ຂປລ. ໃນໂອກາດເຂົ້າຮ່ວມ ກອງປະຊຸມໃຫຍ່ຜູ້ແທນຊາວໜຸ່ມທົ່ວ ຄັ້ງທີ VIII ວັນ​ທີ 24 ທັນວາ 2020 ນີ້,  ສະຫາຍ ນາງ ອໍລະໄທ ສັນຕິຄົງຄາ  ຮອງປະທານສະມາຄົມ ນັກທຸລະກິດໜຸ່ມແຫ່ງຊາດ ໄດ້ໃຫ້ສຳພາດຕໍ່ນັກຂ່າວສຳນັກຂ່າວສານປະເທດລາວວ່າ: ​ໃນ​ໄລຍະ​ຜ່ານ​ມາ, ສະມາຄົມນັກທຸລະກິດ ໜຸ່ມແຫ່ງຊາດ ໄດ້ປະກອບສ່ວນຫລາຍດ້ານ​ເຂົ້າ​ໃນ​ວຽກ​ງານ​ຊາວ​ໜຸ່ມ ເປັນຕົ້ນ ເຂົ້າຮ່ວມຂະບວນການ ຂອງສູນກາງຊາວໜຸ່ມ, ການລົງຮາກຖານຕ່າງໆ, ການເຂົ້າຮ່ວມທຸກໆ ກອງປະຊຸມທີ່ປິ່ນອ້ອມ ຂອງສູນກາງຊາວໜຸ່ມ.

       
ນອກຈາກ​ນີ້ ສະມາຄົມນັກທຸລະກິດ ໜຸ່ມແຫ່ງຊາດ ຍັງມີສ່ວນຮ່ວມໃນການລົງ ຊ່ວຍເຫລືອບັນດາແຂວງ ທີ່ໄດ້ຮັບຜົນກະທົບ ຈາກໄພພິບັດທາງທຳມະຊາດ ແລະ ຊ່ວຍເຫລືອຜູ້ດ້ອຍໂອກາດ, ພ້ອມ​ທັງ​ມີ​ສ່ວນ​ຮ່ວມ ​ໃນຫລາຍກິດຈະກໍາ ​ເປັນ​ຕົ້ນ ສິລະປະກິລາ, ການປົກປັກຮັກສາສິ່ງແວດລ້ອມ, ກິດຈະກໍາຕ່າງໆ ເພື່ອຕ້ອນຮັບວັນ ປະຫວັດສາດທີ່ສໍາຄັນຂອງຊາດ ​ໂດຍ​ສະ​ເພາະ ​ແມ່ນ​ໃນ​ໂອກາດ ວັນສະຖາປະນາ ສປປ ລາວ ຄົຍ​ຮອບ 45 ປີ ​ແລະ ວັນ​ສຳຄັນ​ອື່ນໆ, ໄດ້ລະດົມທຶນຊ່ວຍເຫລືອ ໃນທຸກໆເຫດການ​ເຊັ່ນ: ອຸທົກກະໄພ, ນໍ້າຖ້ວມ ແລະ ອື່ນໆ ເປັນວັດຖຸ ປັດໃຈ ແລະ ງົບປະມານເງິນສົດລວມ ມູນຄ່າຫລາຍຕື້ກີບ.

     
ສະຫາຍ ນາງ ອໍລະໄທ ສັນຕິຄົງຄາ ຍັງ​ໃຫ້​ຮູ້​ອີກ​ວ່າ: ໃນນາມເປັນຜູ້ແທນ ຂອງສະມາຄົມນັກທຸລະກິດ ໜຸ່ມ ຮູ້ສຶກເປັນກຽດຢ່າງສູງ ທີ່ໄດ້ຮັບຄັດເລືອກເຂົ້າຮ່ວມ ກອງປະຊຸມໃຫຍ່ຜູ້ແທນ ຊາວໜຸ່ມທົ່ວປະເທດໃນຄັ້ງນີ້ ​ແລະ ຖືວ່າເປັນນິມິດໝາຍອັນດີ ທີ່ນັກທຸລະກິດໜຸ່ມພວກເຮົາ ໄດ້ຮັບການເຊື່ອມຊຶມ ນະໂຍບາຍຂອງພັກເຮົາ, ປຸກລະດົມໃຫ້ນັກທຸລະກິດໜຸ່ມ ຂອງພວກເຮົາມີນ້ຳໃຈຮັກຊາດ, ມີຄວາມສາມັກຄີ  ຮູ້ຈັກນະໂຍບາຍຂອງພັກ-ລັດ ເພື່ອເສີມຂະຫຍາຍສືບຕໍ່ນຳພາ ວຽກງານຊາວໜຸ່ມ ໃຫ້ມີຄວາມເຂັ້ມແຂງ. 

ຂ່າວ: ສົມຫວັງ

ພາບ: ຂັນໄຊ

ເນື້ອໃນ: ຂປລ