ຂປລ. ​ ຂະແໜງສາທາລະນະສຸກ ເມືອງຜາອຸດົມ ແຂວງບໍ່ແກ້ວ ເປີດຂະບວນການ ລົງເຄື່ອນໄຫວສັກຢາ-ຢອດຢາວັກຊິນ ປ້ອງກັນພະຍາດລະບາດ ຕາມລະດູການໃຫ້ ກຸ່ມເປົ້າເກນອາຍຸ 15-45 ປີ ແມ່ຍິງຖືພາ ແລະ ເດັກນ້ອຍອາຍຸລຸ່ມ 5 ປີຮອບທີ່ 8 ສົກປີ 2017 ພ້ອມ​ກັນ​ນັ້ນ​ກໍ​ເພື່ອສະກັດກັ້ນ ການແຜ່ລະບາດ ຂອງພະຍາດໂປລີໂອ ແລະ ພະຍາດໝາກແດງນ້ອຍ-ໝາກ ແດງໃຫ່ຍ​ໃນທົ່ວເມືອງ. ຂະບວນ ການສັກຢາດັ່ງກ່າວ ໄດ້ແບ່ງອອກເປັນ 15 ເຂດບໍລິການ, ມີ 111 ຈຸດສັກຢາ, ມີທີມງານແພດລົງເຄື່ອນໄຫວ ສັກຢາໃຫ້ປະຊາຊົນ ບັນດາເຜົ່າ ຢູ່ຕາມຮາກ ຖານບ້ານຈຳນວນ 24 ທີມ.

ພິທີ​ດັ່ງກ່າວ​ ໄດ້​ຈັດ​ຂຶ້ນໃນ ວັນທີ 16 ມັງກອນນີ້, ​ໂດຍ​ມີທ່ານ ພົງສະຫວັນ ປັນຍາສັກ ຮອງເຈົ້າເມືອງຜາອຸດົມ, ມີບັນດາຫົວໜ້າຫ້ອງການ ສາທາລະນະສຸກເມືອງ, ຄະກຳມະການ ສົ່ງເສີມສຸຂະພາບແມ່ ແລະ ເດັກຂັ້ນເມືອງ, ພ້ອມ​ດ້ວຍ​ອຳນາດການປົກຄອງບ້ານ, ພໍ່ແມ່ປະຊາຊົນ ເຂົ້າຮ່ວມ.