ຂປລ
ສປ ຈີນ ຈະເປັນເຈົ້າພາບ ຈັດກອງປະຊຸມລະດັບສູງ ຂອງສະພາຄວາມໝັ້ນຄົງ ໃນວັນທີ 26 ພຶດສະພານີ້ ພາຍໃຕ້ຫົວຂໍ້ຫລັກ “ປົກປັກຮັກສາ ຈຸດປະສົງ ແລະ ຫລັກການຂອງກົດບັດສະຫະປະຊາຊາດ, ເພີ່ມທະວີ ລະບົບສາກົນ ທີ່ມີອົງການສະຫະປະຊາຊາດ ເປັນແກນກາງ”
ຂປລ.ວິທະຍຸ ໂທລະພາບ ສູນກາງຈີນ, ໃນຖານະເປັນປະເທດ ປະທານໝູນວຽນ ປະຈຳ ເດືອນພຶດສະພາ ຂອງສະພາຄວາມໝັ້ນຄົງ ອົງການ ສະຫະປະຊາຊາດ, ສປ ຈີນ ຈະເປັນເຈົ້າພາບ ຈັດກອງປະຊຸມລະດັບສູງ ຂອງສະພາຄວາມໝັ້ນຄົງ ໃນວັນທີ 26 ພຶດສະພານີ້ ພາຍໃຕ້ຫົວຂໍ້ຫລັກ “ປົກປັກຮັກສາ ຈຸດປະສົງ ແລະ ຫລັກການຂອງກົດບັດສະຫະປະຊາຊາດ, ເພີ່ມທະວີ ລະບົບສາກົນ ທີ່ມີອົງການສະຫະປະຊາຊາດ ເປັນແກນກາງ”. ທ່ານ ຫວາງຢີ້ ກຳມະການກົມການເມືອງສູນກາງພັກກອມມູນິດຈີນ, ລັດຖະມົນຕີກະຊວງການຕ່າງປະເທດຈີນ ຈະເດີນທາງໄປນະຄອນນິວຢອກຂອງອາເມຣິກາເພື່ອເປັນປະທານກອງປະຊຸມ. ໃນໄລຍະຢູ່ນະຄອນນິວຢອກ, ທ່ານ ຫວາງຢີ້ ຍັງຈະເຂົ້າຮ່ວມກອງປະຊຸມ “ໜ່ວຍງານເພື່ອນມິດໃນການບໍລິຫານໂລກ” ທີ່ຈະຈັດຂຶ້ນ ໃນວັນທີ 28 ພຶດສະພານີ້, ພ້ອມທັງ ຈະພົບປະກັບເລຂາທິການໃຫຍ່ ອົງການ ສະຫະປະຊາຊາດ ແລະ ລັດຖະມົນຕີຕ່າງປະເທດ ຂອງບັນດາປະເທດທີ່ກ່ຽວຂ້ອງ.ນອກຈາກນີ້, ທ່ານ ຫວາງຢີ້ ຈະໄປຢ້ຽມຢາມການາດາ ໃນລະຫວ່າງ ວັນທີ 28 ຫາ 30 ພຶດສະພານີ້ ຕາມຄຳເຊີນຂອງ ທ່ານ ນາງ ອານີຕາ ອານັນ ລັດຖະມົນຕີ ກະຊວງການຕ່າງປະເທດການາດາ./.
(ບັນນາທິການຂ່າວ: ຕ່າງປະເທດ) ຮຽບຮຽງ ຂ່າວໂດຍ: ສະໄຫວ ລາດປາກດີ
KPL
