ຂປລ. ໃນວັນທີ 12 ກັນຍາ 2019 ຄະນະ​ໂຄສະນາ​ອົບຮົມ​ສູນ​ກາງ​ພັກ (ຄອສພ)​ເຜີຍແຜ່ມະຕິ ກອງປະຊຸມຄົບຄະນະ ບໍລິຫານງານສູນກາງພັກຄັ້ງທີ 8 ສະໄໝທີ X ເພື່ອໃຫ້ເຂົ້າສູ່ລົງເລິກ ໃນຊີວິດຕົວຈິງ ໃຫ້ກຽດປາຖະກະຖາ ໂດຍ ທ່ານ ກິ​ແກ້ວ ​ໄຂ​ຄຳ​ພິທູນ ຫົວໜ້າຄະນະ​ໂຄສະນາ​ອົບຮົມ​ສູນ​ກາງ​ພັກ, ມີບັນດາຄະນະພັກ, ຄະນະນຳ, ສະມາຊິກພັກ, ພະນັກງານ-ລັດຖະກອນ ພາຍ​ໃນ ຄອສພ ເຂົ້າ ຮ່ວມ.

​ ​ກອງປະຊຸມໃນຄັ້ງນີ້, ໄດ້ຮັບຟັງບົດລາຍງານ ແລະ ຄົ້ນຄວ້າ, ປຶກສາຫາລືເນື້ອໃນສຳຄັນ ໃນ ບາງຂົງເຂດວຽກງານ ໂດຍສະເພາະ ການແກ້ໄຂຄວາມຫຍຸງຍາກ ທາງດ້ານເສດຖະກິດ ມະຫາພາກ ຕິດ ພັນກັບການຜັນຂະຫຍາຍ ມະຕິກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູນກາງພັກ ສະ ໄໝ ທີ X ​ໂດຍເນັ້ນໜັກໃຫ້ເຫັນບັນຫາ ແລະ ບັນດາສາເຫດຕົ້ນຕໍ ຂອງສະພາບຄວາມຫຍຸ້ງຍາກ ທາງດ້ານເສດຖະກິດ-ການເງິນ ທີ່ປະເທດເຮົາພວມປະເຊີນຢູ່ໃນປັດຈຸບັນ​​ ເປັນ​ຕົ້ນ​ແມ່ນ ໃນການຄຸ້ມຄອງ ລາຍຮັບ-ລາຍຈ່າຍ, ການຈັດເກັບລາຍຮັບເຂົ້າງົບປະມານ ແຫ່ງລັດບໍ່ບັນລຸຕາມຄາດໝາຍ, ບັນຫາໜີ້ສິນຄຸມເຄືອ,  ລວມທັງທິດທາງ ແລະ ມາດຕະການຈຸດສຸມ ໃນການແກ້ໄຂສະເພາະໃນຕໍ່ໜ້າ ​ແລະ ອື່ນໆ ພ້ອມນີ້, ທ່ານ ກິ​ແກ້ວ ​ໄຂ​ຄຳ​ພິທູນ ຍັງຍົກໃຫ້ເຫັນເຖິງ ການພັດທະນາຊົນນະບົດ ແລະ ແກ້ໄຂຄວາມ ທຸກຍາກຂອງປະຊາຊົນ ປັດຈຸບັນ ເຫັນວ່າພື້ນຖານເສດຖະກິດ-ສັງຄົມ ແລະ ຊີວິດການເປັນຢູ່ໄດ້ຮັບ ການພັດທະນາຢ່າງບໍ່ຢຸດຢັ້ງ ​ເປັນ​ຕົ້ນ​ແມ່ນໂຄງລ່າງ ພື້ນຖານດ້ານຄົມມະນາຄົມ ໄດ້ຮັບການພັດທະນາ ຮອດເຂດຫ່າງໄກສອກຫລີກ, ລະບົບສາທາລະນຸປະໂພກ, ການບໍລິການໄດ້ຮັບ ການຍົກລະດັບເປັນ ກ້າວໆ ​ແລະ ​ອື່ນໆ.

      ​ໃນ​ໂອກາດ​ດຽວກັນ​ນີ້, ຜູ້​ເຂົ້າ​ຮ່ວມ​ໄດ້​ຮັບ​ຟັງ ມະຕິ​ຂອງ​ກົມ​ການ​ເມືອງ ​ເລກທີ 072/ກມສພ, ລົງ​ວັນ​ທີ 14/05/2019 ຈາກ ທ່ານ ສີ​ປະ​ເສີດ ​ແສນ​ສະຫວັດ ຄະນະ​ພັກ, ຮອງ​ຫົວໜ້າ ຄອສພ  ​ແລະ ຂໍ້​ກຳນົດ​ເລກທີ 01/ຄລສພ, ລົງ​ວັນ​ທີ 15/05/2019 ​ແລະ ຄຳ​ສັງ​ເລກທີ 03/ຄລສພ, ລົງ​ວັນ​ທີ 15/05/2019 ຈາກ ທ່ານ ອາ​ນົງ​ສັກ ອິນ​ທະ​ວົງ ຄະນະ​ພັກ ຫົວໜ້າກົມ​ຈັດ​ຕັ້ງ​ພະນັກງານ ອີກ​ດ້ວຍ.

ເນື້ອໃນ: ຂປລ