ຂປລ.ປັດຈຸບັນ ໜ່ວຍງານຮັບ-ເບີກຈ່າຍເຄື່ອງບໍລິຈາກ  ໄດ້ສືບຕໍ່​ແຈກ​ຢາຍ​ເຄື່ອງ​ຊ່ວຍ​ເຫລືອ ໃຫ້  ແກ່ພໍ່ແມ່ປະຊາຊົນຜູ້ປະສົບໄພນໍ້າຖ້ວມ ​ເຫດການ​ເຂື່ອນ​ເຊ​ປຽນ-​ເຊ​ນ້ຳ​ນ້ອຍ  ຢູ່ເມືອງສະໜາມ ໄຊ  ແຂວງ ອັດຕະປື ຢູ່ໃນແຕ່ລະຈຸດ ຕາມສູນພັກຊົ່ວຄາວທຸກ​ແຫ່ງ  ເພື່ອແກ້ໄຂບັນເທົາທຸກ ແລະ ຊ່ວຍເຫລືອໃຫ້ທັນເວລາ.  ແຕ່ເຖິງຢ່າງໃດກໍ​ຕາມ ໃນສະພາບຄວາມເປັນຈິງ  ປະຊາຊົນຍັງຕ້ອງການ ອາຫານ ແລະ ເຄື່ອງໃຊ້  ຄົວເຮືອນຕ່າງໆ ຈຳນວນຫລາຍຢ່າງ.

ທ່ານ ນາງ ທອງພິນ ຄຸນຕາມີ ຮອງຫວໜ້າຄະນະຈັດຕັ້ງ  ເມືອງສະໜາມໄຊ,  ຄະນະຊີ້ນຳຮັບ ແລະ ເບີກຈ່າຍ ເຄື່ອງບໍລິຈາກ ໄດ້ລາຍງານໃນວັນທີ 9 ສິງຫາ 2018   ທີ່ຫ້ອງວ່າການປົກ ຄອງເມືອງ ສະໜາມໄຊວ່າ:  ​ໃນ​ໄລຍະ​ຜ່ານ​ມາ ພາຍຫລັງ ໄດ້ຮັບເຄື່ອງຈາກຫ້ອງວ່າການປົກຄອງ  ແຂວງອັດຕະປື ແລະ ຈາກພາກສ່ວນຕ່າງໆ,  ລວມທັງຜູ້ມີໃຈບຸນມາບໍລິຈາກກັບທີ່​ແລ້ວ,  ທາງໜ່ວຍງານ​ພາກ​ສະ ໜາມ ​ໄດ້​ມີການແຈກຢາຍ​ປະເພດເຄື່ອງນອນ  ​ແລະ ເຄື່ອງນຸ່ງຫົ່ມ ໃຫ້​ປະຊາຊົນ​ຕາມ​ຈຸດ​ພັກ​ຊົ່ວຄາວ  ​ເຊິ່ງໃນເບື້ອງຕົ້ນແມ່ນມີທັງໝົດ 8 ຈຸດ,  ແຕ່ລະຈຸດປະກອບມີ 20-30 ຄອບຄົວ.  ​ແຕ່​ມາຮອດ ປັດຈຸບັນ​ແມ່ນໄດ້ແຍກອອກເປັນສູນ  ແລະ ໄດ້ມີການແຈກຢາຍ​ເຄື່ອງ​ຊ່ວຍ ໃຫ້ແຕ່ລະຄອບຄົວ​ໂດຍ​ກົງ ​ເພື່ອ​ໃຫ້​ເຄື່ອງ​ບັນ​ເທົາ​ທຸກ​ເຖິງ​ຄອບຄົວ​ ຜູ້​ປະສົບ​ໄພ​ທີ່​ແທ້​ຈິງ ແຕ່ບາງເທື່ອຄອບຄົວໃຫຍ່ ມີຈຳນວນ ຄົນຫລາຍ​ເຫັນ​ວ່າບໍ່ພຽງພໍ.

ທ່ານ ນາງ ທອງພິນ ຄຸນຕາມີ ກ່າວຕື່ມວ່າ:  ການແຈກຢາຍເຄື່ອງບໍລິຈາກຜ່ານ​ມາ  ສະເພາະຢູ່ ເຂດເທດສະບານ  ແມ່ນນຳໃຊ້ລົດເປັນພາຫະນະຂົນສົ່ງ ແລະ ອີກສອງຈຸດຄື:  ບ້ານປິ່ນດົງ ແລະ ບ້ານຕະມໍຢອດ  ແມ່ນໃຊ້ເຮືອບິນກອງທັບອາກາດໄປແຈກຢາຍມື້ລະ 3-4 ຖ້ຽວ.  ຢ່າງ​ໃດ​ກໍ​ຕາມມາ​ຮອດ​ປັດຈຸບັນ  ​ເຫັນ​ວ່າປະຊາຊົນຍັງ​ມີຄວາມຕ້ອງການ ເຄື່ອງໃຊ້ສອຍຕືມອີກ​ຫລາຍ​ຢ່າງ ​ເຊັ່ນ:  ເຂົ້າ ສານ, ເຄື່ອງແຕ່ງຢູ່ ຄົວກິນ, ເຕົາດັງໄຟ, ຖ່ານດັງໄຟ, ຄຽງ 3 ຂາ,  ຖັງ ຫລື ໂອ່ງໃສ່ນໍ້າ, ເຄື່ອງທຳຄວາມສະອາດ ແລະ ອື່ນໆ.  ສຳລັບການລຳລຽງເຄື່ອງ ໄປຊ່ວຍເຫລືອບັນເທົາທຸກ  ໃຫ້ປະ ຊາຊົນຜູ້ປະສົບໄພນໍ້າຖ້ວມ ​ໃນ​ໄລຍະ​ຜ່ານ​ມາ ​ເຫັນ​ວ່າພົບຄວາມ ຫຍຸ້ງຍາກຫລາຍ ດ້ານ ເພາະວ່າ ຖະ ໜົນ ຫົນທາງຂາດ, ດິນຟ້າອາກາດບໍ່ອຳ ນວຍໃຫ້ແກ່ການຂົນສົ່ງທາງອາກາດ. ແຕ່ເຖິງຢ່າງໃດກໍຕາມ ທາງຄະນະນຳ ແລະ ຄະນະຮັບຜິດຊອບ  ກໍໄດ້ເອົາໃຈໃສ່ຢ່າງຕັ້ງ ໜ້າຊອກ ຫາທຸກວິທີທາງ  ເພື່ອໃຫ້ພໍ່ ແມ່ປະຊາຊົນຜູ້ປະສົບໄພໃນແຕ່ລະຈຸດ  ໄດ້ຮັບ ການຊ່ວຍເຫລືອຢ່າງ​ທົ່ວ​ເຖິງ.

ເນື້ອໃນ: ຂປລ