* ບາງຄົນບໍ່ຮັກໄມ້         ບໍ່ຮັກສັດສາ ທ່ານເອີຍ
ຊັງປ່າດົງແດນຮົກ           ເຄັ່ງຂຶມຂວາງຄຶ້ມ
ເປັນອຶມຄຶມເງົາເງື້ອມ       ຄືຜີເສືອຊິຢູ່
ງູພິດພຶງເຫົ່າຫ້ອມ           ກະບາພ້ອມພວກຢູ່ໃນ ບໍ່ຮູ້

* ເຫັນແລ້ວໃຈຢາກປ້ຳ     ຢາກຕັດອອກມັນແປນ
ແຫງນຫາກຍັງຊິເຫັນຄັກ  ເບິ່ງຫຍັງຊິໃສ່ແຈ້ງ
ເຫັນຕາເວັນເຫັນຟ້າ        ນະພາສີໃສສ່ອງ
ມອງທີ່ໃດກໍໃຫຍ່ກວ້າງ      ໄກໃກ້ກໍ່ບໍ່ຄາ

* ນີ້ແຫລະນາ ເພິ່ນເວົ້າ    ສຳນຶກເກົ່າສະຕິເບົາ
ເອົາແຕ່ຕາມທຳລາຍ        ແຕ່ບໍ່ເຫັນຜົນຮ້າຍ
ຂາດຂອດໄຂຂະຫຍາຍເບື້ອງ ເຍືອງເຖິງຖະແຫລ່ງຂ່າວ
ຂາດຄົນໄປປ່າວເອີ້ນ        ເຊີນຟັງຜົນເຫດແຫ້ງ
                                 ໄພແລ້ງລວກແຜ່ນດິນ ຫັ້ນນາ

* ນີຄືຈຸດບອດກັ້ງ           ບັງຢູ່ກາງສະໝອງ

ບໍ່ສ່ອງໃສ ຫາກມືນຕາ      ເກີດມີພ່ຳພ້ອມ
ພໍ່ກໍ່ ພາກະທຳຮ້າຍ          ສາຍດົງແດນປ່າ
ແມ່ກໍ່ ມາໄບ່ເບື້ອງ          ເຄື່ອງຂ້ອງຮົກແຕ່ດົງ(ບາງຄົນເດີ)

* ໂຮງຮຽນບໍ່ສັ່ງຊີ້           ສະແດງເຫດສະແດງຜົນ
ຄົນຜູ້ ເປັນຄູສອນ          ກໍບໍ່ຈາຈິງແຈ້ງ
ບໍ່ສະແດງນຳໜ້າ            ພາສິດຖະໜອມປ່າ
ປູກຈຳປາແຕ່ລະຕົ້ນ        ຫລາຍຄົນເຮັດຊະເມີ້ຍເກີ້ຍ
                                 ເສີຍລ້ຽວຫລີກຂະບວນ ຊັ້ນໃດ
* ຂໍຊົມເຊີຍ
ບາງຜູ້ເຖົ້າ                   ບາງທ່ານຖະໜອມສ່ວນ
ປູ່ປູກມວນຕາວຕານ      ໄຜ່ຜູກະສັງມີ້
ປູກມ່ວງນົມນາວກ້ຽງ      ກຽງຂາມຂະໜຸນຂຽບ
ພ້າວພຸ່ມທັງໝາກຄ້ຽວ    ກະທັນຫວ້າເວີຍົມ

* ສົມທີ່ຄວນຍົກຍ້ອງ      ຍໍຍື່ນນຳສະເໜີ
ແຕ່ທີ່ຍັງຄາຂັດ             ຄັບຢູ່ໃນມະໂນນັ້ນ
ປູ່ຄິດຕັນໃນສັ້ນ            ຝັນເຫັນແຕ່ສວນປູ້ ເອງນາ
ສ່ວນສວນລວມປ່າໄມ້     ໃນດ່ານດົງປະເທດກວ້າງ
ລາວບໍ່ຫວງຮັກໄວ້          ຄືໄມ້ຢູ່ສວນ ດອກໃດ

ເນື້ອໃນ: ຂປລ