ​​ມີ​ປະ​ສົບ​ການ, ທັງ​ເປັນ​ການ​ເສີມ​ສ້າງ​ຫົວ​ຄິດ​ປະ​ດິດ​ສ້າງ​ໃຫ້​ແກ່​ນ້ອງໆ ​ນັກ​ຮຽນ​ອີກ​ບາດ​ກ້າວ​ໜຶ່ງ ​ໃນ​ການ​ແຕ້ມ​ຮູບ ແລະ ສົ່ງ​ເສີມ​ໃຫ້​ນ້ອງ​ໄດ້​ຮັບ​ຮູ້ ເຂົ້າ​ໃຈ​ເຖິງ​ແບບ​ແຜນ​ວິຖີ່​ຊີ​ວິດ ​ອັນ​ດີ​ງາມ​ຂອງ​ປະ​ຊາ​ຊົ​ນ​ຊົນ​ ທີ່​ອາ​ໃສ​ຢູ່​ຕາມ​ແຄມ​ຝັ່ງ​ແມ່​ນ້ຳ​ຂອງ. ນອກນັ້ນ​ຍັງ​ເສີມ​ສ້າງ​ສາຍ​ສຳ​ພັນ​ອັນ​ດີ​ທາງ​ ດ້ານ​ສັງ​ຄົມ-ວັດ​ທະ​ນະ​ທຳ ລະ​ຫວ່າງ ​ລາວ-ໄທ ​ໂດຍ​ສະ​ເພາະ​ແຂວງບໍ​ລິ​ຄຳ​ໄຊ ແລະ ແຂວງບຶງ​ການ.

ຂ່າວ: ຄຳ​ຟອງ

KPL