ຂປລ. ຕາມ​ການ​ລາຍ​ງານ​ຈາກ ທ່ານ ດຣ ນາງ ບົວຜັນ ຄຳພາພົງຜ່ານ ຮອງຫົວໜ້າສູນວິເຄາະລະບາດວິທະຍາ, ກະຊວງສາທາລະນະສຸກ ໃນວັນທີ 2 ພະຈິກ 2021 ນີ້​ວ່າ: ສະພາບ​ການລະບາດ ​ຂອງ​ເຊື້ອ​ພະຍາດ​ໂຄ​ວິດ-19 ຢູ່ປະ​ເທດ​ເຮົາ​ຍັງ​ໜ້າ​ເປັນ​ຫ່ວງ ມື້​ດຽວ​ກວດ​ພົບ​ ກໍລະນີ​ຕິດ​ເຊື້ອ 873 ຄົນ, ​ໃນ​ນີ້ ຕິດ​ເຊື້ອນຳເຂົ້າມີ 2 ຄົນ ແລະ ຕິດເຊື້ອ ພາຍໃນປະເທດ 871 ຄົນ ​ແລະ ​ເສຍ​ຊີວິດ​ໃໝ່ 3 ຄົນ.

ກໍລະນີຕິດເຊື້ອພາຍໃນ 871 ຄົນ ນັ້ນ, ​ຢູ່ນະຄອນຫລວງວຽງ​ຈັນ 427 ຄົນ, ເຊິ່ງກວດພົບຜູ້ຕິດເຊື້ອ 144 ບ້ານ, ໃນ 7 ເມືອງ; ແຂວງຫລວງພະບາງ 58 ຄົນ ໃນ 15 ບ້ານ, 4 ເມືອງ; ບໍ່ແກ້ວ 40 ຄົນ ໃນ 11 ບ້ານ, 2 ເມືອງ; ແຂວງວຽງຈັນ 105 ຄົນ ໃນ 21 ບ້ານ, 5 ເມືອງ; ອຸດົມໄຊ 16 ຄົນ ໃນ 6 ບ້ານ, 1 ເມືອງ; ບໍລິຄໍາໄຊ 12 ຄົນ ໃນ 4 ບ້ານ, 1 ເມືອງ; ໄຊສົມບູນ 4 ຄົນ ໃນ 1 ບ້ານ, 1 ເມືອງ; ຄໍາມ່ວນ 15 ຄົນ ໃນ2 ບ້ານ, 1 ເມືອງ; ສາລະວັນ 3 ຄົນ ໃນ 3 ບ້ານ, 2 ເມືອງ; ສະຫວັນນະເຂດ 6 ຄົນ ໃນ 5 ບ້ານ, 3 ເມືອງ; ຈໍາປາສັກ 5 ຄົນ ໃນ 2 ບ້ານ, 2 ເມືອງ; ເຊກອງ 7 ຄົນໃນ 5 ບ້ານ, 2 ເມືອງ; ຫລວງນ້ຳທາ 172 ຄົນ ໃນ 35 ບ້ານ, 4 ເມືອງ ແລະ ແຂວງຊຽງຂວາງ 1 ຄົນ.

ຕົວເລກຜູ້ຕິດເຊື້ອສະສົມໃນ ສປປ ລາວ ຮອດປັດຈຸບັນ  41.829 ຄົນ, ເສຍຊີວິດສະສົມ 70 ຄົນ, ສາມາດປິ່ນປົວຫາຍດີ ກັບບ້ານ​ໃນ​ມື້ວານນີ້ 572 ຄົນ ແລະ ຍັງສືບຕໍ່ປິ່ນປົວ 7.695 ຄົນ, ທົ່ວປະເທດ ມີສູນຈຳກັດບໍລິເວນ ທີ່ຍັງເປີດຢູ່ 86 ສູນ ແລະ 55 ໂຮງແຮມ ມີຜູ້ຈຳກັດບໍລິເວນ 5.115 ຄົນ (ສູນ 3.238 ຄົນ ແລະ ໂຮງແຮມ 1.877 ຄົນ), ທຸກຄົນທີ່ເຂົ້າມາສູນ ດັ່ງກ່າວແມ່ນ ໄດ້ເກັບຕົວຢ່າງ ມາກວດວິເຄາະຫາເຊື້ອ ພະຍາດ ​ໂຄ​ວິດ-19.

ສຳລັບຜູ້ເສຍຊີວິດນັ້ນ, ຜູ້ທີ 1: ເພດຊາຍ, ອາຍຸ 23 ປີ, ສັນຊາດ ລາວ, ບ້ານໂນນແຕ້ ເມືອງໄຊທານີ ນະຄອນຫລວງວຽງຈັນ, ຢູ່ສະຖານທີ່ຄຸມຂັງຊົ່ວຄາວ ເມືອງໄຊເສດຖາ, ມາຮອດວັນທີ 29 ຕຸລາ 2021 ຜູ້ກ່ຽວມີອາການລ່ອຍ, ຈ່ອຍຜ່ອມ ແລະ ຈືດມ້ານ ໄດ້ເກັບຕົວຢ່າງ ແລະ ຜົນກວດພົບເຊື້ອ ພະຍາດໂຄວິດ-19, ໄດ້ຮັບການປິ່ນປົ່ວ ນັບແຕ່ວັນທີ 29 ຕຸລາ-1 ພະຈິກ 2021 ເປັນເວລາ 4 ມື້, ຈົນມາຮອດວັນທີ 1 ພະຈິກ 2021 ເວລາ 16:00 ໂມງ ຜູ້ກ່ຽວໄດ້ເສຍຊີວິດ; ຜູ້ທີ 2: ເພດຊາຍ, ອາຍຸ 73 ປີ, ບ້ານພູຄຳ ເມືອງກາສີ ແຂວງວຽງຈັນ, ມີພະຍາດປະຈໍາຕົວເບົາຫວານ, ຄວາມດັນເລືອດສູງ (ເຄີຍເສັ້ນເລືອດ ໃນສະໝອງແຕກ ຫາກໍ່ພັກຟຶ້ນ ແລະ ເລີ່ມຊ່ວຍເຫລືອຕົນເອງໄດ້ 3 ເດືອນ) ຜ່ານມາບໍ່ໄດ້ຮັບການ ສັກວັກຊິນກັນ ໂຄວິດ-19. ໃນວັນທີ 1 ພະຈິກ 2021 ຜູ້ກ່ຽວມາໂຮງໝໍເມືອງກາສີ ດ້ວຍອາການອິດເມື່ອຍ, ແຂນຂາອ່ອນແຮງ ເປັນໄດ້ 3 ມື້ ແລະ ໄອເລັກນ້ອຍ ຈຶ່ງໄດ້ກວດຊອກ ຫາເຊື້ອ ແລະ ຜົນກວດພົບເຊື້ອ ໂຄວິດ-19, ​ເວລາ 21:00 ໂມງ ຄົນເຈັບມີອາການຊ໋ອກ, ແພດໝໍໄດ້ພະຍາຍາມ ຊ່ວຍເຫລືອຄົນເຈັບ ແລະ ນຳສົ່ງໄປຍັງ ສູນໂຄວິດໂພນໂຮງ, ໄລຍະເຄື່ອນຍ້າຍ ຄົນເຈັບຂື້ນລົດ ໄດ້ເຊີດຊູອີກ 1 ຄັ້ງ ໃນລົດ, ແຕ່ເວລາ 23:45 ໂມງ ມາຮອດສູນໂຄວິດໂພນໂຮງ ຄົນເຈັບໄດ້ເສຍຊີວິດລົງ ​ແລະ ຜູ້ທີ 3 ເພດຊາຍ, ອາຍຸ 82 ປີ, ອາຊີບ: ປະຊາຊົນ ບ້ານດົງປ່າແຫລບ ເມືອງຈັນທະບູລີ ນະຄອນຫລວງວຽງຈັນ, ວັນທີ 2 ພະຈິກ 2021 ຜູ້ກ່ຽວເຂົ້າມາກວດ ຢູ່ໂຮງໝໍມິດຕະພາບ ດ້ວຍອາການບໍ່ໄດ້ສະຕິ ພ້ອມທັງ ເກັບຕົວຢ່າງ ມາກວດພະຍາດ ໂຄວິດ-19 ແລະ ໃຫ້ຜົນບວກ ແລະ ເວລາ 1:30 ໂມງເຊົ້າ ຂອງວັນທີ 02 ພະຈິກ 2021 ຜູ້ກ່ຽວໄດ້ເສຍຊີວິດ (ຜູ້ກ່ຽວເສຍຊີວິດ ກ່ອນມາໂຮງໝໍ).

ຂ່າວ: ສຸກສະຫວັດ ສົມສະໜິດ

ເນື້ອໃນ: ຂປລ