ຂປລ. ໂຮງຮຽນນາໆຊາດ ຮີດຟິວ ວຽງຈັນ ​ເປັນ​ໂຮງຮຽນທຳ​ອິດ​ໃນ​ ສປປ ລາວ ກຽມ​ໃຊ້​ຫລັກ ສູດການ​ຮຽນ-ການ​ສອນ ອ໊ອກຟ໊ອດ (Oxford) ​ໃນ​ສົກຮຽນປີ 2020-2021, ​ເຊິ່ງ​ໂຮງຮຽນດັ່ງກ່າວໄດ້ຮັບຄັດເລືອກ ຈາກມະຫາວິທະຍາໄລອ໊ອກຟ໊ອດ (Oxford) ໂດຍອ໊ອກຟ໊ອດ ເອດູເຄຊັ້ນ (Oxford Education) ​ໃນ​ການນໍາໃຊ້ຫລັກສູດສາກົນ ເຂົ້າ​ໃນ​ການ​ຮຽນ-ການສອນ.

ທ່ານ Micheal Anderson ຜູ້ອຳນວຍການໃຫຍ່ໂຮງຮຽນນາໆຊາດ ຮີດຟິວ ວຽງຈັນ, ​ໄດ້​ແຈ້ງ​ໃຫ້​ຮູ້​ເມື່ອ​ບໍ່​ດົນ​ມາ​ນີ້​ວ່າ: ການ​ນຳ​ໃຊ້ຫລັກສູ​ດດັ່ງກ່າວ, ຈະ​ເຮັດ​ໃຫ້ຄຸນ​ນະພາ​ບ​ ໃນ​ການ​ຮຽນ-ການ​ສອນ​ດີ​ຂຶ້ນ ແມ່ນແນໃສ່ຄວາມເປັນເລີດ ທາງການສຶກສາ, ​ເຊິ່ງຫລັກສູດ​ດັ່ງກ່າວ ໄດ້ພັດທະນາຂຶ້ນ ໃຫ້ແທດເໝາະ ກັບຍຸກສະຕະວັດທີ 21 ຍຸກໂລກາພິວັດ ທີ່ໂລກມີແຕ່ຄວາມຜັນຜວນ ແລະ ປ່ຽນແປງຢູ່ຕະຫລອດເວລາ​ເຊິ່ງຈະນໍາພານັກຮຽນ​ໃນຍຸກໃໝ່ ໄດ້ຮັບການພັດທະນາແບບອົງລວມ ແລະ ຮອບດ້ານ ລວມໄປເຖິງທັກສະການໃຊ້ຊີວິດ ​ແລະ ອື່ນໆ.

ເພື່ອ​ຮອງ​ຮັບ​ການ​ເພີ່ມ​ຂຶ້ນຂອງ​ນັກຮຽນ ​ໃນ​ສົກຮຽນ 2020-2021 ​ໂຮງຮຽນນາໆຊາດ ຮີດຟິວ ວຽງຈັນ ​ໄດ້ນຳ​ໃຊ້ອາຄານຮຽນຫລັງໃໝ່, ເດີ່ນເທັນນິສ, ເດີ່ນບານເຕະ, ສະລອຍນໍ້າ, ເດີ່ນກິລາໃນຫົ່ມ ​​ເພື່ອ​ສ້າງ​ ຄວາ​ມສະດວກ​ສະບາຍ ພັດທະນາສັກກະຍະພາບນັກຮຽນ ທາງດ້ານສຸຂະພາບ ແລະ ກິລາ.

ເນື້ອໃນ: ຂປລ