ໃນປັດຈຸບັນ,  ​​ເຕັກ​ໂນ​​ໂລ​ຊີ ກໍາ​ລັງ​ຂະຫຍາຍຕົວ​ຢ່າງ​ກວ້າງຂວາງ ຮອບດ້ານ ບໍ່ວ່າ​ຈະ​ດ້ານ ເສດຖະກິດ​ສັງ​ຄົມ,  ສິລະ​ປະ, ວັດທະ​ນາ​ທໍາ ​ໂດຍ​ສະ​ເພາະ​ວົງ​ການ​ເພງ ການ​ນໍາ​ສະ​ເໜີບົດ​ເພງ  ຂອງ​ສິລະ​ປິນ ​ກໍ​ມີ​ຄວາມ​ຫລາກ​ຫລາຍ​ຂຶ້ນ  ບໍ່ແມ່ນ​ແຕ່ຊ່ອງ​ທາງ ​ຢູທູບ​ພຽງຢ່າງ​ດຽວ​ແລ້ວ ​ແຕ່​ປັດຈຸບັນ​ນີ້ ບີໄລ (Believe) ​ໄດ້​ເປີດ​ຊ່ອງ​ທາງ​ໃໝ່​​ ​ໃຫ້ສິລະ​ປິນທົ່ວ​​ໂລກ ທີ່​ຈະ​ນໍາ​ສະ​ເໜີ ບົດ​ເພງ​ຂອງ​ໂຕ​ເອງ ລົງ​ໃນ​ແອັບ​ ທີ່​ຫລາກ​ຫລາຍ ​ເຊັ່ນ: Spotify, JOOX ຫລື  Apple Music ​ແລະ​ ອື່ນໆ​ອີກ. 

ທ່ານ ຖະນາກອນ ທຳມະວັດວິມົນ ຫົວໜ້າຝ່າຍຈັດຈຳໜ່າຍ ປະຈຳປະເທດໄທ ຂອງບໍລິສັດ Believe ​ເວົ້າ​ສູ່​ຟັງ​ວ່າ:  ບໍລິສັດ Believe ມີສຳນັກງານໃຫຍ່ ຢູ່ທີ່ປະເທດຝຣັ່ງ ເປັນຕົວແທນຈຳໜ່າຍ ເພງແບບດີຈິຕອນ ທີ່ຊ່ວຍນຳເອົາເພງ ຂອງສິລະປິນ ໄປຈຳໜ່າຍຫລາກຫລາຍ ກວ່າ 200 ແຫ່ງ ເຊິ່ງ ລາຍໄດ້ ຈາກການກະຈາຍເພງ ລົງໃນບໍລິການ Streaming ຈະກັບມາສູ່ ຕົວສິລະປິນເອງ ​ເວົ້າ​ລວມ ​ເວົ້າ​ສະ​ເພາະໜ້າ ວຽກຫລັກ ຂອງ Believe ​ໃນ ສປປລາວ ແມ່ນການຂະຫຍາຍ ຕະຫລາດເພງລາວ ໃຫ້ໃຫຍ່ຂຶ້ນ ແລະ ໄປໄດ້ໄກເຖິງ ຕ່າງປະເທດ ແລະ ທາງ Believe ເຊື່ອວ່າເຮັດໄດ້ ແລະ ເປັນໄປໄດ້ ສິ່ງທີ່ ຢາກແນະນຳ ໃຫ້ກັບສິລະປິນລາວ ກໍຄື ໃຫ້ຫາຊ່ອງທາງທີ່ເໝາະສົມ ໃນການສື່ສານ ກັບແຟນເພງ ໃຫ້ຫລາຍຂຶ້ນ, ຫາຊ່ອງທາງທີ່ສິລະປິນ ສາມາດເອົາຜົນງານ ໄປນໍາ​ສະ​ເໜີ ໄດ້ໂດຍໃຫ້ຖືກກັບ ຖານແຟນເພງ ຂອງສິລະປິນ ແລະ ພະຍາຍາມ ໃຫ້ສິລະປິນ ເຂົ້າໃຈວ່າ ຕອນນີ້ມີເຄື່ອງມື ທີ່ທັນສະໄໝຫລາຍຢ່າງ ສາ ມາດຊ່ວຍໄດ້  ສິລະປິນລາວ ໃນ Believe ມີປະມານ 100 ແອັກເຄົາ (accounts) ແຕ່ຖ້າລວມສິລະປິນເກົ່າ ແລະ ຄ້າຍເພງເກົ່າໆ ທີ່ເລີ່ມຕິດຕໍ່ມາ ແລະ ກຳລັງລົມກັນ ມີປະມານ 200 accounts. ອີກ​ຢ່າງໜຶ່ງ ຢາກ​ໃຫ້​ສິລະ​ປິນລາວ ຜະ​ລິດ​ເພງ ມີຄວາມ​ເປັນ​ເອກະລັກ ໃຫ້ຫລາຍທີ່ສຸດ ບໍ່ຕ້ອງຄືໃຜ, ບໍ່ຕ້ອງ ຄື ສິລະປິນດັງ ຂອງຕ່າງປະເທດ ເຊັ່ນ: T-Pop, K-Pop ແຕ່​ໃຫ້ມີຄວາມເປັນລາວ, ນຳສະເໜີເອກະລັກລາວ ໃຫ້ຫລາຍທີ່ສຸດ ຫລື ເອີ້ນວ່າ L-Pop ທີ່ຄົນເຫັນແລ້ວສາມາດຮູ້ໄດ້ວ່ານີ້ຄືຄົນລາວ.

ປັດຈຸບັນີ້ທຸກຄົນສາມາດມີລາຍຮັບຈາກ Music Streaming, ຢາກໃຫ້ທຸກຄົນ ໄດ້ຮຽນຮູ້ກ່ຽວກັບ ການສ້າງລາຍຮັບຈາກເພງ, ນັກດົນຕີສາມາດເປັນອາຊີບ ທີ່ສາມາດລ້ຽງຄອບຄົວໄດ້ Believe ເຊື່ອ ແລະ ຫວັງວ່າວົງການດົນຕີລາວ ຈະໄປໄດ້ໄກ ແລະ ໄປໄດ້ດີ ຊຶ່ງທາງ Believe ເອງກໍຢາກເຫັນ ຄວາມສຳເລັດ ໃນວົງການດົນຕີລາວເຊັ່ນກັນ./.

   ໂດຍ: ລູກສາວຫລ້າ

ເນື້ອໃນ: ຂປລ